Kon Ano an Maitututdo ha Aton han Katamsihan

“KITAA an katamsihan ha langit, nga waray magsabwag, bisan pagbari, bisan pagtirok ha buhos; ngan an iyo Amay, nga aadto ha langit nagpapakaon ha ira. Diri ba kamo maromahal pa ha ira?” (Mateo 6:26) Iginsiring ni Jesu-Kristo ini nga mga pulong ha bantogan nga sermon ha ligid han bukid hirani ha Dagat han Galilea. Diri la an iya mga sumurunod an namamati ha iya. Nakadto an damu hinduro nga mga tawo nga tikang ha ngatanan nga mga bahin han nasud nga posible magin iya mga disipulo. Damu ha ira an mga kablas nga nagdara hin mga masakiton basi tambalon ni Jesus.—Mateo 4:23–5:2; Lukas 6:17-20.

Tungod kay gintambal na an ngatanan nga mga masakiton, gintagan ni Jesus hin atensyon an mas importante nga espirituwal nga mga panginahanglan. Upod han mga leksyon nga iya igintutdo amo an usa nga gin-unabi ha igbaw.

Maiha na nga panahon nga naeksister an katamsihan ha kalangitan. An iba ha ira nakaon hin mga insekto, an iba hin prutas ngan mga liso. Kon igintatagana han Dios an sugad kahura nga pagkaon para ha katamsihan, sigurado nga may kapas hiya ha pagbulig ha iya mga surugoon nga tawo nga makakuha han ira pagkaon ha kada adlaw. Mahimo niya buhaton ini pinaagi han pagbulig ha ira nga makabiling hin trabaho basi magkaada hin kwarta nga ipapalit hin pagkaon. O mahimo niya tugotan hira nga maglampos ha pagtanom para han ira kalugaringon nga pagkaon. Durante han mga panahon han kasuruk-an, mahimo pagiuson han Dios an mga kasingkasing han buotan nga mga amyaw ngan kasangkayan ha paghatag ha mga pobre hin anoman nga pagkaon nga may-ada hira.

Damu pa gud an aton mahibabaroan pinaagi han pag-obserba hin maopay ha kinabuhi han tamsi. Ginlarang han Dios an katamsihan nga may-ada makatirigamnan nga mga kinaiya ha paghimo hin mga salag diin mapapatubo nira an ira mga piso. Tigamni an duha nga klase han salag. Ha wala nga retrato makikita an salag han usa nga klase hin balinsasayaw nga nag-uukoy ha bato ha Aprika. Nahimumutang ito ha bato o ha pader han balay. An atop hito nga mga salag amo an nabitay nga bato, o sugad han makikita dinhi hini nga retrato, an nalapos nga atop ha gawas han usa nga tinukod. An salog han salag hinimo hin gudtiay nga malidong nga lapok nga gindurugkot nga sugad hin tasa an porma. An lalaki ngan babaye nga tamsi maduruto nga nagtatrabaho ha pagtirok hin malidong nga mga lapok ngan bangin umabot hin sobra usa ka bulan antes nira matapos an ira salag. Katapos ira ginlalatagan an sulod hito hin mga banwa ngan mga barahibo. Hira nga duha nagbuburubligay ha pagpakaon han ira mga piso. An nakikita ha ubos amo an salag han usa nga klase hin maya nga lalaki nga sugad hin de-maskara. Ini nga maduruto nga tamsi ha Aprika naghihimo han salag hito nga nagamit hin mga dahon han banwa o han iba nga mga tanom. Nakakatapos ito hin usa nga salag ha sulod hin usa ka adlaw ngan mahimo maglara hin sobra 30 nga salag ha usa ka peryodo han panahon!

Ano an leksyon hini? Kon an Dios nagtatagana ha katamsihan hin sugad nga mga abilidad ngan hura nga mga materyal basi makahimo hin mga salag, sigurado nga mabubuligan niya an iya mga surugoon nga tawo nga magkaada han ginkikinahanglan nga urukyan. Kondi, iginpakita ni Jesus nga may-ada pa ginkikinahanglan kon karuyag naton nga buligan kita ni Jehova nga Dios nga magkaada han aton materyal nga mga panginahanglan. “Pamilnga niyo siyahan an ginhadian han Dios, ngan an iya katadongan; ngan ngatanan ini nga mga butang mahidudugang ha iyo,” nagsaad hi Jesus. (Mateo 6:33) Bangin magpakiana ka, ‘Ano an nahiuupod ha pamiling siyahan han Ginhadian han Dios?’ An mga Saksi ni Jehova, nga nananaltag hini nga magasin, malilipay ha pagbaton hito nga pakiana.