Ginpapatubo Mo ba an Pag-abat hin Kahipausa?

NATIGAMNAN mo ba nga an mga parasurat han Biblia pauroutro nga naaaghat ha pag-abat hin kahipausa kon kinikilala nira an mga buhat ngan mga kalidad han Dios? “An paghimo ha akon makatarag-ob ngan urusahon,” nagpahayag an salmista. (Salmo 139:14) “O Jehova,” nagsurat hi propeta Isaias, “ikaw an akon Dios; akon ka pagpapahitas-on, akon pagdadayawon an imo ngaran; kay nagbuhat ka hin katingalahan nga mga butang.” (Isaias 25:1) O hunahunaa an kahipausa nga iginpahayag ha mga pulong ni apostol Pablo: “O pagkahilarom han kamanggaran han kinaadman ngan hibabroan han Dios!”—Roma 11:33.

An The Oxford Encyclopedic English Dictionary naghahatag hin kahulogan han “kahipausa” sugad nga “usa ka emosyon nga inaabat tungod han usa nga butang nga diri-ginlalaoman, diri-pamilyar, o diri-maisaysay, labi na an kasurprisa nga inuupdan hin pagdayaw o hingyap nga mahibaro, ibp.”

Diri ba makalilipay kitaon an gudtiay nga kabataan nga nagdadaku an mga mata ha kahipausa kon ira nakikita, inaabat, o nababatian an mga butang nga bag-o ha ira? Makasurubo, an sugad nga kahipausa nga iginbasar ha hingyap nga mahibaro ha usa ka butang nga bag-o o naiiba agsob nga nawawara ha paglabay han mga tuig.

Kondi, para ha mga parasurat han Biblia nga ginkotar pa la, kinaiya na nira an pag-abat hin kahipausa. Nagpabilin ito ha mga katuigan. Kay ano? Ira ginpatubo an ira pag-abat hin kahipausa pinaagi han maapresyaron nga pamalandong ha mga buhat han Dios. An salmista nag-ampo: “Nahuhunahuna ko an katuigan han maiha na nga naglabay, an handumanan han ngatanan nga imo ginbuhat; an akon hunahuna puno han pagkaurusahon han imo mga linarang.”—Salmo 143:5, The New English Bible.

Darayawon gud nga may-ada hini nga pag-abat hin kahipausa an moderno nga mga magsiringba han Dios! May-ada ka ba hito? Imo ba ginpapatubo ito?