Ano an Karuyag Mo Igpakiana ha Dios?

AN MGA tawo ha bug-os nga kalibotan may-ada seryoso nga mga pakiana mahitungod han kinabuhi. May-ada ka ba liwat mga pakiana nga sugad hito? Iginpakiana han damu nga mga tawo an ira mga pakiana ha mga magturutdo han relihiyon kondi waray hira makakarawat hin makapatagbaw nga mga baton. An iba namalandong hini nga mga pakiana ha ira kalugaringon la. An pipira nag-aampo para han giya. Posible gud ba nga makakuha ka hin mga baton tikang ha Dios mahitungod han mga pakiana nga nakakagupong ha imo? Kaupod han mga pakiana nga karuyag igpakiana han damu ha Dios amo ini.

Hin-o ka gud ba, Dios ko?

An paagi han paglantaw han mga tawo ha Dios naiimpluwensyahan han ira kultura, han relihiyon han ira mga kag-anak, ngan bangin han ira kalugaringon nga pagpili. An iba nga mga tawo nagamit hin usa nga ngaran para ha Dios; an iba natawag la ha iya nga Dios. Importante gud ba ito? May-ada ba usa la nga totoo nga Dios nga nagpapahayag han iya kalugaringon ngan han iya ngaran ha aton?

Kay ano nga may-ada damu hinduro nga pag-antos?

Kon an waray-pagtagad o imoral nga pagkinabuhi han usa ka tawo nakakadaot han iya kahimsog o nagriresulta ha iya kakablas, bangin hiya magreklamo. Kondi maaram gud hiya kon kay ano nga nag-aantos hiya.

Kondi, damu nga iba pa an nag-aantos hinduro tungod han mga hinungdan nga diri hira an responsable. An iba may-ada maiha na nga mga sakit. An iba naghihimakuri gud ha pangalimbasog nga magkaada mauukyan ngan igo nga pagkaon para ha ira mga pamilya. Minilyon an biktima han krimen, girra, waray-pinipili nga kamadarahog, natural nga mga kalamidad, o kawaray-hustisya han mga tawo nga may-ada awtoridad.

Hinsasabtan kon kay ano nga damu an nagpapakiana: ‘Kay ano nga an sugad nga mga kahimtang nagigin kaylap hinduro? Kay ano nga gintutugotan han Dios ini ngatanan nga pag-antos?’

Kay ano nga aanhi ako? Ano an katuyoan han kinabuhi?

Ini nga mga pakiana agsob nga nabangon tungod han pag-abat hin kapakyasan han usa ka tawo nga an adlaw-adlaw nga buruhaton diri naghahatag hin totoo nga katagbaw—ngan damu nga mga tawo an naabat hito. Minilyon han iba an natoo nga an kinabuhi han tagsa nga tawo baga hin itinanda na nga daan han Dios. Totoo gud ba ito? Kon totoo nga may-ada espesyal nga katuyoan an Dios para ha imo, waray ruhaduha nga karuyag mo hibaroan ito.

Ha ngatanan nga mga libro ha kalibotan, may-ada usa nga matin-aw nga nasiring nga inspirado ito han Dios. Sugad la han imo lalaoman ha usa nga mensahe nga tikang gud ha Dios para ha ngatanan nga katawohan, mababasa ini nga libro ha mas damu nga mga yinaknan kay han iba nga libro nga nahisurat na. Ito amo an Baraan nga Biblia. Dida hito nga libro, an Maglalarang han langit ngan han tuna, an Dios mismo, nagpapakilala kon hin-o hiya ngan kon ano an iya ngaran. Maaram ka ba hito nga ngaran? Maaram ka ba han ginsisiring han Biblia mahitungod han kon ano nga klase hin Persona an Dios? Maaram ka ba kon ano an ginsisiring hito mahitungod han ginkikinahanglan han Dios ha imo?

 [Ginkuhaan han Retrato ha pahina 2]

KOBRE: Chad Ehlers/Index Stock Photography

[Ginkuhaan han Retrato ha pahina 3]

Bukid: Chad Ehlers/Index Stock Photography