“An Dios Amo an Gugma”

“An waray paghigugma waray makakilala ha Dios; kay an Dios amo an gugma.”—1 JUAN 4:8.

1-3. (a) Ano an ginsisiring han Biblia mahitungod han kalidad ni Jehova nga gugma, ngan ha ano nga paagi nga naiiba ini nga pahayag? (b) Kay ano nga an Biblia nasiring nga “an Dios amo an gugma”?

 AN NGATANAN nga mga kalidad ni Jehova diri-matupngan, hingpit, ngan makaruruyag. Kondi an pinakadarayawon ha ngatanan han mga kalidad ni Jehova amo an gugma. Waray iba nga nag-aaghat gud ha aton nga magin duok kan Jehova gawas han iya gugma. Makalilipay, gugma liwat an iya nalabaw nga kalidad. Paonan-o kita nahibaro hito?

² An Biblia may-ada ginsisiring mahitungod han gugma nga diri gud ginsisiring mahitungod han iba nga nangunguna nga mga kalidad ni Jehova. An Kasuratan diri nasiring nga an Dios amo an gahum o nga an Dios amo an hustisya o nga an Dios amo pa ngani an kinaadman. Hiya nagtatag-iya hiton nga mga kalidad ngan hiya an gihitaasi nga surok hini ngatanan nga tulo. Kondi, mahitungod han gugma, may-ada mas hilarom nga ginsisiring an 1 Juan 4:8: “An Dios amo an gugma.” Oo, an gugma nakalukop gud kan Jehova. Ito gud an iya natural nga kinaiya. Ha kabug-osan, mahimo naton hunahunaon ito hini nga paagi: An gahum ni Jehova nabulig ha iya nga gumios. An iya hustisya ngan an iya kinaadman naggigiya han paagi han iya paggios. Kondi, an gugma ni Jehova nag-aaghat ha iya nga gumios. Ngan an iya gugma pirme nakikita ha paagi han paggamit niya han iya iba nga mga kalidad.

³ Agsob nga ginsisiring nga hi Jehova amo an representasyon mismo han gugma. Salit, kon karuyag naton mahibaro mahitungod han gugma, kinahanglan mahibaro kita mahitungod kan Jehova. Salit, aton usisahon an pipira nga mga bahin han diri-matupngan nga gugma ni Jehova.

 An Gidadakui nga Buhat han Gugma

4, 5. (a) Ano an gidadakui nga buhat han gugma ha bug-os nga kasaysayan? (b) Kay ano nga makakasiring kita nga hi Jehova ngan an iya Anak ginhihiusa han pinakamarig-on nga bugkos han gugma nga naporma ha kan-o pa man?

⁴ Ipinapakita ni Jehova an gugma ha damu nga mga paagi, kondi may-ada usa nga nalabaw ha ngatanan. Ano ito? Amo an iya pagsugoa ha iya Anak nga mag-antos ngan mamatay para ha aton. Husto nga makakasiring kita nga ini an gidadakui nga buhat han gugma ha bug-os nga kasaysayan. Kay ano nga makakasiring kita hito?

⁵ Tinatawag han Biblia hi Jesus nga “an siyahan nga natawo han ngatanan nga mga binuhat.” (Kolosas 1:15) Hunahunaa la—an Anak ni Jehova naeksister na antes pa han pisikal nga uniberso. Mationan-o na kahilawig, kon sugad, nga magkaupod an Amay ngan an Anak? An iba nga mga syentista nagbabanabana nga an uniberso naeksister hin 13 ka bilyon ka tuig na. Kondi, bisan kon husto ini nga pagbanabana, diri gud ito igo na nga kahilawig ha pagrepresentar han kahilawig han kinabuhi han suhag nga Anak ni Jehova! Ano an iya ginbuhat durante hiton hilawig hinduro nga panahon? An Anak malipayon nga nag-alagad sugad nga “maabtik nga magburuhat” han iya Amay. (Proberbios 8:30, NW; Juan 1:3) Hi Jehova ngan an iya Anak magkaupod nga naghimo han ngatanan iba nga mga butang. Makaruruyag ngan makalilipay gud ito nga mga panahon nga magkaupod hira! Hin-o ha aton, kon sugad, an makakasabot ha gahum han bugkos nga iniksister ha sulod hiton hilawig hinduro nga panahon? Matin-aw, hi Jehova nga Dios ngan an iya Anak ginhihiusa han pinakamarig-on nga bugkos han gugma nga naporma ha kan-o pa man.

 6. Han nagpabawtismo hi Jesus, paonan-o iginpahayag ni Jehova an iya mga pagbati mahitungod ha Iya Anak?

⁶ Kondi, ginsugo ni Jehova an iya Anak nganhi ha tuna basi ipanganak sugad nga tawhanon nga minasus-an. An pagbuhat hito nangahulogan nga ha sulod hin pipira ka dekada, kinahanglan tugotan ni Jehova nga mahibulag hiya ha duok nga pakig-upod ha iya hinigugma nga Anak ha langit. Tungod han daku nga interes, Hiya nagbantay tikang ha langit samtang nagtutubo hi Jesus ha pagin hingpit nga tawo. Han mga 30 anyos na an edad, nagpabawtismo hi Jesus. Hiton nga okasyon an Amay mismo nagyakan tikang ha langit: “Ini amo an akon hinigugma nga Anak, nga akon nalilipayan.” (Mateo 3:17) Ha pakakita nga matinumanon nga ginbuhat ni Jesus an  ngatanan nga igintagna, an ngatanan nga ginhangyo ha iya, sigurado nga nalipay gud an iya Amay!—Juan 5:36; 17:4.

7, 8. (a) Ano an gin-antos ni Jesus han Nisan 14, 33 K.P., ngan paonan-o naapektohan an iya langitnon nga Amay? (b) Kay ano nga gintugotan ni Jehova an iya Anak nga mag-antos ngan mamatay?

⁷ Kondi, ano an inabat ni Jehova han Nisan 14, 33 K.P., han hi Jesus gintraydoran ngan katapos gindakop han nasisina nga grupo han mga tawo? Han hi Jesus gintamay, ginluraan, ngan ginsuntok? Han ginkastigo hiya, han an iya likod nasamad? Han iginraysang hiya, an mga kamot ngan mga tiil, ha poste nga kahoy ngan ginbayaan nga nabibitay didto samtang an mga tawo nagyuyubit ha iya? Ano an inabat han Amay han an iya hinigugma nga Anak nagsangpit ha iya tungod han duro nga kasakit? Ano an inabat ni Jehova han namatay hi Jesus, ngan ha siyahan nga panahon tikang ha tinikangan han ngatanan nga mga linarang, diri na naeksister an Iya hinigugma nga Anak?—Mateo 26:14-16, 46, 47, 56, 59, 67; 27:26, 38-44, 46; Juan 19:1.

⁸ Tungod kay hi Jehova may-ada mga pagbati, an kasakit nga iya gin-antos tungod han kamatay han iya Anak diri gud maisasaysay han aton mga pulong. An mahimo la isaysay amo an motibo ni Jehova ha pagtugot nga mahitabo ito. Kay ano nga gintugotan han Amay nga makaeksperyensya hiya mismo han sugad nga kasakit? May-ada urusahon nga iginpapahayag hi Jehova ha aton ha Juan 3:16—usa nga bersikulo ha Biblia nga importante gud salit tinatawag ito nga an gutiay nga Ebanghelyo. Ito nasiring: “An Dios naghigugma gud han kalibotan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi mamay kinabuhi nga waray kataposan.” Salit an motibo han Dios amo ini: gugma. Waray pa gud ipinakita nga gugma nga mas labaw hini.

Kon Paonan-o Kita Ginpapasarig ni Jehova han Iya Gugma

 9. Ano an karuyag ni Satanas nga toohan naton mahitungod han paghunahuna ni Jehova ha aton, kondi ano an iginpapasarig ni Jehova ha aton?

⁹ Kondi, nabangon an importante nga pakiana: An Dios ba nahigugma ha aton sugad nga indibiduwal? An iba bangin umuyon nga an Dios nahigugma ha katawohan ha kabug-osan, sugad han ginsisiring han Juan 3:16. Kondi ha tinuod hira nasiring, ‘Diri gud ako mahimo higugmaon han Dios sugad nga indibiduwal.’ An kamatuoran amo nga karuyag gud ni Satanas nga Yawa nga tumoo kita nga hi Jehova diri gud nahigugma o nagpapabili ha aton. Ha luyo nga bahin, bisan kon bangin ginhuhunahuna naton nga kita diri mahimo higugmaon o diri pinabibilhan, hi Jehova nagpapasarig ha aton nga an kada usa han iya matinumanon nga mga surugoon birilhon gud ha iya.

10, 11. Paonan-o ipinakita han ilustrasyon ni Jesus mahitungod han mga maya nga birilhon kita kan Jehova?

¹⁰ Pananglitan, tagda an mga pulong ni Jesus nga nakarekord ha Mateo 10:29-31. Ha pag-ilustrar han bili han iya mga disipulo, hi Jesus nagsiring: “Diri ba iginbabaligya an duha nga tamsihay hin usa [“nga sinselyo,” NW] nga gutiay [“an bili,” NW]? Ngan waray usa ha ira, nga nahuhulog ha tuna, nga waray hibaroi han iyo Amay. Kondi an mga buhok han iyo ulo naisip [“naihap,” NW] na ngatanan. Busa, diri kamo mahadlok; maromahal pa kamo [kay] han damu nga mga katamsihan.” Tagda kon ano an kahulogan hiton nga mga pulong ha siyahan-siglo nga mga mamarati ni Jesus.

¹¹ Ha panahon ni Jesus an maya amo an pinakabarato han katamsihan nga iginbabaligya sugad nga pagkaon. Ha usa nga sinselyo nga gutiay an bili, makakapalit an usa hin duha nga maya. Kondi hi Jesus ha urhi nagsiring, sumala ha Lukas 12:6, 7, nga kon an usa ka tawo naggasto hin duha nga sinselyo, diri upat nga maya an mapapalit niya, kondi lima. Igindugang an usa nga tamsi nga baga in waray gud bili ito. Bangin an sugad nga mga linarang waray bili ha mga tawo, kondi paonan-o ito gintatagad han Maglalarang? Hi Jesus nagsiring: “Bisan an usa ha ira [bisan an usa nga igindugang] waray hingalimti ha atubangan  han Dios.” Yana bangin nasasabtan na naton an punto ni Jesus. Tungod kay pinabibilhan ni Jehova an usa nga maya, labi pa gud an bili han usa nga tawo! Sugad han ginsiring ni Jesus, maaram hi Jehova han tagsa nga detalye mahitungod ha aton. Aw, an mga buhok mismo han aton ulo naihap na!

12. Kay ano nga makakasiguro kita nga reyalistiko hi Jesus han gin-unabi niya nga naihap na an mga buhok han aton ulo?

¹² An iba bangin maghunahuna nga nagpapasobra hi Jesus may kalabotan hini nga kamatuoran. Kondi, hunahunaa la an mahitungod han pagkabanhaw. Kinahanglan nga kilala gud kita ni Jehova basi malalarang kita utro niya! Pinabibilhan gud kita niya salit nahinunumdoman niya an tagsa nga detalye, upod na an pagkahimo ha aton ngan an ngatanan nga aton mga handumanan ngan mga eksperyensya ha sulod hin mga katuigan. An pag-ihap ha aton mga buhok—nga an aberids nga ulo han tawo nakakapatubo hin mga 100,000—masayon la nga buhat kon itatanding hito. Nagpapasarig gud ha aton an makaruruyag nga mga pulong ni Jesus nga hi Jehova nagtatagad ha aton sugad nga mga indibiduwal!

13. Paonan-o ipinapakita han kahimtang ni Hadi Jehosapat nga ginkikita ni Jehova an maopay ha aton bisan kon kita diri-hingpit?

¹³ An Biblia may-ada pa iginpapahayag nga nagpapasarig ha aton han gugma ni Jehova. Iya ginbibiling ngan ginpapabilhan an maopay ha aton. Tagda, pananglitan, an maopay nga hi Hadi Jehosapat. Han an hadi nagbuhat hin kalurongan, an propeta ni Jehova nagsiring ha iya: “Tungod hini nga butang an kapungot aada ha imo tikang ha atubangan ni Jehova.” Seryoso gud ito! Kondi an mensahe ni Jehova waray matapos dida. Nagpadayon ito: “Bisan pa, may-ada mag-opay nga mga butang nga hin-agian dida ha imo.” (2 Kronikas 19:1-3) Salit an matadong nga kasina ni Jehova waray makapugong ha iya nga kitaon an “mag-opay nga mga butang” kan Jehosapat. Diri ba nagpapasarig ha aton an paghibaro nga an aton Dios nagbibiling han maopay ha aton bisan kon kita diri-hingpit?

Usa nga Dios nga “Andam ha Pagpasaylo”

14. Kon kita nakakasala, ano nga mabug-at nga mga pagbati an bangin abaton naton, kondi paonan-o kita makakapahimulos han pagpasaylo ni Jehova?

¹⁴ Kon kita nakakasala, an kapakyasan, kaawod, ngan an pag-abat hin pagkasalaan bangin magpagios ha aton nga maghunahuna nga diri na gud kita takos mag-alagad kan Jehova. Kondi, hinumdumi nga hi Jehova “andam ha pagpasaylo.” (Salmo 86:5) Oo, kon nagbabasol kita ha aton mga sala ngan nangangalimbasog gud nga diri na utruhon ito, magpapahimulos kita han pagpasaylo ni Jehova. Tagda kon paonan-o iginhuhulagway han Biblia inin urusahon nga bahin han gugma ni Jehova.

15. Mationan-o kahirayo tikang ha aton iginbubulag ni Jehova an aton mga sala?

¹⁵ Ginamit ni salmista David an matin-aw nga ekspresyon ha paghulagway han pagpasaylo ni Jehova: “Sugad nga hirayo an sinirangan tikang ha katundan, sugad kahirayo iginbubulag Niya an aton mga sala tikang ha aton.” (Amon an italiko; Salmo 103:12, The Amplified Bible) Mationan-o kahirayo an sinirangan tikang ha katundan? Ha pagkamatuod, an sinirangan pirme nga aada ha gihirayoi nga distansya nga mahahanduraw tikang ha katundan; an este ngan an weste diri gud magtatapo. Usa nga eskolar an nasiring nga ini nga termino nangangahulogan hin “an gihirayoi nga mahihimo; an gihirayoi nga aton mahahanduraw.” An inspirado nga mga pulong ni David nagsusumat ha aton nga kon hi Jehova nagpapasaylo, iginbubulag niya an aton mga sala ha pinakahirayo gud nga aton mahuhunahuna.

16. Kon ginpapasaylo ni Jehova an aton mga sala, kay ano nga makakasarig kita nga gintatagad kita niya nga limpyo katapos hito?

¹⁶ Nagsari ka na ba ha pagkuha han mantsa tikang ha mapus-aw an kolor nga panapton? Bangin bisan pa han imo gimaopayi nga pangalimbasog, an mantsa nakikita la gihapon. Tigamni kon paonan-o iginhuhulagway ni Jehova an iya kapasidad ha pagpasaylo: “Bisan kon an iyo mga sala masugad han eskarlata, hira magbubusag sugad han niebe; bisan hira mapula pariho han takuranga [“krimson nga panapton,” NW], hira masusugad han barahibo han karnero.” (Isaias 1:18) An pulong nga “eskarlata” nagpapasabot hin mahayag nga pula nga kolor. a An “krimson” usa han masirom nga pula nga mga kolor han tinina nga tela. Diri gud naton makukuha an mantsa han sala pinaagi han aton kalugaringon nga mga pangalimbasog. Kondi, mahimo kuhaon ni Jehova an mga sala nga pariho han eskarlata ngan krimson ngan pabusagon ito sugad han niebe o han waray-tinaa nga barahibo han karnero. Salit kon nagpapasaylo hi Jehova han aton mga sala, diri na naton kinahanglan abaton nga gindadara pa naton an  mantsa han sugad nga mga sala ha bug-os naton nga kinabuhi.

17. Ha ano nga paagi iginlalabog ni Jehova an aton mga sala ha iya luyo?

¹⁷ Ha makabantad nga kanta han pagpasalamat nga ginkomposo ni Hesekia katapos luwason hiya tikang ha makamaratay nga sakit, hiya nagsiring kan Jehova: “Imo isinalikway an ngatanan ko nga sala ha luyo han imo bungkog.” (Isaias 38:17) Iginhuhulagway dinhi hi Jehova sugad nga nagkukuha han mga sala han mabinasulon nga makasasala ngan naglalabog hito ha Iya luyo diin diri na Niya ito nakikita o natitigamnan pa. Sumala ha usa nga reperensya, an ideya nga iginpasabot mahimo igpahayag nga: “Imo gintagad [an akon mga sala] nga baga in waray ito mahitabo.” Diri ba ito nakakaliaw?

18. Paonan-o iginpapasabot ni propeta Mika nga kon hi Jehova nagpapasaylo, permanente nga ginkukuha Niya an aton mga sala?

¹⁸ Ha saad nga pagpahiuli, iginpahayag ni propeta Mika an iya pagsarig nga pasasayloon ni Jehova an iya mabinasulon nga katawohan: “Hin-o an Dios nga pariho ha imo, . . . nga napalabay han pagtalapas han salin han iya panurundon? . . . Ngan imo ilalabog an ngatanan nira nga sala ngadto ha mga kahiladman han dagat.” (Mika 7:18, 19) Handurawa an kahulogan hito nga mga pulong ha mga tawo nga nagkinabuhi ha mga panahon han Biblia. May-ada ba higayon nga maibalik pa an iginlabog na “ngadto ha mga kahiladman han dagat”? Iginpapasabot kon sugad han mga pulong ni Mika nga kon hi Jehova nagpapasaylo, permanente nga ginkukuha niya an aton mga sala.

‘An Mahigugmaon nga Pagpaid han Aton Dios’

19, 20. (a) Ano an kahulogan han Hebreo nga berbo nga iginhubad nga “magpakita hin kalooy” o “malooy”? (b) Paonan-o ginagamit han Biblia an mga pagbati han usa nga iroy para ha iya minasus-an ha pagtutdo ha aton mahitungod han pagpaid ni Jehova?

¹⁹ An pagpaid usa pa nga bahin han gugma ni Jehova. Ano an pagpaid? Ha Biblia, may-ada duok nga relasyon an pagpaid ngan an kalooy. Damu nga mga pulong ha Hebreo ngan Griego an nagpapasabot han kahulogan han pagpaid. Pananglitan, an Hebreo nga berbo nga ra·chamʹ agsob nga iginhuhubad nga “magpakita hin kalooy” o “malooy.” Inin Hebreo nga termino, nga igin-aaplikar ni Jehova ha iya kalugaringon, may kalabotan ha pulong para han “taguangkan” ngan mahimo ihulagway sugad nga “pagpaid han iroy.”

²⁰ Ginagamit han Biblia an mga pagbati han usa nga iroy para ha iya minasus-an ha pagtutdo ha aton mahitungod han kahulogan han pagpaid ni Jehova. An Isaias 49:15 nasiring: “Mahingangalimot ba an usa nga babaye ha iya nasuso nga anak, nga hiya diri mapaid [ra·chamʹ] ha anak han iya taguangkan? Oo, bangin mahingalimot hira, kondi ako diri mahingangalimot ha imo.” (The Amplified Bible) Makuri handurawon nga mahingangalimot an usa nga iroy ha pagpasuso ngan pagmangno ha iya minasus-an. Ha pagkamatuod, an minasus-an waray mahihimo; adlaw ngan gab-i nagkikinahanglan an minasus-an han pagtagad han iroy hito. Kondi, makasurubo, may-ada mga hinbabatian mahitungod han pagpasibaya han mga iroy, labi na durante hinin “magpakalilisang nga mga panahon.” (2 Timoteo 3:1, 3) “Kondi,”  hi Jehova nagpapahayag, “ako diri mahingangalimot ha imo.” An mahigugmaon nga pagpaid ni Jehova ha iya mga surugoon mas makusog gud kay ha pinakamahigugmaon nga natural nga pagbati nga mahahanduraw naton—an pagpaid nga natural nga inaabat han usa nga iroy ha iya minasus-an.

21, 22. Ano an gin-antos han mga Israelita ha kadaan nga Ehipto, ngan paonan-o ginios hi Jehova ha ira mga pag-antos?

²¹ Pariho han usa nga mahigugmaon nga ginikanan, paonan-o ipinapakita ni Jehova an pagpaid? Ini nga kalidad matin-aw nga nakita ha paagi han iya pagtrato ha kadaan nga nasud han Israel. Ha ikatarapos han ika-16 ka siglo A.K.P., minilyon nga mga Israelita an nagin mga uripon ha Ehipto, diin gintalumpigos hira hinduro. (Eksodo 1:11, 14) Ha ira kasakit, an mga Israelita nanginyupo kan Jehova para han bulig. Paonan-o binaton an Dios nga may pagpaid?

²² Nabantad an kasingkasing ni Jehova. Hiya nagsiring: “Akon hinkit-an an mga kakurian han akon katawohan nga aadto ha Ehipto, ngan hinbatian ko an ira took [“pagtangis,” NW] . . . ako maaram han ira mga kabidoan.” (Eksodo 3:7) Imposible nga makita ni Jehova an mga pag-antos han iya katawohan o hibatian an ira mga pagtangis nga waray pagpaid ha ira. Hi Jehova usa nga Dios nga may empatiya. Ngan an empatiya—an abilidad ha pag-abat han kasakit han iba—duok nga may kalabotan ha pagpaid. Kondi, hi Jehova diri la kay pinaid ha iya katawohan; naaghat hiya nga gumios para ha ira. An Isaias 63:9 nasiring: “Ha iya gugma ngan ha iya pagbati iya hira linukat.” Pinaagi han “kamot nga makagarahum,” ginluwas ni Jehova an mga Israelita tikang ha Ehipto. (Deuteronomio 4:34) Katapos hito, iya gintagan hira han milagroso nga pagkaon ngan gindara hira ngadto ha mabungahon nga tuna nga ira kalugaringon.

23. (a) Paonan-o an mga pulong han salmista nagpapasarig ha aton nga hi Jehova nagtatagad gud ha aton sugad nga mga indibiduwal? (b) Ha ano nga mga paagi nabulig hi Jehova ha aton?

²³ Ipinapakita ni Jehova an pagpaid ha iya katawohan diri la sugad nga grupo. An aton mahigugmaon nga Dios nagtatagad gud ha aton sugad nga mga indibiduwal. Maaram gud hiya han bisan ano nga pag-antos nga bangin antuson naton. An salmista nagsiring: “An mga mata ni Jehova ngadto ha mga magtadong, ngan binubuka niya iton iya talinga ngadto ha ira singgit. Hi Jehova hirani hadton may masinakitnon nga kasingkasing, ngan nagluluwas hiya hadton mga mabinasulon an espiritu.” (Salmo 34:15, 18) Paonan-o nabulig hi Jehova ha aton sugad nga mga indibiduwal? Bangin diri niya kuhaon an hinungdan han aton pag-antos. Kondi may-ada hiya hura nga mga tagana para hadton nanginginyupo han iya bulig. An iya Pulong naghahatag hin praktikal nga sagdon nga mapulsanon gud. Ha kongregasyon, hi Jehova nagtatagana hin kuwalipikado ha espirituwal nga mga paramangno, nga nangangalimbasog ha pagpakita han iya pagpaid ha pagbulig ha iba. (Jakobo 5:14, 15) Sugad nga ‘Parapamati han pag-ampo,’ hi Jehova naghahatag han iya ‘baraan nga espiritu ha mga nangangaro ha iya.’ (Salmo 65:2; Lukas 11:13) Ini ngatanan nga mga tagana mga kapahayagan han “mahigugmaon nga pagpaid han aton Dios.”—Lukas 1:78, NW.

24. Paonan-o ka mabalos ha gugma ni Jehova?

²⁴ Diri ba makalilipay pamalandungon an gugma han aton langitnon nga Amay? Ha nahiuna nga artikulo, ginpahinumdom kita nga hi Jehova nagpapakita han iya gahum, hustisya, ngan kinaadman ha mahigugmaon nga mga paagi para ha aton kapulsanan. Ngan hini nga artikulo, nasabtan naton nga hi Jehova direkta nga nagpapahayag han iya gugma ha katawohan—ngan ha aton sugad nga indibiduwal—ha makatirigamnan nga mga paagi. Yana, an kada tagsa ha aton sadang magpakiana, ‘Paonan-o ko babalosan an gugma ni Jehova?’ Hinaot gumios ka pinaagi han paghigugma ha iya ha bug-os mo nga kasingkasing, hunahuna, kalag, ngan kusog. (Markos 12:29, 30) Hinaot an imo pagkinabuhi kada adlaw magpakita han imo kinasingkasing nga hingyap nga magin mas duok gud kan Jehova. Ngan hinaot hi Jehova, an Dios nga amo an gugma, magin mas duok gud ha imo—ha kadayonan!—Jakobo 4:8.

[Footnote]

Nahinunumdoman Mo Ba?

• Paonan-o kita nahibaro nga an gugma amo an gilalabawi nga kalidad ni Jehova?

• Kay ano nga masisiring nga an pagsugoa ni Jehova ha iya Anak basi mag-antos ngan mamatay para ha aton amo an gidadakui nga buhat han gugma nga ginbuhat ha kan-o pa man?

• Paonan-o kita ginpapasarig ni Jehova nga nahigugma hiya ha aton sugad nga mga indibiduwal?

• Ha ano nga matin-aw nga mga paagi iginhuhulagway han Biblia an pagpasaylo ni Jehova?

[Mga Pakiana]

[Retrato ha pahina 15]

‘Iginhatag han Dios an iya bugtong nga Anak’

[Retrato ha pahina 16, 17]

‘Mas birilhon kamo kay han damu nga maya’

[Ginkuhaan han Retrato

© J. Heidecker/VIREO

[Retrato ha pahina 18]

An pagbati han usa nga iroy ha iya minasus-an nagtututdo ha aton mahitungod han pagpaid ni Jehova