An Kataposan nga Panihapon—Ano Ito?

ANO an imo nahuhunahuna kon nakakabati ka han mga pulong nga “an kataposan nga panihapon”? Damu nga mga tawo an maghuhunahuna han gindadayaw gud nga debuho ha Milan, Italya ni Leonardo da Vinci (1452-1519). Ha pagkamatuod, an Kataposan nga Panihapon nagin popular nga tema para ha mga paradebuho, mga parasurat, ngan mga musikero ha bug-os nga mga siglo.

Kondi, ano an Kataposan nga Panihapon, ngan ano an iginpapasabot hito ha mga tawo nga nagkikinabuhi ha ika-21 ka siglo? An mga encyclopedia ngan mga diksyonaryo magsusumat ha imo nga an Kataposan nga Panihapon, nga tinatawag liwat nga Panihapon han Ginoo, amo an panihapon ni Jesu-Kristo kaupod han iya mga apostol ha gab-i antes han iya halad nga kamatayon. Tungod kay ito an kataposan nga panihapon ni Jesus nga kaupod han iya matinumanon nga mga sumurunod, nahiaraan na nga tinatawag ito nga an Kataposan nga Panihapon. Ngan tungod kay gintikangan ito han Ginoo nga Jesu-Kristo mismo, angayan an tawag nga Panihapon han Ginoo.

Ha paglabay han mga siglo, iginhalad han damu an ira mga kinabuhi tungod ha mga katuyoan nga ira ginhuhunahuna nga darayawon gud. An iba hini nga mga kamatayon napahimulosan han pipira nga mga tawo ha sulod hin usa ka peryodo han panahon. Kondi, kon itanding ha kamatayon ni Jesu-Kristo, waray hiton nagsasakripisyo-ha-kalugaringon nga mga kamatayon, bisan kon darayawon man ito, an makatirigamnan gud sugad han kamatayon ni Jesu-Kristo. Dugang pa, waray kamatayon ha puno hin problema nga kasaysayan han tawo an posible nga nakaapekto ha bug-os nga uniberso. Kay ano?

Basi mabaton ito nga pakiana ngan basi mabuligan ka nga hisabtan an kahulogan ha imo han Panihapon han Ginoo, ginhahangyo ka namon nga basahon an masunod nga artikulo.