Ikaw ba Nagpapakiana, “Hain hi Jehova?”

“Hira nagpahirayo tikang ha akon . . . Waray man hira pagsiring: Hain hi Jehova?”—JEREMIAS 2:5, 6.

 1. Kon an mga tawo nagpapakiana, “Hain an Dios?,” ano an bangin nahuhunahuna nira?

 “HAIN an Dios?” Ito an iginpapakiana han damu nga mga tawo. An iba ha ira nangangalimbasog la nga masabtan an basihan nga kamatuoran mahitungod han Maglalarang, kon diin hiya nahimumutang. Iginpapakiana ito han iba katapos han kaylap nga kalamidad o kon inaabat nira mismo an kakurian ngan diri nira masabtan kon kay ano nga an Dios waray maghilabot. Kondi an iba diri gud nagpapakiana tungod kay ira iginsasalikway an ideya nga naeksister an Dios.—Salmo 10:4.

 2. Hin-o an naglalampos ha ira pamiling ha Dios?

² Siyempre, kinikilala han damu nga mga tawo an hura nga pamatuod nga may-ada Dios. (Salmo 19:1; 104:24) An iba ha ira kontento na ha pagkaada la usa nga klase hin relihiyon. Kondi an duro nga gugma ha kamatuoran nagpapagios ha damu nga iba pa nga mga tawo, ha ngatanan nga nasud, nga bilngon an totoo nga Dios. Waray makawang an ira pangalimbasog tungod kay hiya “diri hirayo ha tagsatagsa ha aton.”—Buhat 17:26-28.

 3. (a) Hain an lugar nga urukyan han Dios? (b) Ano an iginpapasabot han Kasuratanhon nga pakiana, “Hain hi Jehova?”

³ Kon tinuod nga hin-aagian han usa ka tawo hi Jehova, nasasabtan niya nga “an Dios Espiritu,” diri-nakikita han mga mata han tawo. (Juan 4:24) Gintawag ni Jesus an totoo nga Dios nga “akon Amay nga aadto ha langit.” Ano an kahulogan hito? Nga ha espirituwal nga kahulogan, hitaas an lugar nga inuukyan han aton langitnon nga Amay, sugad la nga an mga langit ha kawanangan hitaas kay ha tuna. (Mateo 12:50; Isaias 63:15) Kondi, bisan kon diri naton nakikita an Dios pinaagi han aton pisikal nga mga mata, iya ginpapahinabo nga makilala naton hiya ngan hibaroan naton an damu pa mahitungod han iya mga katuyoan. (Eksodo 33:20; 34:6, 7) Binabaton niya an mga pakiana han sinsero nga mga tawo nga karuyag mahibaro han kahulogan han kinabuhi. Mahitungod han mga butang nga nakakaapekto ha aton mga kinabuhi, naghahatag hiya hin masasarigan nga basihanan basi hibaroan naton an iya katungdanan, karuyag sidngon, kon paonan-o niya gintatagad an sugad nga mga butang ngan kon an aton mga hingyap nahiuuyon ba ha iya mga katuyoan. Karuyag niya nga magpakiana kita mahitungod han sugad nga mga butang ngan mangalimbasog gud nga hibaroan an mga baton. Pinaagi kan propeta Jeremias, ginsaway ni Jehova an katawohan han kadaan nga Israel tungod kay napakyas hira ha pagbuhat hini. Maaram hira han ngaran han Dios, kondi waray hira magpakiana, “Hain hi Jehova?” (Jeremias 2:6) An katuyoan ni Jehova diri amo an ira siyahan nga gintatagad. Diri hira nagbibiling han iya giya. Kon naatubang ha paghimo hin mga desisyon, daku man ngan gutiay, ikaw ba nagpapakiana, “Hain hi Jehova?”

Adton Namiling hin Giya Tikang ha Dios

 4. Paonan-o kita magpapahimulos tikang ha susbaranan ni David ha pagpakiana kan Jehova?

⁴ Han batan-on pa an anak ni Jesse nga hi David, napatubo niya an marig-on nga pagtoo kan Jehova. Kilala niya hi Jehova sugad nga “an buhi nga Dios.” Personal nga naeksperyensyahan ni David an panalipod ni Jehova. Tungod kay napagios han pagtoo ngan gugma ha “ngaran ni Jehova,” ginpatay ni David an armado gud nga Pilisteohanon nga higante nga hi Goliat. (1 Samuel 17:26, 34-51) Kondi, an kalamposan ni David waray magpagios ha iya nga sumarig ha iya kalugaringon. Waray hiya mangatadongan nga anoman an iya buhaton yana, hi Jehova magbibendisyon ha iya. Pauroutro nga durante han sumunod nga mga tuig, nagpakiana hi David kan Jehova kon ginkinahanglan niya nga magdesisyon. (1 Samuel 23:2; 30:8; 2 Samuel 2:1; 5:19) Hiya nagpadayon ha pag-ampo: “Igtutdo  ha akon an imo mga agianan, O Jehova; tutdui ako han imo mga dalan. Mandoi ako ha imo kamatuoran, ngan ako tutdui; kay ikaw an Dios han akon kaluwasan: ha imo ako nahulat ha bug-os nga adlaw.” (Salmo 25:4, 5) Pagkamaopay gud nga susbaranan nga angay sundon naton!

5, 6. Paonan-o ginbiling ni Jehosapat hi Jehova ha magkalainlain nga mga higayon ha iya kinabuhi?

⁵ Ha panahon ni Hadi Jehosapat, an ikalima nga hadi ha hadianon nga katulinan tikang kan David, nakig-away ha Juda an gintampo nga kasundalohan han tulo nga nasud. Han inatubang hiya hini nga kasuruk-an han nasud, hi Jehosapat “nag-andam ha iya ngahaw pangita kan Jehova.” (2 Kronikas 20:1-3) Diri ini an siyahan nga panahon nga ginbiling ni Jehosapat hi Jehova. Ginlikyan han hadi an pagsingba kan Baal nga ginbuhat han apostata nga norte nga ginhadian han Israel ngan ginpili niya nga maglakat ha mga dalan ni Jehova. (2 Kronikas 17:3, 4) Salit yana han inatubang hiya hin problema, paonan-o ‘ginbiling hi Jehova’ ni Jehosapat?

⁶ Ha iya pag-ampo ha publiko ha Jerusalem durante hinin peligroso nga panahon, ipinakita ni Jehosapat nga nahinumdoman niya an harangdon nga gahum ni Jehova. Iya nahunahuna hin maopay an mahitungod han katuyoan ni Jehova nga iginpakita pinaagi han pagpaiwasa Niya han iba nga mga nasud ngan han paghatag hin espisipiko nga tuna ha Israel sugad nga panurundon. Kinilala han hadi an iya panginahanglan han bulig ni Jehova. (2 Kronikas 20:6-12) Gintugotan ba ni Jehova nga hiagian hiya durante hiton nga okasyon? Oo. Pinaagi kan Jahasiel, usa nga Lebihanon, hi Jehova naghatag hin espisipiko nga instruksyon, ngan kinabuwasan Iya iginhatag an kadaogan ha Iya katawohan. (2 Kronikas 20:14-28) Paonan-o ka makakasiguro nga igpapahinabo liwat ni Jehova nga hiagian mo hiya kon umayop ka ha iya para han giya?

 7. Kan kanay mga pag-ampo an pinamamatian han Dios?

⁷ Hi Jehova diri nagpapasulabi. Iya gindadapit an mga tawo han ngatanan nga nasud nga pamilngon hiya ha pag-ampo. (Salmo 65:2; Buhat 10:34, 35) Maaram hiya kon ano an aada ha kasingkasing hadton nanginginyupo ha iya. Iya ginpapasarig kita nga pinamamatian niya an mga pag-ampo han mga magtadong. (Proberbios 15:29) Iya tinutugotan nga hiagian hiya han iba nga waray magpakita hadto hin interes ha iya kondi mapainubsanon na yana nga namimiling han iya giya. (Isaias 65:1) Pinamamatian pa ngani niya an mga pag-ampo hadton napakyas ha pagsunod han iya balaud kondi mapainubsanon nga nagbabasol na yana. (Salmo 32:5, 6; Buhat 3:19) Kondi, kon an kasingkasing han usa ka tawo diri nagpapasakop ha Dios, an mga pag-ampo hiton nga tawo diri makakabulig ha iya. (Markos 7:6, 7) Tagda an pipira nga mga ehemplo.

Nag-ampo Hira Kondi Waray Batona

 8. Kay ano nga waray karawata ni Jehova an mga pag-ampo ni Hadi Saul?

⁸ Katapos sumatan ni propeta Samuel hi Hadi Saul nga iginsalikway hiya han Dios tungod han iya pagtalapas, hi Saul hinapa ha atubangan ni Jehova. (1 Samuel 15:30, 31) Kondi diri ito sinsero. An hingyap ni Saul, diri an pagin masinugtanon ha Dios, kondi nga pasidunggan hiya han katawohan. Ha urhi, han an mga Pilisteohanon nakikig-away ha Israel, hi Saul ha pormalidad la nga paagi nagpakiana kan Jehova. Kondi, han waray hiya batona, nagkonsulta hiya hin espiritista, bisan kon maaram hiya nga ginkukondenar ito ni Jehova. (Deuteronomio 18:10-12; 1 Samuel 28:6, 7) Ha pagsumaryo, an 1 Kronikas 10:14 nasiring mahitungod kan Saul: “[Hiya] waray magpakiana kan Jehova.” Kay ano? Tungod kay an mga  pag-ampo ni Saul diri basado ha pagtoo. Salit, baga in waray gud hiya mag-ampo.

 9. Ano an sayop ha pakimalooy ni Sedekia para han giya ni Jehova?

⁹ Ha sugad man nga paagi, samtang nagtitiarabot an kataposan han ginhadian han Juda, mas damu pa nga mga pag-ampo an iginhalad ngan ginkonsulta an mga propeta ni Jehova. Kondi, an katawohan nag-angkon nga natahod hira kan Jehova, kondi ha pariho nga panahon nagbubuhat han idolatriya. (Sepania 1:4-6) Bisan kon nagpakiana hira ha Dios, diri hira sinsero ha pagpasakop ha iya kaburut-on. Hi Hadi Sedekia nanginyupo kan Jeremias nga magpakiana kan Jehova para ha iya. Ginsumatan na ni Jehova an hadi kon ano an kinahanglan niya buhaton. Kondi tungod kay kulang hin pagtoo ngan nahadlok ha mga tawo, an hadi waray sumugot ha tingog ni Jehova, ngan hi Jehova waray maghatag ha iya hin iba nga baton nga mas maruruyagan han hadi.—Jeremias 21:1-12; 38:14-19.

10. Ano an sayop ha paagi han pagbiling ni Johanan han giya ni Jehova, ngan ano an mahibabaroan naton tikang ha iya sayop?

¹⁰ Katapos mabungkag an Jerusalem ngan binaya na an kasundalohan han Babilonya upod an bihag nga mga Judio, nag-andam hi Johanan basi dad-on ngadto ha Ehipto an gutiay nga grupo han mga Judio nga nagpabilin ha Juda. Ginhimo an ira mga plano, kondi antes bumaya naghangyo hira kan Jeremias nga mag-ampo para ha ira ngan maghangyo hin giya tikang kan Jehova. Kondi, han waray nira makarawat an baton nga karuyag nira, binaya hira ngan ginbuhat an ira ginplano. (Jeremias 41:16–43:7) Nakikita mo ba hini nga mga hitabo an mga leksyon nga mapapahimulsan mo basi kon bilngon mo hi Jehova, igpapahinabo niya nga hiagian mo hiya?

“Padayon nga Siguroha”

11. Kay ano nga kinahanglan iaplikar naton an Efeso 5:10?

¹¹ An totoo nga pagsingba nag-uupod hin labaw pa ha pagpabawtismo ha tubig sugad nga simbolo han aton dedikasyon, pagtambong ha mga katirok ha kongregasyon, ngan pakigbahin ha ministeryo ha publiko. Nahiuupod an aton bug-os nga paagi han pagkinabuhi. Adlaw-adlaw naieksperyensyahan naton an epekto han mga pag-ipit—an iba tuso, an iba mas matin-aw—nga mahimo makapasimang ha aton tikang ha dalan nga nahiuuyon ha diosnon nga debosyon. Paonan-o kita magios hini nga mga pag-ipit? Han nagsurat ha matinumanon nga mga Kristiano ha Efeso, hi apostol Pablo nagsagda ha ira: “Padayon nga siguroha niyo kon ano an kinakarawat han Ginoo.” (Efeso 5:10, NW) An kapulsanan han pagbuhat hito igin-iilustrar han damu nga mga kahimtang nga igin-asoy ha Kasuratan.

12. Kay ano nga waray malipay hi Jehova han iginbalhin ni David an arka han kauyonan ngadto ha Jerusalem?

¹² Katapos nga iginbalik an arka han kauyonan ngadto ha Israel ngan gintipigan ha damu ka mga tuig ha Kiriat-jearim, ginhingyap ni Hadi David nga ibalhin ito ngadto ha Jerusalem. Iya ginkonsulta an mga kapitan han katawohan ngan nagsiring nga ibabalhin an Arka ‘kon baga in maopay ito ha ira ngan kon kinakarawat ito ni Jehova.’ Kondi nagpasibaya hiya ha pagbiling hin maopay ha pagsiguro han kaburut-on ni Jehova hito nga butang. Kon iya ginbuhat ito, an Arka diri gud unta ikakarga ha karomata. Ginpas-an unta ito han Kohatitanhon nga mga Lebihanon ha ira mga sugbong, sugad han matin-aw nga iginsugo han Dios. Bisan kon agsob magpakiana hi David kan Jehova, napakyas hiya ha pagbuhat hito ha husto nga paagi hini nga okasyon. Kadaot an nagin resulta. Ha urhi kinarawat ni David: “Hi Jehova nga Dios nasina ha aton, tungod kay waray naton hiya  pamilnga sumala han lagda.”—1 Kronikas 13:1-3; 15:11-13; Numeros 4:4-6, 15; 7:1-9.

13. Ha karantahon nga ginkanta han malampuson nga iginbalhin an Arka, ano nga pahinumdom an nahiupod?

¹³ Han an Arka ha kataposan gindara han mga Lebihanon tikang ha balay ni Obed-edom ngadto ha Jerusalem, ginkanta an karantahon nga ginkomposo ni David. Nag-upod ito han kinasingkasing nga pahinumdom: “Pamilngon niyo hi Jehova ngan an iya kusog; pamilnga an iya nawong ha gihapon. Hinumdumi an iya mga buhat nga kahiburongan nga iya nabuhat, an iya mga katingalahan, ngan an mga paghukom han iya baba.”—1 Kronikas 16:11, 12.

14. Paonan-o kita makakapahimulos tikang ha maopay nga susbaranan ni Salomon ngan tikang ha iya mga sayop ha urhi han iya kinabuhi?

¹⁴ Antes hiya mamatay, ginsagdonan ni David an iya anak nga hi Salomon: “Kon imo pamilngon [hi Jehova], tutugotan niya nga hiagian mo hiya.” (1 Kronikas 28:9, NW) Han nahitrono na, hi Salomon nagpakadto ha Gibeon, diin nahimutang an tolda han katirok, ngan naghalad ngadto kan Jehova. Didto gindapit ni Jehova hi Salomon: “Pangaro kon ano an akon ihahatag ha imo.” Ha pagbaton ha hangyo ni Salomon, hi Jehova hura nga naghatag ha iya hin kinaadman ngan kahibaro basi paghukman an Israel, ngan gawas pa hito Iya igindugang an mga bahandi ngan kadungganan. (2 Kronikas 1:3-12) Gintukod ni Salomon an maanyag nga templo nga ginamit an arkitektural nga plano nga iginhatag ni Jehova kan David. Kondi may kalabotan ha iya pag-asawa, napakyas hi Salomon ha pamiling kan Jehova. Nag-asawa hi Salomon hin kababayin-an nga diri mga magsiringba ni Jehova. Ha iya urhi nga mga tuig, ira iginhilig an iya kasingkasing pahirayo kan Jehova. (1 Hadi 11:1-10) Prominente man kita, makinaadmananon, o maaramon, importante nga ‘padayon nga siguruhon kon ano an kinakarawat han Ginoo’!

15. Han an Etiopiahanon nga hi Sera inabot kontra han Juda, kay ano nga may pagsarig nga makakag-ampo hi Asa nga tatalwason ni Jehova an Juda?

¹⁵ An panginahanglan hini dugang nga pinabug-atan han rekord han pagkahadi ni Asa, an apo ha tuhod ni Salomon. Onse ka tuig katapos nga nagin hadi hi Asa, an Etiopiahanon nga hi Sera nanguna ha usa ka milyon nga kasundalohan kontra han Juda. Tatalwason ba ni Jehova an Juda? Sobra 500 ka tuig una pa, matin-aw nga iginsaysay ni Jehova kon ano an malalaoman han iya katawohan kon mamati hira ha iya ngan sundon an iya mga sugo ngan kon ano an ira malalaoman kon diri nira buhaton ito. (Deuteronomio 28:1, 7, 15, 25) Ha tinikangan han iya pagmando, ginkuha na ni Asa tikang ha iya nasasakopan an mga altar ngan mga harigi nga ginamit ha palso nga pagsingba. Iya ginsagda an katawohan nga “pamilngon hi Jehova.” Waray maghulat hi Asa nga umatubang anay hin kalamidad antes niya buhaton ito. Salit tungod kay may pagtoo kan Jehova, makakag-ampo hi Asa ha iya nga gumios para ha ira kaopayan. Ano an resulta? Tinagan an Juda hin makatirigamnan nga kadaogan.—2 Kronikas 14:2-12.

16, 17. (a) Bisan kon madaugon hi Asa, ano nga pahinumdom an iginhatag ha iya ni Jehova? (b) Han ginios hi Asa ha diri-maaramon nga paagi, ano nga bulig an iginhatag ha iya, kondi ano an nagin reaksyon niya? (c) Paonan-o kita magpapahimulos ha pagtagad ha paggawi ni Asa?

¹⁶ Kondi, han binalik hi Asa nga madaugon, sinugo ni Jehova hi Asaria nga tapoon an hadi ngan sumiring: “Pamati kamo ha akon, Asa, ngan bug-os nga Juda ngan Benjamin: hi Jehova maupod ha iyo samtang nga kamo maupod ha iya; ngan kon mangita kamo ha iya, hiaagian hiya niyo; kondi kon kamo bumaya ha iya, hiya mabaya ha iyo.” (2 Kronikas 15:2) Tungod kay may nabag-o nga kadasig, sinuportahan ni Asa an totoo nga pagsingba. Kondi paglabay hin 24 ka tuig, han inatubang utro hin girra, napakyas hi Asa ha pamiling kan Jehova. Waray niya konsultaha an Pulong han Dios, ngan waray niya hinumdumi an ginbuhat ni Jehova han an Etiopiahanon nga kasundalohan sinulong ha Juda. May kalurongan nga nakig-alyansa hiya ha Sirya.—2 Kronikas 16:1-6.

¹⁷ Tungod hini, ginsugo ni Jehova an propeta nga hi Hanani nga sawayon hi Asa. Bisan hito nga panahon, han iginsaysay an panhunahuna ni Jehova mahitungod hito nga butang, nagpahimulos unta hi Asa. Lugod, nasina hiya ngan iginbutang hi Hanani ha balay han mga pandugan. (2 Kronikas 16:7-10) Makasurubo gud! Kumusta man kita? Ginbibiling ba naton an Dios kondi katapos, diri kita nakarawat hin sagdon? Kon an nababaraka ngan nagtatagad nga tigurang nagamit han Biblia ha pagsagdon ha aton tungod kay nagagapos kita han kalibotan, inaapresyar ba naton  an mahigugmaon nga bulig nga iginhahatag ha aton basi hibaroan “kon ano an kinakarawat han Ginoo”?

Ayaw Kahingalimot ha Pagpakiana

18. Paonan-o kita magpapahimulos tikang ha mga pulong ni Elihu kan Job?

¹⁸ Kon ilarom han pag-ipit, bisan an usa nga may-ada na maopay nga rekord ha pag-alagad kan Jehova mahimo mapakyas ha pagin kinakarawat ni Jehova. Han ginhampak hi Job hin makangingirhat nga sakit, ginpatay an iya mga anak ngan nawara an iya materyal nga mga panag-iya, ngan sayop nga gin-akusahan hiya han iya mga sangkay, an iya bug-os nga hunahuna nahisentro na la ha iya kalugaringon. Hi Elihu nagpahinumdom ha iya: “Waray nagsiring: Hain an Dios nga akon Magburuhat?” (Job 35:10) Kinahanglan isentro ni Job an iya atensyon ngadto kan Jehova ngan hunahunaon kon paonan-o Niya gintatagad an kahimtang. Mapainubsanon nga kinarawat ni Job iton nga pahinumdom, ngan an iya susbaranan makakabulig ha aton nga buhaton ito liwat.

19. An katawohan han Israel agsob nga napakyas ha pagbuhat han ano?

¹⁹ Maaram an katawohan han Israel ha rekord han mga pakig-upod han Dios ha ira nasud. Kondi agsob gud nga diri nira ito nahinunumdoman kon naatubang hira hin espisipiko nga mga kahimtang ha ira kinabuhi. (Jeremias 2:5, 6, 8) Kon naatubang ha mga pagdesisyon ha kinabuhi, ira ginbubuhat an ira kalugaringon nga kalipay imbes nga magpakiana, “Hain hi Jehova?”—Isaias 5:11, 12.

Padayon nga Magpakiana, “Hain hi Jehova”?

20, 21. (a) Hin-o yana nga panahon an nagpapakita han disposisyon ni Eliseo ha pamiling han giya ni Jehova? (b) Paonan-o naton masusubad ngan mapapahimulsan an ira susbaranan han pagtoo?

²⁰ Han natapos an ministeryo ha publiko ni Elias, ginkuha han iya surugoon nga hi Eliseo an opisyal nga panapton nga nahulog tikang kan Elias, nagpakadto ha Salog Jordan, ginhampak an katubigan ngan nagpakiana: “Hain hi Jehova an Dios ni Elias?” (2 Hadi 2:14) Binaton hi Jehova pinaagi han pagpakita nga an iya espiritu aada na yana kan Eliseo. Ano an mahibabaroan naton tikang hini?

 ²¹ May-ada kapariho hito nga nahitabo ha moderno nga mga panahon. Namatay an iba han dinihogan nga mga Kristiano nga nangunguna ha pagsangyaw nga buruhaton. Adton gintaporan han pagmangno nag-uusisa han Kasuratan ngan nag-aampo kan Jehova para han giya. Pirme hira nagpapakiana, “Hain hi Jehova?” Sugad nga resulta, padayon nga gintutugwayan ni Jehova an iya katawohan ngan ginpapauswag an ira buruhaton. Ginsusubad ba naton an ira pagtoo? (Hebreo 13:7) Kon amo, magpapabilin kita nga duok ha organisasyon ni Jehova, masugot ha iya giya, ngan bug-os nga makikigbahin ha buruhaton nga ginbubuhat ilarom han giya ni Jesu-Kristo.—Sakarias 8:23.

Paonan-o Mo Babatunon?

• Ha ano nga katuyoan sadang kita magpakiana, “Hain hi Jehova?”

• Paonan-o naton hiaagian yana nga panahon an baton ha pakiana nga, “Hain hi Jehova?”

• Kay ano nga diri binabaton an iba nga mga pag-ampo para han giya han Dios?

• Ano nga mga susbaranan ha Biblia an nag-iilustrar han panginahanglan ha ‘pagpadayon ha pagsiguro kon ano an kinakarawat han Ginoo’?

[Mga Pakiana]

[Retrato ha pahina 9]

Paonan-o ginbiling ni Hadi Jehosapat hi Jehova?

[Retrato ha pahina 10]

Kay ano nga nagkonsulta hi Saul ha espiritista?

[Mga Retrato ha pahina 12]

Pag-ampo, pag-aram, ngan pamalandong basi masiguro kon “hain hi Jehova”