Istorya han Kinabuhi

An Pagserbi ha Iba Nag-iiban han Pag-antos han Usa

IGINSUMAT NI JULIÁN ARIAS

Han 1988, han 40 anyos an akon edad, baga hin establisado na an akon karera. Ako an direktor ha rehiyon han usa nga multinasyonal nga kompanya. Tungod han akon trabaho, gintagan ako han kompanya hin mahal nga awto, hitaas nga suweldo, ngan kompleto-ha-gamit nga opisina ha sentro han Madrid, Espanya. Diri direkta nga nagpabati pa ngani an kompanya nga hihimoon nira ako nga nasyonal nga direktor. Waray ko hunahunaa hito nga panahon nga hirani na an tigda nga pagbag-o han akon kinabuhi.

USA ka adlaw hito nga tuig, ginsumatan ako han akon doktor nga may-ada ako multiple sclerosis, usa nga sakit nga diri na matatambal. Nanluya gud ako. Ha urhi, han mabasa ko kon ano an nahihimo han multiple sclerosis ha usa ka tawo, nahadlok ako. a Baga hin magkikinabuhi ako nga may permanente na nga tarhog ha nahibibilin nga bahin han akon kinabuhi. Paonan-o ko maaataman an akon asawa, hi Milagros, ngan an akon tres anyos nga anak, hi Ismael? Paonan-o namon malalamposan an kahimtang? Samtang namimiling pa ako hin mga baton ngada hini nga mga pakiana, usa pa nga makasurubo nga panhitabo an inabot ha akon.

Mag-uusa ka bulan katapos ako sumatan han akon doktor mahitungod han akon sakit, iginpatawag ako han akon superbisor ngadto ha iya opisina ngan ginsumatan ako nga an kompanya nagkikinahanglan hin mga tawo nga may “makaruruyag nga personalidad.” Ngan an usa nga may nakakadaot nga sakit—bisan ha temprano nga bahin hito—diri nagpapakita han sugad nga imahen. Salit hito mismo nga takna, ginpaiwas ako han akon agaron ha akon trabaho. Tigda nga natapos an akon sekular nga propesyon!

 Ha atubangan han akon pamilya, nangalimbasog ako nga magin maisugon, kondi karuyag ko nga mag-usahan, basi makapanhunahuna mahitungod han akon bag-o nga mga kahimtang, ngan basi makapamalandong mahitungod han akon tidaraon. Nangalimbasog ako nga madaog an nagtutubo nga depresyon. An nakapasakit gud ha akon amo an tigda nga pagin waray pulos ko ha paniplatan han akon kompanya.

Pakabiling hin Kusog Tikang ha Kaluya

Mapasalamaton gud ako nga hinin nakakapanluya-ha-emosyon nga takna, makakasarig ako ha pipira nga mga surok han kusog. Mga 20 ka tuig antes hito, nagin usa ako han mga Saksi ni Jehova. Salit sinsero nga nag-ampo ako kan Jehova mahitungod han akon mga pagbati ngan mga pagruhaduha mahitungod han tidaraon. An akon asawa, nga usa liwat nga Saksi ni Jehova, amo an permanente nga surok han akon kusog, ngan sinusuportahan ngan binubuligan ako han pipira nga duok nga kasangkayan nga an pagkabuotan ngan pagpaid napamatud-an nga birilhon gud.—Proberbios 17:17.

Nakabulig liwat an pag-abat nga may responsabilidad ako ha iba. Karuyag ko nga mapatubo hin maopay an akon anak, matutdoan hiya, makauyag hiya, ngan mabansay hiya ha pagsangyaw nga buruhaton. Salit diri ako mahimo manluya. Dugang pa, tigurang ako ha usa han mga kongregasyon han mga Saksi ni Jehova, ngan an akon Kristiano nga kabugtoan didto nanginginahanglan han akon suporta. Kon akon tugotan an akon kakurian nga magpaluya han akon pagtoo, magigin ano nga klase ako hin susbaranan ha iba?

Diri malikyan nga nagbag-o an akon kinabuhi ha pisikal ngan ha pinansyal—ha pipira nga mga paagi ngadto ha maraot gud kondi ha iba nga mga paagi ngadto ha mas maopay. Makausa hinbatian ko an usa nga doktor nga nasiring: “An sakit diri nakakadaot han usa nga tawo; lugod, nakakagbag-o ito ha iya.” Ngan hinbaroan ko na nga an mga pagbag-o diri ngatanan negatibo.

Siyahan ha ngatanan, an akon “tunok ha unod” nakabulig ha akon nga mas makasabot han mga problema ha kahimsog han iba nga mga tawo ngan pumaid ha ira. (2 Korinto 12:7) Mas nasabtan ko gud yana an mga pulong han Proberbios 3:5: “Sarig kan Jehova ha bug-os mo nga kasingkasing, ngan ayaw sandig dida ha imo kalugaringon nga pagsabot.” Labaw ha ngatanan, gintutdoan ako han akon bag-o nga mga kahimtang nga hisabtan kon ano gud an importante ha kinabuhi ngan kon ano an nakakahatag hin totoo nga katagbaw ngan pagkaada kompyansa ha kalugaringon. Damu pa gihapon an akon mahihimo ha organisasyon ni Jehova. Nadiskobrehan ko an totoo nga kahulogan han mga pulong ni Jesus: “May-ada labaw nga kalipay ha paghatag kay ha pagkarawat.”—Buhat 20:35, NW.

Bag-o nga Kinabuhi

Waray pag-iha katapos hisabtan an akon sakit, gindapit ako ngadto ha usa nga seminar ha Madrid diin an Kristiano nga mga boluntaryo gintutdoan ha pag-aghat hin kooperasyon butnga han mga doktor ngan han ira mga pasyente nga mga Saksi. Ha urhi, ito nga mga boluntaryo gin-organisa ngadto ha mga Hospital Liaison Committee. Para ha akon, ito nga seminar inabot ha husto gud nga panahon. Nadiskobrehan ko an mas maopay nga karera, usa nga maghahatag ha akon hin labaw gud nga katagbaw kay han bisan ano nga komersyal nga trabaho.

Hinbaroan namon ha seminar nga an naporma pa la nga mga Hospital Liaison Committee igintoka nga bumisita ha mga ospital, mag-interbyu hin mga doktor, maghimo hin mga presentasyon ha mga nagtatrabaho ha ospital, nga an ngatanan basi maaghat an kooperasyon ngan mapugngan an mga komprontasyon. Binubuligan hini nga mga komite an mga igkasi-Saksi nga makabiling hin mga doktor nga andam ha pag-opera nga diri nagamit hin dugo. Syempre, tungod kay waray ako pagbansay ha mediko, damu an kinahanglan ko hibaroan mahitungod han mga termino ha mediko, mga etika ha mediko, ngan organisasyonal nga bahin han ospital. Bisan pa hito, ini nga seminar nakagbag-o han paagi han akon panhunahuna, nga nagsangkap ha akon ha bag-o nga ayat nga nakapainteres gud ha akon.

 Mga Pagbisita ha Ospital—Usa nga Surok han Katagbaw

Bisan kon an akon sakit hinayhinay ngan padayon nga nakakabaldado ha akon, nagtikadamu an akon mga responsabilidad sugad nga membro han Hospital Liaison Committee. Nakakarawat na ako hin pensyon tungod han akon pagin baldado, salit may-ada ako panahon ha mga pagbisita ha mga ospital. Bisan pa han panalagsa nga mga kapakyasan, ini nga mga pagbisita napamatud-an nga mas masayon ngan mas may balos kay han akon linalaoman. Bisan kon nadepende na ako yana ha lingkoran nga de-kaliding, diri ini daku nga ulang. Pirme ako gin-uupdan han usa nga igkasi-membro han komite. Dugang pa, an mga doktor hiara na makiistorya ha mga tawo nga aada ha lingkoran nga de-kaliding, ngan usahay baga hin mas matinalahuron nga namamati hira kon naoobserbahan nira an akon pangalimbasog ha pagbisita ha ira.

Ha naglabay nga napulo ka tuig, nakabisita na ako hin ginatos nga mga doktor. An pipira andam ha pagbulig ha amon haros tikang ha tinikangan. Hi Dr. Juan Duarte—usa nga seruhano ha kasingkasing ha Madrid nga natatagbaw ha pagtahod ha konsensya han pasyente—naghatag dayon han iya mga serbisyo. Tikang hito nga panahon, nakahimo na hiya hin sobra 200 nga operasyon nga diri nagamit hin dugo ha Saksi nga mga pasyente tikang ha damu nga mga bahin han Espanya. Ha paglabay han mga tuig nagtitikadamu nga doktor an nagtitikang ha pag-opera nga diri nagamit hin dugo. An amon regular nga pagbisita may-ada bahin ha pagdamu han mga seruhano nga nag-oopera nga diri nagamit hin dugo, kondi an pag-uswag tungod liwat han pag-uswag han mediko ngan han maopay nga mga resulta han mga operasyon nga diri nagamit hin dugo. Ngan kombinsido kami nga ginbibendisyonan ni Jehova an amon mga pangalimbasog.

Labi nga nadasig ako han positibo nga pagkarawat han pipira nga mga seruhano ha kasingkasing nga espesyalista ha pagtambal ha kabataan. Ha sulod hin duha ka tuig ginbisita namon an usa nga grupo han duha nga seruhano ngan an ira mga paraanestesya. Gintagan namon hira hin literatura may kalabotan ha mediko nga nagsaysay han ginbubuhat han iba nga mga doktor hini nga kanataran. Ginbalosan an amon mga pangalimbasog han 1999 durante han Medical Conference on Infantile Cardiovascular Surgery. An duha nga seruhano—nga ginbuligan hin usa nga seruhano tikang ha Inglatera nga andam liwat ha pagsunod ha aton gintotoohan may kalabotan ha dugo—naghimo hin makuri hinduro nga operasyon ha aortic valve han usa nga minasus-an nga Saksi. b Inabat ko an kalipay han mga kag-anak han an usa nga seruhano ginawas tikang ha kuwarto diin ginhimo an operasyon ha pagpahibaro nga naglampos an operasyon ngan gintahod an konsensya han pamilya. Yana inin duha nga doktor regular nga nakarawat hin mga pasyente nga Saksi tikang ha bug-os nga Espanya.

Ha sugad nga mga kahimtang, an nakakapalipay gud ha akon amo an paghibaro nga makakabulig ako ha akon Kristiano nga kabugtoan. Kasagaran, kon namimiling hira hin Hospital Liaison Committee, usa ito han pinakamakuri nga mga panahon ha ira kinabuhi. Kinahanglan hira magpaopera, ngan an mga doktor ha usa nga ospital hito nga lugar diri disidido o diri makakag-opera ha ira nga diri magamit hin dugo. Kondi, kon hinbabaroan han kabugtoan nga may-ada mga seruhano nga nakooperar ha ngatanan nga kanataran han medisina dinhi ha Madrid, nakakaginhawa gud hira. Nakakita na ako nga an ekspresyon ha nawong han usa nga bugto nga lalaki nagbag-o tikang ha kabaraka ngadto ha pagin kalmado, tungod la han amon presensya ha ospital.

 An Grupo han mga Hukom Ngan han mga Etika ha Mediko

Ha bag-o pa la nga mga tuig, an mga membro han mga Hospital Liaison Committee nabisita liwat ha mga hukom. Durante hito nga mga pagbisita, gintatagan namon hira hin usa nga publikasyon nga tinatawag nga Family Care and Medical Management for Jehovah’s Witnesses, nga gin-andam labi na ha pagpahibaro ha sugad nga mga opisyal mahitungod han aton gintotoohan may kalabotan ha paggamit han dugo ngan ha magagamit nga mga alternatibo ha pagtambal nga diri nagamit hin dugo. May-ada daku nga panginahanglan para hini nga mga pagbisita, tungod kay nagin komon hadto ha Espanya nga an mga hukom nahatag hin awtorisasyon ha mga doktor ha pag-abuno hin dugo bisan kon kontra ha mga hingyap han pasyente.

Dagku nga lugar an mga hukmanan, ngan ha akon siyahan nga pagbisita, inabat ako hin pagin waray pulos samtang naagi ha mga aragian ha akon lingkoran nga de-kaliding. Ngan mas nanluya pa gud ako han nagkaada kami gutiay nga aksidente, ngan nahulog ako tikang ha akon lingkoran. May pagkabuotan nga ginbuligan ako han pipira nga mga hukom ngan mga abogado nga kinita han akon kahimtang, kondi naawod ako ha ira.

Bisan kon an mga hukom diri sigurado han mga hinungdan han amon pagbisita ha ira, kadam-an ha ira an nagtagad ha amon ha buotan nga paagi. An siyahan nga hukom nga akon ginbisita naghihinunahuna na han amon gintotoohan, ngan nagsiring hiya nga karuyag niya makaistorya kami hin maiha. Ha amon sunod nga pagbisita, hiya mismo an nagduso han akon lingkoran nga de-kaliding ngadto ha iya hukmanan ngan namati hiya hin maopay. An maopay nga mga resulta hinin siyahan nga pagbisita nagdasig ha akon ngan ha akon mga kaupod nga malamposan an amon mga kahadlok, ngan waray pag-iha nakita namon an dugang nga maopay nga mga resulta.

Durante hito nga tuig, nagbilin kami hin usa nga kopya han Family Care ha usa pa nga hukom, nga may pagkabuotan nga kinarawat ha amon ngan nagsaad ha pagbasa han impormasyon. Iginhatag ko ha iya an numero han akon telepono kon kinahanglan niya kami makaistorya durante han kasuruk-an. Paglabay hin duha ka semana tinawag hiya ha pagsumat nga an usa nga lokal nga seruhano naghangyo ha iya hin awtorisasyon para ha pag-abuno hin dugo ha usa nga Saksi nga kinahanglan operahan. Ginsumatan kami han hukom nga karuyag niya nga buligan namon hiya ha pagbiling hin solusyon nga magtatahod han hingyap han Saksi nga likyan an dugo. Waray gud kami magkuri ha pamiling hin lain nga ospital, diin an mga seruhano malampuson nga nag-opera nga diri nagamit hin dugo. Nalipay an hukom han hibatian niya an resulta, ngan ginpasarig niya kami nga mamimiling hiya hin pariho nga mga solusyon ha tidaraon.

 Durante han akon mga pagbisita ha ospital, agsob nga nabangon an pakiana mahitungod han mga etika ha mediko, tungod kay karuyag namon nga tagdon han mga doktor an mga katungod ngan konsensya han pasyente. Usa nga nakooperar nga ospital ha Madrid an nagdapit ha akon nga umapi ha ira usa nga kurso may kalabotan ha mga etika. Ini nga kurso nakabulig ha akon nga maipresenta an aton basado ha Biblia nga punto-de-bista ngadto ha damu nga mga espesyalista hini nga kanataran. Nakabulig liwat ito ha akon nga hisabtan an damu nga makuri nga mga desisyon nga kinahanglan himoon han mga doktor.

Usa han mga magturutdo han kurso, hi Propesor Diego Gracia, an regular nga nag-oorganisa hin dungganon nga masteral nga kurso ha mga etika para ha Espanyol nga mga doktor ngan usa na hiya nga marig-on nga parasuporta han aton katungod ha may kahibaro nga pagbuot may kalabotan ha mga pag-abuno hin dugo. c Tungod han amon regular nga komunikasyon ha iya, gin-imbitar an pipira nga mga representante han sanga nga opisina han mga Saksi ni Jehova ha Espanya basi magsaysay han aton gintotoohan ngadto ha nagmamasteral nga mga estudyante ni Propesor Gracia, nga an pipira ha ira gintatagad sugad nga an gimaopayi nga mga doktor ha nasud.

Pag-atubang ha Kamatuoran

Syempre, inin makapatagbaw nga buruhaton para ha kaopayan han mga igkasi-tumuroo diri nakakasulbad han ngatanan ko nga personal nga mga problema. Padayon nga nagtitikagrabe an akon sakit. Kondi, maopay na la nga alerto an akon hunahuna. Ha bulig han akon asawa ngan anak nga diri gud nagrireklamo, nabubuhat ko pa gihapon an akon mga responsabilidad. Kon waray han ira bulig ngan suporta, magigin imposible gud ini. Diri ngani ako nakakasiper han akon saruwal o nakakasul-ot han akon amerikana. Labi nga nalilipay ako ha pagsangyaw kada Sabado kaupod han akon anak, hi Ismael, nga nagduduso han akon lingkoran nga de-kaliding basi makaistorya ko an tagsa nga tagbalay. Ngan naaataman ko pa gihapon an akon mga obligasyon sugad nga tigurang ha kongregasyon.

May-ada ako masurub-on nga mga panahon durante han naglabay nga 12 ka tuig. Usahay, an pagkita kon paonan-o nakakaapekto an akon pagin baldado ha akon pamilya mas duro nga nakakasakit ha akon kay han aktuwal nga sakit. Maaram ako nga nag-aantos hira, bisan kon diri nira ito iginpapahayag. Diri pa la maiha, ha sulod hin usa ka tuig, namatay an akon ugangan-nga-babaye ngan an akon amay. Durante hito mismo nga tuig, diri ako nakakagios-gios kon waray lingkoran nga de-kaliding. An akon amay, nga nalungon ha amon, namatay tungod hin usa pa nga nakakadaot nga sakit. Hi Milagros nga nag-ataman ha iya, inabat nga nakikita niya an mahitatabo ha akon ha tidaraon.

Kondi, ha positibo nga bahin, urosa an amon pamilya samtang magkaupod nga inaatubang namon an mga kakurian. Ginsaliwnan ko an lingkoran han usa nga administrador hin lingkoran nga de-kaliding, kondi an akon kinabuhi mas maopay yana tungod kay bug-os nga ginagamit ito ha pagserbi ha iba. An paghatag nakakaiban han pag-antos han usa, ngan gintutuman gud ni Jehova an iya saad ha pagparig-on ha aton ha panahon han panginahanglan. Pariho kan Pablo, makakasiring gud ako: “Ngatanan mahihimo ko ha gahum han nagpaparig-on ha akon.”—Filipos 4:13.

[Mga footnote]

[Kahon ha pahina 24]

An Panhunahuna han Asawa

Para ha usa nga asawa, an pakig-upod ha usa nga padis nga nag-aantos hin multiple sclerosis makuri—ha hunahuna, ha emosyon, ngan ha pisikal. Kinahanglan magin makatadunganon ako ha ginpaplano ko nga buhaton ngan magin disidido nga igbalewaray an diri kinahanglanon nga kabaraka mahitungod han tidaraon. (Mateo 6:34) Kondi, an pagkinabuhi nga may gin-aantos mahimo magpakita han gimaopayi nga mga kalidad han usa ka tawo. An amon pag-asawa mas marig-on yana kay han hadto, ngan mas duok an akon relasyon kan Jehova. An mga istorya ha kinabuhi han iba nga nakakaeksperyensya hin pariho nga nakakaguol nga mga kahimtang nakakaparig-on gud liwat ha akon. Inaabat ko liwat an katagbaw nga inaabat ni Julián sugad nga resulta han iya birilhon nga serbisyo para ha kaopayan han kabugtoan, ngan hinsasabtan ko nga diri gud kami pinababay-an ni Jehova, bisan kon an tagsa nga adlaw mahimo magdara hin bag-o nga problema.

[Kahon ha pahina 24]

An Panhunahuna han Anak

Nabilngan ko an maopay hinduro nga susbaranan ha pag-ilob ngan positibo nga disposisyon han akon amay, ngan inaabat ko nga nakakabulig ako kon ginduduso ko an iya lingkoran nga de-kaliding. Maaram ako nga diri ko pirme mahihimo an akon karuyag buhaton. Tinedyer na ako yana, kondi kon magin mas hamtong na ako, karuyag ko magserbi sugad nga membro han usa nga Hospital Liaison Committee. Tungod han mga saad han Biblia maaram ako nga temporaryo an pag-antos ngan maaram liwat ako nga damu nga kabugtoan an labaw nga nag-aantos kay ha amon.

[Retrato ha pahina 22]

An akon asawa usa han nagpapakusog ha akon

[Retrato ha pahina 23]

Nakikiistorya kan Dr. Juan Duarte nga seruhano ha kasingkasing

[Retrato ha pahina 25]

Nalilipay kami han akon anak nga magkaupod ha ministeryo