Mga Pakiana Tikang ha mga Magbarasa

Sayop ba nga patayon an masakit hinduro o lagas na nga minangnoan nga hayop?

Kadam-an nga mga tawo an nagtatagad ha magkalainlain nga mga hayop sugad nga makaruruyag ngan makalilipay. An iba nga inataman nga mga hayop nagigin maopay nga mga kaupod sugad nga minangnoan nga mga hayop. Pananglitan, kilala an mga ayam nga bug-os nga nasunod ngan nahigugma ha mga nagtatag-iya ha ira. Salit, diri urusahon nga hinigugma han mga tawo an sugad nga minangnoan nga hayop, labi na an hayop nga kaupod nira ha sulod hin mga tuig na.

Kondi, halipot an kinabuhi han kadam-an nga minangnoan nga mga hayop. Mahimo mabuhi an mga ayam ha sulod hin 10 tubtob 15 ka tuig o sobra pa, sugad man an mga misay, depende ha klase. Kon lagas na an minangnoan nga mga hayop, mahimo ito mag-antos hin mga sakit ngan mga depekto ha lawas nga mahimo makaguol ha mga tag-iya hito, nga nahinunumdom han mga tuig han barubata ngan mas aktibo pa ini nga mga hayop. Sayop ba an pagpaundang han kasakitan hini nga mga hayop, an pagpatay hito?

Karuyag han usa nga Kristiano nga gumios uyon ha kaburut-on han Dios may kalabotan ha pagtagad ha mga hayop. An mabangis nga pagtrato ha ira kontra gud ha kaburut-on han Dios, kay an iya Pulong nasiring: “An tawo nga matadong nagtatagad han kinabuhi han iya mananap.” (Proberbios 12:10) Kondi, diri ini nangangahulogan nga gintatagad han Dios an mga hayop pariho han pagtagad niya ha mga tawo. Han ginlarang han Dios an mga tawo, iya iginpakita nga may-ada matin-aw nga kaibahan butnga ha ira ngan ha mga hayop. Pananglitan, iya gintagan an mga tawo han paglaom nga kinabuhi nga waray kataposan, kondi waray gud niya ihatag ini nga paglaom ha mga hayop. (Roma 6:23; 2 Pedro 2:12) Tungod kay hiya an Maglalarang, may-ada hiya katungod ha pagtanda han husto nga relasyon butnga han mga tawo ngan mga hayop.

An Genesis 1:28 nagsusumat ha aton kon ano ito nga relasyon. An Dios nagsiring ha siyahan nga mga tawo: “Paghadian niyo an kaisdaan han dagat, ngan an katamsihan ha mga langit, ngan an ngatanan nga mga mananap nga nabantad ha bawbaw han tuna.” Ha pariho nga paagi, an Salmo 8:6-8 nasiring: “Ibinutang mo [Dios] an ngatanan nga mga bagay ha ilarom han iya [kanan tawo] mga tiil: an ngatanan nga mga kakarnerohan ngan kabakahan, oo, ngan an mga kamanampan ha kaumhan, an mga katamsihan ha langit ngan an mga kaisdaan ha dagat.”

Iginpatin-aw han Dios nga an mga hayop mahimo gamiton ngan patayon han tawo ha husto nga paagi. Pananglitan, an ira panit mahimo gamiton sugad nga mga panapton. Katapos han Baha ha panahon ni Noe, gintugotan liwat han Dios an mga tawo nga kaunon an karne han mga hayop, dugang pa ha pagkaon han utanon nga iginhatag na ha ira.—Genesis 3:21; 4:4; 9:3.

Diri ini nagtutugot han waray hinungdan nga pamatay han mga hayop tungod han isport. Ha Genesis 10:9 (NW), iginhuhulagway han Biblia hi Nimrod sugad nga “gamhanan nga parapanganop.” Kondi an pariho nga bersikulo nasiring nga tungod hito hiya “nakontra kan Jehova.”

Salit, bisan kon an tawo may-ada awtoridad ha mga hayop, diri niya sadang abusuhon ito nga awtoridad kondi gamiton ito uyon ha mga prinsipyo han Pulong han Dios. Bangin nag-uupod ini han diri pagtugot nga mag-antos an minangnoan nga hayop ha diri kinahanglanon nga paagi tungod han duro nga kalagas, grabe nga pagkabaldado, o makamaratay nga sakit. Ha sugad nga kahimtang, responsabilidad han usa nga Kristiano nga magdesisyon kon ano an bubuhaton. Kon magdesisyon hiya nga malolooyon an diri pagtugot ha usa nga minangnoan nga hayop nga waray na bisan ano nga paglaom nga matambal nga padayon nga mag-antos, niyan bangin pilion niya nga patayon na la ito.