Pirme Ka ba Nagkikinahanglan hin Balaud ha Biblia?

HAN bata ka pa, sigurado nga gintagan ka hin damu nga mga surundon han imo mga kag-anak. Samtang nagtutubo ka, hinsabtan mo nga interesado gud hira ha imo kaopayan. Sugad nga adulto, bangin ginsusunod mo pa gihapon an pipira nga mga prinsipyo nga ira igintutdo ha imo, bisan kon diri ka na sakop han ira awtoridad.

An aton langitnon nga Amay, hi Jehova, naghahatag ha aton hin damu nga direkta nga mga balaud pinaagi han iya Pulong, an Biblia. Pananglitan, iya igindidiri an idolatriya, pornikasyon, pag-adulteryo, ngan pangawat. (Eksodo 20:1-17; Buhat 15:28, 29) Samtang kita ‘nagtutubo ha ngatanan nga mga bagay’ ha espirituwal, hinsasabtan naton nga hi Jehova interesado gud ha gimaopayi para ha aton ngan nga an iya mga balaud diri gud sobra kaistrikto.—Efeso 4:15; Isaias 48:17, 18; 54:13.

Kondi, damu an mga kahimtang diin waray direkta nga balaud. Tungod hito, inaabat han iba nga kon waray direkta nga balaud ha Biblia, may kagawasan hira ha pagbuhat han ira karuyag. Nangangatadongan hira nga kon ha pag-abat han Dios kinahanglanon ito, iya unta iginsumat an iya kaburut-on pinaagi hin direkta nga balaud.

Adton naghuhunahuna hini nga paagi agsob nga naghihimo hin diri maaramon nga mga desisyon nga ira gud ginbabasolan ha urhi. Napapakyas hira ha paghibaro nga an Biblia nagsusulod diri la hin mga balaud kondi han mga pangirilal-an liwat han paagi han panhunahuna han Dios. Samtang aton gin-aadman an Biblia ngan hinbabaroan an panhunahuna ni Jehova ha mga butang, napapatubo naton an konsensya nga binansay uyon ha Biblia ngan nabubuligan kita ha paghimo hin mga desisyon nga nagpapakita han paagi han iya panhunahuna. Kon aton ginbubuhat ito, napapalipay naton an iya kasingkasing ngan naieksperyensyahan naton an mga kapulsanan nga resulta han maaramon nga paghimo hin mga desisyon.—Efeso 5:1.

Mag-opay Gud nga mga Susbaranan ha Biblia

Kon kitaon naton an mga asoy ha Biblia mahitungod ha mga surugoon han Dios ha kadaan nga mga panahon, makakabiling kita hin mga kahimtang diin ira gintagad an panhunahuna ni Jehova bisan kon diri hira ilarom han direkta nga sugo. Tagda an susbaranan ni Jose. Han ginsusulay hiya han asawa ni Potipar ha pakighilawas, waray pa hadto sinurat nga giniyahan han Dios nga balaud kontra ha pag-adulteryo. Kondi, bisan kon waray direkta nga balaud, nasantop ni Jose nga an pag-adulteryo usa nga sala diri la kontra ha iya kalugaringon nga konsensya kondi ‘kontra ha Dios’ liwat. (Genesis 39:9) Matin-aw, nasantop ni Jose nga an pag-adulteryo usa nga pagtalapas ha panhunahuna ngan kaburut-on han Dios, sugad han iginpahayag ha Eden.—Genesis 2:24.

Tagda an usa pa nga ehemplo. Ha Buhat 16:3, aton hibabaroan nga antes iupod hi Timoteo ha iya Kristiano nga mga pagbiyahe, ginturi ni Pablo hiya. Kondi, ha bersikulo 4 mababasa naton nga katapos hito nagbiyahe hi Pablo ngan hi Timoteo ngadto ha mga siyudad ha pagpahayag han “mga pagburut-an [“mga sugo,” NW], nga ginkatangdoan han mga apostol ngan mga ansiano ha Jerusalem.” Usa hito nga mga sugo amo an desisyon nga diri na obligado an mga Kristiano magpaturi! (Buhat 15:5, 6, 28, 29) Kay ano nga inabat hi Pablo nga kinahanglanon ni Timoteo nga magpaturi? “Tungod han mga Judio nga nakadto hadto nga mga lugar; kay hira ngatanan maaram, nga an . . . amay [ni Timoteo] Gresyahanon.” Diri karuyag ni Pablo nga magin hinungdan han diri-kinahanglanon nga paghipakdol. Interesado hiya nga an mga Kristiano padayon nga “magdayaw [ha ira] ngahaw ha konsensya han tagsatagsa ka tawo ha atubangan han Dios.”—2 Korinto 4:2; 1 Korinto 9:19-23.

Ini nga klase han panhunahuna amo an natural  nga panhunahuna ni Pablo ngan ni Timoteo. Basaha an mga teksto sugad han Roma 14:15, 20, 21 ngan 1 Korinto 8:9-13; 10:23-33, ngan kitaa kon mationan-o kainteresado gud hi Pablo ha espirituwal nga kaopayan han iba, labi na hadton bangin mahipakdol ha usa nga butang nga ha pagkamatuod, diri sayop. Ngan hi Pablo nagsurat mahitungod kan Timoteo: “Waray ko iba nga tawo nga may sugad ha iya nga hunahuna nga nagmamangno gud hin totoo ha iyo kahimtangan. Kay an ngatanan nagpapangita ha ira mga kalugaringon, ngan diri an mga bagay ni Jesu-Kristo. Kondi hinbaroan niyo an proyba ha iya, nga, sugad ha usa nga bata nga nag-aalagad ha amay, sugad man hiya nag-aalagad upod ha akon ha pagpasarang han maopay nga sumat.” (Filipos 2:20-22) Maopay gud nga susbaranan para ha aton yana inin duha nga Kristiano nga kalalakin-an! Imbes nga pilion an usa nga butang para ha ira personal nga bentaha, han diri ilarom han espisipiko nga sugo han Dios, ira ginsubad an gugma ni Jehova ngan han iya Anak pinaagi han pagtagad kon paonan-o an ira personal nga mga desisyon mahimo makaapekto ha espirituwalidad han iba.

Tagda hi Jesu-Kristo, an aton nangunguna nga susbaranan. Ha iya Sermon ha Bukid, matin-aw nga iginsaysay niya nga an usa nga nakakasabot han espiritu han mga balaud han Dios masunod hito bisan pa kon an ira mga buhat diri espisipiko nga iginsusugo o igindidiri. (Mateo 5:21, 22, 27, 28) Hira Jesus, Pablo, Timoteo, ngan Jose waray kumarawat han pangatadongan nga kon waray espisipiko nga balaud han Dios, mahimo buhaton han usa ka tawo an iya karuyag. Basi magpahiuyon ha paagi han panhunahuna han Dios, nagkinabuhi ini nga kalalakin-an uyon ha espisipiko nga iginsaysay ni Jesus sugad nga an duha nga gidadakui nga sugo ha ngatanan—paghigugma ha Dios ngan paghigugma ha igkasi-tawo han usa.—Mateo 22:36-40.

Kumusta Man an mga Kristiano Yana?

Matin-aw nga diri naton sadang tagdon an Biblia sugad han pagtagad han usa ha legal nga dokumento—naglalaom nga isusurat hin detalyado an tagsa nga obligasyon. Napapalipay hinduro naton an kasingkasing ni Jehova kon ginpipili naton nga buhaton an nagpapakita han iya panhunahuna, bisan kon waray espisipiko nga balaud nga nagdidikta han aton mga buhat. Ha iba nga pagkayakan, imbes nga sumatan pirme kon ano an karuyag han Dios nga buhaton naton, mahimo naton ‘sabton kon ano an kaburut-on han Ginoo.’ (Efeso 5:17; Roma 12:2) Kay ano nga nakakalipay ini kan Jehova? Tungod kay ipinapakita hito nga mas gintatagad naton an pagpalipay ha iya kay ha aton personal nga mga karuyag ngan mga katungod. Ipinapakita liwat hito nga mapasalamaton gud kita ha iya gugma salit karuyag naton subaron ito, ginhihimo an sugad nga gugma nga puwersa nga nagpapagios ha aton. (Proberbios 23:15; 27:11) Dugang pa, an mga buhat nga iginbasar ha ipinapakita han Kasuratan nakakaamot ha espirituwal ngan agsob ha pisikal nga kahimsog.

Kitaon naton kon paonan-o ini nga prinsipyo mahimo iaplikar ha personal nga mga butang.

Pagpili hin Kaliawan

Tagda an kahimtang han usa nga batan-on nga lalaki nga naruruyag pumalit hin usa nga album hin kanta. Makaruruyag gud an iya hinbatian ha album, kondi nababaraka hiya tungod kay an luyo nga kobre nagpapakita nga an mga pulong malaw-ay ngan bastos. Maaram liwat hiya nga damu han mga kanta han parakanta nasisina ngan agresibo an tono. Sugad nga nahigugma kan Jehova, inin batan-on nga lalaki interesado ha panhunahuna ngan pagbati ni Jehova mahitungod hito. Paonan-o niya masasabtan kon ano an kaburut-on han Dios mahitungod hini nga bahin?

Ha iya surat ha mga taga-Galasia, iginlista ni apostol Pablo an mga buhat han unod ngan  an mga bunga han espiritu han Dios. Sigurado nga maaram ka kon ano an nahiuupod ha mga bunga han espiritu han Dios: gugma, kalipay, kamurayawan, hilawig nga pagpailob, pagkabuotan, pagkamaopay, pagtoo, pagkamalumo, pagpugong-ha-kalugaringon. Kondi ano nga mga buhat an nahiuupod ha mga buhat han unod? Hi Pablo nagsurat: “Niyan madayag an mga buhat han unod nga amo ini: pakighilawas, kahugawan, kalaw-ayan, pagsingba ha mga diosdios, diwata, mga pagkaaway, pagsuhay, mga pangabugho, mga kasina, mga paglaris, mga pagbulag, mga pagkakabig, mga kaawa, mga paghubog, mga aringasa, ngan mga bagay nga mga sugadsugad hini; ginsusumatan ko kamo nga daan, sugad nga ginsumatan ko na kamo hadto pa, nga an mga magbubuhat hin sugad hini nga mga bagay diri makakapanunod ha ginhadian han Dios.”—Galasia 5:19-23.

Tigamni an urhi gud nga mga pulong hito nga lista—“mga bagay nga sugadsugad hini.” Waray ihatag ni Pablo an kompleto nga lista han ngatanan nga mahimo hunahunaon nga buhat han unod. Diri iginpapasabot hito nga mahimo mangatadongan an usa ka tawo, ‘Uyon ha Kasuratan, mahimo ako magbuhat hin bisan ano nga waray ha lista ni Pablo nga mga buhat han unod.’ Lugod, kinahanglan gamiton han mga magbarasa an ira abilidad ha pagsabot basi hibaroan an mga butang nga bangin waray ha lista kondi “sugadsugad hini.” Adton diri-mabinasulon nga nakikigbahin ha mga buhat nga waray unabiha kondi “sugadsugad hini” diri makakapanunod ha mga bendisyon han Ginhadian han Dios.

Salit, kinahanglan naton sabton, o hibaroan, kon ano an diri nakakalipay ha paniplatan ni Jehova. Makuri ba ito? Kon pananglitan ginsagdonan ka han imo doktor nga kumaon hin mas damu nga mga prutas ngan mga utan kondi likyan an pagkaon hin matam-is nga karan-on, ice cream, ngan mga butang nga sugad hini. Makuri ba sabton kon diin nga lista nahiuupod an keyk? Yana kitaa utro an mga bunga han espiritu han Dios ngan an mga buhat han unod. Diin nahiuupod an ginhisgotan na nga album han kanta? Sigurado nga diri ito nagpapakita han mga kalidad sugad han gugma, pagkamaopay, pagpugong-ha-kalugaringon, o han iba pa nga mga kalidad nga may kalabotan ha mga bunga han espiritu han Dios. Diri magkikinahanglan an usa hin direkta nga balaud basi sabton nga ini nga klase han musika diri nauyon ha paagi han panhunahuna han Dios. Ito nga mga prinsipyo naaplikar liwat ha mga barasahon, mga sine, mga programa ha telebisyon, mga uyag ha kompyuter, mga Web site, ngan iba pa.

Maopay nga Personal nga Hitsura

An Biblia nagtatagana liwat hin mga prinsipyo nga may kalabotan ha pamado ngan pag-ayos. Nabulig ini ha tagsa nga Kristiano nga magiyahan ha pagtipig hin angayan ngan makaruruyag nga personal nga hitsura. Gintatagad liwat ini han nahigugma kan Jehova sugad nga higayon liwat, diri ha pagbuhat han iya karuyag, kondi ha pagbuhat han makakalipay ha iya langitnon nga Amay. Sugad han aton hinbaroan na, an kamatuoran nga hi Jehova waray maghatag hin espisipiko nga mga surundon ha usa nga butang diri nagpapasabot nga diri hiya nagtatagad ha kon ano an ginbubuhat han iya katawohan. An mga estilo nagkakaiba ha magkalainlain nga mga lugar, ngan bisan ha usa nga lugar, nagbabag-o ito ha panapanahon. Kondi, an Dios naghahatag hin basihan nga mga prinsipyo nga sadang maggiya ha iya katawohan ha ngatanan nga panahon ngan ha bisan diin nga lugar.

Pananglitan, an 1 Timoteo 2:9, 10 nasiring: “Sugad man, an mga babaye magpakaopay ha ira ha mga kaangayan nga panapton, mahadong ngan maligdong; diri nga may tinalonay nga buhok, ngan bulawan, o mutya, o mahal nga panapton; kondi, pinaagi ha mga maopay nga buhat sugad ha nahiaangay ha mga babaye nga nagsusunod ngan nagtatahod ha Dios.” Tungod hito, kinahanglan tagdon hin maopay han Kristiano nga kababayin-an—ngan kalalakin-an—kon ano nga klase hin hitsura an ginlalaoman han mga tawo ha ira lugar ngada hadton “nagsusunod ngan nagtatahod ha Dios.” Labi na nga angay tagdon han usa nga Kristiano kon ano an mahimo hunahunaon han iba mahitungod han mensahe han Biblia nga iya gindadara tungod han iya hitsura. (2 Korinto 6:3) An susbaranan nga Kristiano diri maghuhunahuna hin sobra mahitungod han iya kalugaringon nga mga karuyag o mga katungod kondi, lugod, sadang hiya magin mahunahunaon nga diri magin hiparakdolan han iba.—Mateo 18:6; Filipos 1:10.

Kon hibaroan han usa nga Kristiano nga an espisipiko nga estilo ha personal nga hitsura nakakapakdol ha iba, mahimo niya subaron hi apostol  Pablo pinaagi han pagtagad ha espirituwal nga kaopayan han iba imbes nga ha iya personal nga mga karuyag. Hi Pablo nagsiring: “Magsubad kamo ha akon, sugad nga hi ako nasubad kan Kristo.” (1 Korinto 11:1) Ngan mahitungod kan Jesus, hi Pablo nagsurat: “Hi Kristo waray man liwat malipay ha iya kalugaringon.” Matin-aw an instruksyon ni Pablo ha ngatanan nga mga Kristiano: “Kita, nga mga marig-on, kinahanglan aton pagdad-on an mga kaluyahan han mga magluya, ngan diri la kita maglipay ha aton kalugaringon. An tagsatagsa ha aton maglipay ha iya amyaw tungod ha maopay, ngan karig-onan.”— Roma 15:1-3.

Pagpatarom han Aton Abilidad ha Pagsabot

Paonan-o naton mapapatubo an aton abilidad ha pagsabot basi mahibaro kon paonan-o mapapalipay hi Jehova bisan kon waray hiya maghatag hin espisipiko nga giya ha usa nga butang? Kon aton basahon an iya Pulong kada adlaw, regular nga pag-adman ito, ngan pamalandungon an aton binabasa, makakaeksperyensya kita hin pag-uswag ha aton abilidad ha pagsabot. An sugad nga pag-uswag diri madagmit nga nahitatabo. Sugad han pisikal nga pagtubo han usa nga bata, an espirituwal nga pagtubo hinay-hinay ngan diri dayon hinbabaroan. Salit kinahanglan magpailob, ngan diri kita sadang umabat hin kapakyas kon diri dayon naton nakikita an pag-uswag. Ha luyo nga bahin, an paglabay la han damu nga panahon diri magpapatarom han aton abilidad ha pagsabot. An sugad nga panahon kinahanglan pun-on hin regular nga pag-usisa ha Pulong han Dios sugad han ginsiring na, ngan kinahanglan iaplikar naton ito nga Pulong ha aton kinabuhi ha pinakamaopay naton nga mahihimo.—Hebreo 5:14.

Mahimo sidngon nga samtang an mga balaud han Dios nagsasari han aton pagkamasinugtanon, an iya mga prinsipyo nagsasari han kahilarom han aton espirituwalidad ngan han aton hingyap nga mapalipay hiya. Samtang nagtutubo kita ha espirituwal, dugang nga pabubug-atan naton an pagsubad kan Jehova ngan ha iya Anak. Mangangalimbasog kita nga igbasar an aton mga desisyon ha panhunahuna han Dios ha mga butang sugad han ipinapakita han Kasuratan. Samtang ginpapalipay naton an aton langitnon nga Amay ha ngatanan nga aton ginbubuhat, mahibabaroan naton nga nagdudugang liwat an aton kalipay.

[Mga Retrato ha pahina 23]

An mga estilo han pamado magkalainlain ha kada lugar, kondi an mga prinsipyo ha Biblia sadang maggiya han aton mga pagpili