Importante Hinduro an Gugma

ANOMAN an edad, kultura, yinaknan, o rasa, an ngatanan nga katawohan may-ada daku nga panginahanglan para han gugma. Kon diri natatagbaw ito nga panginahanglan, diri hira malipayon. Usa nga parasaliksik ha mediko an nagsurat: “An gugma ngan duok nga relasyon importante hinduro nga mga bahin ha paghibaro kon ano an nakakasakit ha aton ngan kon ano an nakakatambal ha aton, kon ano an nakakapasubo ngan kon ano an nakakalipay, kon ano an nakakahimo ha aton nga mag-antos ngan kon ano an nakakaopay. Kon an usa nga bag-o nga medisina may-ada pariho nga epekto, haros ngatanan nga doktor ha nasud magrirekomenda hito para ha ira mga pasyente. Sayop nga pagbuhat han propesyon an diri pagresita hito.”

Kondi, agsob nga ginpapabug-atan han moderno nga sosiedad, labi na han media ngan han popular nga mga tawo hito, an karikohan, awtoridad, pagin bantogan, ngan sekso kay ha panginahanglan han tawo hin mapaso, mahigugmaon nga mga relasyon. Ginpapabug-atan han damu nga mga edukador an kalibotanon nga mga tumong ngan mga propesyon, ginsusukol an kalamposan pinaagi han nabuhat na han usa ngan pinaagi han iya katungdanan ha sosiedad. Oo, importante an edukasyon ngan an pagpatubo han mga abilidad han usa, kondi sadang ba nga pangalimbasogan ito hin sugad nga waray na panahon an usa para ha pamilya ngan kasangkayan? Nagsiring an usa nga edukado nga parasurat ha kadaan nga panahon nga maabtik nga paraobserba han kahimtang han tawo, nga an maabilidad kondi waray gugma nga indibiduwal pariho ha “matunog nga tumbaga, o tagingting han mga platilya.” (1 Korinto 13:1) An sugad nga mga tawo mahimo magin riko, bantogan pa ngani, kondi diri gud totoo nga malipayon.

Hi Jesu-Kristo nga may-ada hilarom nga pagsabot ngan espesyal nga gugma ha mga tawo, nagtagad han gugma ha Dios ngan ha amyaw sugad nga amo an pinakaimportante ha iya pagtutdo. Hiya nagsiring: “Higugmaon mo an Ginoo nga imo Dios ha bug-os mo nga kasingkasing ngan ha bug-os mo nga kalag, ngan ha bug-os mo nga hunahuna. . . . Higugmaon mo an imo igkasitawo sugad ha imo ngahaw.” (Mateo 22:37-39) Adton nasunod la hini nga mga pulong an magigin totoo nga mga sumurunod ni Jesus. Salit, hiya nagsiring: “Tungod hini an ngatanan makilala, nga kamo akon mga tinon-an, kon kamo maghigugmaay an usa kag usa.”—Juan 13:35.

Kondi, paonan-o mapapatubo han usa an gugma ha kalibotan yana? Ngan paonan-o maitututdo han mga kag-anak an gugma ha ira mga anak? Paghihisgotan ini nga mga pakiana ha masunod nga mga artikulo.

[Mga Retrato ha pahina 3]

Usa nga ayat an pagpatubo hin gugma ha kalibotan nga ginmamandoan han kahakog