Matatapos Pa ba an Kakablas?

“KITAA an mga luha hito nga gintatalumpigos, ngan hira waray maglilipay; ngan ha dapig han ira mga magtatalumpigos nakada an gahum; kondi waray ha ira maglilipay,” siring han makinaadmananon nga hi Hadi Salomon han kadaan nga Israel. (Eklesiastes 4:1) Waray ruhaduha nga mga kablas liwat an damu han mga tinalumpigos nga nahunahuna ni Salomon.

An kakablas diri masusukol pinaagi la han kwarta. Sumala ha impormasyon nga iginhatag han World Bank han Hunyo 2002, “ginbanabana nga han 1998 1.2 bilyon ka tawo ha bug-os nga kalibotan an may-ada ubos pa ha $1 nga ginagasto ha usa ka adlaw . . . ngan 2.8 bilyon an nabubuhi ha ubos pa ha $2 ha usa ka adlaw.” Naobserbahan nga bisan kon ito nga mga numero mas ubos kay ha nahiuna nga mga pagbanabana, “nagpapabilin pa gihapon ito nga hitaas hinduro may kalabotan ha pag-antos han tawo tungod han kakablas.”

Matatapos pa ba an kakablas? Hi Jesu-Kristo nagsiring ha iya mga disipulo: “An mga kablas upod niyo pirme.” (Juan 12:8, NW) Kondi nangangahulogan ba ini nga an kakablas ngan an makuri nga mga resulta hito magpapadayon ha kadayonan? Diri, kay bisan kon hi Jesus waray magsaad ha iya mga sumurunod nga magigin bahandianon hira ngatanan, diri iginpapasabot han iya mga pulong nga waray na paglaom an mga kablas.

Bisan pa han mga pangalimbasog han tawo ngan han kamatuoran nga agsob nga napapakyas an mga saad nga tatapuson an kakablas, an Pulong han Dios, an Biblia, nagpapasarig ha aton nga diri na mag-iiha mawawaray na kablas nga mga tawo. Ha pagkamatuod, iginpahayag ni Jesus “an maopay nga sumat ha mga kablas.” (Lukas 4:18, NW) Kaupod hinin maopay nga sumat an saad nga pagwawad-on an kakablas. Mahitatabo ini kon ipahamutang na han Ginhadian han Dios an matadong nga mga kahimtang ha tuna.

Iba na gud an kahimtang han kalibotan hiton nga panahon! An langitnon nga Hadi nga hi Jesu-Kristo ‘malolooy ha mga kablasanon ngan makinurion, ngan an mga kalag han mga makinurion iya pagluluwason.’ Oo, “tutubson niya an ira mga kalag tikang ha pagtalumpigos ngan paglugos [“kamadarahog,” NW].”—Salmo 72:13, 14.

Mahitungod hiton nga panahon, an Mika 4:4 nasiring: “Hira an tagsatagsa nga tawo malingkod ha sirong han iya balagon han ubas ngan ha sirong han iya kahoy nga igera; ngan waray bisan hin-o nga maghahadlok ha ira: kay an baba ni Jehova han mga kasundalohan nagyakan hini.” An Ginhadian han Dios an magsusulbad han ngatanan nga mga problema nga nagpapasakit ha katawohan, pagwawad-on pa ngani an sakit ngan kamatayon. An Dios ‘maglalamoy han kamatayon ha kadayonan, ngan an Soberano nga Ginoo nga hi Jehova magpapahid han mga luha tikang ha ngatanan nga nawong.’—Isaias 25:8, NW.

Makakasarig ka hini nga mga saad tungod kay an Dios mismo an nagsaad hito. Kay ano nga diri usisahon an ebidensya nga nagpapamatuod nga masasarigan an mga tagna ha Biblia?

[Ginkuhaan han Retrato ha pahina 32]

FAO photo/M. Marzot