Pagsangyaw Basi Maghimo hin mga Disipulo

“Hi Akila ngan hi Prisila, han pakabati [kan Apolos], igin-upod hiya nira, ngan gin-asoyan hiya hin iruigo pa gud han dalan han Ginoo.”—BUHAT 18:26.

 1. (a) Bisan kon hiya “matinguhaon ha espiritu,” ano an kulang kan Apolos? (b) Ano an ginkinahanglan ni Apolos basi magkaada bug-os nga pagsabot ha espirituwal nga mga butang?

 HI Prisila ngan hi Akila, nga Kristiano nga mag-asawa ha siyahan nga siglo, nakaobserba kan Apolos nga nagpapahayag ha sinagoga ha siyudad han Efeso. Tungod han iya maabtik nga pagpahayag ngan abilidad ha pagkombinse, nadani ni Apolos an atensyon han iya mga mamarati. Hiya “matinguhaon ha espiritu,” ngan “nagtututdo hin igo gud nga mga bagay mahitungod kan Jesus.” Kondi, matin-aw nga hi Apolos ‘nahibaro la han pamaptis ni Juan.’ Kamatuoran kondi limitado an iginsangyaw ni Apolos mahitungod kan Kristo. An problema amo nga diri-kompleto an iya kahibaro mahitungod kan Kristo. Kinahanglan dugangan ni Apolos an iya kahibaro mahitungod han buruhaton ni Jesu-Kristo ha pagtuman han katuyoan ni Jehova.—Buhat 18:24-26.

 2. Ano nga makuri nga buruhaton an kinarawat ni Prisila ngan ni Akila?

 ² Waray pag-alang, binuligan ni Prisila ngan ni Akila hi Apolos nga makagbuhat han “ngatanan nga mga bagay” nga iginsugo ni Kristo. (Mateo 28:19, 20) An asoy nasiring nga ira ‘igin-upod hi Apolos ngan gin-asoyan hiya hin iruigo pa gud han dalan han Ginoo.’ Kondi, may-ada mga impormasyon mahitungod kan Apolos nga tungod hito bangin mag-alang an iba nga mga Kristiano ha pagtutdo ha iya. Ano nga mga impormasyon? Ngan ano an mahibabaroan naton tikang ha mga pangalimbasog ni Prisila ngan ni Akila nga paghisgotan kan Apolos an Kasuratan? Paonan-o an pagrepaso hinin asoy han kasaysayan mabulig ha aton nga mangalimbasog ha pagtikang hin mga pag-aram ha Biblia?

Isentro an Atensyon ha mga Panginahanglan han mga Tawo

 3. Kay ano nga an gintikangan ni Apolos waray makapugong kan Prisila ngan kan Akila ha pagtutdo ha iya?

³ Tungod kay natawo nga usa ka Judio, matin-aw nga hi Apolos nagdaku ha siyudad han Alexandria. An Alexandria amo an kapital hadto han Ehipto ngan sentro han hitaas nga edukasyon, nga bantogan tungod han daku nga librarya hito. An siyudad may-ada daku nga populasyon nga mga Judio, upod na an mga eskolar. Salit, didto ginhimo an Griego nga hubad han Hebreo nga Kasuratan nga tinatawag nga Septuagint. Diri urusahon nga hi Apolos ‘gamhanan ha Kasuratan’! Hi Akila ngan hi Prisila parahimo hin mga tolda. Nahadlok ba hira tungod han pagin batid ni Apolos? Waray. Tungod ha gugma, ira gintagad ini nga tawo, an iya mga panginahanglan, ngan kon paonan-o nira mabubuligan hiya.

 4. Diin ngan paonan-o nakarawat ni Apolos an ginkinahanglan niya nga bulig?

⁴ Bisan kon batid hi Apolos, nagkinahanglan hiya hin instruksyon. An bulig nga iya ginkinahanglan diri hiaagian ha bisan ano nga unibersidad kondi ha mga igkasi-membro han Kristiano nga kongregasyon. Hi Apolos hirani na magpahimulos han mga punto nga magriresulta hin mas husto nga pagsabot ha kahikayan han Dios para han kaluwasan. “Igin-upod hiya [ni Prisila ngan ni Akila], ngan gin-asoyan nira hiya hin iruigo pa gud han dalan han Ginoo.”

 5. Ano an imo masisiring mahitungod han espirituwalidad ni Prisila ngan ni Akila?

⁵ Hi Prisila ngan hi Akila marig-on ha espirituwal ngan marig-on an pundasyon ha pagtoo. Sigurado nga hira ‘andam pirme ha pagdepensa ha atubangan han ngatanan nga mapakiana han hinungdan han ira pagtoo,’ bahandianon man iton nga tawo, usa nga kablas, usa nga maaramon, o usa nga uripon. (1 Pedro 3:15) Hi Akila ngan an iya asawa ‘naggamit hin husto han pulong han kamatuoran.’ (2 Timoteo 2:15, NW) Matin-aw, seryoso nga mga estudyante hira han Kasuratan. Hi Apolos nabantad gud han instruksyon nga iginbasar ha ‘pulong han Dios, nga buhi ngan maabtik,’ nga nakakaapekto han kasingkasing.—Hebreo 4:12.

 6. Paonan-o kita nahibaro nga inapresyar gud ni Apolos an bulig nga iya nakarawat?

⁶ Inapresyar gud ni Apolos an susbaranan han iya mga magturutdo ngan nagin mas maabtik pa ngani hiya ha paghimo hin mga disipulo. Ginamit niya hin epektibo an iya kahibaro ha buruhaton nga pagpasamwak han maopay nga sumat, labi na ha mga Judio. Hi Apolos epektibo gud ha pagkombinse ha mga Judio mahitungod kan Kristo. Tungod kay ‘gamhanan ha Kasuratan,’ napamatud-an niya ha ira nga an ngatanan nga mga propeta ha kadaan nga panahon nagpamulat ha pag-abot han Kristo. (Buhat 18:24, Kingdom Interlinear Translation) An asoy nagdudugang nga katapos hito hi Apolos nagpakadto ha Akaya, diin “binulig hiya hin daku ha mga nagtotoo tungod han grasya. Kay ha daku nga gahum, iya gindaog an mga Judio ha kadaygan, ha pagpahayag tungod ha santos nga surat, nga hi Jesus amo an Kristo.”—Buhat 18:27, 28.

Mahibaro Tikang ha Susbaranan han Iba nga mga Magturutdo

 7. Paonan-o hi Akila ngan hi Prisila nagin maabtik nga mga magturutdo?

⁷ Paonan-o hi Akila ngan hi Prisila nagin maabtik nga mga magturutdo han Pulong han Dios? Gawas pa han ira kamaduruto ha personal nga pag-aram ngan pagtambong ha mga katirok, an ira duok nga pakig-upod kan apostol Pablo sigurado nga nakabulig gud. Nag-ukoy hi Pablo ha balay ni Prisila ngan ni Akila ha Korinto ha sulod hin 18 ka bulan. Magkaupod hira nga nagtrabaho ha paghimo ngan pag-ayad hin mga tolda. (Buhat 18:2, 3)  Handurawa an ira hilarom nga espirituwal nga mga pag-iristorya ha Kasuratan. Ngan an sugad nga pakig-upod kan Pablo sigurado nga nagpauswag han ira espirituwalidad! ‘Lakat kaupod han mga tawo nga makinaadmananon, ngan ikaw magigin makinaadmananon,’ siring han Proberbios 13:20. An maopay nga mga kaupod may-ada maopay nga epekto ha ira espirituwal nga mga batasan.—1 Korinto 15:33.

 8. Ano an hinbaroan ni Prisila ngan ni Akila ha pag-obserba kan Pablo ha iya ministeryo?

⁸ Han naobserbahan ni Prisila ngan ni Akila hi Pablo sugad nga parasamwak han Ginhadian, nakita nira an susbaranan han usa ka maopay nga magturutdo. An asoy ha Mga Buhat nasiring nga hi Pablo “nagsaysay didto ha sinagoga [ha Korinto] ha ngatanan nga adlaw nga iparahuway, ngan pinapag-alagad [“kinumbinse,” NW] an mga Judio ngan an mga Gresyahanon.” Ha urhi, han inupdan hiya ni Silas ngan ni Timoteo, hi Pablo “ginlugos han [“nagin okupado hinduro ha,” NW] pulong, ngan nagtestigo ha mga Judio, nga hi Jesus amo an Kristo.” Han nakita nga gutiay an interes han mga membro han sinagoga, naobserbahan ni Prisila ngan ni Akila nga binalhin hi Pablo ngadto ha mas maopay nga lugar basi tikanganan an pagsangyaw didto, ha balay nga hirani ha sinagoga. Didto nabuligan ni Pablo hi Krispo, “an magburuot ha sinagoga,” nga magin usa nga disipulo. Sigurado, naobserbahan ni Prisila ngan ni Akila nga an pagin disipulo hiton nga usa nagkaada daku ngan mabungahon nga epekto ha teritoryo. An asoy nasiring: “Hi Krispo . . . tinoo ha Ginoo pati an ngatanan nga nakada ha iya balay; ngan damu han mga Korintohanon, han pagpakabati, an nanoo; ngan pinanbaptisan.”—Buhat 18:4-8.

 9. Paonan-o napagios hi Prisila ngan hi Akila ha susbaranan ni Pablo?

⁹ An susbaranan ni Pablo ha ministeryo ha kanataran ginsubad han iba nga mga parasamwak han Ginhadian, sugad kan Prisila ngan kan Akila. An apostol nagsagda ha iba nga mga Kristiano: “Magsubad kamo ha akon, sugad nga hi ako nasubad kan Kristo.” (1 Korinto 11:1) Uyon ha susbaranan ni Pablo, binuligan ni Prisila ngan ni Akila hi Apolos nga masabtan hin mas husto an mga katutdoan mahitungod kan Kristo. Katapos, hi Apolos naman an binulig ha iba pa. Sigurado nga binulig hi Prisila ngan hi Akila ha paghimo hin mga disipulo ha Roma, Korinto, ngan ha Efeso.—Buhat 18:1, 2, 18, 19; Roma 16:3-5.

10. Ano an hinbaroan mo ha Buhat kapitulo 18 nga mabulig ha imo ha buruhaton nga paghimo hin disipulo?

¹⁰ Ano an mahibabaroan naton tikang ha aton paghisgot ha Buhat kapitulo 18? Bueno, sugad la nga hi Akila ngan hi Prisila nahibaro tikang kan Pablo, mapapauswag naton an aton abilidad ha paghimo hin mga disipulo pinaagi han pagsunod ha susbaranan han mag-opay nga mga magturutdo han Pulong han Dios. Mahimo kita makig-upod hadton “okupado hinduro ha pulong” ngan “nagtitestigo hin maopay” ha iba. (Buhat 18:5, Kingdom Interlinear Translation) Maoobserbahan naton kon paonan-o nira natutugkad an kasingkasing han mga tawo pinaagi han paggamit hin nakakakombinse nga mga kaabtik ha pagtutdo. An sugad nga mga kaabtik makakabulig ha aton ha paghimo hin mga disipulo. Kon an usa ka tawo nag-aaram ha Biblia kaupod naton, mahimo kita  magsuhestyon nga aghaton niya an iba nga mga membro han iya pamilya o mga amyaw nga umupod ha pag-aram. O mahimo naton hangyoon hiya nga isumat ha aton kon hin-o pa an mahimo naton tanyagan hin pag-aram ha Biblia.—Buhat 18:6-8.

Maghimo hin mga Higayon ha Paghimo hin mga Disipulo

11. Diin hiaagian an bag-o nga mga disipulo?

¹¹ Hi Pablo ngan an iya mga igkasi-Kristiano nangalimbasog ha paghimo hin mga disipulo pinaagi han pagsangyaw ha balay-balay, ha mga baraligyaan, ngan ha ira mga pagbiyahe—oo, ha bisan diin. Sugad nga madasigon nga magburuhat han Ginhadian nga nangangalimbasog ha paghimo hin mga disipulo, mapapauswag mo ba an imo mga buruhaton ha pag-alagad ha kanataran? Magagamit mo ba hin epektibo an mga higayon ha pagbiling hin mga takos ngan pagsangyaw ha ira? Ano an pipira nga mga paagi diin nakabiling hin mga disipulo an aton mga igkasi-magwarali han maopay nga sumat? Aton kitaon siyahan an pagsangyaw pinaagi han telepono.

12-14. Ha pag-ilustrar han mga kapulsanan han pagsangyaw pinaagi han telepono, isaysay an imo kalugaringon nga eksperyensya o an usa dida hini nga mga parapo.

¹² Samtang nagsasangyaw ha balay-balay ha Brazil, usa nga Kristiano nga tatawagon naton nga Maria an naghatag hin tract ha usa ka batan-on nga babaye nga tigawas ha usa nga apartment. Ginagamit an ulohan han tract sugad nga introduksyon, hi Maria nagpakiana, “Karuyag mo ba mahibaro hin dugang pa mahitungod ha Biblia?” An babaye binaton: “Karuyag ko. Kondi an problema, usa ako nga maestra, ngan an pagtutdo ha mga estudyante nakakaubos han akon panahon.” Iginsaysay ni Maria nga mahimo nira paghisgotan an mga topiko han Biblia ha telepono. Iginhatag han babaye kan Maria an iya numero han telepono, ngan hiton mismo nga gab-i, nagtikang hiya ha pagdumara hin pag-aram pinaagi han telepono nga ginagamit an brosyur nga Ano an Ginkikinahanglan ha Aton han Dios?  a

¹³ Samtang nagsasangyaw pinaagi han telepono, usa nga bug-os-panahon nga ministro ha Etiopia an kinalasan han nakiistorya hiya ha usa nga lalaki kondi nakabati hiya hin aringasa ha luyo. An lalaki naghangyo ha iya nga tumawag utro unina. Han tumawag hiya, nangaro hin pasaylo an lalaki ngan nagsiring nga ha panahon han iya pagtawag kanina, nag-aaway hira nga mag-asawa. Ginamit han Saksi ini nga ginsiring han lalaki sugad nga higayon ha pagpatin-aw han maaramon nga giya nga iginhahatag han Biblia ha pagsulbad ha mga problema han pamilya. Iya ginsumatan an lalaki nga damu nga mga pamilya an nabuligan na han An Sekreto han Kalipayan ha Pamilya, usa nga libro nga iginpublikar han mga Saksi ni Jehova. Pipira ka adlaw katapos idul-ong an libro, an Saksi tinawag utro ha lalaki ha telepono. Hiya nagsiring: “Ini nga libro nagtalwas han akon pag-asawa!” Ha pagkamatuod, gintirok niya an pamilya basi isumat an maopay nga mga punto nga nabasa niya ha libro. Gintikangan an pag-aram ha Biblia ha balay, ngan waray pag-iha an lalaki nagtikang na tumambong hin regular ha Kristiano nga mga katirok.

¹⁴ Usa nga parasamwak han Ginhadian ha Denmark nga nagtikang hin pag-aram ha Biblia pinaagi han pagsangyaw ha telepono an nasiring: “An paramangno han pag-alagad nagdasig ha akon nga  makigbahin ha pagsangyaw pinaagi han telepono. Ha tinikangan nag-alang ako, nasiring: ‘Nadiri ako hito.’ Kondi, usa ka adlaw nagmaisugon ako ngan nagtikang pagpindot han numero han siyahan nga tagbalay. Binaton hi Sonja ngan, katapos han halipot nga pakiistorya, inuyon hiya ha pagkarawat hin basado-ha-Biblia nga literatura. Usa ka gab-i ginhisgotan namon an ulohan mahitungod han paglarang, ngan karuyag niya basahon an libro nga Life—How Did It Get Here? By Evolution or by Creation. b Siring ko nga maopay unta kon magkita kami ngan paghisgotan an ulohan. Inuyon hiya. Andam na ha pag-aram hi Sonja han inabot ako, ngan tikang hadto nag-aaram kami kada semana.” An aton Kristiano nga bugto nga babaye nagtapos: “Damu ka tuig na nga nag-ampo ako nga magkaada usa nga pag-aram ha Biblia, kondi waray ako maglaom nga magkakaada usa pinaagi han pagsangyaw ha telepono.”

15, 16. Ano nga mga eksperyensya an maisasaysay mo ha pagpakita han kapulsanan han pagin alerto ha magkalainlain nga mga paagi ha pagtikang hin mga pag-aram ha Biblia?

¹⁵ Damu an naglalampos tungod ha pag-aplikar han mga suhestyon ha pagsangyaw ha mga tawo ha bisan diin. Usa nga Kristiano nga babaye ha Estados Unidos an nagparada han iya awto sapit han panpubliko nga awto ha usa nga paradahan. Han hinkit-an hiya han babaye ha awto, an Saksi nagtikang magsaysay mahitungod han aton edukasyonal nga buruhaton ha Biblia. Namati an babaye, ginawas ha awto, ngan kinadto ha awto han Saksi. Hiya nagsiring: “Nalipay ako nga pinarada ka basi makiistorya ha akon. Maiha na nga waray ako makakarawat han iyo mga literatura ha Biblia. Gawas pa, karuyag ko mag-aram utro ha Biblia. Mahimo ba kita mag-aram?” Hito nga paagi nakahimo an aton bugto hin maopay nga kahimtang basi ipaangbit an maopay nga sumat.

¹⁶ Usa nga bugto nga babaye ha Estados Unidos an may-ada han masunod nga eksperyensya han binisita hiya ha usa nga nursing home: Gindaop niya an direktor han usa nga departamento han mga trabaho ha pasilidad ngan nagsiring ha iya nga karuyag niya magboluntaryo ha pagbulig ha espirituwal nga mga panginahanglan han mga residente. An aton bugto nagdugang nga malilipay hiya ha pagdumara hin libre nga pag-aram ha Biblia kada semana ha ngatanan nga karuyag tumambong. Gintugotan hiya han direktor nga bumisita ha mga kuwarto han ibaiba nga mga residente. Waray pag-iha, nagdudumara na hiya hin pag-aram ha Biblia tulo ka beses ha usa ka semana ha 26 nga residente, nga an usa ha ira regular na nga natambong ha aton mga katirok.

17. Ano nga paagi an agsob nga epektibo ha pagtikang hin mga pag-aram ha Biblia?

¹⁷ Para ha iba nga mga parasamwak han Ginhadian, an direkta nga pagtanyag hin pag-aram ha Biblia may-ada maopay nga mga resulta. Usa ka aga, an usa nga kongregasyon nga may-ada 105 nga magwarali naghimo hin espesyal nga pangalimbasog ha pagtanyag hin pag-aram ha Biblia ha kada tagbalay nga ira iginkita. Otsenta-y-sais nga magwarali an nakigbahin ha pag-alagad ha kanataran, ngan katapos hin duha ka oras nga pagsangyaw, nakagtikang hira hin 15 nga bag-o nga mga pag-aram ha Biblia.

Magpadayon ha Pagbiling han mga Takos

18, 19. Ano nga importante nga giya tikang kan Jesus an sadang hinumdoman naton, ngan tungod hito nga katuyoan sadang magin determinado kita nga buhaton an ano?

¹⁸ Sugad nga parasamwak han Ginhadian, bangin karuyag mo sarihan an mga suhestyon nga gin-unabi hini nga artikulo. Syempre, maaramon nga tagdon an lokal nga mga kustomre kon ginhuhunahuna an mga paagi han pagsangyaw. Labaw ha ngatanan, hinumdoman naton an giya ni Jesus nga bilngon an mga takos ngan buligan an sugad  nga mga indibiduwal nga magin mga disipulo.—Mateo 10:11; 28:19.

¹⁹ Basi matuman ito nga katuyoan, hinaot ‘gamiton naton hin husto an pulong han kamatuoran.’ Mahihimo naton ito pinaagi han paggamit han pagkombinse nga iginbasar hin marig-on ha Kasuratan. Mabulig ini ha aton nga matugkad an kasingkasing han mga makinarawaton ngan mapagios hira ha pagbuhat. Samtang mainampoon nga nasarig kita kan Jehova, mahimo kita makigbahin ha pagbulig ha iba nga magin mga disipulo ni Jesu-Kristo. Ngan may balos gud ini nga buruhaton! Salit ‘aton buhaton an bug-os nga aton mahihimo ha pagpresenta han aton kalugaringon nga inuyonan han Dios,’ pirme nagpapasidungog kan Jehova sugad nga madasigon nga mga parasamwak han Ginhadian, nga nagsasangyaw nga an katuyoan amo an paghimo hin mga disipulo.—2 Timoteo 2:15, NW.

[Mga footnote]

Nahinunumdoman Mo Ba?

• Kay ano nga ginkinahanglan ni Apolos nga ig-asoy ha iya hin mas kompleto an katuyoan han Dios?

• Ha ano nga mga paagi nahibaro hi Prisila ngan hi Akila tikang kan apostol Pablo?

• Ha Buhat kapitulo 18, ano an imo hinbaroan mahitungod han buruhaton nga paghimo hin disipulo?

• Paonan-o ka makakahimo hin mga higayon ha paghimo hin mga disipulo?

[Mga Pakiana]

[Retrato ha pahina 18]

Hi Prisila ngan hi Akila ‘nag-asoy hin iruigo pa gud han dalan han Ginoo’ kan Apolos

[Retrato ha pahina 20]

Hi Apolos nagin maabtik ha paghimo hin mga disipulo

[Retrato ha pahina 21]

Hi Pablo nagsangyaw bisan diin hiya kumadto

[Mga Retrato ha pahina 23]

Paghimo hin mga higayon ha pagsangyaw