“Magin Duok Kamo ha Dios, Ngan Hiya Magigin Duok ha Iyo”

Antes Ngan Katapos—Kon Paonan-o Nabag-o han Biblia Ini nga Tawo

MUSIKA an pinakaimportante ha kinabuhi ni Rolf-Michael. Mga droga an iya bisyo. Sugad nga batan-on ha Alemanya, nakaubos hiya hin damu nga de-alkohol nga irinmon ngan waray pagpugong nga nagamit hin LSD, cocaine, marijuana, ngan iba nga mga droga nga nakaapekto han iya panhunahuna.

Samtang nangangalimbasog ha pagpasulod hin ilegal nga mga droga ha usa nga nasud ha Aprika, nadakop hi Rolf-Michael ngan napriso hin 13 ka bulan. Ito nga kaprisohan naghatag ha iya hin panahon ha paghunahuna mahitungod han totoo nga katuyoan han kinabuhi.

Hi Rolf-Michael ngan an iya asawa, hi Ursula, namiling gud hin kahulogan ha kinabuhi ngan han kamatuoran. Bisan pa han maraot nga mga eksperyensya ha tinatawag nga Kristiano nga mga iglesia, daku an ira hingyap nga makilala an Dios. Kondi may-ada hira mga pakiana ngan waray hira makakarawat hin makapatagbaw nga mga baton tikang ha magkalainlain nga mga grupo han relihiyon. Dugang pa, ini nga mga relihiyon waray makahatag hin marig-on nga hinungdan basi bag-ohon nira an ira mga kinabuhi.

Ha urhi, may nakaistorya hira Rolf-Michael ngan Ursula nga mga Saksi ni Jehova. Katapos tikangan an pag-aram ha Biblia, nabantad gud hi Rolf-Michael han sagdon nga: “Magin duok kamo ha Dios, ngan hiya magigin duok ha iyo.” (Jakobo 4:8, NW) Nagin determinado hiya nga ‘bayaan an daan nga personalidad nga nauyon ha iya siyahan nga panggawi ngan isul-ot an bag-o nga personalidad, nga ginhimo sumala ha kaburut-on han Dios ha totoo nga pagkamatadong ngan pagkamaunungon.’—Efeso 4:22-24, NW.

Paonan-o isusul-ot ni Rolf-Michael an bag-o nga personalidad? Iginpakita ha iya tikang ha Biblia nga “pinaagi han husto nga kahibaro” an personalidad han usa nga indibiduwal mahimo “bag-ohon uyon ha dagway han Usa nga naglarang hito,” nga amo hi Jehova nga Dios.—Kolosas 3:9-11, NW.

Samtang nagkakaada hiya husto nga kahibaro, nangalimbasog hi Rolf-Michael nga ipahiuyon an iya kinabuhi ha mga prinsipyo han Pulong han Dios. (Juan 17:3) Makuri an pag-undang ha paggamit hin mga droga, kondi hinsabtan ni Rolf-Michael an bili han pagdaop kan Jehova ha pag-ampo ngan pakaeksperyensya han iya bulig. (1 Juan 5:14, 15) An dugang nga bulig nagtikang ha duok nga pakig-upod ha mga Saksi ni Jehova na, nga nangangalimbasog ha pagbuhat han kaburut-on han Dios.

An kahibaro nga an kalibotan lumalabay ngan adton nagbubuhat han kaburut-on han Dios magpapabilin ha waray kataposan nakabulig liwat kan Rolf-Michael. Nakabulig ito ha iya nga pilion, diri an temporaryo nga gugma ha kalibotan, kondi an waray kataposan nga bendisyon tungod han duok nga relasyon ha mahigugmaon nga Dios, hi Jehova. (1 Juan 2:15-17) Nabantad gud hi Rolf-Michael han mga pulong han Proberbios 27:11: “Anak ko, pagmakinaadmananon, ngan himoa an akon kasingkasing nga malipayon, nga ako makabaton ha iya nga nagsasaway [“nagtatamay,” NW] ha akon.” Mapasalamaton hiya nga siniring: “Ini nga bersikulo nagpapakita han kahilarom  han gugma ni Jehova, tungod kay tinatagan niya hin higayon an katawohan nga lipayon an iya kasingkasing.”

Pariho kan Rolf-Michael, han iya asawa, ngan han ira tulo nga anak, ginatos ka yukot an nagpapahimulos pinaagi han pagsunod ha mga prinsipyo ha Biblia. An sugad nga mga indibiduwal mabibilngan ha mga kongregasyon han mga Saksi ni Jehova ha bug-os nga kalibotan. Makasurubo, ha pipira nga mga nasud an mga Saksi sayop nga gin-akusahan ha pagin peligroso nga sekta nga nagbubungkag han mga pamilya. Pinamamatud-an han eksperyensya ni Rolf-Michael an kabaliktaran.—Hebreo 4:12.

Hi Rolf-Michael nasiring nga an Mateo 6:33, nga nagsasagda ha aton nga unahon an aton espirituwal nga mga buruhaton, amo an “kompas” han iya pamilya, ginigiyahan hira ngadto ha husto nga direksyon. Hiya ngan an iya pamilya mapasalamaton gud kan Jehova tungod han malipayon nga pamilya nga ira napapahimulosan sugad nga mga Kristiano. Nauyon hira ha mga pagbati han salmista nga nagkanta: “Ano ba an akon ihahatag kan Jehova tungod han iya mga pakaopay ha akon?”—Salmo 116:12.

[Blurb ha pahina 9]

An Dios naghahatag ha mga tawo hin higayon nga lipayon an iya kasingkasing

[Kahon ha pahina 9]

Mga Prinsipyo ha Biblia nga Epektibo

Kaupod han mga prinsipyo ha Biblia nga nagpagios na ha damu nga bayaan an makamaratay nga mga pagkagiyan amo an masunod:

“O kamo nga nahigugma kan Jehova, ikangalas an kamaraot.” (Salmo 97:10) Katapos makombinse ha pagin maraot han makamaratay nga mga binuhatan ngan pagpatubo hin totoo nga kangalas hito, nagigin mas masayon ha usa ka tawo nga buhaton an nakakalipay ha Dios.

“Lakat nga kaupod han mga tawo nga makinaadmananon, ngan ikaw makikinaadmananon; kondi an kaupod-upod han mga lurong mag-aantos tungod hini.” (Proberbios 13:20) Basi malikyan an mga droga ngan an iba pa nga mga tutumaron nga nakakagiyan, kinahanglan pilion hin maopay han usa an iya mga kaupod. Mapulsanon gud an pagpatubo hin pakigsangkay ha mga Kristiano nga mabulig ha iya nga malikyan ini nga mga pagkagiyan.

“Diri kamo mabaraka hin bisan ano nga bagay; kondi ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro. Ngan an kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna kan Kristo Jesus.” (Filipos 4:6, 7) An sugad nga kamurayawan han kasingkasing ngan hunahuna diri gud madadangat pinaagi han artipisyal nga mga paagi, sugad han mga droga. Ngan an pagsarig ha Dios pinaagi ha pag-ampo nabulig ha usa nga malamposan an mga problema ha kinabuhi nga diri nagamit hin nakakagiyan nga mga droga.