Kon Paonan-o Mapaparig-on an Imo Pag-asawa

HANDURAWA an usa nga balay nga guba na tungod kay napasibay-an. Bakbak na an pintura, guba na an atop, ngan bisan an libong waray na atamana. Matin-aw, naguba na ini nga tinukod tungod han magkusog nga mga bagyo ha paglabay han mga tuig, ngan ginpasibay-an ito. Sadang ba ito bungkagon? Diri. Kon marig-on an pundasyon ngan an istraktura, posible nga maaayad pa an balay.

An kahimtang ba hito nga balay nagpapahinumdom ha imo mahitungod han imo pag-asawa? Ha paglabay han mga tuig, an magkusog nga mga bagyo, siring pa, bangin nakaapekto gud han imo pag-asawa. Bangin an usa ha iyo o kamo nga duha nagpasibaya han iyo pag-asawa ha pipira nga bahin. Bangin abaton mo an gin-abat ni Sandy. Katapos han 15 ka tuig nga pag-asawa, hiya nagsiring: “An usa la nga butang nga masisiring nga ginkaangbitan namon nga duha, amo nga kasal kami ha kada tagsa. Ngan diri igo na ito.”

Bisan kon an imo pag-asawa pariho hito an kahimtang, ayaw pagdagmit ha paghunahuna nga sadang tapuson na ito. Posible nga maipapahiuli pa an iyo pag-asawa. Daku an nadepende ha kon mationan-o kadeterminado ka ngan an imo padis nga ipahiuli ngan tipigan an iyo pag-asawa. An sugad nga determinasyon ngan hingyap makakabulig ha pagparig-on han pag-asawa ha mga panahon han pagsari. Paonan-o kamo mabubuligan han Biblia nga maparig-on ini nga determinasyon ngan hingyap?

An Determinasyon Ngan Hingyap Nag-uupod hin Obligasyon

Sumala ha usa nga diksyonaryo, an determinasyon ngan hingyap nga tipigan an pag-asawa nagpapasabot hin kahimtang han pagin obligado o pagin napagios han emosyon. Pananglitan, an usa nga trabahador bangin maobligar ha pagtuman han mga ginkikinahanglan han usa nga kontrata nga iya ginpirmahan ha pagtukod hin usa nga balay. Bangin diri niya personal nga kilala an nagpatrabaho. Ha gihapon, obligado hiya ha pagtuman han iya saad ha kontrata.

Bisan kon an pag-asawa diri usa ka waray-emosyon nga transaksyon ha negosyo, an imo determinasyon ngan hingyap nga tipigan ito natural nga nag-uupod han pag-abat hin obligasyon. Ikaw ngan an imo padis sigurado nga seryoso nga nagsaad ha atubangan han Dios ngan han tawo nga magpabilin nga magkaupod, anoman an mahitabo. Hi Jesus nagsiring: “An nagbuhat ha [lalaki ngan babaye] ha tinikangan, ginbuhat hira nga lalaki ug babaye. Ngan siniring: Tungod hini an tawo babayaan an  amay niya ngan an iroy niya, ngan tumampo ha iya asawa.” Hi Jesus nagdugang: “Kon ano an gintig-ob han Dios, diri pagbulagon han tawo.” (Mateo 19:4-6) Salit, kon naabot an mga problema, ikaw ngan an imo padis sadang magin determinado gud ha pagtuman han iyo iginsaad ha kada tagsa. a Usa nga asawa an nagsiring: “Nagtikang la mag-uswag an amon kahimtang han waray na namon hunahunaa an diborsyo sugad nga solusyon.”

Kondi, an determinasyon ngan hingyap nga tipigan an pag-asawa diri la usa nga obligasyon. Ano pa an nahiuupod hito?

An Pagbinuligay Nagpaparig-on han Determinasyon Ngan Hingyap nga Tipigan an Pag-asawa

An determinasyon ngan hingyap nga tipigan an pag-asawa diri nangangahulogan nga diri na gud maglalantugi an mag-asawa. Kon may-ada diri pagsinabtanay, kinahanglan may-ada sinsero nga hingyap ha pagsulbad han problema diri la tungod han saad nga kinahanglan tumanon han usa kondi tungod han bugkos han emosyon. May kalabotan ha bana ngan asawa, hi Jesus nagsiring: “Hira diri na duha, kondi usa la nga unod.”

Ano an iginpapasabot han pagin “usa la nga unod” kaupod han imo padis? Hi apostol Pablo nagsurat nga “an mga asawa nga kalalakin-an kinahanglan man nga mahigugma ha ira mga asawa nga babaye sugad ha ira mga kalugaringon nga lawas.” (Efeso 5:28, 29) Kon sugad, ha bahin, an pagin “usa la nga unod” nangangahulogan nga imo gintatagad an kaopayan han imo padis sugad han imo pagtagad ha imo kalugaringon nga kaopayan. Kinahanglan bag-ohon han mga inasaw-an an ira panhunahuna tikang ha “akon” ngadto ha “amon,” tikang ha “ako” ngadto ha “kami.” Usa nga parasagdon an nagsurat: “Kinahanglan umundang an magpadis ha paghunahuna ngan pag-abat nga sugad hin diri hira inasaw-an, ngan magtikang ha paghunahuna ngan pag-abat sugad nga mag-asawa.”

Ikaw ba ngan an imo padis naghuhunahuna ngan naabat sugad nga inasaw-an na? Posible nga magin magkaupod ha sulod hin damu ka tuig kondi diri ‘usa nga unod’ hito nga bahin. Oo, mahimo ito mahitabo, kondi an libro nga Giving Time a Chance nasiring: “An pag-asawa nangangahulogan hin paghatag han kinabuhi, ngan kon an duha ka tawo mas nagbubuhat nga magkaupod, mas mag-uuswag an ira pag-asawa.”

An iba nga diri malipayon nga mga mag-asawa nagpapabilin nga magkaupod tungod han ira mga anak o tungod han pinansyal nga seguridad. Nag-iilob an iba tungod kay nadiri gud hira ha diborsyo o tungod kay nahahadlok hira han huhunahunaon han iba kon magbulag hira. Bisan kon maopay nga nagpapabilin ini nga mga pag-asawa, hinumdumi nga an iyo tumong amo an pagkaada relasyon nga may gugma, diri la usa nga nagpapadayon.

 An Pagin Diri Hakog Nagdadasig han Determinasyon Ngan Hingyap nga Tipigan an Pag-asawa

Igintagna han Biblia nga durante han “kataposan nga mga adlaw,” an mga tawo “magmamahigugmaon ha ira kalugaringon.” (2 Timoteo 3:1, 2) Uyon hito nga tagna, baga hin ginpapabug-atan yana nga panahon an paghimaya ha kalugaringon. Ha damu nga mga pag-asawa, an paghatag han kalugaringon nga diri nakakasiguro ha pagkarawat hin balos gintatagad sugad nga tigaman han kaluyahan. Kondi, ha marig-on nga pag-asawa, an duha nagpapakita hin nagsasakripisyo-ha-kalugaringon nga disposisyon. Paonan-o mo maipapakita an sugad nga disposisyon?

Imbes nga maghinunahuna ha pakiana nga, ‘Ano an akon napapahimulosan tikang hini nga relasyon?’ pakianhi an imo kalugaringon, ‘Ano an akon ginbubuhat basi maparig-on an akon pag-asawa?’ An Biblia nasiring nga an mga Kristiano sadang “magkita, diri la ha personal nga interes han [ira] kalugaringon nga mga butang, kondi ha personal nga interes liwat han iba.” (Filipos 2:4, NW) Samtang ginpapamalandong ini nga mga prinsipyo ha Biblia, hunahunaa an imo mga panggawi durante han naglabay nga semana. Mationan-o kaagsob nga nagbuhat ka hin maopay nga butang para ha kaopayan han imo padis la? Han karuyag makiistorya an imo padis, namati ka ba—bisan kon diri mo gud karuyag makiistorya? Pira nga mga buruhaton an imo ginbuhat nga nakapainteres ha imo padis labaw ha imo naruyagan?

Ha pagpamalandong han sugad nga mga pakiana, ayaw kabaraka nga an imo maopay nga mga buhat diri makikita o diri babalosan. “Ha kadam-an nga mga relasyon,” siring han usa nga reperensya, “binabalosan an positibo nga mga panggawi, salit pangalimbasugi gud an pagdasig ha imo padis nga gumawi hin positibo pinaagi han paggawi hin positibo liwat.” An nagsasakripisyo-ha-kalugaringon nga mga buhat nagpaparig-on ha imo pag-asawa tungod kay ipinapakita hito nga ginpapabilhan mo ito ngan karuyag mo nga tipigan ito.

Importante an Paghunahuna nga Magpapadayon an Pag-asawa

Ginpapabilhan ni Jehova nga Dios an pagkamaunungon. Ha pagkamatuod, an Biblia nasiring: “Ha usa nga maunungon ikaw [Jehova] magios nga maunungon.” (2 Samuel 22:26, NW) An pagpabilin nga maunungon ha Dios nag-uupod han pagpabilin nga maunungon ha kahikayan han pag-asawa nga iya gintikangan.—Genesis 2:24.

Kon ikaw ngan an imo padis maunungon ha usa kag usa, nakakaeksperyensya kamo hin pag-abat hin pagkapermanente han iyo pag-asawa. Kon naghuhunahuna ka mahitungod han tidaraon, nahahanduraw mo nga magkaupod la gihapon kamo. Diri mo gud nahuhunahuna nga magkakabulag kamo, ngan ini nga panhunahuna nagdadara hin seguridad ha iyo relasyon. Usa nga asawa an nasiring: “Bisan kon nasisina gud ako ha [akon bana] ngan nangangalas mahitungod han nahitatabo ha amon, diri ako nababaraka nga matatapos an amon pag-asawa. Nababaraka ako mahitungod ha kon paonan-o namon maibabalik an amon relasyon. Diri ako nagruruhaduha nga maghihiuli kami—bisan kon hito nga panahon diri ako maaram kon paonan-o.”

An panhunahuna nga magpapadayon an pag-asawa importante nga bahin han determinasyon ngan hingyap han usa nga magmaunungon ha iya padis, kondi makasurubo nga waray ito ha damu nga mga  pag-asawa. Durante han mga argumento, usa nga padis an bangin suminggit, “Babayaan ko na ikaw!” o, “Mamimiling ako hin usa nga nagpapabili gud ha akon!” Oo, agsob nga an sugad nga mga pulong diri gud amo an iginpapasabot. Ha gihapon, an Biblia nasiring nga an dila mahimo magin “puno [hin] . . . magpakamaratay nga hilo.” (Jakobo 3:8) An mga panarhog ngan mga ultimo nga kondisyon pariho hin pagsiring: ‘Diri ko ginhuhunahuna nga an aton pag-asawa magpapadayon. Mahimo ko bayaan ito ha bisan ano nga panahon.’ An pagpabati hin sugad hito mahimo makadaot ha pag-asawa.

Kon naghuhunahuna ka nga magpapadayon an iyo pag-asawa, naglalaom ka nga makakaupod mo an imo padis ha ngatanan nga kakurian. May-ada ini dugang nga kapulsanan. Magigin mas masayon para ha imo ngan ha imo padis nga karawaton an mga kaluyahan ngan mga sayop ngan magpadayon ha pagpasensya ngan pagpasaylo hin kinasingkasing ha usa kag usa. (Kolosas 3:13) “Ha usa nga maopay nga pag-asawa,” siring han usa nga libro, “may-ada posibilidad nga kamo nga duha mapakyas, ngan an iyo pag-asawa magin marig-on bisan pa hito.”

Ha adlaw han imo kasal, naghimo ka hin sinsero nga saad, diri ha institusyon han pag-asawa, kondi ha usa nga buhi nga tawo—an imo padis. Ini nga kamatuoran sadang magkaada hilarom nga epekto ha paagi han imo paghunahuna ngan paggios yana sugad nga inasaw-an nga tawo. Diri ka ba nauyon nga sadang ka magpabilin ha imo padis diri la tungod kay natoo ka gud ha pagin sagrado han pag-asawa kondi tungod liwat kay hinigugma mo an tawo nga imo ginpakasalan?

[Footnote]

[Kahon/Retrato ha pahina 5]

Kon Ano an Imo Mahihimo Yana

Mationan-o karig-on an imo determinasyon ngan hingyap nga matipigan ngan maparig-on an imo pag-asawa? Bangin naobserbahan mo nga mahimo ito mapauswag. Basi maparig-on an imo determinasyon, sarihi an masunod:

● Usisaha an imo kalugaringon. Pakianhi an imo kalugaringon: ‘Ha akon ba pag-abat inasaw-aw na gud ako, o naghuhunahuna ngan nagios pa gihapon ako sugad nga solo nga tawo?’ Hibaroi kon ano an inaabat han imo padis mahitungod ha imo may kalabotan hini.

● Basaha ini nga artikulo kaupod han imo padis. Katapos, ha kalmado nga paagi, hisguti an mga paagi nga mapaparig-on niyo an iyo determinasyon ngan hingyap nga tipigan an iyo pag-asawa.

● Magbuhat kaupod han imo padis hin mga buruhaton nga nagpaparig-on han iyo determinasyon ngan hingyap. Pananglitan: Kitaa an mga retrato han iyo kasal ngan han iba pa nga diri hingangalimtan nga mga hitabo. Pagbuhat hin mga butang nga naruyagan niyo han magtrato pa la kamo o ha temprano nga mga tuig han iyo pag-asawa. Pag-admi niyo nga duha an mga artikulo nga basado ha Biblia tikang ha Barantayan ngan Awake! nga may kalabotan ha pag-asawa.

[Kahon/Retrato ha pahina 6]

An Pagin Determinado ha Pagtipig han Imo Pag-asawa Nag-uupod han . . .

● Obligasyon “Pagbayad hadton imo iginsaad. Gabay ka pa diri magsaad, kay nga magsaad ka ngan diri bayaran.—Eklesiastes 5:4, 5.

● Pagbinuligay “An duha maoroopay kay han usa . . .Kay kon hira mapukan, an usa magbabangon han iya kaupod.”—Eklesiastes 4:9, 10.

● Pagsakripisyo ha Kalugaringon “May-ada labaw nga kalipay ha paghatag kay ha pagkarawat.”—Buhat 20:35, NW.

● Paghunahuna nga Magpapadayon an Pag-asawa “An gugma . . . nag-iilob han ngatanan nga mga bagay.”—1 Korinto 13:4, 7.

[Mga Retrato ha pahina 7]

Kon karuyag makiistorya han imo padis, namamati ka ba?