“Duha nga Babaye an Nagtuktok ha Amon Purtahan”

“DUHA ka tuig na tikang nga inabat namon an daku nga kabidoan tungod ha kamatay han amon pinaura nga gutiay pa nga anak nga babaye.” Ito an tinikangan han usa nga surat ha pahayagan nga Le Progrès, nga iginpublikar ha Saint-Étienne, ha Fransia.

“Tulo ka bulan pa la tikang nga natawo hi Mélissa ngan nag-antos hiya han grabe nga sakit nga trisomy 18. Diri gud makakabawi hin bug-os an usa tikang ha sugad nga trahedya nga baga in diri gud makatadunganon. Bisan kon nagtubo kami nga Katoliko, pirme kami nagpapakiana, ‘Dios ko, kon naeksister ka, kay ano nga gintutugotan mo nga mahitabo an sugad hini nga mga butang?’ ” Matin-aw, an iroy nga nagsurat hito inabat gud hin kaguol ngan kawaray-mahihimo. An iya surat nagpadayon:

“Waray pag-iha katapos hini nga mga panhitabo, duha nga babaye an nagtuktok ha amon purtahan. Nakilala ko dayon nga mga Saksi ni Jehova hira. Andam na ako nga hangyoon hira nga bumaya, kondi nakita ko an brosyur nga ira igintatanyag. Mahitungod ito ha kon kay ano nga gintutugotan han Dios an pag-antos. Salit nagdesisyon ako nga pasudlon hira basi pamatud-an nga sayop hira. Naghunahuna ako nga kon mahitungod han pag-antos, duro na an gin-antos han akon pamilya ngan damu na gud ka beses nga hinbatian namon an pampakalma nga mga pulong pariho han ‘Iginhatag hiya ha amon han Dios, ngan ginkuha hiya han Dios.’ An mga Saksi nagpabilin ha sulod hin sobra usa ka oras. Namati hira ha akon nga may daku nga pagpaid, ngan han tilakat na hira, mas maopay na gud an akon inabat salit inuyon ako nga bumalik hira. Duha ka tuig na ito nga naglabay. Waray ako magin usa han mga Saksi ni Jehova, kondi nagtikang ako mag-aram ha Biblia upod ha ira, ngan agsob ako tumambong ha ira mga katirok tubtob nga mahihimo ko.”