“Iginhatag Hito an Ginkikinahanglan han Akon Kasingkasing”

“BUG-OS-KASINGKASING nga nagpapasalamat ako ha iyo tungod han matahom nga regalo nga Magin Duok kan Jehova. Iginhatag hito an ginkikinahanglan han akon kasingkasing—an panginahanglan nga umabat nga hinigugma ngan pinaura ako ni Jehova. Inaabat ko nga mas duok na gud ako yana kan Jehova ngan ha iya hinigugma nga Anak. Karuyag ko sumatan an ngatanan mahitungod hini nga libro ngan tagan hin kopya an ngatanan nga akon mga hinigugma.” Ito an inabat han usa han mga Saksi ni Jehova mahitungod han bag-o nga 320-pahina nga libro nga iginpagowa ha “Madasigon nga mga Parasamwak han Ginhadian” Distrito nga mga Kombensyon nga ginhimo durante han 2002/03. Aton usisahon an pipira nga mga bahin hinin bag-o nga libro ngan kon kay ano nga iginpublikar ito.

An Pipira nga mga Bahin han Bag-o nga Libro

Ano an sulod hinin bag-o nga libro? An ngatanan nga impormasyon nga iginpresenta ha duha nga aradman nga artikulo hini nga gowa—ngan damu pa! An libro may-ada 31 nga kapitulo, an kada tagsa sugad kahilawig han usa nga aradman nga artikulo ha Barantayan. Katapos han introduksyon ngan siyahan nga tulo nga kapitulo, an libro ginbahin ha upat, usa para ha tagsa nga nangunguna nga mga kalidad ni Jehova. An tagsa nga bahin tinitikangan han kabug-osan nga sumaryo han kalidad. An sunod nga pipira nga mga kapitulo naghihisgot kon paonan-o ipinapakita ni Jehova an kalidad. An tagsa nga bahin may-ada usa nga kapitulo mahitungod kan Jesus. Kay ano? Bueno, hi Jesus nagsiring: “An nakakita ha akon, nakakita man ha Amay.” (Juan 14:9) Tungod kay hiya an hingpit nga dagway ni Jehova, hi Jesus naghahatag ha aton hin matin-aw nga mga susbaranan han nagios nga mga kalidad han Dios. An tagsa nga bahin natatapos ha usa nga kapitulo nga nagtututdo ha aton kon paonan-o susubaron hi Jehova ha pagpakita han kalidad nga ginhihisgotan. Ha paghisgot han mga kalidad ni Jehova, inin bag-o nga libro nag-uunabi han tagsa nga libro han Biblia.

An libro nga Magin Duok kan Jehova may-ada liwat pipira ka espesyal nga mga bahin. Tikang ha kapitulo 2, an tagsa nga kapitulo may-ada kahon nga may ulohan nga “Mga Pakiana nga Angay Pamalandungon.” An mga teksto ngan mga pakiana waray igtagana sugad nga repaso han kapitulo. Lugod, dinisenyo ito basi buligan ka nga gamiton an Biblia ha pamalandong hin hilarom hito nga ulohan. Iginrirekomenda nga basahon mo hin maopay an tagsa nga mga bersikulo han Kasuratan. Katapos, hunahunaa hin maopay an pakiana ngan pangalimbasugi nga iaplikar ha imo kalugaringon. An sugad nga pamalandong makakabantad han imo kasingkasing, mabulig ha imo nga magin mas duok gud kan Jehova.—Salmo 19:14.

An mga retrato ha Magin Duok kan Jehova nga libro ginsaliksik gud ngan igin-andam hin maopay basi makagtutdo ngan makaaghat. Disisyete nga kapitulo an may-ada matahom, bug-os-pahina nga mga retrato han mga eksena ha panahon han Biblia.

Kay Ano nga Iginpublikar?

Kay ano nga iginpublikar an libro nga Magin Duok kan Jehova? An siyahan nga katuyoan hinin bag-o nga publikasyon amo an pagbulig ha aton nga labaw nga makilala hi Jehova basi makapatubo kita hin mas marig-on nga personal nga relasyon ha aton Dios.

May nahuhunahuna ka ba nga tawo nga mahimo magpahimulos han Magin Duok kan Jehova nga libro, bangin usa nga estudyante ha Biblia o usa nga diri-aktibo nga Kristiano nga bugto nga lalaki o babaye? Kumusta ka man—natikangan mo na ba an pagbasa hinin bag-o nga libro? Kon waray pa, kay ano nga diri mag-eskedyol hin panahon nga tikangan dayon kon mahihimo? Magkaada panahon ha paghunahuna han imo binabasa. Hinaot inin bag-o nga publikasyon makabulig ha imo nga magin mas duok pa gud kan Jehova nga Dios, basi maipasamwak mo an maopay nga sumat mahitungod han iya Ginhadian nga may dugang nga kalipay ngan kadasig!