Malipayon nga Gindadapit Ka

AN Panihapon han Ginoo, nga gintikangan han Ginoo nga hi Jesu-Kristo mga 2,000 ka tuig na an naglabay, diri kay usa la ka makapainteres nga hitabo ha kasaysayan. Nagkaada ito gamhanan nga epekto ha mga tawo tikang pa han gintikangan ito. Tungod kay nabantad han ira nabasa ha mga asoy han mga Ebanghelyo mahitungod han nahitabo hiton nga gab-i, damu an nangangalimbasog nga isaurog an Panihapon han Ginoo ha magkalainlain nga mga paagi.

Hinsasabtan ini ngatanan, tungod kay hi Jesu-Kristo mismo an nagsugo nga isaurog han iya mga sumurunod ini nga hitabo ngan buhaton nira ito hin regular. Espisipiko nga nagsiring hiya ha ira: ‘Buhata niyo ini nga hinumdoman ha akon.’—Lukas 22:19; 1 Korinto 11:23-25.

Siyempre, basi magin makapatagbaw gud nga eksperyensya an pagsaurog, an usa kinahanglan may-ada husto nga pagsabot ha kahulogan hito, sugad han makikita ha Pulong han Dios, an Biblia. Dugang pa, importante nga hibaroan kon ano an ginsisiring han Biblia mahitungod han kon san-o ngan kon paonan-o isasaurog ito.

Ha pagsugot ha sugo ni Jesus, an mga Saksi ni Jehova ha bug-os nga kalibotan magkakatirok ha Mierkoles nga gab-i, Abril 16, 2003, ha paghinumdom han kamatayon ni Jesus. Magigin okasyon ini para ha ira ha pag-usisa han Kasuratan ngan ha pagparig-on-utro han ira pagtoo ngan gugma ha Ginoo nga hi Jesu-Kristo, nga nagsiring: “An Dios naghigugma gud han kalibotan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi mamay kinabuhi nga waray kataposan.” (Juan 3:16) Malipayon nga gindadapit ka nga umupod ha ira katirok hiton nga gab-i basi maparig-on mo liwat an imo pagtoo ngan gugma kan Jesu-Kristo ngan ha langitnon nga Amay, hi Jehova nga Dios.