Mga Batan-on nga Nagpapalipay han Kasingkasing ni Jehova

Ini nga aradman nga mga artikulo igin-andam labi na gud para ha mga batan-on dida ha mga Saksi ni Jehova. Salit, amon gindadasig an mga batan-on nga pag-adman hin maopay ini nga mga artikulo ngan magkomento hin agsob ha panahon nga ginhihisgotan ini ha Pag-aram ha Barantayan ha kongregasyon.

“Magin makinaadmananon ka, anak ko, ngan lipaya an akon kasingkasing, basi ako makabaton ha iya nga nagtatamay ha akon.”—PROBERBIOS 27:11, NW.

1, 2. (a) Isaysay kon an kadani la ba ha mga butang han kalibotan nangangahulogan nga diri ka angayan magin Kristiano. (Roma 7:21) (b) Ano an imo hinbabaroan tikang ha ehemplo ni Asap? (Kitaa an kahon, ha pahina 13.)

 HANDURAWA nga namamalit ka hin mga bado. Samtang nagpipili, nakita mo an usa nga bado nga naruyagan mo dayon. An kolor ngan estilo hito baga in angay gud ha imo, ngan an prisyo nagpapakita nga barato gud ini. Kondi ginkita mo ito hin mas maopay. Nahipausa ka gud tungod kay natastas na an mga kataposan han tela, ngan baga in diri maopay an pagkatahi. An bado, bisan kon maopay, baratuhon an pagkahimo. Gagastuhon mo ba an imo kwarta ha sugad hito nga diri maopay nga produkto?

² Itanding ini ha kahimtang nga bangin atubangon mo sugad nga Kristiano nga batan-on. Ha siyahan nga pagkita, an mga butang hini nga kalibotan—pariho gud hiton nga bado—bangin makaruruyag gud. Pananglitan, an imo mga kaeskwela bangin kumadto ha makalilipay nga mga panagtawo, magtumar hin droga, mag-irignom, makig-date, ngan makighilawas antes ikasal. Nadadani ka ba, usahay, ha sugad hito nga estilo-han-kinabuhi? Naghahandom ka ba nga sarihan bisan gutiay la an ira tinatawag nga kagawasan? Kon amo, ayaw dayon paghunahuna nga maraot ka ngan diri angayan magin Kristiano. Ha pagkamatuod, kinikilala han Biblia nga an kalibotan nakakadani gud—bisan ha tawo nga naruruyag nga lipayon an Dios.—2 Timoteo 4:10.

 3. (a) Kay ano nga waray kapulsanan an pagtinguha han mga butang han kalibotan? (b) Paonan-o iginhuhulagway han usa nga Kristiano an kawaray-kapulsanan han kalibotanon nga mga tinguha?

³ Yana alayon kitaa hin maopay an mga butang nga igintatanyag hini nga kalibotan, sugad la nga imo gin-uusisa an usa nga bado nga karuyag mo paliton. Pakianhi an imo kalugaringon, ‘Ano an kuwalidad hini nga sistema han mga butang?’ An Biblia nasiring nga “an kalibotan nawawara.” (1 Juan 2:17) Bisan ano nga kalipayan tikang ha kalibotan temporaryo la ilarom han gimaopayi nga mga kahimtang. Dugang pa, an diri-diosnon nga paggawi nag-aani hin seryoso nga mga resulta. Sigurado nga diri ito mapulsanon. An usa nga Kristiano, nga kinahanglan mag-ilob han tinatawag niya nga “mga kasakit tungod han sayop nga paggamit han pagkabatan-on,” nagsiring: “An kalibotan bangin makaruruyag ngan hiringyapon. Ngan karuyag hito nga tumoo ka nga mahimo ka magkaada han klase han kalipayan hito nga waray kasakit. Kondi matin-aw nga imposible gud ito. Gagamiton ka han kalibotan, ngan  kon tapos na ito, ilalabog ka hito.” a Kay ano nga karagan an imo pagkabatan-on ha sugad nga ubos nga paagi han pagkinabuhi?

Panalipod Tikang ha “Usa nga Maraot”

4, 5. (a) Antes hiya mamatay, ano an ginhangyo ni Jesus ha pag-ampo kan Jehova? (b) Kay ano nga angayan ini nga hangyo?

⁴ Tungod kay maaram nga ini nga sistema han mga butang waray maihahatag nga anoman nga de-kalidad, an mga batan-on ha mga Saksi ni Jehova nangangalimbasog nga likyan an pakigsangkay hini nga kalibotan. (Jakobo 4:4) Usa ka ba hinin matinumanon nga mga batan-on? Kon amo, angay ka kumendasyonan. Oo, diri masayon an pag-ato ha pag-ipit han mga igkasi-batan-on ngan magin kaiba, kondi may-ada usa nga makakabulig ha imo.

⁵ Antes hiya mamatay, nag-ampo hi Jesus nga “bantayan” unta ni Jehova an iya mga disipulo “tungod han usa nga maraot.” (Juan 17:15, NW) Ginhangyo ini ni Jesus nga may maopay nga hinungdan. Maaram hiya nga an pagtipig han integridad diri magigin masayon para ha iya mga sumurunod, anoman an ira edad. Kay ano? Usa han mga hinungdan, sugad han kinilala ni Jesus, an iya mga disipulo maatubang ha gamhanan, diri-nakikita nga kaaway—“an usa nga maraot,” hi Satanas nga Yawa. An Biblia nasiring nga ini nga maraot nga espiritu nga linarang “sugad hin maaringasa nga leon, naglilinakatlakat, pagpinamiling hin iya lalamyon.”—1 Pedro 5:8.

 6. Paonan-o kita nahibabaro nga hi Satanas waray pagpaid ha mga batan-on?

⁶ Ha bug-os nga kasaysayan, nalilipay gud hi Satanas ha pagdara han pinakamabangis nga kasakitan ha katawohan. Tagda an makangingirhat nga mga kalamidad nga iginpaantos ni Satanas kan Job ngan ha iya pamilya. (Job 1:13-19; 2:7) Bangin nahinunumdoman mo an mga sumat mahitungod han mga hitabo durante han imo panahon nga may-ada han kinaiya han madarahog nga espiritu ni Satanas. An Yawa naglilinakatlakat, ngan ha iya pamiling hin lalamyon, waray hiya kalooy ha mga batan-on. Ha tinikangan han siyahan nga siglo K.P., pananglitan, hi Herodes nagplano ha pagpatay han ngatanan nga kabataan nga lalaki ha Betlehem nga duha ka tuig an edad o mas bata pa. (Mateo 2:16) Posible nga hi Satanas an nagpagios kan Herodes—ha pangalimbasog nga patayon an bata nga ha maabot nga panahon magigin an iginsaad han Dios nga Mesias ngan magpapadapat han paghukom han Dios kan Satanas! (Genesis 3:15) Matin-aw, hi Satanas waray pagpaid ha mga batan-on. An iya tuyo amo la an paglamoy hin damu nga mga tawo tubtob ha mahihimo niya. Totoo ini labi na yana, kay iginlabog na hi Satanas tikang ha langit nganhi ha tuna, nga “may daku nga kasina, kay hinbaroan niya nga halipot na la nga oras iton iya pag-ukoy.”—Pahayag 12:9, 12.

 7. (a) Paonan-o naiiba gud hi Jehova kan Satanas? (b) Ano an inaabat ni Jehova mahitungod ha imo pagpahimulos han kinabuhi?

 ⁷ Ha daku nga kabaliktaran kan Satanas, nga may-ada “daku nga kasina,” hi Jehova may-ada “mahumok nga pagpaid.” (Lukas 1:78, NW) Hiya an personipikasyon mismo han gugma. Ha pagkamatuod, inin gihitaasi nga kalidad ipinapakita gud han aton Maglalarang salit an Biblia nasiring: “An Dios amo an gugma.” (1 Juan 4:8) Magkaiba gud an dios hini nga sistema han mga butang ngan an Dios nga nakapribilehiyo ka nga singbahon! Samtang hi Satanas namimiling han iya lalamyon, hi Jehova “diri buot nga may-ada mawara.” (2 Pedro 3:9) Iya gintatagad nga presyoso an tagsa nga tawhanon nga kinabuhi—upod na an imo kinabuhi. Kon hi Jehova nagsasagdon ha imo pinaagi han iya Pulong nga diri ka magin bahin han kalibotan, diri ka niya gindidid-an nga magpahimulos han imo kinabuhi o ginpupugngan an imo kagawasan. (Juan 15:19) Ha kabaliktaran, nagbabantay hiya ha imo tungod han usa nga maraot. Karuyag han imo langitnon nga Amay nga magkaada ka han butang nga mas maopay gud kay han lumalabay nga mga kalipayan hini nga kalibotan. Karuyag niya nga makarawat mo an “totoo nga kinabuhi”—kinabuhi nga waray kataposan ha paraiso nga tuna. (1 Timoteo 6:17-19) Karuyag ni Jehova nga maglampos ka, ngan ginsasagda ka niya nga mangalimbasog nga madangat iton nga tumong. (1 Timoteo 2:4) Dugang pa, hi Jehova naghahatag ha imo hin espesyal nga pagdapit. Ano ito?

“Lipaya an Akon Kasingkasing”

8, 9. (a) Ano nga regalo an maihahatag mo kan Jehova? (b) Paonan-o gintatamay ni Satanas hi Jehova, sugad han ipinakita ha kahimtang ni Job?

⁸ Nakapalit ka na ba hin regalo para ha usa ka duok nga sangkay ngan katapos nakita mo an nawong han imo sangkay nga nahiyom gud tungod han kasurprisa ngan pagpasalamat ha pakakarawat hito? Bangin naghunahuna ka hin maiha kon ano nga klase hin regalo an angayan para hiton nga tawo. Yana tagda ini nga pakiana: Ano nga klase hin regalo an maihahatag mo ha imo Maglalarang, hi Jehova nga Dios? Ha siyahan, bangin waray pulos iton nga ideya. Ano an ginkikinahanglan han Makagarahum tikang ha usa la nga tawo? Ano an maihahatag mo ha iya nga diri pa niya gintatag-iya? An Biblia nabaton ha Proberbios 27:11, (NW): “Magmakinaadmananon ka, anak ko, ngan lipaya an akon kasingkasing, basi nga ako makabaton ha iya nga nagtatamay ha akon.”

⁹ Sugad han sigurado nga hinbabaroan mo na tikang ha imo pag-aram ha Biblia, hi Satanas nga Yawa an nagtatamay kan Jehova. Nasiring hiya nga bisan hin-o nga tawo nga nag-aalagad ha Dios nagbubuhat hito, diri tungod ha gugma, kondi tungod ha hakugnon nga mga hinungdan. Nasiring hi Satanas nga kon mag-antos hira hin kakurian, isasalikway dayon nira an totoo nga pagsingba. Tagda pananglitan an ginsiring ni Satanas kan Jehova mahitungod han matadong nga tawo nga hi Job: “Waray ba nimo himoi hiya ha palibot hin alad, ngan ha palibot han iya balay, ngan ha palibot han ngatanan nga iya, ha kada ligid? Imo ginbendisyonan an buhat han iya mga kamot, ngan an iya manggad ginpadamu dida ha tuna. Kondi bikyawa an imo kamot yana, ngan kamkama an ngatanan nga iya, ngan hiya magtatampalas ha imo ngada ha imo nawong.”—Job 1:10, 11.

10. (a) Paonan-o kita nahibaro nga diri la integridad ni Job an ginruhaduhaan ni Satanas? (b) Paonan-o ka nahiuupod ha isyu han pagkasoberano?

¹⁰ Sugad han iginpahayag ha asoy han Biblia, ginruhaduhaan ni Satanas diri la an pagkamaunungon ni Job kondi an pagkamaunungon liwat han ngatanan nga iba nga nag-aalagad ha Dios—kaupod ka na. Ha pagkamatuod, ha pag-unabi ha katawohan ha kabug-osan, hi Satanas nagsiring kan Jehova: “An ngatanan nga gintatag-iya han tawo [diri la hi Job kondi an bisan hin-o] iya ihahatag para han iya kinabuhi.” (Job 2:4) Nakikita mo ba an imo bahin hinin importante nga isyu? Sugad han ipinakita ha Proberbios 27:11, hi Jehova nasiring nga may-ada usa ka butang nga maihahatag mo ha iya—usa ka basihanan basi makabaton hiya ha nagtatamay ha iya, hi Satanas. Handurawa—an Soberano ha Uniberso naghahangyo ha imo nga makigbahin ha pagbaton ha gidadakui nga isyu ha bug-os nga panahon. May-ada ka daku nga responsabilidad ngan pribilehiyo! Matutuman mo ba an ginhahangyo ni Jehova ha imo? Gintuman ito ni Job. (Job 2:9, 10) Gintuman liwat ito ni Jesus ngan han damu nga iba pa ha bug-os nga kasaysayan, upod na an damu nga mga batan-on. (Filipos 2:8; Pahayag 6:9) Mahihimo mo liwat ito. Kondi, usa la nga butang an imo masisiguro, waray neutral hini nga butang. Pinaagi han imo binuhatan, maipapakita  mo nga nasuporta ka ha pagtamay ni Satanas o ha baton ni Jehova. Hain an pipilion mo nga susuportahan?

Hi Jehova Nagmamangno ha Imo!

11, 12. Importante gud ba kan Jehova kon pilion mo nga mag-alagad ha iya o diri? Isaysay.

¹¹ Importante gud ba kan Jehova kon ano an imo pipilion? Diri ba damu na nga mga tawo an nagpabilin nga matinumanon salit may-ada na hiya igo nga baton kan Satanas? Oo, iginpirit ni Satanas nga waray usa nga nag-aalagad kan Jehova tungod ha gugma, usa nga akusasyon nga napamatud-an na nga buwa. Kondi, karuyag ni Jehova nga dumapig ka ha iya ha isyu han pagkasoberano tungod kay nagmamangno hiya ha imo sugad nga indibiduwal. Hi Jesus nagsiring: ‘Diri kaburut-on han akon Amay nga aadto ha langit, nga may mawara hini nga mga gudtiay.’—Mateo 18:14.

¹² Matin-aw, interesado hi Jehova ha imo pinipili. Mas importante pa gud, naaapektohan hiya hito. Iginpapatin-aw han Biblia nga hi Jehova may-ada hilarom nga mga pagbati nga ginpapagios han maopay o han maraot nga mga buhat han mga tawo. Pananglitan, han pauroutro nga nagrebelde an mga Israelita, hi Jehova ‘nasubo.’ (Salmo 78:40, 41) Antes han Delubyo ha panahon ni Noe, han “an karaotan daku ha tuna,” hi Jehova ‘nasubo ha iya kasingkasing.’ (Genesis 6:5, 6) Hunahunaa an kahulogan hini. Kon magbuhat ka hin sayop, mapapasubo mo an imo Maglalarang. Diri ini nangangahulogan nga an Dios maluya o nadadaog han emosyon. Lugod, nahigugma hiya ha imo ngan nagmamangno han imo kaopayan. Ha luyo nga bahin, kon ginbubuhat mo an husto, nalilipay an kasingkasing ni Jehova. Nalilipay hiya diri la tungod kay may-ada hiya dugang nga baton kan Satanas kondi tungod kay mahimo na liwat hiya yana nga magin imo Parabalos. Ngan ito an karuyag niya nga magin. (Hebreo 11:6) Mahigugmaon gud an imo Amay nga hi Jehova nga Dios!

Hura nga mga Bendisyon Yana

13. Paonan-o an pag-alagad kan Jehova nagdadara hin mga bendisyon bisan yana mismo?

¹³ Diri la ha tidaraon maieksperyensyahan an mga bendisyon tungod ha pag-alagad kan Jehova. Damu nga mga batan-on dida ha mga Saksi ni Jehova an ginbibendisyonan hin kalipay ngan katagbaw yana mismo, ngan may-ada maopay nga hinungdan. “An mga sugo ni Jehova magtul-id nga nakakalipay ha kasingkasing,” nagsurat an salmista. (Salmo 19:8) Mas maaram hi Jehova kay ha bisan hin-o nga tawo kon ano an maopay para ha aton. Pinaagi kan propeta Isaias, hi Jehova nagsiring: “Ako hi Jehova nga imo Dios, nga nagtututdo ha imo ha pagpahimulos, nga nagmamando ha imo ha dalan nga imo paglalaktan. O nga ikaw namati unta han akon mga sugo! Dida hito an imo kamurayaw masusugad hin usa nga salog, ngan an imo pagkamatadong masusugad han mga balod han dagat.”—Isaias 48:17, 18.

14. Paonan-o makakabulig ha imo an mga prinsipyo han Biblia basi malikyan an kasakit han pangutang?

 ¹⁴ An pagsunod ha mga prinsipyo ha Biblia mabulig ha imo nga malikyan an duro nga kasakitan ngan kasubo ha kasingkasing. Pananglitan, an Biblia nasiring nga adton nagpapatubo hin gugma ha salapi “nagtugob ha ira hin damu nga kasakitan.” (1 Timoteo 6:9, 10) Nakakaeksperyensya ba an bisan hin-o han imo mga kaupod han maraot nga resulta han ira gugma ha salapi, sugad han ginsisiring hini nga teksto? An iba nga mga batan-on may-ada damu nga utang tungod la kay naghuhunahuna hira nga kinahanglan magkaada hira hin pinakabag-o-an-etiketa nga mga bado ngan pinakabag-o nga mga gamit. Tungod kay nabubug-atan han maiha, hitaas-an-tubo nga pagbinayad ha mga butang nga diri mo gud maaakos usa ito nga masakit nga klase han pagkauripon!—Proberbios 22:7.

15. Ha ano nga mga paagi nagpapanalipod ha imo an mga prinsipyo han Biblia tikang ha kasakit nga resulta han seksuwal nga imoralidad?

¹⁵ Tagda liwat an may kalabotan ha seksuwal nga imoralidad. Kada tuig ha bug-os nga kalibotan, damu nga mga tinedyer an nagbuburod nga diri kasal. An iba nanganganak nga waray hingyap o kapas ha pagmangno hito. An iba nagpapapunit ngan nag-aantos han mga resulta han ginsasakit nga konsensya. Ngan aada adton batan-on nga kalalakin-an ngan kababayin-an nga nagkakaada sakit nga naibabalhin pinaagi han pakighilawas, sugad han AIDS. Para ha usa nga nakilala kan Jehova, siyempre, an gidadakui nga resulta han ngatanan amo an nadaot nga relasyon kan Jehova. b (Galasia 5:19-21) May maopay nga hinungdan nga an Biblia nasiring: “Palagiw kamo tikang ha pakighilawas.”—1 Korinto 6:18.

Pag-alagad ha “Malipayon nga Dios”

16. (a) Paonan-o kita nahibaro nga karuyag ni Jehova nga maglipay ka ha imo pagkabatan-on? (b) Kay ano nga naghimo hi Jehova hin mga giya basi imo sundon?

¹⁶ An Biblia naghuhulagway kan Jehova sugad nga an “malipayon nga Dios.” (1 Timoteo 1:11, NW) Karuyag niya nga magin malipayon ka liwat. Ha pagkamatuod, an iya mismo Pulong nasiring: “Paglipay ha imo pagkabatan-on. Paglipay samtang batan-on ka pa.” (Eklesiastes 11:9, Today’s English Version) Kondi nakikita ni Jehova an lahos pa ha presente nga takna ngan maaram hiya han maiha nga mga resulta han maopay ngan maraot nga binuhatan. Salit nagsasagdon hiya ha imo:  “Hinumdumi yana an imo Magburuhat ha mga adlaw han imo pagkabatan-on, nga diri pa madangat an magraot nga mga adlaw, ngan magtitikahirani an mga tuig, han imo pagsiring: Waray ko kalipay ha ira.”—Eklesiastes 12:1.

17, 18. Paonan-o iginpahayag han usa nga batan-on nga Kristiano an iya kalipay ha pag-alagad kan Jehova, ngan paonan-o ka magkakaada hin sugad hito nga kalipay?

¹⁷ Yana nga panahon, damu nga mga batan-on an nakaagi hin daku nga kalipay ha pag-alagad kan Jehova. Pananglitan, an 15-anyos nga hi Lina nagsiring: “May-ada ako pagsarig ngan pagtahod-ha-kalugaringon. May-ada ako mahimsog nga lawas tungod kay naglilikay ako ha pagsigarilyo ngan ha mga droga. May-ada ako birilhon nga giya nga iginhahatag ha akon pinaagi han kongregasyon nga nabulig ha akon ha pag-ato ha duro nga pag-ipit ni Satanas. Malipayon an akon nawong tungod han makaparig-on nga mga kaupod ha Kingdom Hall. Labaw ha ngatanan, may-ada ako paglaom nga kinabuhi nga waray kataposan ha tuna.”

¹⁸ Pariho kan Lina, damu nga Kristiano nga mga batan-on an nangangalimbasog gud ha makuri nga pakig-away para han pagtoo, ngan nagdadara ini ha ira hin kalipay. Nasasabtan nira nga an ira kinabuhi—bisan kon puno hin mga problema usahay—may-ada totoo nga katuyoan ngan totoo nga tidaraon. Salit, magpadayon ha pag-alagad ha Dios nga interesado gud han imo kaopayan. Lipaya an iya kasingkasing, ngan hiya magpapalipay ha imo yana ngan ha kadayonan!—Salmo 5:11.

[Mga footnote]

Nahinunumdoman Mo Ba?

• Ano nga peligro an inaatubang mo tikang ha “usa nga maraot,” hi Satanas?

• Paonan-o mo mapapalipay an kasingkasing ni Jehova?

• Paonan-o ipinapakita han Biblia nga hi Jehova nagmamangno ha imo?

• Ano an pipira han mga bendisyon nga resulta han pag-alagad kan Jehova?

[Mga Pakiana]

[Kahon/Retrato ha pahina 13]

Usa ka Matadong nga Tawo nga Hirani Na Mahipakdol

Hi Asap usa ka prominente nga Lebihanon nga musikero ha templo ni Jehovah ha kadaan nga Israel. Nagkomposo pa ngani hiya hin mga karantahon nga ginamit ha pagsingba ha publiko. Kondi, bisan pa han iya talagsahon nga mga pribilehiyo, may-ada panahon nga nadani hi Asap ha diri-diosnon nga paggawi han iya mga kadungan-dungan nga baga in nagtatalapas han mga balaud han Dios nga waray maraot nga mga resulta. “Gutiay la an akon mga tiil mahibulag; gutiay la an akon mga biksal manhitalindas,” siring ni Asap ha urhi. “Aawaon ako hadton mga palabilabihon, han pakakita ko han kauswagan han mga magraot.”—Salmo 73:2, 3.

Ha urhi, kinadto hi Asap ha santuaryo han Dios ngan nag-ampo mahitungod hito. Tungod kay gintirutimbang utro an mga butang ha espirituwal nga paagi, nasabtan niya nga hi Jehova nangangalas ha karaotan ngan maabot an panahon, an magraot ngan an magtadong mag-aani han ira iginsabwag. (Salmo 73:17-20; Galasia 6:7, 8) Oo, an magraot aada ha madalunot nga tuna. Ha kataposan, matutumba hira kon bungkagon na ni Jehova inin diri-diosnon nga sistema.—Pahayag 21:8.

[Mga Retrato ha pahina 15]

Interesado gud hi Jehova ha imo kaopayan, samtang an tumong ni Satanas amo an paglamoy ha imo

[Retrato ha pahina 16]

Damu nga mga batan-on an nagkakaada han gidadakui nga kalipay pinaagi han pag-alagad kan Jehova upod an mga igkasi-Kristiano