“Magin Duok Kamo ha Dios, Ngan Hiya Magigin Duok ha Iyo”

Antes Ngan Katapos—Madulom nga Naglabay, Malamrag nga Tidaraon

“AN PULONG han Dios buhi, ngan maabtik, ngan mamatarom pa kay han bisan ano nga kampilan nga duduha iton tarom, . . . ngan madagmit makasabot ha mga hunahuna ngan mga tinguha han kasingkasing.” (Hebreo 4:12) Ito an ginsiring ni apostol Pablo mahitungod han nakakadulot nga kalidad han mensahe han Dios. An abilidad hito nga maabot an kasingkasing labi nga nakita durante han siyahan nga siglo K.P. Bisan pa han diri-maopay nga impluwensya hito nga mga panahon, ginsul-ot hadton nagin mga Kristiano an bag-o nga personalidad.—Roma 1:28, 29; Kolosas 3:8-10.

An nakakapabag-o nga gahum han pulong han Dios, sugad han nahirekord ha Biblia, nakikita liwat yana nga panahon. Pananglitan, tagda an kahimtang han hitaas ngan makusog nga lalaki nga hi Richard. Tungod kay putóng, nakikipagsuntukay hi Richard ha pinakasimple nga hinungdan. Apektado gud an iya kinabuhi han kamadarahog. Inapi pa ngani hi Richard ha usa nga grupo han mga boksingero. Nagbansay gud hiya ngan nagin tsampyon ha kategoriya han boksing nga heavyweight ha Westphalia, Alemanya. Parahubog liwat hi Richard ngan agsob mahiapi ha maaringasa nga mga araway. Ha usa nga okasyon nga sugad hito, hirapit na mapriso hi Richard han may-ada namatay.

Kumusta man an pag-asawa ni Richard? “Antes kami ni Heike mag-aram ha Biblia,” nahinunumdom hi Richard, “magkaiba an amon estilo han pagkinabuhi. Hi Heike naggasto hin daku nga panahon kaupod han iya kasangkayan nga kababayin-an, samtang nagasto ako hin daku nga panahon ha akon mga hilangkagan—labi na ha boksing, surfing, ngan diving.”

Han magtikang hira Richard ngan Heike ha pag-aram ha Biblia kaupod han mga Saksi ni Jehova, nabug-atan hi Richard ha ideya han paghimo hin baga hin imposible nga mga pagbag-o basi maipahiuyon an iya kinabuhi ha hitaas nga mga suruklan nga aada ha Pulong han Dios. Kondi, samtang mas nakikilala niya hi Jehova nga Dios, napatubo ni Richard an marig-on nga hingyap nga mapalipay hi Jehova. Nasantop ni Richard nga diri inuuyonan han Dios an mga mahigugmaon ha kamadarahog o adton nagamit hito para ha kaliawan. Hinbaroan ni Richard nga “an bisan hin-o nga nahigugma ha kamadarahog kinangangalasan gud han . . . kalag [ni Jehova].”—Salmo 11:5, NW.

Dugang pa, an paglaom nga mabuhi ha waray kataposan ha paraiso nga tuna nakapainteres gud kan Richard ngan Heike. Karuyag nira nga mahingadto hira nga duha! (Isaias 65:21-23) An pagdapit nga “magin duok kamo ha Dios, ngan hiya magigin duok ha iyo” nakabantad gud kan Richard. (Santiago 4:8, NW) Hinsabtan niya an bili han pagsunod hini nga inspirado nga sagdon: “Diri ka maawa ha tawo nga maraugdaog, ngan ayaw pilia an iya mga dalan. Kay an malinarisnon mangil-ad kan Jehova; kondi an iya pakigsangkay aada ha matadong.”—Proberbios 3:31, 32.

Bisan pa han iya marig-on nga hingyap nga bag-ohon an iya mga paagi, nasantop ni Richard nga diri niya mahihimo ito ha iya kalugaringon nga kusog. Nahunahuna niya an panginahanglan nga pangaroon an bulig han Dios pinaagi ha pag-ampo. Ha sugad nga paagi ginios hiya uyon ha mga pulong ni Jesus ngadto ha Iya mga apostol: “Pag-ampo, basi diri kamo mahulog ha pagsulay. Matuod, an espiritu andam, kondi an unod maluya.”—Mateo 26:41.

Katapos mahibaro kon paonan-o ginlalantaw han Dios an kamadarahog ngan mga kasina, nasiguro ni Richard nga diri maopay nga isport an boksing. Pinaagi han bulig tikang kan Jehova ngan pagdasig tikang hadton nag-aram han Biblia kaupod ha iya, waray na  magin madarahog hi Richard. Ginbayaan niya an boksing ngan araway ngan nagdesisyon nga pauswagon an iya kinabuhi sugad nga pamilyado. “An paghibaro han kamatuoran tikang ha Biblia nakabulig ha akon nga umundang ngan maghunahuna anay antes gumios,” siring ni Richard, nga usa na yana nga malumo nga paramangno ha usa han mga kongregasyon han mga Saksi ni Jehova. Hiya nagdudugang: “An mga prinsipyo han gugma ngan pagtahod naggigiya ha akon yana ha akon relasyon ha akon asawa ngan mga anak. Sugad nga resulta, nagin duok an amon pamilya.”

Usahay gin-aakusahan han mga tawo nga sayop an nahibaroan nga mga impormasyon nga an mga Saksi ni Jehova nagbubungkag hin mga pamilya. Kondi, an mga ehemplo han mga indibiduwal nga sugad kan Richard nagpapamatuod nga sayop an ira akusasyon. Ha pagkamatuod, an kamatuoran han Biblia mahimo magresulta hin karig-on ha pamilya ngan malamrag nga tidaraon para hadton may-ada madulom nga naglabay.—Jeremias 29:11.

[Blurb ha pahina 9]

“An paglaom ha paraiso nga tuna nakahatag ha akon hin hinungdan nga magbag-o”

[Kahon ha pahina 9]

Nagios nga mga Prinsipyo han Biblia

An Biblia mahimo magkaada gamhanan nga impluwensya ha mga kinabuhi han mga tawo. Iini an pipira nga mga prinsipyo ha Kasuratan nga nakakabulig ha madarahog nga mga indibiduwal nga magbag-o:

“Hiya nga mahinay ha pagkasina maoroopay kay han kusgan; ngan hiya nga nakakaparong [“nagpupugong,” NW] han iya espiritu, maoroopay kay ha iya nga nakakakuha han bungto.” (Proberbios 16:32) An diri-napupugngan nga kasina usa nga tigaman han kaluyahan, diri han kusog.

“An kanan tawo pagtirotimbang makakahimo ha iya nga mahinay ha pagkasina.” (Proberbios 19:11) An pagkaada kahibaro ngan pagsabot mahitungod han usa nga sitwasyon nakakabulig ha usa nga makita an totoo nga mga rason para han komprontasyon ngan nakakapugong ha usa ka tawo nga tigda nga masina.

‘Ayaw pakigsangkay ha tawo nga mapungtanon, bangin ka makatoon han iya mga dalan.’ (Proberbios 22:24, 25) Maaramon nga nalikay an mga Kristiano ha pakig-upod ha mga mapungtanon.