Kustomre La ba o Panhukip?

HA PIPIRA nga mga kolehiyo ha Polandia, kustomre na han mga estudyante an pangulekta hin kwarta basi ipalit hin mga regalo para ha ira mga magturutdo, naglalaom nga makakakuha hira hin mas maopay nga mga grado ha ira mga eksamin. Salit, diri urusahon nga an Kristiano nga batan-on nga hi Katarzyna inatubang hin makuri nga sitwasyon. “Maghahatag ba ako hin kwarta o diri?” naghunahuna hiya. An iya mga igkasi-estudyante nangatadongan: “Komon nga kustomre ito. Waray mawawara ha imo, kondi daku an makakarawat mo, salit kay ano nga nagruruhaduha ka?”

“Oo, ha siyahan nga tuig han akon pag-eskwela, nakigbahin ako ha pangulekta hin kwarta,” siring ni Katarzyna. “Diri pa la maiha nga hinsabtan ko nga hini nga paagi sinuportahan ko an panhukip, nga ginkukondenar ha Biblia.” Nahinumdoman niya an mga teksto nga nagpapakita nga diri gud inuuyonan ni Jehova an panhukip. (Deuteronomio 10:17; 16:19; 2 Kronikas 19:7) Hi Katarzyna nasiring: “Hinsabtan ko nga masayon gud madaog han pag-ipit han mga kaupod. Ginhunahuna ko utro ito ngan tikang hadto waray na gud ako makigbahin hini nga kustomre.” Ha naglabay nga tulo ka tuig, bisan pa han pagtamay tikang ha iba nga mga estudyante, naisaysay niya ha iba nga diri hiya nakikigbahin ha pangulekta para hini nga “regalo” tungod han iya basado-ha-Biblia nga mga tinotoohan.

Gin-akusahan han iba hi Katarzyna hin kahakog ngan kawaray-pagtagad. “An iba ha ira diri pa gihapon nakikisangkay ha akon,” siring niya. “Ha luyo nga bahin, damu an natahod ha akon punto-de-bista, nga nakakapalipay ha akon.” Kilala na yana hi Katarzyna sugad nga usa han mga Saksi ni Jehova, nga nasunod ha mga prinsipyo han Biblia ha adlaw-adlaw nga pagkinabuhi.