Sumat han mga Parasamwak han Ginhadian

Malipayon nga mga Resulta Tungod han Pagpailob Ngan Pagkamapinadayunon

HI Jesu-Kristo nagtagna nga ha kataposan nga mga adlaw “an gugma han kadam-an mababahaw.” Sugad nga resulta, ha damu nga mga bahin han kalibotan yana nga panahon, an katawohan ha kabug-osan diri-interesado ha maopay nga sumat han Ginhadian. Gintatamay pa ngani han iba an relihiyon.—Mateo 24:12, 14.

Bisan pa hito, pinaagi han pagtoo ngan pagpailob, malampuson nga gin-aatubang han mga magwarali han Ginhadian an ayat, sugad han ipinapakita han masunod nga eksperyensya tikang ha Republika han Czech.

Duha nga Saksi an nakiistorya ha usa nga babaye ha sarado nga purtahan. Waray pag-iha, gin-abrihan hin gutiay han babaye an purtahan, iya igingawas an iya usa nga kamot ngan ginkuha an Barantayan ngan Awake! nga mga magasin nga igintatanyag han mga Saksi. Nagsiring hiya hin “salamat,” ngan iginsara an purtahan. “Mabalik pa ba kita?” naghunahuna an mga Saksi. Usa ha ira, nga usa ka payunir, o bug-os-panahon nga ministro, an nagdesisyon nga bumalik, kondi sugad na liwat hito an nahitabo, ngan nagpadayon ini ha sulod hin usa ka tuig.

Tungod kay nakagdesisyon na hiya nga sadang niya bag-ohon an iya introduksyon, nag-ampo an payunir kan Jehova para han bulig. Han sunod nga panahon nga nagtanyag hiya hin mga magasin, makisangkayon nga ginpakianhan niya an babaye: “Kumusta ka na? Naruyagan mo ba an mga magasin?” Ha tinikangan, waray baton, kondi paglabay hin pipira pa nga mga pagbisita, nagtikang magin mas makisangkayon an babaye. Usa ka beses gin-abrihan niya hin haluag an purtahan, kondi waray pag-iha an ira pag-istorya.

Tungod han pag-alang han babaye nga makiistorya dida ha purtahan, nagdesisyon an payunir nga suratan hiya basi isaysay an katuyoan han mga pagbisita ngan basi itanyag an pag-aram ha Biblia ha balay. Ha kataposan, paglabay hin usa ngan tunga ka tuig han mapailubon nga pangalimbasog, naglampos an payunir ha pagtikang hin pag-aram ha Biblia ha tagbalay. Nahipausa hiya kondi nadasig han ha urhi ginsumatan hiya han babaye: “Tinoo na ako ha Dios tikang nga nagtikang kamo pagdara hin mga magasin ha akon.”

Oo, an pagpailob ngan pagkamapinadayunon mahimo magdara hin makalilipay nga mga resulta ha pagsangyaw-han-Ginhadian ngan paghimo-disipulo nga buruhaton.—Mateo 28:19, 20.