Napaid hi Jehova ha Ordinaryo nga mga Tawo

KINAHANGLAN ba kita magin labaw ha ordinaryo o makatirigamnan ha usa nga paagi basi makita han Dios? Hi Abraham Lincoln, an ika-16 nga presidente han Estados Unidos, iginkotar nga nagsiring: “An Ginoo mas naruruyag ha ordinaryo nga mga tawo. Salit damu hinduro an iya ginhimo nga sugad hito.” Damu an naabat nga ordinaryo nga mga tawo hira ngan waray espesyal nga mga kalidad. An pagin ordinaryo bangin sabton sugad nga pagin “pobre, minos.” Ha pariho nga paagi, an pulong nga “komon” mahimo magpasabot hin “kakulang hin pribilehiyo o espesyal nga mga kahimtang,” “ubos ha ordinaryo nga mga suruklan,” o “ikaduha nga klase” pa ngani. Ano nga klase hin mga tawo an imo karuyag makaupod? Karuyag mo ba makaupod an hambog, agresibo, mapahitas-on nga mga indibiduwal? Diri ba mas karuyag mo makaupod an makisangkayon, mapainubsanon, diri-salingkapaw nga mga tawo nga nagpapakita hin sinsero, mahigugmaon nga interes ha iba?

Tungod kay an pag-abuso ha emosyon ngan pagtamay komon ha kalibotan yana, nakukurian an iba ha pagtoo nga an Dios personal nga interesado ha ira. “Tikang ako ha pamilya nga an mga membro diri masayon magpakita hin gugma ha usa kag usa. Ginminos ako, ginsunlog, ngan ginhimo nga pataraw-an. Salit, temprano pa ha akon kinabuhi inabat ko na nga waray ako pulos,” nagsurat an usa nga parabasa hini nga magasin. “Dara ko pa gihapon yana an nakagamot na gud nga mga pagbati tikang ha akon naglabay nga nagpapaluya ha akon kon nakakaeksperyensya ako hin kakurian.” Kondi, may-ada mga hinungdan ha pagtoo nga an Dios personal nga interesado ha ordinaryo nga mga tawo.

An Interes han Dios ha Ordinaryo nga mga Tawo

“Daku hi Jehova, ngan pagdayawon gud hin daku; ngan an iya pagkadaku diri hikilal-an,” nagsurat hi Hadi David. (Salmo 145:3) Kondi, diri ini nagpupugong kan Jehova ha pag-ataman ha aton ha mahigugmaon ngan mapinairon nga paagi. (1 Pedro 5:7) Pananglitan, an salmista nagsiring: “Hi Jehova hirani hadton may masinakitnon nga kasingkasing, ngan nagluluwas hiya hadton mga mabinasulon an espiritu.”—Salmo 34:18.

An mga butang nga nakakadani han atensyon han mga tawo ha kalibotan, sugad han pisikal nga kahusay, dungog, o karikohan, diri importante para ha Dios. Ipinakita han Balaud han Dios ha Israel an iya mapinairon nga interes ha mga kablas, mga ilo, mga balo, ngan mga dumuruong. An Dios nagsiring ha mga Israelita, nga madarahog nga gintrato mismo ha Ehipto: “Ha dumuruong diri ka magbuhat hin maraot, bisan paglupiglupig ha iya . . . Diri niyo paghatagan hin kagol-anan an bisan hin-o nga balo nga babaye, o ilo nga bata. Kon iyo hira paghatagan hin kagol-anan, ngan magsinggit hira ngadi ha akon; pamamatian ko gud an ira singgit.” (Eksodo 22:21-24) Dugang pa, iginpahayag ni propeta Isaias an iya pagsarig ha pagpaid han Dios ha mga kablas: “Ikaw nagin panalipdanan han mga kablas, usa nga panalipdanan han runos ha iya kaguol, usa nga arayopan tikang han bagyo, usa nga sirongan tikang ha kapaso, kon an puros han mga magpakalilisang nagsusugad-sugad hin bagyo patok ha kuta.”—Isaias 25:4.

Ha iya bug-os nga ministeryo, hi Jesu-Kristo, nga amo “an dagway” han Dios, nagin susbaranan ha iya mga disipulo ha pagpakita hin totoo nga interes ha ordinaryo nga mga tawo. (Hebreo 1:3) Ha pakakita han damu nga katawohan nga “nanluluya ngan nagpapatlaag, sugad hin mga karnero nga waray magbarantay,” hi Jesus “nalooy ha ira.”—Mateo 9:36.

Tigamni liwat kon ano nga klase hin mga tawo an ginpili ni Jesus nga magin iya mga apostol—kalalakin-an  nga iginhulagway sugad nga “diri edukado ngan ordinaryo.” (Buhat 4:13, NW) Han mamatay hi Jesus, nagtikang dapiton han iya mga sumurunod an ngatanan nga klase han mga tawo nga mamati ha Pulong han Dios. Hi apostol Pablo nagsurat nga an “bisan hin-o nga diri-tumuroo o ordinaryo nga tawo” mahimo sumulod ha Kristiano nga kongregasyon ngan magin tumuroo. (1 Korinto 14:24, 25, NW) Imbes nga pilion la adton gindadayaw sumala ha mga suruklan han kalibotan, ginpili han Dios an damu nga simple, ordinaryo nga mga tawo nga mag-alagad ha iya. “Tan-awa niyo, mga kabugtoan an pagkatinawag niyo,” nagsiring hi apostol Pablo, “nga diri damu an mag-aram sumala ha unod, diri damu an magkusog, diri damu an mga bantogan, an gintawag; kondi, ginpili han Dios an mga waray himurulsan nga mga bagay ha kalibotan, basi niya hibutang ha kaawod an mga mag-aram; ngan ginpili han Dios an mga magluya nga mga bagay ha kalibotan, basi niya hibutang ha kaawod an mga bagay nga magkusog. Ngan an mga ubos ngan gintatamay nga mga butang ha kalibotan, amo an ginpili han Dios, oo, ngan an mga bagay nga diri mga asya, basi niya mawara an mga amo nga bagay: basi nga waray unod nga magdayaw [“maghambog,” NW] ha atubangan han Dios.”—1 Korinto 1:26-29.

Yana nga panahon, an Dios ha pariho nga paagi, interesado gud ha aton. Kaburut-on han Dios nga “an ngatanan nga mga tawo maluwas, ngan nga makadangat ha pagkilala han kamatuoran.” (1 Timoteo 2:4) Kon hinigugma gud han Dios an katawohan salit iya iginpadara an iya Anak ha tuna basi mamatay para ha aton, waray kita hinungdan nga umabat nga diri kita hinigugma o waray bili. (Juan 3:16) Iginpakita ni Jesu-Kristo ha iya mga sumurunod an bili han pagtagad bisan ha pinakawaray gud bili ha iya kabugtoan ha espirituwal, nga sugad hin ginbubuhat ito para kan Jesus mismo. Hiya nagsiring: “Tungod han iyo ginbuhat ha usa hini nga akon mga kabugtoan, nga mga gurogudtiay, iyo ginbuhat ha akon.” (Mateo 25:40) Anoman an pagkita ha aton han kalibotan, kon hinigugma naton an kamatuoran, espesyal kita ha paniplatan han Dios.

Ito an inabat ni Francisco, a usa nga waray-amay nga bata nga taga-Brazil, katapos makapatubo hin personal nga relasyon ha Dios. Hiya nagsaysay: “An pagkilala kan Jehova ngan han iya organisasyon nakabulig ha akon nga malamposan an akon pagbati hin kawaray-seguridad ngan pagin awdanon. Hinbaroan ko nga hi Jehova personal nga interesado ha kada usa ha aton.” Para kan Francisco, nagin totoo nga Amay hi Jehova.

Pagtagad ha mga Batan-on

Hi Jehova interesado gud ha mga batan-on diri la sugad nga grupo kondi sugad nga mga indibiduwal. Siyempre, bata man o lagas, diri gud naton karuyag nga maghunahuna nga mas maoroopay kita kay han totoo nga kahimtang naton. Kondi, bangin may-ada kita mga abilidad ngan mga kalidad nga mahimo gamiton han Dios ha tidaraon. Maaram hi Jehova kon ano nga pagpauswag ngan pagbansay an ginkikinahanglan naton basi magamit hin bug-os an aton abilidad. Pananglitan, tigamni an asoy ha 1 Samuel kapitulo 16. Tungod kay an iba nga posible nga mga kandidato para ha pagkahadi han Israel baga hin mas kuwalipikado para kan propeta Samuel, iginsaysay ni Jehova an Iya mga hinungdan ha pagpili kan David, an gimamanghori nga  anak ni Jesse, sugad nga an tidaraon nga hadi han Israel: “Ayaw tan-awa an iya pamahungpahong, o an kahitaas han iya lawas, tungod kay akon hiya [magurang nga bugto ni David] diniri: kay hi Jehova nakita diri sugad han pagkita han tawo; kay an tawo nagtatan-aw han kinikita ha gawas, kondi hi Jehova nagtatan-aw han kasingkasing.”—1 Samuel 16:7.

Makakasarig ba an mga batan-on yana nga panahon nga interesado gud hi Jehova ha ira? Tagda hi Ana, usa nga batan-on nga taga-Brazil. Pariho han iba nga mga batan-on, nabaraka hiya ha pagkinita hin panlimbong ngan kawaray-hustisya. Katapos, nagtikang ig-upod hiya ngan an iya kabugtoan han iya amay ha Kristiano nga mga katirok. Inabot an panahon, naruyagan niya an iya hinbabaroan mahitungod han Pulong han Dios. Nagtikang ha pagbasa hi Ana han Biblia ngan han Kristiano nga mga publikasyon ngan ha pag-ampo ngadto kan Jehova nga Dios. Hinay-hinay, nakapatubo hiya hin duok nga relasyon ha Dios. Hiya nagsaysay: “Naruruyag ako pagbisikleta ngadto ha bungtod nga hirani ha akon balay diin nakikita kon an mag-opay nga mga katunod han adlaw. Nag-ampo ako kan Jehova ngan nagpasalamat ha iya tungod han iya pagkabuotan ngan pagkamahinatagon, ngan nangalimbasog ako ha pagsumat ha iya kon mationan-o ko hiya kahinigugma. An pagkilala kan Jehova nga Dios ngan paghibaro han iya mga katuyoan nakahatag ha akon hin kamurayawan ngan pagbati hin kasigurohan.” Ikaw ba liwat nangangalimbasog ha pamiling hin panahon ha pamalandong han mahigugmaon nga pag-ataman ni Jehova?

Oo, an aton gintikangan mahimo magpakuri ha aton nga magkaada kita duok nga relasyon kan Jehova. Tagda pananglitan hi Lidia. Han nagsumat hiya ha iya amay mahitungod hin personal nga butang nga seryoso hinduro, waray gud niya hiya tagda, nasiring la: “Diri ito importante.” Bisan kon hinsabtan niya nga karuyag la han iya amay nga hingalimtan niya an problema, hi Lidia nagsiring: “An pag-aram ha Biblia nakahatag ha akon han ngatanan nga akon hingyap ngan hin damu pa nga mga butang. An nakakadani nga personalidad ni Jehova nakahimo ha iya nga magin akon gimaopayi nga sangkay. Yana may-ada ako mahigugmaon ngan masinabuton nga Amay nga akon nasusumatan han akon mga pagbati ngan mga ginkakahadlokan gud. Mahimo ako gumasto hin mga oras ha pakiistorya ha pinakaimportante nga Persona ha uniberso, nakakasiguro nga mamamati hiya ha akon.” An mga teksto ha Biblia sugad han Filipos 4:6, 7 nakabulig ha iya nga umabat han mahigugmaon nga pagpaid ni Jehova. Ito nga teksto nasiring: “Diri kamo mabaraka hin bisan ano nga bagay; kondi ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro. Ngan an kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna kan Kristo Jesus.”

Bulig ha Pag-ataman han Imo mga Kinahanglanon

Iginpapakita ni Jehova an iya pagtagad para ha iya tagsa nga mga surugoon, sugad man ha iya kongregasyon ha bug-os nga kalibotan. Maipapakita naton an aton gugma para han aton langitnon nga Amay pinaagi han pagkaada panahon ha pakiistorya ha iya. Diri gud naton sadang igbalewaray an aton relasyon ha iya. Mahunahunaon pirme hi David han iya relasyon kan Jehova. Hiya nagsiring: “Igtutdo ha akon an imo nga agianan, O Jehova; tutdui ako han imo mga dalan. Mandoi ako ha imo kamatuoran, ngan ako tutdui; kay ikaw an Dios han akon kaluwasan: ha imo ako nahulat ha bug-os nga adlaw.”—Salmo 25:4, 5.

An ideya han pagkaada duok nga relasyon ha Dios bangin bag-o ha imo. Anoman an imo mga problema, makakasarig ka pirme nga an Gihitaasi makakabulig ha imo, uyon ha iya kaburut-on. (1 Juan 5:14, 15) Salit, mahibaro ha pagin espisipiko  ha imo mga pag-ampo, gintatagad an imo mga kahimtang ngan mga panginahanglan.

An bili ha pagsantop han aton mga panginahanglan iginpapatin-aw ha pag-ampo ni Hadi Salomon han iginpahinungod an templo: “Kon may-ada dida ha tuna kagutoman, kon may-ada peste, kon may-ada pagkauga o alamag, duron o ulod; kon an ira mga kaaway maglikos ha ira dida ha tuna han ira mga bungto; bisan ano nga sirot o bisan ano nga sakit in maada; bisan ano nga pag-ampo ngan pakimalooy an paghimoon han bisan hin-o nga tawo, o han bug-os nga imo katawohan nga Israel, nga makilala an tagsa ka tawo han iya kalugaringon nga kabidoan . . . dida hito pamatian mo tikang ha langit . . . ngan pasayloa, ngan hatagi an tagsa ka tawo sumala han ngatanan niya nga dalan.” (2 Kronikas 6:28-30) Oo, ikaw la an ‘makilala han imo kalugaringon nga kabidoan.’ Importante gud, kon sugad, nga hibaroan an imo totoo nga mga panginahanglan ngan mga hingyap. Kon maaram ka na, “[hi Jehova] mahatag ha imo han mga pinangangaro han imo kasingkasing.”—Salmo 37:4.

Parig-ona an Imo Relasyon kan Jehova

Nalilipay hi Jehova nga an ordinaryo nga mga tawo makapahimulos hin duok nga relasyon ha iya. Ginpapasarig kita han Iya Pulong: “Magigin Amay ako niyo, ngan kamo magigin mga anak ko nga kalalakin-an ngan kababayin-an; siring han Ginoo, an Makagagahum.” (2 Korinto 6:18) Oo, naruruyag gud hi Jehova ngan an iya Anak nga maglampos kita ngan kumarawat hin waray kataposan nga kinabuhi. Makapadasig gud an paghibaro nga bubuligan kita ni Jehova ha pag-ataman han aton mga responsabilidad ha pamilya, ha trabaho, ngan ha Kristiano nga kongregasyon!

Kondi, kita ngatanan naatubang hin makuri nga mga panahon. Bangin mabido gud kita tungod han maluya nga kahimsog, mga problema ha pamilya, hamubo nga suweldo, o iba pa. Bangin diri kita maaram ha paglampos ha usa nga pagsari o usa nga kakurian. An dugang nga mga pag-ipit, direkta man o diri-direkta, ginpapahinabo han maraot nga paraakusar, hi Satanas nga Yawa, nga nakikiaway ha espirituwal kontra ha katawohan han Dios. Kondi, may-ada usa nga nakakasabot ngan nabulig ha aton nga matipigan an aton maopay nga relasyon kan Jehova. Hiya amo hi Jesu-Kristo ha iya ginpahitaas nga katungdanan ha kalangitan. Aton mababasa: “Kay diri nga waray ta usa nga Hitaas nga Saserdote nga diri sadang makahimo hin pagbati ha aton mga kakurian; kondi hiya man ginsulay ha ngatanan nga paagi sugad ha aton, kondi waray sala. Busa manaraon kita nga nangahas ngadto ha hadianon nga lingkuranan han grasya, basi nga makakarawat kita hin pagkalooy, ngan makaagi hin grasya nga makakatambulig ha aton ha oras nga may kinahanglan.”—Hebreo 4:15, 16.

Naghahatag gud ha aton hin pagsarig an paghibaro nga diri naton kinahanglan magin bantogan o riko basi kumarawat han pag-uyon han Dios! Bisan kon aada ka ha makasurubo nga kahimtang, magin pariho han salmista nga nag-ampo: “Makalolooy ako ngan kablasanon: bisan pa an Ginoo nahinunumdom ha akon: ikaw an akon parabulig ngan parabawi.” (Salmo 31:9-14; 40:17) Sarig nga hinigugma ni Jehova an mapainubsanon, ordinaryo nga mga tawo. Oo, ‘mailalabog naton an ngatanan naton nga pangarit ha iya kay napaid hiya ha aton.’—1 Pedro 5:7, NW.

[Footnote]

[Mga Retrato ha pahina 29]

Damu han mga sumurunod ni Jesus an diri edukado ngan ordinaryo

[Retrato ha pahina 30]

An mga Kristiano nangangalimbasog nga magkaada marig-on nga pagtoo

[Mga Retrato ha pahina 31]

Diri kinahanglan nga magin bantogan kita basi kumarawat han pag-uyon han Dios