Ipakita an “Bug-os nga Pagkamalumo ha Ngatanan nga Tawo”
Ipakita an “Bug-os nga Pagkamalumo ha Ngatanan nga Tawo”
“Padayon nga pahinumdoma hira . . . nga magin makatadunganon, ipinapakita an bug-os nga pagkamalumo ha ngatanan nga tawo.”—TITO 3:1, 2, NW.
1. Kay ano nga diri masayon pirme an pagpakita hin pagkamalumo?
“MAGSUBAD kamo ha akon,” nagsurat hi apostol Pablo, “sugad nga hi ako nagsubad kan Kristo.” (1 Korinto 11:1) An ngatanan han mga surugoon han Dios yana nangangalimbasog ha pagsunod hini nga sagdon. Oo, diri ito masayon, tungod kay napanunod naton tikang ha aton siyahan nga mga ginikanan an hakugnon nga mga hingyap ngan mga batasan nga diri nahiuuyon ha susbaranan ni Kristo. (Roma 3:23; 7:21-25) Kondi, may kalabotan ha pagpakita hin pagkamalumo, kita ngatanan mahimo maglampos kon mangalimbasog kita. Kondi an pagsarig ha aton kalugaringon nga determinasyon la diri igo na. Labaw pa an ginkikinahanglan. Ano pa an ginkikinahanglan?
2. Paonan-o naton maipapakita “an bug-os nga pagkamalumo ha ngatanan nga tawo”?
2 An diosnon nga pagkamalumo bahin han mga bunga han baraan nga espiritu. Kon labaw nga nasunod kita ha mga giya han aktibo nga puwersa han Dios, labaw nga makikita ha aton an mga bunga hito. Hito la nga paagi maipapakita naton “an bug-os nga pagkamalumo” ha ngatanan. (Tito 3:2, NW) Aton usisahon kon paonan-o naton masusubad an susbaranan ni Jesus ngan mabubuligan adton nakikig-upod ha aton nga ‘makaagi hin pagpahuway.’—Mateo 11:29; Galasia 5:22, 23.
Ha Pamilya
3. Ano nga kahimtang ha pamilya an nagpapakita han espiritu han kalibotan?
3 An usa nga kahimtang diin importante an pagkamalumo amo an ha sulod han pamilya. An World Health Organization nagbabanabana nga an kamadarahog ha pamilya nagigin mas daku nga peligro ha kahimsog han kababayin-an kay ha mga aksidente ha trapiko ngan malaria, kon pagtampuhon. Ha Londres, Inglatera, pananglitan, ikaupat nga bahin han ngatanan nga iginsumat nga madarahog nga krimen amo an ha pamilya. An polis agsob nga iginkikita hin mga tawo nga nagpapahayag han ira mga pagbati pinaagi han ‘pagguliat ngan pagbusa.’ Mas maraot pa gud, gintugotan han iba nga mag-asawa nga makaapekto ha ira relasyon an “nakakadaot nga kapaitan.” Ini ngatanan nga batasan amo an makasurubo nga pagpakita han “espiritu han kalibotan” ngan diri ito kinakarawat ha Kristiano nga mga pamilya.—Efeso 4:31; 1 Korinto 2:12.
4. Ano an epekto ha pamilya han pagkamalumo?
4 Basi mapugngan an kalibotanon nga mga hilig, ginkikinahanglan naton an espiritu han Dios. “Kon hain an espiritu han Ginoo, aadto man an kaluwasan.” (2 Korinto 3:17) An gugma, pagkabuotan, pagpugong ha kalugaringon, ngan hilawig nga pagpailob nagpaparig-on han pagkaurosa han diri-hingpit nga mga bana ngan mga asawa. (Efeso 5:33) An pagkamalumo nakakapalipay han pamilya ngan naghahatag hin makaruruyag nga kahimtang nga kabaliktaran han pag-araway ngan pagkabahinbahin nga nakakadaot han damu nga mga pamilya. Importante an ginsisiring han usa ka tawo, kondi an paagi han iya pagpahayag amo an nagpapakita han iya mga disposisyon. An mga pagtagad ngan mga kabaraka nga iginpahayag nga may pagkamalumo nakakaiban han mga kaaringit. An makinaadmananon nga hi Hadi Salomon nagsurat: “An malumo nga baton nakakapaiway han kapungot; kondi an mapait nga pulong nakakapabukal han kasina.”—Proberbios 15:1.
5. Paonan-o an pagkamalumo nabulig ha panimalay nga magkaiba an relihiyon?
5 An pagkamalumo labi nga importante ha panimalay nga magkaiba an relihiyon. Kon inuupdan hin buotan nga mga buhat, makakabulig ito nga magpahirani kan Jehova adton diri interesado. Hi Pedro nagsagdon ha Kristiano nga mga asawa: “Magpasakop kamo ha iyo mga kaasaw-an nga kalalakin-an; nga, basi, kon may-ada iba nga diri masinugtanon ha pulong, pagdad-on unta hira ha waray pulong, pinaagi han mga batasan han ira mga kaasaw-an; nga hikit-an nira an iyo mauray nga gawi nga may kahadlok. Ngan iton iyo pagrayandayan diri magin ha gowa ha pagsalapid ha buhok, ngan paggamit hin mga alahas nga bulawan, o pagsul-ot hin panapton. Kondi maasya unta an tinago nga tawo ha kasingkasing, ha panapton nga waray pagkadunot han maaghop ngan mabuot [“hilom ngan malumo,” NW] nga espiritu, nga amo an mahal gud ha atubangan han Dios.”—1 Pedro 3:1-4.
6. Paonan-o an pagpakita hin pagkamalumo nagpaparig-on han mga bugkos han mga ginikanan ngan mga anak?
6 An relasyon han mga ginikanan ngan mga anak mahimo magin tensyonado hinduro, labi na kon kulang hin gugma kan Jehova. Kondi ha ngatanan nga Kristiano nga mga panimalay, kinahanglan ipakita an pagkamalumo. Hi Pablo nagsagdon ha mga amay: “Ayaw niyo pag-aringita an iyo mga anak, kondi padayon nga padakua hira ha disiplina ngan panhunahuna-nga-giya ni Jehova.” (Efeso 6:4, NW) Kon may-ada pagkamalumo ha pamilya, napaparig-on an duok nga bugkos ha butnga han mga ginikanan ngan mga anak. Hi Dean, usa han lima nga anak, nahinumdom mahitungod ha iya amay: “Malumo hi Tatay. Waray ako nahinunumdoman nga nakiglantugi ako ha iya—bisan han tinedyer ako. Malumo hiya pirme, bisan kon nasisina hiya. Usahay ginpapasulod niya ako ha akon kuwarto o diri tinutugotan nga makigbahin ha mga butang nga akon naruruyagan, kondi waray gud kami paglantugi. Diri la hiya amay namon. Sangkay liwat namon hiya, ngan diri namon karuyag nga masubo hiya.” An pagkamalumo tinuod nga nabulig ha pagparig-on han mga bugkos ha butnga han mga ginikanan ngan mga anak.
Ha Aton Ministeryo
7, 8. Kay ano nga importante an pagpakita hin pagkamalumo ha ministeryo ha kanataran?
7 An usa pa nga lugar diin importante an pagkamalumo amo an ha ministeryo ha kanataran. Samtang iginpapaangbit naton an maopay nga sumat han Ginhadian ha iba, iginkikita naton an mga tawo nga magkalainlain an mga disposisyon. An iba malipayon nga namamati ha mensahe mahitungod han paglaom nga aton gindadara. An iba, tungod ha magkalainlain nga mga hinungdan, bangin diri kumarawat. Hini nga kahimtang nakakabulig gud ha aton an kalidad nga pagkamalumo ha pagtuman han aton buruhaton nga magin mga saksi ngadto ha gihirayoi nga bahin han tuna.—Buhat 1:8; 2 Timoteo 4:5.
8 Hi apostol Pedro nagsurat: “Pagbaraanon niyo ha iyo mga kasingkasing hi Kristo nga Ginoo: ngan mag-andam kamo gihapon ha pagbaton, nga may kaaghop [“pagkamalumo,” NW] ngan pagtahod, ha ngatanan nga mga tawo nga mapakiana ha iyo, kon ano an katungdanan han pagtoo nga aada ha iyo.” (1 Pedro 3:15) Tungod kay pinabibilhan naton hi Kristo ha aton mga kasingkasing sugad nga aton Susbaranan, ipinapakita naton an pagkamalumo ngan pagtahod kon nagsasangyaw kita ha mga tawo nga nagyayakan hin mapintas. Ini nga paggawi agsob nga may-ada makatirigamnan nga mga resulta.
9, 10. Isaysay an usa nga eksperyensya nga nagpapakita han bili han pagkamalumo ha ministeryo ha kanataran.
9 Han inabrihan han iya asawa an nagtuktok ha purtahan han ira apartment, hi Keith nagpabilin ha lugar nga diri hiya nakikita. Han hinbaroan nga an ira bisita usa han mga Saksi ni Jehova, an asawa ni Keith nasisina nga nag-akusa ha mga Saksi nga madarahog kuno hira ha kabataan. An Saksi nagpabilin nga kalmado. Malumo hiya nga binaton: “Nasusubo ako nga sugad hito an imo inaabat. Mahimo ko ba ipakita ha imo kon ano an tinotoohan han mga Saksi ni Jehova?” Hi Keith nagpinamati ha pakiistorya ngan yana hinirani ha purtahan basi tapuson an pagbisita han Saksi.
10 Ha urhi, nasubo an mag-asawa nga mapintas an ira pagtrato ha ira bisita. An malumo nga paggawi han Saksi nakabantad ha ira. Paglabay hin usa ka semana, nahipausa hira kay binalik an Saksi, ngan hi Keith ngan an iya asawa tinugot na ha iya nga isaysay an Kasuratanhon nga basihanan han iya tinotoohan. “Ha sumunod nga duha ka tuig, namati kami ha ginsiring han iba nga mga Saksi,” siring nira ha urhi. Kinarawat nira an pag-aram ha Biblia, ngan ha kataposan nabawtismohan hira nga duha sugad nga simbolo han ira dedikasyon kan Jehova. Makalilipay gud ito para hiton nga Saksi nga siyahan nga binisita kan Keith ngan ha iya asawa! Paglabay hin pipira ka tuig, iginkita han Saksi an mag-asawa ngan hinbaroan niya nga hira yana iya na espirituwal nga kabugtoan. Naglalampos an pagkamalumo.
11. Ha ano nga paagi nakakabulig an pagkamalumo basi magin mas masayon an pagkarawat han usa nga tawo ha Kristiano nga kamatuoran?
11 An mga eksperyensya ni Harold sugad nga sundalo nakahimo ha iya nga masisinahon ngan magruhaduha ha pag-eksister han Dios. Nadugangan pa gud an iya mga problema han an aksidente ha trapiko, tungod han hubog nga nagmamaneho, nakahimo kan Harold nga magin permanente nga baldado. Han binisita ha iya balay an mga Saksi ni Jehova, nagsiring hi Harold nga diri na hira bumisita utro ha iya. Kondi usa ka adlaw, an Saksi nga hi Bill nagplano nga bisitahon an interesado nga tawo nga nag-uukoy mga duha la nga balay an distansya tikang ha balay ni Harold. Nagsayop hi Bill ha pagtuktok ha purtahan ni Harold. Han hi Harold, nga duha an tungkod, nag-abri han purtahan, nangaro dayon hin pasaylo hi Bill, nagsasaysay nga bibisitahon unta niya an kahirani nga balay. Ano an reaksyon ni Harold? Diri maaram hi Bill nga nakita ni Harold ha telebisyon an usa nga bahin han mga sumat nga nagpapakita han mga Saksi nga nagtatrabaho nga tarampo ha pagtukod hin bag-o nga Kingdom Hall ha madaliay la nga panahon. Tungod kay nadasig han iya nakita nga damu hinduro nga mga tawo nga urosa nga nagtatrabaho, iya ginbag-o an iya pagtagad ha mga Saksi. Tungod kay nabantad han pagkabuotan ni Bill ha pangaro hin pasaylo ngan ha iya makaruruyag, malumo nga paggawi, nagdesisyon hi Harold nga tugotan an mga Saksi nga bumisita ha iya. Nag-aram hiya ha Biblia, nag-uswag, ngan nagin bawtismado nga surugoon ni Jehova.
Ha Kongregasyon
12. Ano nga kalibotanon nga mga kinaiya an sadang atohan han mga membro han Kristiano nga kongregasyon?
12 An ikatulo nga lugar diin importante an pagkamalumo amo an ha Kristiano nga kongregasyon. Kasagaran na an araway ha sosiedad yana nga panahon. Normal na an mga pagdebate, mga paglantugi, ngan araway dida ha mga tawo nga nagtatagad han kinabuhi ha unudnon nga paagi. Usahay, an sugad kalibotanon nga mga kinaiya hinay-hinay nga nasulod ha Kristiano nga kongregasyon ngan nagriresulta hin mga paglantugi ngan mga argumento. Nasusubo an mga tigurang kon ginkikinahanglan nga tadungon nira ini nga mga kahimtang. Kondi, an gugma kan Jehova ngan ha ira kabugtoan nagpapagios ha ira nga buligan an mga nagsayop nga magbasol ngan magbag-o.—Galasia 5:25, 26.
13, 14. Ano an mahimo magin resulta han ‘pagsaway nga may pagkamalumo ha mga nakontra’?
13 Ha siyahan nga siglo, hi Pablo ngan an iya kaupod nga hi Timoteo nakaeksperyensya hin mga problema tikang ha pipira nga mga tawo ha sulod han kongregasyon. Nagpahamangno hi Pablo kan Timoteo nga magbantay kontra han kabugtoan nga pariho han mga surudlan para ha “pagkadiri-dungganan.” “An surugoon han Ginoo diri kinahanglan makiglantugi,” siring ni Pablo, “kondi magin magtalunoy ha ngatanan, andam ha pagtutdo, maantuson, magsaway hiya ha kaaghop [“pagkamalumo,” NW] ha mga nakontra.” Kon malumo kita bisan kon naaaghat ha kasina, an mga nakontra agsob nga naghuhunahuna utro han ira mga pakaraot. Tungod hito, dugang nga nagsurat hi Pablo, hi Jehova mahimo ‘maghatag ha ira hin pagbasol ngadto ha pagkilala ha kamatuoran.’ (2 Timoteo 2:20, 21, 24, 25) Tigamni nga iginkakaw-ing ni Pablo an pagkamahumok ngan pagpugong ha pagkamalumo.
14 Ginbuhat ni Pablo an iya iginsasangyaw. Han nakikig-upod ha “mga bantogan kaopay nga mga apostol” ha kongregasyon ha Korinto, iya ginsagda an kabugtoan: “Ako nga amo hi Pablo nanginginyupo ha iyo tungod ha kaaghop ngan pagkamalumo ni Kristo, hi ako nga ha atubangan niyo mapainubsanon, kondi kon diri ako upod niyo nasarig ako ha iyo.” (2 Korinto 10:1; 11:5) Ginsubad gud ni Pablo hi Kristo. Tigamni nga nanginyupo hiya hini nga kabugtoan ‘pinaagi han pagkamalumo’ ni Kristo. Tungod hito nalikyan niya an mapahitas-on, diktador nga paggios. An iya pagsagda sigurado nga naruyagan hadton aada ha kongregasyon nga may-ada makinarawaton nga mga kasingkasing. Iya gintadong an nadaot nga mga relasyon ngan binulig ha pagparig-on han kamurayawan ngan pagkaurosa ha kongregasyon. Diri ba ini an angay pangalimbasogan naton ngatanan nga subaron? An mga tigurang labi na kinahanglan magsubad han mga buhat ni Kristo ngan ni Pablo.
15. Kay ano nga importante an pagkamalumo kon nagsasagdon?
15 An responsabilidad nga buligan an iba sigurado nga diri limitado ha mga panahon nga namimeligro an kamurayawan ngan pagkaurosa han kongregasyon. Antes pa mahitabo an nadaot nga mga relasyon, ginkikinahanglan han kabugtoan an mahigugmaon nga giya. “Mga kabugtoan, kon an usa ka tawo hiagian han iba nga nagtalapas, kamo nga mga espirituhanon, pabalikon unta hiya niyo,” nagsagda hi Pablo. Kondi paonan-o? “Ha espiritu han kaaghop [“pagkamalumo,” NW]; pagtan-aw man ha imo kalugaringon, bangin ikaw naman an pagsulayon.” (Galasia 6:1) An pagtipig han ‘espiritu han pagkamalumo’ diri masayon pirme, labi na tungod kay an ngatanan nga mga Kristiano, upod na an pinili nga kalalakin-an, apektado han makasasala nga mga hilig. Kondi, an pagkamalumo mabulig ha usa nga nagsayop nga magbag-o basi magin matadong.
16, 17. Ano an mabulig nga malikyan an anoman nga pag-alang-alang ha pagsunod ha sagdon?
16 Ha orihinal nga Griego, an pulong nga iginhubad nga “pabalikon” mahimo liwat magtudlok ha pagtadong han nalisa nga mga tul-an, nga masakit nga proseso. An nagpapasarig nga doktor nga nagtatadong han nalisa nga tul-an nagyayakan hin positibo mahitungod han mga kapulsanan han proseso. Nakakaliaw an iya kalmado nga paggawi. An pipira nga mga pulong nabulig ha pagliaw ha nadaot nga mga pagbati. Ha sugad man nga paagi, an espirituwal nga pagtadong bangin makabibido. Kondi an pagkamalumo mabulig basi magin mas masayon ito karawaton, salit naipapahiuli an maopay nga mga relasyon ngan napapagios an usa nga nagsayop nga bag-ohon an iya paggawi. Bisan kon ha siyahan diri kinakarawat an sagdon, an pagkamalumo han usa nga nagtatanyag hin bulig bangin makadasig nga sundon an Kasuratanhon nga sagdon.—Proberbios 25:15.
17 Kon nabulig ha iba nga bumalik, aada pirme an peligro nga an sagdon bangin tagdon sugad nga pakaraot. Usa nga parasurat an nagkomento hini: “Kon nagsasaway ha iba aada an makusog nga tendensya nga magin mapuwersa hinduro ngan salit ginkikinahanglan an kaaghop.” An pagpatubo han pagkamalumo nga nagtitikang ha pagpaubos mabulig ha Kristiano nga magsaragdon nga malikyan ini nga peligro.
“Ha Ngatanan nga Tawo”
18, 19. (a) Kay ano nga bangin makuri para ha mga Kristiano an pagpakita hin pagkamalumo ha pakig-upod ha sekular nga mga awtoridad? (b) Ano an mabulig ha mga Kristiano ha pagpakita hin pagkamalumo ha mga may awtoridad, ngan ano an posible nga resulta?
18 An usa nga bahin diin damu an nakukurian ha pagpakita hin pagkamalumo amo an ha pakig-upod ha sekular nga mga awtoridad. Oo, an paagi han paggawi han iba nga may awtoridad nagpapakita hin kapintas ngan kakulang hin empatiya. (Eklesiastes 4:1; 8:9) Kondi, an aton gugma kan Jehova mabulig ha aton nga kilalahon an iya gihitaasi nga awtoridad ngan magpakita ha mga awtoridad ha gobyerno han relatibo nga pagpasakop nga angay ha ira. (Roma 13:1, 4; 1 Timoteo 2:1, 2) Bisan kon adton hitaas an katungdanan nagsasari nga pugngan an pagpahayag ha publiko han aton pagsingba kan Jehova, malipayon nga nagbibiling kita hin mga paagi nga mahihimo pa gihapon ha paghalad han aton mga pagdayaw.—Hebreo 13:15.
19 Diri gud kita nagios hin madarahog ha bisan ano nga mga kahimtang. Nangangalimbasog kita nga magin makatadunganon nga diri gud iginkukompromiso an matadong nga mga prinsipyo. Hini nga paagi, naglalampos an aton kabugtoan ha pagpadayon han ira ministeryo ha 234 nga katunaan ha bug-os nga kalibotan. Aton ginsusunod an sagdon ni Pablo nga ‘magpasakop ha mga punoan, ha mga magburuot, nga magmasinugtanon, ngan mag-andam ha ngatanan nga mag-opay nga buhat, nga diri magyakan hin maraot kontra ha bisan hin-o, nga diri makimasamok, magtalunoy, ha pagpakita han bug-os nga kaaghop [“pagkamalumo,” NW] ha ngatanan nga mga tawo.”—Tito 3:1, 2.
20. Ano an mga balos para hadton nagpapakita hin pagkamalumo?
20 Hura nga mga bendisyon an mapapahimulsan han ngatanan nga nagpapakita hin pagkamalumo. “Bulahan an mga maaghop [“malumo,” NW],” siring ni Jesus, “kay hira makakapanunod han tuna.” (Mateo 5:5) Para ha dinihogan-ha-espiritu nga kabugtoan ni Kristo, an pagtipig han pagkamalumo nagsisiguro han ira kalipayan ngan pribilehiyo ha pagmando ha tunan-on nga nasasakopan han Ginhadian. Para ha “daku nga panon” han ‘iba nga mga karnero,’ nagpapadayon hira ha pagpakita hin pagkamalumo ngan madasigon nga nagpapamulat han kinabuhi ha Paraiso dinhi ha tuna. (Pahayag 7:9, NW; Juan 10:16; Salmo 37:11) Urusahon gud an aton mga paglaom ha tidaraon! Salit, diri gud naton igbalewaray an pahinumdom nga iginhatag ni Pablo ha mga Kristiano ha Efeso: “Busa tungod hini, ako nga binilanggo ha Ginoo, nanginginyupo ako ha iyo nga manggawi kamo hin takos gud ha katungdanan nga igintawag ha iyo, ha bug-os nga pagpaubos ngan pagkaaghop [“pagkamalumo,” NW].”—Efeso 4:1, 2.
Sugad nga Repaso
• Ano an mga bendisyon han pagpakita hin pagkamalumo
• ha pamilya?
• ha ministeryo ha kanataran?
• ha kongregasyon?
• Ano an mga balos nga iginsasaad ha mga malumo?
[Mga Pakiana]
[Retrato ha pahina 21]
An pagkamalumo labi nga importante ha panimalay nga magkaiba an relihiyon
[Retrato ha pahina 21]
An pagkamalumo nagpaparig-on han mga bugkos han pamilya
[Retrato ha pahina 23]
Himoa an pagdepensa nga may pagkamalumo ngan hilarom nga pagtahod
[Retrato ha pahina 24]
An pagkamalumo han magsaragdon mahimo makabulig ha usa nga nagsayop