Kapitulo Disiotso

Iginpapahiuli ni Jehova an Espiritu han mga Mapainubsanon

Isaias 57:1-21

 1. Ano nga pasarig an iginhatag ni Jehova, ngan ano nga mga pakiana an binangon tungod han iya mga pulong?

 “HA SUGAD hini nasiring an hitaas ngan an nananawantawan nga Usa nga naukoy ha kadayonan, kanay ngaran amo an Baraan: Ako naukoy ha hitaas ngan baraan nga lugar, kaupod liwat ha iya nga may mahinulsulon ngan mapainubsanon nga espiritu, ha pagpaabtik han espiritu han mapainubsanon, ngan ha pagpaabtik han kasingkasing han mahinulsulon.” (Isaias 57:15) Ito an iginsurat ni propeta Isaias han ikawalo ka siglo A.K.P. Ano an nahitabo ha Juda nga nakahimo hini nga mensahe nga makapadasig hinduro? Paonan-o inin inspirado nga mga pulong nabulig ha mga Kristiano yana? An paghisgot ha Isaias kapitulo 57 mabulig ha aton nga mabaton ito nga mga pakiana.

‘Daop Kamo Ngadi’

 2. (a) Kakan-o baga in naaplikar an mga pulong han Isaias kapitulo 57? (b) Ano an kahimtang han mga magtadong ha panahon ni Isaias?

² Ini nga bahin han tagna ni Isaias baga in naaplikar ha panahon mismo ni Isaias. Kitaa kon mationan-o na kagrabe an karaotan hito nga panahon: “An matadong naaanaw, ngan waray tawo nga nabutang hini ha iya kasingkasing; ngan an mga tawo nga maloloy-on pinanguha, waray nagpainoino nga an matadong kinukuha tikang ha maraot nga maabot. Hiya masulod ha kamurayaw; hira napahuway ha ira mga higdaan, an tagsatagsa nga naglalakat ha iya pagkamaligdong.” (Isaias 57:1, 2) Kon natutumba an matadong nga tawo, waray nababaraka. An iya diri-napapanahon nga kamatayon diri hinbabaroan. An pagkaturog ha kamatayon naghahatag ha iya hin kamurayawan, katalwasan tikang ha pag-antos nga iginpapadapat han mga magraot, ngan pakapalagiw tikang ha kataragman. An pinili nga nasud han Dios nahilubong ha makalolooy nga kahimtang. Kondi posible nga nadasig adton nagpabilin nga matinumanon ha paghibaro nga hi Jehova diri la nagkikita han nahitatabo kondi masuporta liwat ha ira!

 3. Paonan-o ginpakiistoryahan ni Jehova an maraot nga henerasyon han Juda, ngan kay ano?

³ Iginpatawag ni Jehova an maraot nga henerasyon han Juda, nasiring: “Daop ngadi, kamo mga anak han babaye nga diwatahan, an tulin han parapanlibog ngan han bigaon.” (Isaias 57:3) Takos gud hira hiton makaarawod nga paghulagway sugad nga mga anak han usa nga diwatahan ngan tulin han usa nga parapanlibog ngan han usa nga bigaon. An palso nga pagsingba nga ira sinarigan nag-uupod hin mangil-ad nga mga buhat han idolatriya ngan espiritismo sugad man han imoral nga mga buhat ha sekso. Salit, ginpakianhan ni Jehova ini nga mga magpakasasala: “Patok kanay kamo pagbiaybiay [“naglilipay,” NW]? Patok kanay kamo pagpapahiloag han iyo baba, ngan pagpapawalwal han dila? Diri ba kamo mga anak han pagtalapas, usa nga tulin han pagkabuwaon. Kamo nga nagpapalaga dida ha mga roble, ha tungod han tagsa nga kahoy nga lunhaw; nga namamatay han kabataan dida ha mga walog ha ilarom han mga kaguakan han mga bato?”—Isaias 57:4, 5.

 4. Tungod ha ano nagin salaan an mga magraot ha Juda?

⁴ An mga magraot ha Juda dayag nga nagbuhat han ira mangil-ad nga pagano nga pagsingba, duro nga “naglilipay.” Nakakatamay nga ginminos nira an mga propeta han Dios nga iginpadara basi magsaway ha ira, waray-awod ngan waray-pagtahod nga iginwawalwal an ira mga dila. Bisan kon mga anak hira ni Abraham, an ira pagrebelde nakahimo ha ira nga magin mga anak han pagtalapas ngan binhi han kabuwaan. (Isaias 1:4; 30:9; Juan 8:39, 44) Ha dagku nga kakahoyan ha kaumhan, nag-aghat hira hin relihiyoso nga kadasig ha ira idolatroso nga pagsingba. Ngan mabangis gud ini nga pagsingba! Aw, ira pa ngani ginpatay an ira mismo mga anak, pariho ha mga nasud nga ginpaiwas ni Jehova tikang ha tuna tungod han ira mangil-ad nga mga buhat!—1 Hadi 14:23; 2 Hadi 16:3, 4; Isaias 1:29.

 Nag-iipis hin Irinmon nga Halad ha mga Bato

5, 6. (a) Ano an ginpili nga pagbuhaton han mga umurukoy han Juda imbes nga magsingba kan Jehova? (b) Mationan-o kadayag ngan kakaylap an pagsingba han Juda ha idolo?

⁵ Kitaa kon mationan-o na kahilarom nahilubong ha idolatriya an mga umurukoy han Juda: “Dida ha maghamis nga mga bato han walog amo an imo bahin; hira, hira amo an imo kapalaran; bisan ha ira ikaw naipis han halad nga irinmon, ikaw naghalad han usa nga halad. Mahuhugpayan ba ako tungod hini nga mga butang?” (Isaias 57:6) An mga Judio amo an may-kauyonan nga katawohan han Dios, kondi imbes nga magsingba hira ha iya, namurot hira hin mga bato ha salad han salog ngan ginhimo ini nga mga dios. Nagpahayag hi David nga hi Jehova amo an iya bahin, kondi ginpili hinin magpakasasala an waray-kinabuhi nga mga bato nga idolo sugad nga ira bahin ngan nag-ipis hin irinmon nga mga halad ha ira. (Salmo 16:5; Habakuk 2:19) Ano nga pagliaw an makikita ni Jehova ha sugad nga pagsimang ha pagsingba han iya katawohan nga nagrirepresentar ha iya ngaran?

⁶ Ha bisan diin—ha ilarom han kakahoyan, ha inaawasan nga mga walog, ha kabungtoran, ha ira mga siyudad—an Juda nagbubuhat han idolatriya. Kondi ito ngatanan nakikita ni Jehova, ngan pinaagi kan Isaias, Iya iginbuhayhag an karaotan hito: “Dida ha hitaas ngan nananawantawan nga bukid nagbutang ka han imo higdaan; ngadto liwat sinagka ka ha paghalad hin halad. Ngan ha luyo han mga sada ngan han mga harigi nagtukod ka han imo handumanan.” (Isaias 57:7-8a) Dida ha higtaas nga mga lugar, ginhimo han Juda an iya higdaan han espirituwal nga kahugaw, ngan didto naghalad hiya ngadto ha langyawanon nga mga dios. a Bisan an pribado nga mga balay may-ada mga idolo ha luyo han mga purtahan ngan ha mga poste han purtahan.

 7. An Juda nagbuhat han imoral nga pagsingba nga may-ada ano nga espiritu?

⁷ An iba bangin mahipausa kon kay ano nga an Juda nahidabi gud ha mahugaw nga pagsingba. May-ada ba mas makusog nga gahum nga nagpirit ha iya basi bayaan hi Jehova? An baton, waray. Kinaburut-on ngan disidido nga ginbuhat niya ito. Hi Jehova nagsiring: “Ha pagbulag ha akon ikaw naghubo ngan sinagka; imo ginpahaluag an imo higdaan. Ngan para ha imo kalugaringon naghimo ka hin kauyonan ha ira. Ginhigugma mo an higdaan upod nira. An sangkap han lalaki imo nakita.” (Isaias 57:8b, “NW”) An Juda nakigsabot ha iya palso nga mga dios, ngan naruyag gud hiya ha iya sayop nga relasyon hito. Naruyagan niya labi na an imoral nga mga buhat ha sekso—posible nga upod na an paggamit hin mga simbolo han sekso han lalaki—nga pangirilal-an han pagsingba hini nga mga dios!

 8. Durante han paghadi nin-o labi nga nagin kaylap an idolatriya ha Juda?

⁸ An hulagway han duro kaimoral, madarahog nga pagsingba ha idolo nauyon ha aton hinbabaroan mahitungod ha pipira nga mga hadi han Juda. Hi Manases, pananglitan, naghimo hin higtaas nga mga lugar, nagtindog hin mga halaran para kan Baal, ngan nagbutang hin mga halaran para ha palso nga relihiyon dida ha duha nga bungsaran han templo. Iya ginsunog ha kalayo sugad nga halad an iya mga anak nga lalaki, nagbuhat hin mahika, naggamit hin pagtigo, ngan nagsagda ha pagbuhat hin espiritismo. Iginbutang liwat ni Hadi Manases didto ha templo ni Jehova an tinigib nga imahen han sagrado nga poste nga iya ginhimo. b Gindani niya an Juda ha pagbuhat “hadton maraot labi kay han ginbuhat han mga nasud nga kan Jehova gingunaw.” (2 Hadi 21:2-9) An iba natoo nga iginpapatay ni Manases hi Isaias, bisan kon an ngaran ni Manases waray unabiha ha Isaias 1:1.

‘Nagpadayon Ka Pagpadara han Imo mga Embahador’

 9. Kay ano nga an Juda nagpadara hin mga representante ngadto ha “kahigrayoan”?

⁹ An pagtalapas han Juda linahos pa ha pag-alagad ha palso nga mga dios. Pinaagi han paggamit kan Isaias sugad nga iya tagapagyakan, hi Jehova nagsiring: “Nakadto ka ha hadi [“kan Melek,” NW] dara an lana, ngan nagdugang han imo mga talamhot, ngan nagpadara han imo mga embahador ha kahigrayoan, ngan rinmuso [“linugsong,” NW] ka bisan ngadto ha Sheol.” (Isaias 57:9) An diri-matinumanon nga ginhadian han Juda nagpakadto kan “Melek,” “an hadi” ha Hebreo—posible nga an hadi han usa nga langyaw nga pagmando—naghatag ha iya hin marahalon ngan makaruruyag nga mga regalo, nga ginsimbolohan han lana ngan mga pahamot. An Juda nagpadara hin mga representante ngadto ha higrayo nga mga lugar. Kay ano? Basi kombinsihon an Hentil nga mga nasud nga makig-alyansa ha iya ha politika. Tungod kay iya na iginsalikway hi Jehova, sinarig hiya ha langyawanon nga mga hadi.

10. (a) Paonan-o hi Hadi Ahas nakig-alyansa ha hadi han Asirya? (b) Ha ano nga paagi an Juda ‘linugsong bisan ngadto ha Sheol’?

 ¹⁰ An usa nga ehemplo hini amo an ha panahon ni Hadi Ahas. Tungod kay inabat hin kahadlok ha pag-alyansa han Israel ngan Sirya, iton diri-matinumanon nga hadi han Juda nagpadara hin mga mensahero ngadto kan Tiglat-pileser III han Asirya, nasiring: “Ako an imo surugoon ngan an imo anak nga lalaki: kadi, ngan luwasa ako tikang ha kamot han hadi ha Sirya, ngan tikang ha kamot han hadi ha Israel, nga binangon patok ha akon.” Hi Ahas nagpadara hin salapi ngan bulawan ngadto ha hadi han Asirya sugad nga suhol, ngan ginios an hadi, nagbuhat hiya hin makabungkag nga pag-atake ha Sirya. (2 Hadi 16:7-9) Ha pakig-upod han Juda ha Hentil nga mga nasud, linugsong ito ngadto “ha kahiladman han Sheol.” (An American Translation) Tungod hito nga mga pakig-upod, mamamatay ito, o diri na maeksister sugad nga independente nga nasud nga may hadi.

11. Ano nga palso nga pag-abat hin seguridad an ipinakita han Juda?

¹¹ Hi Jehova nagpadayon ha pakiistorya ha Juda: “Inuyaman ka han kahilaba han imo dalan; kondi waray ka sumiring: Ini kawang la: ikaw nakaagi hin magpapaabtik han imo kusog; busa ikaw waray lumuya.” (Isaias 57:10) Oo, an nasud mauyatom nga nagbuhat han iya apostata nga mga paagi, ngan waray niya makita an pagkawaray-paglaom han iya mga pangalimbasog. Ha kabaliktaran, ginlimbongan niya an iya kalugaringon ha pagtoo nga naglalampos hiya ha iya kalugaringon nga gahum. Ha iya pag-abat makusog ngan mahimsog hiya. Daku gud nga kalurongan!

12. Ano nga mga kahimtang ha Kakristianohan an kapariho han Juda?

¹² May-ada usa nga organisasyon yana nga an paggawi nagpapahinumdom han paggawi han Juda ha panahon ni Isaias. Ginagamit han Kakristianohan an ngaran ni Jesus, kondi padayon nga nakikig-alyansa hiya ha mga nasud ngan iya ginpupuno hin mga idolo an iya mga lugar han pagsingba. An iya mga sumurunod nagbubutang pa ngani hin idolatroso nga mga imahen ha ira kalugaringon nga mga balay. Iginhahalad han Kakristianohan an iya mga batan-on ha girra han mga nasud. Ini ngatanan daku gud nga sala ha totoo nga Dios, nga nagsusugo ha mga Kristiano: “Pumalagiw kamo tikang ha pagsingba ha mga diosdios”! (1 Korinto 10:14) Pinaagi han iya pag-api ha politika, an Kakristianohan ‘nakikighilawas ha mga hadi ha tuna.’ (Pahayag 17:1, 2) Ha pagkamatuod, hiya an nangunguna nga parasuporta ha Nagkakaurosa nga mga Nasud. Ano an kabubuwason hinin relihiyoso nga puta? Bueno, ano an ginsiring ni Jehova ha iya kapariho, an diri-matinumanon nga Juda, nga ginrepresentaran labi na han iya sentro nga siyudad, an Jerusalem?

‘Diri Makakaluwas ha Imo an Imo Gintirok’

13. An Juda “nagbuwa” hin ano, ngan paonan-o niya gintagad an pagpasensya ni Jehova?

¹³ “Kan kanay ka mahadlok ngan malisang, nga ikaw nagbuwa?” nagpakiana hi Jehova. Maopay gud nga pakiana! Sigurado nga an Juda waray magpakita hin maopay, diosnon nga kahadlok kan Jehova. Kon nagpakita hiya hito, waray unta hiya magin usa nga nasud han mga buwaon ngan mga magsiringba ha palso nga mga dios. Hi Jehova padayon nga nagsiring: “Waray mahinumdom ha akon, o waray ini ibutang ha imo kasingkasing? Waray ba ako maghilom bisan ha maiha nga panahon, ngan ikaw waray kahadlok ha akon?” (Isaias 57:10, 11) Hi Jehova nagpabilin nga hilom, waray dayon magsirot ha Juda. Gin-apresyar ba ito han Juda? Waray, lugod iya ginhunahuna an pagpasensya han Dios sugad nga pagpasibaya. Bug-os nga nawad-an hiya hin kahadlok ha Dios.

14, 15. Ano an ginsiring ni Jehova mahitungod ha mga buhat han Juda ngan han iya “gintirok nga mga butang”?

¹⁴ Kondi, an peryodo han hilawig nga pagpailob han Dios matatapos. Samtang ginhuhunahuna an pag-abot hito nga panahon, hi Jehova nagpahayag: “Akon igpapahayag an imo pagkamatadong ngan an imo mga buhat, nga diri mo ito pagpupulsan. Kon mangaro ka hin bulig an imo gintirok nga mga butang diri magluluwas ha imo, kondi ito ngatanan igpapalid han hangin. Usa nga gininhawa an magdadara hito ngatanan.” (Isaias 57:12, 13, “NW”) Ibubuhayhag ni Jehova an salingkapaw nga pagpakamatadong han Juda. An iya salingkapaw nga mga buhat magigin waray kapulsanan. An iya “gintirok nga mga butang,” an iya damu nga mga idolo, diri makakaluwas ha iya. Kon umabot an kalamidad, an mga dios nga iya sinasarigan igpapalid ha usa la ka huyop han hangin.

¹⁵ An mga pulong ni Jehova natuman han 607 A.K.P. Nahitabo ito han an Jerusalem ginbungkag ni Hadi Nabukodonosor han Babilonya, ginsunog an templo, ngan ginbihag an kadam-an han mga tawo. “Busa an Juda gindara nga bihag tikang ha iya tuna.”—2 Hadi 25:1-21.

16. Ano an dadangatan han Kakristianohan ngan han iba pa nga mga bahin han “Daku nga Babilonya”?

¹⁶ Ha pariho nga paagi, an damu hinduro nga mga idolo han Kakristianohan diri makakaluwas ha iya ha adlaw han kasina ni Jehova. (Isaias 2:19-22; 2 Tesalonika 1:6-10) Pupoohon an Kakristianohan kaupod han iba pa nga mga bahin han “Daku nga Babilonya,” an imperyo han palso nga relihiyon ha kalibotan. An simboliko nga ihalas nga mananap nga eskarlata an kolor ngan an napulo nga sungay hito ‘maglalaglag  han Babilonya nga Daku ngan paghuhuboan hiya ngan pagkakaunon an iya unod, ngan pagsusunugon hiya ha kalayo.’ (Pahayag 17:3, 16, 17) Malipayon gud kita nga aton ginsusunod an sugo: “Gawas kamo ngadi, mga tawo ko, tikang ha iya, basi nga diri kamo makaangbit ha iya mga sala, ngan basi kamo diri makakarawat han iya mga peste.” (Pahayag 18:4, 5) Hinaot diri na gud kita bumalik ngada ha iya o ha iya mga paagi.

“Hiya nga Maayop ha Akon Magtatag-iya han Tuna”

17. Ano an iginsaad ha ‘usa nga naayop kan Jehova,’ ngan kakan-o ini natuman?

¹⁷ Kondi, kumusta man an sunod nga mga pulong han tagna ni Isaias? “Hiya nga maayop ha akon magtatag-iya han tuna, ngan manununod han akon bukid nga baraan.” (Isaias 57:13b) Kan kanay yana nakikiistorya hi Jehova? Nagkikita hiya lahos pa han tiarabot nga kalamidad ngan nagtatagna han kagawasan han iya katawohan tikang ha Babilonya ngan han pagpahiuli han putli nga pagsingba ha iya baraan nga bukid, an Jerusalem. (Isaias 66:20; Daniel 9:16) Makakahatag gud ini hin daku nga pagdasig ha bisan hin-o nga mga Judio nga nagpapabilin nga matinumanon! Dugang pa, hi Jehova nagsiring: “Hiya masiring: Pagtak-op kamo, pagtak-op kamo, andama an dalan, kuhaa an hiparakdolan tikang ha dalan han akon katawohan.” (Isaias 57:14) Kon umabot na an panahon ha pagluwas ni Jehova ha iya katawohan, an dalan ig-aandam, ngan mawawaray na an ngatanan nga mga ulang.—2 Kronikas 36:22, 23.

18. Paonan-o iginsaysay an pagkaharangdon ni Jehova, kondi ano nga mahigugmaon nga pagtagad an iya iginpapakita?

¹⁸ Hini nga higayon iginsaysay ni Isaias an mga pulong nga ginkotar ha tinikangan: “Ha sugad hini nasiring an hitaas ngan an nananawantawan [“harangdon,” NW] nga Usa nga naukoy ha kadayonan, kanay ngaran amo an Baraan: Ako naukoy ha hitaas ngan baraan nga lugar, kaupod liwat ha iya nga may mahinulsulon ngan mapainubsanon nga espiritu, ha pagpaabtik han espiritu han mapainubsanon, ngan ha pagpaabtik han kasingkasing han mahinulsulon.” (Isaias 57:15) An trono ni Jehova aada ha gihitaasi nga kalangitan. Waray na iba nga katungdanan nga mas hitaas o mas harangdon pa. Nakakaliaw gud hibaroan nga tikang didto iya nakikita an ngatanan—diri la an mga sala han mga magraot kondi an matadong liwat nga mga buhat hadton nangangalimbasog ha pag-alagad ha iya! (Salmo 102:19; 103:6) Dugang pa, iya hinbabatian an mga pagharoy han mga tinalumpigos ngan gintatambal an mga kasingkasing han mga ginraraugdaog. Ini nga mga pulong posible nga nakabantad ha mga kasingkasing han mabinasulon nga mga Judio ha kadaan nga mga panahon. Sigurado nga nakakabantad liwat ito han aton mga kasingkasing yana.

19. San-o nawawara an kasina ni Jehova?

¹⁹ Nakakaliaw liwat an dugang pa nga ginsiring ni Jehova: “Ako diri makikigsuhay hin dayon, diri man ako mapupungot ha kanunay; kay an espiritu mahiraraptay ha akon atubangan, ngan an mga kalag nga akon pinanhimo.” (Isaias 57:16) Waray mabubuhi nga mga linarang han Dios kon padayon ngan waray kataposan an kapungot ni Jehova. Kondi, makalilipay nga an kasina han Dios sulod la hin limitado nga panahon. Kon natuman na an katuyoan hito, nawawara na ito. Inin giniyahan nga pagsabot nabulig ha aton nga mapatubo an hilarom nga apresasyon ha gugma ni Jehova ha iya mga linarang.

20. (a) Paonan-o gintatagad ni Jehova an diri mabinasulon nga makasasala? (b) Ha ano nga paagi ginliliaw ni Jehova an usa nga mabinasulon?

²⁰ Mas nakakasabot kita samtang nagpapadayon hi Jehova. Siyahan hiya nagsiring: “Tungod han karat-an han iya pagkamaawaon ako napungot, ngan hinampak ha iya; akon tinago an akon nawong ngan napungot; ngan hiya nagpadayon ha pag-isol ha dalan han iya kasingkasing.” (Isaias 57:17) An mga sayop nga nabuhat tungod han kahakog sigurado nga nakaaghat ha Dios nga masina. Samtang an kasingkasing han usa nagpapabilin nga matinalapason, hi Jehova padayon nga nasisina. Kondi kumusta man kon an matinalapason kumarawat han disiplina? Niyan ipapakita ni Jehova kon paonan-o an iya gugma ngan kalooy nagpapagios ha iya: “Akon hinkit-an an iya mga paagi, ngan magtatambal ha iya: ako liwat magmamando ha iya; ngan mag-uuli hin mga paglipay ha iya ngan ha iya mga masurub-on.” (Isaias 57:18) Katapos ipadapat an disiplina, gintatambal ni Jehova an usa nga mabinasulon ngan ginliliaw hiya ngan adton nasusubo nga kaupod niya. Salit han 537 A.K.P., an mga Judio nakauli ha ira nasud. Totoo, an Juda waray na gud magin independente nga ginhadian ilarom han usa nga hadi ha tulin ni David. Ha gihapon, gin-ayad an templo ha Jerusalem, ngan iginpahiuli an totoo nga pagsingba.

21. (a) Paonan-o iginpahiuli ni Jehova an espiritu han dinihogan nga mga Kristiano han 1919? (b) Ano nga kalidad an maopay nga patuboon naton sugad nga mga indibiduwal?

²¹ “An Hitaas ngan an Harangdon nga Usa,” hi Jehova, nagpakita liwat hin pagtagad para ha kaopayan han dinihogan nga nanhibilin han 1919. Tungod han ira mabinasulon, mapainubsanon nga disposisyon, maloloy-on nga gintagad han harangdon nga Dios, hi Jehova, an ira duro nga kasakitan ngan gintalwas hira tikang ha sugad-Babilonya nga pagkabihag. Iya ginkuha an ngatanan nga hiparakdolan ngan gintugwayan hira  ngadto ha kagawasan basi hira makagbuhat han putli nga pagsingba ha iya. Salit an ginsiring ni Jehova pinaagi kan Isaias nagkaada katumanan hito nga panahon. Ngan ha luyo hito nga mga pulong aada an waray kataposan nga mga prinsipyo nga naaplikar ha kada usa ha aton. An pagsingba la hadton mga mapainubsanon an ginkakarawat ni Jehova. Ngan kon an usa han mga surugoon ni Jehova makasala, sadang niya kilalahon dayon an iya sayop, karawaton an pagsaway, ngan tadungon an iya mga paagi. Hinaot diri gud naton hingalimtan nga hi Jehova nagtatambal ngan nagliliaw ha mga mapainubsanon kondi “nakontra ha mga mapahitas-on.”—Jakobo 4:6, NW.

‘Kamurayaw ha Ira nga Hirayo Ngan Hirani’

22. Ano nga kabubuwason an igintagna ni Jehova para ha mga (a) mabinasulon? (b) maraot?

²² Ha pagtanding han kaibahan han kabubuwason hadton nagbabasol ngan hadton nagpapadayon han ira maraot nga mga buhat, hi Jehova nagpahayag: “Ako nagbubuhat han bunga han mga im-im: Kamurayaw, kamurayaw, ha iya nga hirayo ngan ha iya nga hiraniay, . . . ngan akon hiya tatambalon. Kondi an mga maraot pariho han dagat nga ginsasamok; kay ini diri nakakapahuway, ngan an iya katubigan nagtatambak hin hanang ngan hin hugaw. Waray kamurayaw . . . ha mga maraot.”—Isaias 57:19-21.

23. Ano an bunga han mga im-im, ngan ha ano nga paagi hi Jehova “nagbubuhat” hini nga bunga?

²³ An bunga han mga im-im amo an halad nga pagdayaw ngadto ha Dios—an pagpahayag han iya ngaran ha mga tawo. (Hebreo 13:15) Paonan-o hi Jehova “nagbubuhat” hito nga pagpahayag ha mga tawo? Basi makaghalad hin halad ha pagdayaw, an indibiduwal kinahanglan mahibaro anay mahitungod ha Dios ngan katapos tumoo ha iya. An pagtoo—usa nga bunga han espiritu han Dios—nagpapagios hito nga tawo nga isumat ha iba an iya hinbatian. Ha iba nga pagkayakan, nagpapasamwak hiya ha mga tawo. (Roma 10:13-15; Galasia 5:22) Sadang liwat hinumdoman nga hi Jehova amo an nagsusugo ha iya mga surugoon nga isumat an iya kadayawan. Ngan hi Jehova amo an usa nga nagtatalwas han iya katawohan, nga nagpapahinabo nga mahimo nira an sugad nga mga paghalad hin pagdayaw. (1 Pedro 2:9) Salit, masisiring gud nga hi Jehova an nagbuhat hini nga bunga han mga im-im.

24. (a) Hin-o an nahibabaro han kamurayawan han Dios, ngan ano an resulta? (b) Hin-o an diri nahibabaro han kamurayawan, ngan ano an resulta para ha ira?

²⁴ Sigurado nga makalilipay gud nga bunga han mga im-im an iginhalad han mga Judio samtang tipabalik hira ngadto ha ira natawohan nga tuna ngan nagkakanta hin mga pagdayaw ngadto kan Jehova! Sigurado nga malipayon gud hira ha paghibaro han kamurayawan han Dios, “hirayo” man hira—hirayo ha Juda, nga naghuhulat pa han ira pag-uli—o “hiraniay”—nakaabot na ha ira natawohan nga tuna. Ha daku nga kabaliktaran, naiiba gud an mga kahimtang han mga magraot! An bisan hin-o nga diri gumios uyon ha disiplina ni Jehova, an bisan hin-o nga magraot ngan bisan hain man hira, waray gud kamurayawan. Sugad hin mabalod nga dagat, padayon nga namumunga hira, diri han bunga han mga im-im, kondi hin “hanang ngan hin hugaw,” han ngatanan nga mahugaw.

25. Paonan-o an damu nga mga tawo ha bisan diin nahibabaro han kamurayawan?

²⁵ Yana liwat, iginpapasamwak han mga magsiringba ni Jehova ha bisan diin an maopay nga sumat han Ginhadian han Dios. An mga Kristiano ha bisan diin ha sobra 230 nga nasud naghahalad han bunga han ira mga im-im, nagpapahayag han pagdayaw ha amo la matuod nga Dios. An mga pagdayaw nga ira ginkakanta hinbabatian “tikang ha kataposan han tuna.” (Isaias 42:10-12) Adton namamati ngan nagios uyon ha ira mga kapahayagan nakarawat han kamatuoran han Pulong han Dios, an Biblia. An sugad ha ira nahibabaro han kamurayawan, nga nagtitikang ha pag-alagad ha “Dios nga nahatag hin kamurayawan.”—Roma 16:20, NW.

26. (a) Ano an dadangatan han mga magraot? (b) Ano an gimaopayi nga saad ha mga maaghop, ngan ano an sadang magin determinasyon naton?

²⁶ Totoo, an mga magraot diri namamati ha mensahe han Ginhadian. Kondi, ha diri mag-iiha, diri na hira tutugotan nga samukon an kamurayawan han mga magtadong. “Salit diri mag-iiha, ngan an mga magraot pagwawad-on,” nagsasaad hi Jehova. Adton nasarig han panalipod ni Jehova magtatag-iya han tuna ha makalilipay nga paagi. “An maaghop makakapanunod han tuna, ngan maglilipay hira tungod han kahuraan han kamurayaw.” (Salmo 37:10, 11, 29) Magigin makaruruyag gud nga lugar an aton tuna hito nga panahon! Hinaot kita ngatanan magin determinado nga diri gud wad-on an kamurayaw han Dios, basi kita makagkanta han pagdayaw ha Dios ha waray kataposan.

[Mga footnote]

[Mga Pakiana]