Espirituwal nga mga Kalidad—Diin an Dadangatan Hito?

“Kinse nga magpadis an natambong ha pan-gab-i nga sesyon [han Katoliko] para ha pagsagdon ha mga magpadis nga nagpaplano ha pag-asawa. Ha 30 ka tawo nga nakadto, 3 la an nasiring nga may-ada hira relihiyon.” La Croix, pahayagan han Katoliko ha Fransia.

NAMIMELIGRO an relihiyoso nga mga kalidad. An prente nga kobre han Hulyo 12, 1999 nga gowa han internasyonal nga edisyon han Newsweek nagpakiana: “Patay ba an Dios?” Para ha weste nga Europa, an baton han magasin baga hin patay na gud an Dios. Ha pagreport mahitungod han katirok han nagmamando nga grupo han Iglesia Katolika nga gindumara ha Roma han Oktubre hiton mismo nga tuig, an pahayagan han Fransia nga Le Monde nagsiring: “Nakukurian gud an Iglesia yana kay ha bisan kakan-o pa man ha pagpahayag han mensahe hito ha usa nga kultura nga nagin ‘waray pagkaruyag’ na hito. . . . Ha Italya, diri na nagkakauruyon an ngatanan nga mga Katoliko ha mga doktrina ngan mga buruhaton. . . . Ha Alemanya, an debate may kalabotan ha mga sentro nga naghahatag hin abanse nga impormasyon mahitungod ha pagpunit nagpapadaku han diri-pagkasinabot butnga han papa ngan han demokratiko nga sistema nga diri na andam ha pagkarawat hin mga surundon. An waray-pagpugong nga disposisyon [han Netherlands] mahitungod ha moral ngan pagpatay ha nag-aantos (euthanasia) ginhuhunahuna na han pipira nga mga paraobserba sugad nga epekto han tigda nga pagin diri-Kristiano hito nga nasud.”

An kahimtang pariho gud ha iba nga lugar. Han 1999 an Arsobispo han Canterbury nga hi George Carey nagpahamangno nga an Iglesia han Inglatera “usa na la nga henerasyon ngan mawawara na.” Ha usa nga artikulo nga may ulohan nga “An Kataposan han Kristiano nga Europa,” an pahayagan han Fransia nga Le Figaro nagsiring: “An pariho nga kahimtang makikita ha bisan diin. . . . An mga tawo nagpapahayag hin mga pagruhaduha mahitungod han maopay nga mga pamatasan ngan mga gintotoohan nga doktrina.”

Nagtitikaguti an Pakigbahin han Relihiyon

Ha Europa, tigda nga nagtitikaguti an nasingba. Diri naabot hin 10 porsyento han Franses nga mga Katoliko an natambong hin Misa kada Domingo, samtang tikang ha 3 ngadto ha  4 porsyento la han mga Katoliko ha Paris an regular nga nasingba. Pariho o mas gutiay pa ngani an naoobserbahan nga nasingba ha United Kingdom, Alemanya, ngan ha mga nasud han Scandinavia.

Daku nga problema han mga awtoridad han relihiyon an kakulang hin mga kandidato ha pagkapadi. Ha sulod hin haros usa ka siglo, an kadamu han mga padi ha Fransia tigda nga nagtikaguti, tikang ha 14 nga padi ha kada 10,000 nga umurukoy ngadto ha diri mausa ha kada 10,000 nga umurukoy yana. Ha bug-os nga Europa, nagtitikahitaas an aberids nga edad han mga padi, ngan inaabat an kakulangan hin mga padi bisan ha mga nasud sugad han Ireland ngan Belgium. Ha pariho nga panahon, nagtitikaguti an kadamu han kabataan nga listado ha mga klase han katekismo, ngan nagbabangon ini hin seryoso nga mga pagruhaduha mahitungod ha kapasidad han Iglesia Katolika ha pagsiguro nga magpapadayon pa ito.

May kalabotan ha relihiyon, baga hin nawarayan na pagsarig an mga tawo. Sais porsyento la han mga Franses an natoo nga “an kamatuoran mabibilngan la ha usa nga relihiyon,” kon itanding ha 15 porsyento nga natoo han 1981 ngan 50 porsyento han 1952. An kawaray-interes ha relihiyon nagtitikakaylap. An kadamu han mga tawo nga nasiring nga diri hira membro han usa nga relihiyon nag-uswag tikang ha 26 porsyento han 1980 ngadto ha 42 porsyento han 2000.—Les valeurs des Français—Évolutions de 1980 à 2000 (Mga Kalidad han Fransia—Pag-uswag Tikang han 1980 tubtob han 2000).

Daku nga Pagbag-o ha Moral nga mga Kalidad

An krisis ha maopay nga mga kalidad makikita liwat ha moralidad. Sugad han gin-unabi na, damu nga mga parasingba an nadiri ha pagkarawat han mga surundon ha moral han ira relihiyon. Diri hira nauyon nga an mga lider han relihiyon may-ada katungod ha paghimo hin mga suruklan may kalabotan ha pamatasan. Ito mismo nga katawohan nga nagpapahayag hin pag-uyon ha papa may kalabotan ha mga katungod han tawo nagdudumiri ha pagsunod ha iya kon an iya mga pulong nakakaapekto ha ira pribado nga mga kinabuhi. Pananglitan, an iya ideya may kalabotan ha kontrasepsyon diri ginsusunod han damu nga tawo, bisan han damu nga Katoliko nga mag-asawa.

Ini nga paggawi nakakaapekto ha relihiyoso ngan diri-relihiyoso nga katawohan, ha ngatanan nga bahin han sosiedad. Diri ginsasaway an mga buhat nga matin-aw nga ginkukondenar ha Baraan nga Kasuratan. Bainte ka tuig na an naglabay, diri inuuyonan an homoseksuwalidad han 45 porsyento han mga tuminungnong han Fransia. Yana, 80 porsyento na an nakarawat hito. Bisan kon an kadam-an nga bahin nauyon ha pagin maunungon ha padis, 36 porsyento la an nagkukondenar han mga relasyon nga gawas ha pag-asawa sugad nga diri gud husto.—Roma 1:26, 27; 1 Korinto 6:9, 10; Hebreo 13:4.

Ginsaralakot nga Pagtoo

Ha Weste nga sosiedad, napuporma an relihiyon nga personal-nga-gindisenyo diin an ngatanan may-ada katungod ha pagpili han iya mga totoohan. Kinakarawat an pipira nga mga doktrina, samtang iginsasalikway an iba. Ginhuhunahuna han iba an ira kalugaringon nga mga Kristiano samtang natoo ha reinkarnasyon, ngan an iba andam ha pagsunod hin durungan ha pipira nga relihiyoso nga mga gintotoohan. (Eklesiastes 9:5, 10; Esekiel 18:4, 20; Mateo 7:21; Efeso 4:5, 6) Prangka nga iginpakita han libro nga Les valeurs des Français nga damu nga mga tumuroo yana an nagpapahirayo tikang ha mga surundon nga gin-establisar han relihiyon, nga waray na posibilidad ha pagbalik.

Kondi, peligroso ini nga pamaagi nga pabor ha mas labaw nga pagpabili ha personal nga karuyag may kalabotan ha relihiyon. Hi Jean Delumeau, nga historyador han relihiyon ngan membro han Institut de France, marig-on nga natoo nga imposible para han usa ka tawo nga maghimo han iya kalugaringon nga relihiyon nga bulag ha bisan ano nga establisado na nga sistema. “An relihiyon diri makakagpadayon kon diri ito nakagamot ha karig-onan han usa ka espisipiko nga organisado nga relihiyon.” An maopay nga mga kalidad ha espirituwal ngan relihiyoso nga mga buruhaton kinahanglan magin bahin ha relihiyon han usa. Diin mabibilngan an sugad nga pagin bahin ha usa nga sosiedad nga gindaot han pagbag-o?

An bug-os nga Biblia nagpapahinumdom ha aton nga an Dios an naghihimo hin mag-opay nga mga suruklan han paggawi ngan moralidad, bisan kon tinatagan niya an katawohan hin kagawasan nga sundon ito o diri. Ginkikilala han minilyon nga katawohan ha bug-os-kalibotan nga inin maiha na nga tinahod nga libro may-ada praktikal nga bili yana ngan ito an ‘lampara ha ira tiil ngan suga ha ira agianan.’ (Salmo 119:105) Paonan-o hira nagkaada hito nga konklusyon? Paghihisgotan ini ha sunod nga artikulo.