An Kalibotan nga Waray Krimen ha Tidaraon

HANDURAWA, kon mahihimo mo, an kalibotan nga waray mga kriminal! Diri na magkikinahanglan hin mga polis, mga prisohan, o magastos ngan komplikado nga mga sistema han hustisya para ha mga kriminal. Magigin kalibotan ito diin an tagsa nga indibiduwal matahod ha kinabuhi ngan panag-iya han iba. Baga in imposible ba ito? Bangin hunahunaon mo ito, kondi inin urusahon nga pag-uswag amo gud an iginsasaad han Biblia. Kay ano nga diri tagdon an igintatagna han Kasuratan mahitungod han krimen ngan iba pa nga mga karaotan dinhi hini nga tuna?

Ha libro nga Salmos, aton mababasa: “Diri ka magmasamdong tungod han mga magburuhat hin diri katadongan, bisan liwat diri ka maawa ha ira nga nagbubuhat hin diri matadong: kay sugad han banwa madali hira utdon, ngan manlalaya hira sugad han hilaw nga urutanon. Kondi an maaghop makakapanunod han tuna, ngan maglilipay hira tungod han kahuraan han kamurayaw.” (Salmo 37:1, 2, 11) Oo, waray makakapugong ha Dios ha pagtuman hini nga saad ngan ha ngatanan nga iba pa nga iya nakakadasig nga mga saad.

An paagi han Dios ha pagtuman hini nga mga bendisyon amo an iya Ginhadian. Ha Pag-ampo han Ginoo, gintutdoan ni Jesu-Kristo an iya mga sumurunod nga mag-ampo nga umabot ini nga Ginhadian ngan matuman an kaburut-on han Dios “sugad ha langit, amo man ha tuna.” (Mateo 6:9, 10) Diri na mag-iiha, ilarom hiton nga Ginhadian, waray na usa dinhi ha tuna nga magbubuhat hin krimen tungod han kakablas, panalumpigos, o kahakog. Lugod, an Pulong han Dios nasiring: “Magkakaada kahuraan hin lugas ha tuna ha bawbaw han mga bukid.” (Salmo 72:16) Oo, hi Jehova nga Dios magtatagana ha ngatanan dinhi ha tuna hin waray kataposan nga suplay han mag-opay nga mga butang. Mas importante, an mga tawo mapapagios han gugma ha Dios ngan ha igkasi-tawo, ngan an kalibotan diri na gud masasamok tungod han krimen.