Paghatag nga Nakakalipay ha Dios

HI Jesus ngan an iya mga disipulo nangangaon hin marasa nga mga pagkaon ha Betania kaupod an pipira nga duok nga kasangkayan, upod na hira Maria, Marta, ngan an binanhaw pa la nga hi Lasaro. Han kumuha hi Maria hin haros tunga hin kilo nga marahalon nga lana ngan iginhirog ito ha mga tiil ni Jesus, nasina hi Judas Iskariote ngan nagpahayag han iya opinyon. “Kay ano nga ini nga balsamo nga waray igbaligya hin tulo ka gatos ka denaryo [katugbang han haros usa ka tuig nga suweldo], ngan ipanhatag ha mga kablas?” nagreklamo hiya. Ha kadagmitan, an iba nagpahayag hin pariho nga mga reklamo.—Juan 12:1-6; Markos 14:3-5.

Kondi, hi Jesus binaton: “Pabay-i hiya. . . . Kay an mga kablas kaupod niyo gihapon, ngan bisan san-o an iyo karuyag makakahimo kamo pagbuhat hin maopay ha ira; kondi hi ako diri kaupod niyo gihapon ha lawas.” (Markos 14:6-9) An Judio nga mga lider han relihiyon nagtutdo nga an paglimos diri la maopay gud ha moral kondi nakakatubos pa ngani han mga sala. Ha luyo nga bahin, iginpatin-aw ni Jesus nga an paghatag nga nakakalipay ha Dios diri limitado la ha paghatag hin mga regalo ha pagbulig ha mga kablas.

An madaliay nga pagtagad ha paagi han paghatag ha siyahan nga Kristiano nga kongregasyon magpapatin-aw han pipira nga praktikal nga mga paagi diin maipapakita naton an aton pagtagad ngan hito nga paagi mapapalipay an Dios pinaagi han aton paghatag. Iginpapakita liwat hito an hitaas nga klase han paghatag nga pinakamapulsanon gud.

“Maghatag hin mga Regalo han Kalooy”

Ha pipira nga mga okasyon gindasig ni Jesus an iya mga disipulo nga “maghatag hin mga regalo han kalooy.” (Lukas 12:33, NW) Kondi, hi Jesus nagpahamangno kontra ha mga pagparayaw nga an tumong amo an pagdayaw la ha naghatag imbes nga pagdayaw ha Dios. “Kon ikaw maglimos,” nagsiring hiya, “diri mo tunggon an budyong ha imo atubangan sugad han mga binuhat han mga salingkapaw ha mga sinagoga ngan ha mga dalan, basi paghimayaon hira han mga tawo.” (Mateo 6:1-4) Ha pag-aplikar hini nga sagdon, an siyahan nga mga Kristiano naglikay ha parayawnon nga pagpakita han nagpapakadiosnon nga mga lider han relihiyon ha ira panahon ngan mas pinili nira an pagbulig hadton nanginginahanglan pinaagi han paghimo hin personal nga mga serbisyo o paghatag hin pribado nga mga regalo.

Pananglitan, ha Lukas 8:1-3 (NW), ginsusumatan kita nga gingamit nira Maria Magdalena, Juana, Susana, ngan han iba “an ira mga panag-iya” ha diri-parayawnon nga pagserbisyo kan Jesus ngan ha iya mga apostol. Bisan kon ini nga kalalakin-an  diri mga kablas, ira ginbayaan an ira mga ginkakakitaan basi isentro an ira mga pangalimbasog ha ministeryo la. (Mateo 4:18-22; Lukas 5:27, 28) Pinaagi han pagbulig ha ira nga matapos an ira hatag han Dios nga toka, ini nga kababayin-an, ha pagkamatuod, nagdadayaw ha Dios. Ngan iginpakita han Dios an iya pag-uyon pinaagi han pagtipig hin usa nga rekord ha Biblia mahitungod han ira maloloy-on nga pagkamahinatagon basi mabasa han ngatanan nga tidaraon nga mga henerasyon.—Proberbios 19:17; Hebreo 6:10.

Hi Dorcas usa pa nga buotan nga babaye nga “hura ha maopay nga mga buhat ngan mga regalo han kalooy.” Nagtahi hiya hin mga bado para ha kablas nga mga balo nga kababayin-an ha iya bungto han Jope nga hirani han dagat. Kon hiya mismo an naggasto para han ngatanan nga mga materyales o waray la magpabayad han iya pagtahi, diri kita maaram. Kondi, tungod han iya maopay nga buhat nagin duok hiya ngada hadton iya nabuligan, sugad man ha Dios, nga maloloy-on nga nagbalos han iya maopay nga buhat.—Buhat 9:36-41, NW.

Importante an Husto nga Motibo

Ano an nagpagios hini nga mga indibiduwal nga humatag? Labaw pa ito han mapinairon nga pagbati tungod han hingyap nga makabulig. Personal nga inabat nira nga angayan nga himoon nira an ira maaakos ha kada adlaw basi buligan adton nakakaeksperyensya hin kakablas, kakurian, sakit, o iba nga mga problema. (Proberbios 3:27, 28; Jakobo 2:15, 16) Ini an klase han paghatag nga nalilipayan han Dios. Ginpapagios ito siyahan tungod han hilarom nga gugma ha Dios ngan han hingyap ha pagsubad han iya maloloy-on ngan mahinatagon nga personalidad.—Mateo 5:44, 45; Jakobo 1:17.

Ginpabug-atan ni apostol Juan inin importante nga bahin han paghatag han nagpakiana hiya: “Kon hin-o an may bahandi nga kalibotanon, ngan makita niya an iya bugto nga aada ha kakablasan, ngan diri niya kalooyan an iya bugto, oonan-on an pagbilin han gugma han Dios dida ha iya?” (1 Juan 3:17) Matin-aw an baton. An gugma han Dios nagpapagios ha mga tawo nga magin mahinatagon. Ginpapabilhan gud ngan ginbabalosan han Dios adton pariho ha iya, nagpapakita hin mahinatagon nga disposisyon. (Proberbios 22:9; 2 Korinto 9:6-11) Nakikita ba naton ini nga klase hin pagkamahinatagon yana? Tagda an nahitabo pa la ha usa nga kongregasyon han mga Saksi ni Jehova.

An balay han usa nga lagas nga Kristiano nga babaye nagkinahanglan hin daku gud nga pag-ayad. Nag-uusahan hiya ngan waray hiya pamilya nga makabulig ha iya. Ha sulod hin mga katuigan, pirme abrido an iya balay para ha Kristiano nga mga katirok, ngan agsob nga nakaon hiya kaupod han bisan hin-o nga nakarawat han iya imbitasyon. (Buhat 16:14, 15, 40) Han nakita an iya kahimtang, nagkaurosa an mga membro han kongregasyon nga bumulig. An iba naghatag hin kwarta, an iba han ira kusog. Ha pipira la nga mga kataposan han semana, an mga boluntaryo nagbutang hin bag-o nga atop, naghimo hin bag-o nga banyo, nagpaletada ngan nagpintura han bug-os nga siyahan nga andana, ngan nag-instalar hin bag-o nga mga kabinet ha kusina. An ira paghatag diri la nagtagbaw ha panginahanglan han babaye kondi nagin mas duok liwat ha usa kag usa an kongregasyon ngan naipakita ha mga amyaw an ehemplo han totoo nga paghatag sugad nga Kristiano.

 Damu hinduro an mga paagi nga personal nga mabubuligan naton an iba. Mahimo ba kita gumasto hin panahon ha bata nga waray amay? Mahimo ba kita mamalit o magtahi para ha usa nga lagas nga balo nga kilala naton? Mahimo ba kita magluto hin pagkaon o maghatag hin kwarta ha usa nga limitado ha pinansyal? Makakabulig kita bisan kon diri kita riko. Hi apostol Pablo nagsurat: “Kon may-ada pag-andam, ito kinakarawat sugad han sadang han tawo, diri sugad han iya pagkawaray sadang.” (2 Korinto 8:12) Kondi, an sugad ba nga personal, direkta nga paghatag, an klase la han paghatag nga bibendisyonan han Dios? Diri.

Kumusta Liwat an Mahitungod han Organisado nga Pagbulig

Usahay diri igo na an personal nga mga pangalimbasog. Ha pagkamatuod, hi Jesus ngan an iya mga apostol nagtipig hin tirig-ob nga pundo para ha mga kablas, ngan nagkarawat hira hin mga donasyon nga kwarta tikang ha mapinairon nga mga tawo nga ira iginkita ha ira buruhaton. (Juan 12:6; 13:29) Ha pariho nga paagi, an siyahan-siglo nga mga kongregasyon kinarawat hin mga kontribusyon han nagkamay-ada panginahanglan ngan nag-organisa hin pagbulig ha mas daku nga sukol.—Buhat 2:44, 45; 6:1-3; 1 Timoteo 5:9, 10.

Usa han sugad nga mga okasyon nahitabo han mga 55 K.P. An mga kongregasyon ha Judea nakaeksperyensya hin kakablas, bangin sugad nga resulta han daku nga gutom nga nahitabo pa la. (Buhat 11:27-30) Tungod kay gintatagad pirme ni apostol Pablo an mga kablas, naghangyo hiya han bulig han mga kongregasyon bisan tubtob ha hirayo nga Masedonia. Personal nga gin-organisa niya an pangulekta ngan naghangyo ha matataporan nga kalalakin-an ha pagdul-ong hito. (1 Korinto 16:1-4; Galasia 2:10) Hiya o an iba nga nakigbahin waray ginkarawat nga suweldo para han ira serbisyo.—2 Korinto 8:20, 21.

An mga Saksi ni Jehova yana andam liwat bumulig kon naabot an kalamidad. Pananglitan, durante han katpaso han 2001, nagkamay-ada dagku nga pagbaha ha Houston, Texas, E.U.A. tungod han makusog nga mga bagyo. Ha kabug-osan, 723 nga kabalayan han mga Saksi an naguba, ngan damu hito an nadaot hinduro. Usa nga komite ha pagbulig nga ginkompuwesto hin kuwalipikado nga Kristiano nga mga tigurang an ginporma dayon basi hisabtan an mga panginahanglan han kada tagsa ngan basi maghatag hin kwarta ha pagbulig ha mga Saksi hito nga lugar nga makalampos han kahimtang ngan maayad an ira kabalayan. Ginbuhat an ngatanan nga trabaho han disidido nga mga boluntaryo tikang ha kahirani nga mga kongregasyon. Usa nga Saksi an mapasalamaton gud ha bulig salit han kinarawat hiya hin bayad han insurance para han mga gin-ayad ha iya balay, iya dayon iginhatag an kwarta ha pundo ha pagbulig basi makabulig ito ha iba nga nanginginahanglan.

Kondi, may kalabotan ha organisado nga institusyon nga nakarawat hin donasyon basi ibulig, kinahanglan magin mabinantayon kita samtang gin-uusisa naton an damu nga mga pandani nga aton nakakarawat. An iba nga mga institusyon may-ada  dagku nga gasto para ha mga empleyado o gasto para ha pag-aghat ha mga tawo nga humatag, salit gutiay na la an nabibilin han nakolekta nga kwarta para ha ginplanohan nga katuyoan. An Proberbios 14:15 nasiring: “An tapang natuod han tagsatagsa nga pulong; kondi an tawo nga mainalam-agamon nagtatan-aw hin maopay ha iya kakadtoan.” Salit maaramon nga usisahon hin maopay an mga impormasyon mahitungod hito.

An Pinakamapulsanon nga Paghatag

May-ada usa nga klase hin paghatag nga mas importante pa kay ha paghatag para ha pagbulig. Gin-unabi ini ni Jesus han nagpakiana an usa nga bahandianon ngan batan-on nga magmarando kon ano an iya kinahanglan pagbuhaton basi magkaada kinabuhi nga waray kataposan. Hi Jesus nagsiring ha iya: “Lakat, ipamaligya an imo mga bahandi ngan ipanhatag ha mga kablas, ngan ikaw mamamay-ada bahandi ha langit; ngan kadi, sunod ha akon.” (Mateo 19:16-22) Tigamni nga waray sumiring hi Jesus, ‘Paghatag ngadto ha mga kablas ngan magkakaada ka kinabuhi.’ Lugod, hiya nagdugang, “Kadi, sunod ha akon.” Ha iba nga pagkayakan, bisan kon darayawon ngan mapulsanon an mga buhat ha paghatag, mas daku pa an nahidadabi ha pagin Kristiano nga disipulo.

An siyahan nga interes ni Jesus amo an pagbulig ha iba ha espirituwal. Diri na maiha antes hiya mamatay, hiya nagsiring kan Pilato: “Tungod hini nagpakatawo ako ngan tungod hini ako kinanhi ha kalibotan, basi ako magtestigo han kamatuoran.” (Juan 18:37) Bisan kon ginpangunahan ni Jesus an pagbulig ha mga kablas, pagtambal ha mga masakit, ngan pagpakaon ha mga nagugutom, labaw nga ginbansay niya an iya mga disipulo ha pagsangyaw. (Mateo 10:7, 8) Ha pagkamatuod, kaupod han iya ultimo nga mga instruksyon ha ira amo an sugo: “Busa, lakat kamo, ngan manhimo kamo hin mga tinon-an ha ngatanan nga mga nasud.”—Mateo 28:19, 20.

Syempre, an pagsangyaw diri magsusulbad han ngatanan nga mga problema han kalibotan. Kondi, an pagpaangbit han maopay nga sumat han Ginhadian han Dios ha ngatanan nga klase han mga tawo naghihimaya ha Dios tungod kay an pagsangyaw nagtutuman han kaburut-on han Dios ngan nag-aabri han dalan ngadto ha dayon nga mga kapulsanan para hadton nakarawat han mensahe han Dios. (Juan 17:3; 1 Timoteo 2:3, 4) Kay ano nga diri mamati ha isisiring han mga Saksi ni Jehova ha ira sunod nga pagbisita? Nabisita hira nga dara an espirituwal nga regalo. Ngan maaram hira nga ini an gimaopayi nga paagi nga makakahatag hira ha imo.

[Mga Retrato ha pahina 6]

Damu an mga paagi ha pagpakita nga napaid kita

[Retrato ha pahina 7]

An aton pagsangyaw han maopay nga sumat ngadto ha iba nagpapalipay ha Dios ngan nag-aabri han dalan ngadto ha dayon nga mga kapulsanan