An Ngatanan Magpasamwak han Himaya ni Jehova
An Ngatanan Magpasamwak han Himaya ni Jehova
“Ihatag niyo kan Jehova an kahimayaan ngan an kakusganan. Ihatag ngadto kan Jehova an himaya nga angay ha iya ngaran.”—SALMO 96:7, 8.
1, 2. Tikang ha ano nga surok iginhahatag an pagdayaw kan Jehova, ngan hin-o an ginsasagda nga umupod hito?
HI David, an anak ni Jesse, nagdaku sugad nga magbarantay han kakarnerohan ha distrito han Betlehem. Sigurado nga agsob niya kitaon ha igbaw an kahaluag han damu-an-bitoon nga kalangitan ha mamingaw nga kagab-ihon samtang nagbabantay han kakarnerohan han iya amay dida hiton mamingaw nga sabsaban han kakarnerohan! Sigurado nga nahinumdoman niya iton matin-aw nga mga kiritaon han, pinaagi han giya han baraan nga espiritu han Dios, iya ginkomposo ngan ginkanta an makaruruyag nga mga pulong han ika-19 nga Salmo: “An mga langit nagsusumat han kahimayaan han Dios; ngan an kawanhawanan nagpapahayag han mga buhat han iya mga kamot. An ira tigaman nakadto ha bug-os nga tuna, ngan an ira mga pulong ngadto ha tubtoban han kalibotan.”—Salmo 19:1, 4.
2 Bisan waray yakan, waray pulong, waray tingog, an urusahon nga linarang ni Jehova nga kalangitan nagsusumat han iya himaya, kada adlaw, kada gab-i. An mga linarang diri gud naundang ha pagpahayag han himaya han Dios, ngan tungod hito, nasasantop han usa an iya pagin ubos kon iya ginhuhunahuna inin hilom nga ebidensya nga nahitatabo mismo ha “bug-os nga tuna” basi makita han ngatanan nga umurukoy hito. Kondi, an hilom nga pagpamatuod han mga linarang diri igo na. An matinumanon nga mga tawo ginsasagda nga umupod ha pagyakan sugad nga usa nga testigo. An waray ngarani nga salmista nagsiring ha matinumanon nga mga magsiringba hinin inspirado nga mga pulong: “Ihatag niyo kan Jehova an kahimayaan ngan an kakusganan. Ihatag ngadto kan Jehova an himaya nga angay ha iya ngaran.” (Salmo 96:7, 8) Adton may-ada duok nga relasyon kan Jehova malipayon nga nagios uyon hito nga pagsagda. Kondi, ano an nahiuupod ha paghatag hin himaya ha Dios?
3. Kay ano nga naghihimaya ha Dios an mga tawo?
3 Labaw pa an ginkikinahanglan kay ha mga pulong la. An mga Israelita ha panahon ni Isaias naghimaya ha Dios pinaagi han ira mga im-im, kondi an kadam-an kulang hin sinseridad. Pinaagi kan Isaias, hi Jehova nagsiring: “Ini nga katawohan nadaop ha akon, ngan pinaagi han ira baba ngan han ira mga im-im nagpasidungog ha akon, kondi nagpahirayo han ira kasingkasing tikang ha akon.” (Isaias 29:13) Waray kapulsanan an anoman nga pagdayaw nga ginyakan han sugad nga mga indibiduwal. Basi magin makahuluganon, an pagdayaw kinahanglan magtikang ha kasingkasing nga puno hin gugma kan Jehova ngan sinsero nga pagkilala han iya waray-kapariho nga himaya. Hi Jehova la an Maglalarang. Hiya an Makagarahum-ha-ngatanan, an Usa nga Matadong, an personipikasyon han gugma. Hiya an surok han aton kaluwasan ngan an may-katungod nga Soberano nga ha iya kinahanglan magpasakop an ngatanan nga buhi ha langit ngan ha tuna. (Pahayag 4:11; 19:1) Kon natoo gud kita hini nga mga butang, bug-os-kasingkasing nga himayaon naton hiya.
4. Ano nga mga instruksyon an iginhatag ni Jesus mahitungod ha kon paonan-o mahihimaya an Dios, ngan paonan-o naton matutuman ito?
4 Hi Jesu-Kristo nagsumat ha aton kon paonan-o mahihimaya an Dios. Hiya nagsiring: “Dida hini an akon Amay paghimayaon, nga kamo namumunga hin damu nga mga bunga; busa mahimo kamo nga akon mga tinon-an.” (Juan 15:8) Paonan-o kita namumunga hin damu? Siyahan, pinaagi han bug-os-kalag nga pakigbahin ha pagsangyaw han “maopay nga sumat han ginhadian” ngan hito nga paagi nakikig-usa kita ha ngatanan nga mga linarang ha ‘pagsumat’ mahitungod han ‘diri-nakikita nga mga kalidad’ han Dios. (Mateo 24:14; Roma 1:20) Dugang pa, hini nga paagi nakikigbahin kita ngatanan—ha direkta o diri-direkta nga paagi—ha paghimo hin bag-o nga mga disipulo nga nagpapadaku han lanog han pagkanta hin pagdayaw ngadto kan Jehova nga Dios. Ikaduha, ginpapatubo naton an mga bunga nga nahihimo ha aton han baraan nga espiritu ngan nangangalimbasog kita nga subaron an gihitaasi nga mga kalidad ni Jehova nga Dios. (Galasia 5:22, 23; Efeso 5:1; Kolosas 3:10) Sugad nga resulta, an aton adlaw-adlaw nga paggawi naghihimaya ha Dios.
“Ha Bug-os nga Tuna”
5. Isaysay kon paonan-o pinabug-atan ni Pablo an responsabilidad han mga Kristiano ha paghimaya ha Dios pinaagi han pagsumat han ira pagtoo ha iba.
5 Ha iya surat ngadto ha mga taga-Roma pinabug-atan ni Pablo an responsabilidad han mga Kristiano nga himayaon an Dios pinaagi han pagsumat han ira pagtoo ha iba. An nangunguna nga mensahe han libro nga Mga Taga-Roma amo nga adto la nga nagbubuhat hin pagtoo kan Jesu-Kristo an mahimo maluwas. Ha kapitulo 10 han iya surat, ipinakita ni Pablo nga an natural nga Israel ha iya panahon nangalimbasog pa gihapon nga magkaada matadong nga kahimtang pinaagi han pagsunod ha Mosaiko nga Balaud, bisan kon “hi Kristo amo an kataposan han Kasugoanan.” Salit, hi Pablo nagsiring: “Kon magtug-an ka ha imo baba nga hi Jesus an Ginoo, ngan magtoo ka ha imo kasingkasing nga an Dios nagbanhaw ha iya tikang ha mga minatay, maluluwas ka.” Tikang hadto nga panahon padayon, “waray ginkalainan han Judio ngan han Gresyahanon: kay usa la an Ginoo han ngatanan, ngan makalilipay ha ngatanan nga natawag ha iya: kay, bisan hin-o nga magtawag han ngaran han Ginoo maluluwas hiya.”—Roma 10:4, 9-13.
6. Paonan-o inaplikar ni Pablo an Salmo 19:4?
6 Katapos hi Pablo makatadunganon nga nagsiring: “Oonan-on ba an pagtawag nira hadton nga ha iya waray nira pagtoohi? Ngan oonan-on ba an ira pagtoo kon waray hira pakabati tungod ha iya? Ngan oonan-o an pamati nira hin waray magwawali?” (Roma 10:14) Mahitungod ha Israel, hi Pablo nagsiring: “Waray hira ngatanan pamati [“sumugot,” NW] han maopay nga sumat.” Kay ano nga waray sumugot an Israel? Waray hira sumugot tungod han kawaray pagtoo, diri tungod han kawaray higayon. Ipinakita ini ni Pablo pinaagi han pagkotar han Salmo 19:4 ngan pag-aplikar hito ha pagsangyaw nga buruhaton han mga Kristiano imbes han hilom nga pagpamatuod han mga linarang. Hiya nagsiring: “Matuod gud, an dungog [“tingog,” NW] nira nagsarang ha bug-os nga tuna, ngan an ira mga pulong ngadto ha mga kataposan han kalibotan.” (Roma 10:16, 18) Oo, sugad la nga an waray-kinabuhi nga mga linarang naghihimaya kan Jehova, an siyahan-siglo nga mga Kristiano nagsangyaw han maopay nga sumat han kaluwasan ha bisan diin ngan hito nga paagi nagdayaw ha Dios ha “bug-os nga tuna.” Ha iya surat ngadto ha mga taga-Kolosas, iginhulagway liwat ni Pablo an kahaluag han pagsarang han maopay nga sumat. Hiya nagsiring nga an maopay nga sumat iginwali na “ha ngatanan nga binuhat ha ilarom han langit.”—Kolosas 1:23.
Madasigon nga mga Saksi
7. Sumala kan Jesus, ano an responsabilidad han mga Kristiano?
7 Posible nga iginsurat ni Pablo an iya surat ngadto ha mga taga-Kolosas mga 27 ka tuig katapos mamatay hi Jesu-Kristo. Paonan-o nagsarang an pagsangyaw nga buruhaton ha hirayo tubtob ha Kolosas ha sugad kahalipot nga panahon? Nahitabo ito tungod kay madasigon an siyahan-siglo nga mga Kristiano, ngan ginbendisyonan ni Jehova an ira kadasig. Hi Jesus nagtagna nga an iya mga sumurunod magigin aktibo nga mga parawali han hiya nagsiring: “An maopay nga sumat kinahanglan nga igwali anay ha ngatanan nga mga nasud.” (Markos 13:10) Hiton nga tagna, igindugang ni Jesus an sugo nga iginrekord ha kataposan nga mga bersikulo han Ebanghelyo ni Mateo: “Busa, lakat kamo, ngan manhimo kamo hin mga tinon-an ha ngatanan nga mga nasud ngan pamaptisan hira ha ngaran han Amay, han Anak, ngan han espiritu santo. Pagtutdui hira ha pagbantay han ngatanan nga mga bagay, nga akon iginsugo ha iyo.” (Mateo 28:19, 20) Waray pag-iha katapos ni Jesus sumaka ngadto ha langit, an iya mga sumurunod nagtikang pagtuman hiton nga mga pulong.
8, 9. Sumala ha Mga Buhat, paonan-o ginios an mga Kristiano ha mga sugo ni Jesus?
8 Katapos han pagbubo han baraan nga espiritu ha Pentekostes 33 K.P., an siyahan nga ginbuhat han maunungon nga mga sumurunod ni Jesus amo an paggawas ngan pagsangyaw, nagsusumat ha damu nga mga tawo ha Jerusalem “mahitungod han mga urusahon nga mga buhat han Dios.” Epektibo gud an ira pagsangyaw, ngan mga “tulo ka yukot nga mga kalag” an ginbawtismohan. An mga disipulo madasigon nga nagpadayon ha pagdayaw ha Dios ha publiko, ngan may-ada maopay nga mga resulta.—Buhat 2:4, 11, 41, 46, 47.
9 Waray pag-iha, an mga buruhaton hiton nga mga Kristiano hinbaroan han relihiyoso nga mga lider. Tungod kay nabaraka han kaisog ni Pedro ngan Juan, ira ginsugo an duha nga apostol nga umundang na ha pagsangyaw. An mga apostol binaton: “Diri kami makakahimo, kon diri an pagyakan han mga bagay nga amon hinkit-an ngan hinbatian.” Katapos tarhugon ngan palakton, binalik hi Pedro ngan hi Juan ha ira kabugtoan, ngan hira ngatanan urosa nga nag-ampo ngadto kan Jehova. Maisugon nga nakimalooy hira kan Jehova: “Hatagi an imo mga uripon, nga igyakan nira an imo pulong ha waray kahadlok.”—Buhat 4:13, 20, 29.
10. Ano nga pagkontra an nagtikang mahitabo, ngan paonan-o ginios an totoo nga mga Kristiano?
10 Iton nga pag-ampo nahiuuyon ha kaburut-on ni Jehova, nga nagin matin-aw ha urhi. An mga apostol gindakop ngan katapos, milagroso nga ginpagawas han usa nga anghel. An anghel nagsiring ha ira: “Lakat, ngan tukdaw didto ha templo, ngan pagyakan ha katawohan han ngatanan nga mga pulong hini nga kinabuhi.” (Buhat 5:18-20) Tungod kay sinugot an mga apostol, padayon nga ginbendisyonan hira ni Jehova. Salit, “adlaw-adlaw waray hira ukoy ha panutdo, ngan pagwali, nga hi Jesus amo an Kristo, didto ha templo ngan ha ira balay.” (Buhat 5:42) Matin-aw, an duro nga pagkontra waray gud makapaundang ha mga sumurunod ni Jesus ha paghimaya ha Dios ha kadaygan.
11. Ano an paggios han siyahan nga mga Kristiano ha pagsangyaw nga buruhaton?
11 Waray pag-iha gindakop hi Esteban ngan ginbato tubtob mamatay. An pagpataya ha iya nag-aghat hin duro nga pagtimaraot ha Jerusalem, ngan an ngatanan nga mga disipulo gawas han mga apostol napiritan bumaya ha Jerusalem. Nanluya ba hira tungod han pagtimaraot? Waray gud. Aton mababasa: “An mga nagpatlaag, nagkarokalakat, ngan nanwali han pulong.” (Buhat 8:1, 4) Iton nga kadasig ha pagpasamwak han himaya han Dios pauroutro nga nakita. Ha Buhat kapitulo 9, aton mababasa nga an Pariseo nga hi Saulo nga taga-Tarso, samtang tipakadto ha Damasko basi tikangan an pagtimaraot ha mga disipulo ni Jesus didto, nakakita kan Jesus pinaagi hin usa nga bisyon ngan nabuta. Ha Damasko, milagroso nga gintambal ni Ananias an pagkabuta ni Saulo. Ano an siyahan nga ginbuhat ni Saulo—nga nagin hi apostol Pablo? An rekord nasiring: “Ha kadagmitan hiya nagwali didto ha mga sinagoga, nga hi Jesus amo an Anak han Dios.”—Buhat 9:20.
An Ngatanan Nakigbahin ha Pagsangyaw
12, 13. (a) Sumala ha mga historyador, ano an makatirigamnan mahitungod han siyahan nga Kristiano nga kongregasyon? (b) Paonan-o nauyon an libro nga Mga Buhat ngan an mga pulong ni Pablo ha mga asoy han mga historyador?
12 Kaylap nga kinikilala nga an ngatanan ha siyahan nga Kristiano nga kongregasyon nakigbahin ha pagsangyaw nga buruhaton. Mahitungod han mga Kristiano hiton nga panahon, hi Philip Schaff nagsurat: “Ministeryo an katuyoan han tagsa nga kongregasyon, ngan usa nga misyonero an tagsa nga Kristiano nga tumuroo.” (History of the Christian Church) Hi W. S. Williams nagsaysay: “An kabug-osan nga asoy amo nga an ngatanan nga mga Kristiano ha siyahan nga Iglesia, labi na adton may-ada espesyal nga regalo [mga regalo han espiritu], nagsangyaw han ebanghelyo.” (The Glorious Ministry of the Laity) Marig-on liwat hiya nga nagsaysay: “Diri gud katuyoan ni Jesu-Kristo nga an pagsangyaw magin esklusibo nga pribilehiyo han pipira la nga may ranggo ha ministeryo.” Bisan hi Celsus, usa nga kaaway han Kristianidad ha kadaan nga panahon, nagsurat: “Mga trabahador han tela nga lana, mga sapatiro, mga nagtitina han anit, an mga pinakawaray-edukasyon ngan ordinaryo han katawohan, madasigon nga mga parawali han ebanghelyo.”
13 An pagkahusto hiton nga mga asoy makasaysayan nga rekord han Mga Buhat. Ha Pentekostes 33 K.P., katapos igbubo an baraan nga espiritu, an ngatanan nga mga disipulo, kalalakin-an ngan kababayin-an, nagsumat ha kadaygan han urusahon nga mga buhat han Dios. Katapos han pagtimaraot nga sumunod ha pagpataya kan Esteban, an ngatanan nga mga Kristiano nga nagpatlaag nagpasarang han maopay nga sumat ha kahigrayoan. Paglabay hin mga 28 ka tuig, nagsusurat hi Pablo ha ngatanan nga Hebreohanon nga mga Kristiano, diri la ha gutiay nga klero nga klase, han hiya nagsiring: “Pinaagi ha iya halaran ta gihapon an Dios hin halad han pagdayeg, nga amo, an bunga han mga im-im nga nagsusumat han iya ngaran.” (Hebreo 13:15) Ha pagsaysay han iya panhunahuna mahitungod han pagsangyaw nga buruhaton, hi Pablo nagsiring: “Kon igwali ko an maopay nga sumat, waray ko sadang paghimayaan; kay ini kinahanglan gud ha akon; kay kairo ko kon diri ko igwali an maopay nga sumat!” (1 Korinto 9:16) Matin-aw, ito liwat an inabat han ngatanan nga matinumanon nga mga Kristiano ha siyahan nga siglo.
14. Ano an relasyon han pagtoo ngan pagsangyaw?
14 Oo, an totoo nga Kristiano kinahanglan makigbahin ha pagsangyaw nga buruhaton tungod kay nakakaw-ing gud ito ha pagtoo. Hi Pablo nagsiring: “Ha kasingkasing, an tawo natoo ngadto ha katadongan: ngan ha baba, ginhimo an pagtug-an ngadto ha kaluwasan.” (Roma 10:10) Gutiay la ba ito nga grupo ha sulod han kongregasyon—pariho han klero nga klase—nga nagtotoo ngan salit may-ada responsabilidad ha pagsangyaw? a Syempre diri! An ngatanan nga totoo nga mga Kristiano nagpapatubo hin marig-on nga pagtoo ha Ginoo nga Jesu-Kristo ngan napapagios ha pagpasamwak ha publiko mahitungod hiton nga pagtoo. Kon diri, patay an ira pagtoo. (Jakobo 2:26) Tungod kay an ngatanan nga maunungon nga mga Kristiano ha siyahan nga siglo han aton Komon nga Panahon nagpakita han ira pagtoo hini nga paagi, hinbatian an daku nga singgit han pagdayaw ha ngaran ni Jehova.
15, 16. Paghatag hin mga ehemplo ha pagpakita nga nag-uswag an pagsangyaw nga buruhaton bisan pa han mga problema.
15 Han siyahan nga siglo, ginbendisyonan ni Jehova hin pag-uswag an iya katawohan bisan pa han mga problema ha sulod ngan ha gawas han kongregasyon. Pananglitan, an Buhat kapitulo 6 nagrekord han paglantugi han mga nakombirte nga nagyayakan hin Hebreo ngan nagyayakan hin Griego. Ginsulbad han mga apostol an problema. Sugad nga resulta, aton mababasa: “An pulong han Dios tinubo; ngan an kadamu han mga tinon-an nagdugang gud ha Jerusalem, ngan daku an kadam-an han mga saserdote, nga sinugot han pagtoo.”—Buhat 6:7.
16 Ha urhi, nagkaada mga problema ha politika butnga ni Hadi Herodes Agripa han Judea ngan han mga tawo ha Tiro ngan Sidon. An mga umurukoy hiton nga mga siyudad nagbuhat hin mga pangamuyo ha pakigmurayaw nga nakalipay kan Herodes, ngan ha pagbaton hi Herodes nagpahayag ha publiko. An nagkatirok nga damu nga mga tawo nagtikang magsinggit: “Tingog han usa nga dios; ngan diri han usa nga tawo.” Ha kadagmitan, ginhampak han anghel ni Jehova hi Herodes Agripa, ngan hiya namatay “kay waray hiya hatag han himaya ha Dios.” (Buhat 12:20-23) Nakalasan gud adton naglaom ha tawhanon nga mga magmarando! (Salmo 146:3, 4) Kondi, an mga Kristiano nagpadayon ha paghimaya kan Jehova. Sugad nga resulta, “an pulong han Dios nagtubo, ngan nagtikadamu” bisan pa hiton nga kawaray karig-onan ha politika.—Buhat 12:24.
Hadto Ngan Yana
17. Ha siyahan nga siglo, nagtitikadamu nga grupo han mga tawo an inupod ha pagbuhat han ano?
17 Oo, an bug-os-kalibotan nga Kristiano nga kongregasyon ha siyahan nga siglo ginkompuwesto han madasigon, aktibo nga mga magdarayaw ni Jehova nga Dios. An ngatanan nga maunungon nga mga Kristiano nakigbahin ha pagpasarang han maopay nga sumat. An iba iginkita hin makinarawaton nga mga tawo ngan, sugad han ginsiring ni Jesus, gintutdoan hira ha pagsugot ha ngatanan nga mga butang nga iya iginsugo. (Mateo 28:19, 20) An resulta amo nga an kongregasyon nagtubo, ngan nagtikadamu nga mga indibiduwal an inupod kan Hadi David han kadaan nga panahon ha pagdayaw kan Jehova. An ngatanan nagyakan han inspirado nga mga pulong: “Pagdadayawon ko ikaw, O Ginoo, nga akon Dios, ha bug-os nakon nga kasingkasing; ngan paghihimayaon ko an imo ngaran ha waray kataposan. Kay daku an imo mahigugmaon nga kalooy ha akon.”—Salmo 86:12, 13.
18. (a) Ano nga pagkaiba an natigamnan mahitungod han siyahan-siglo nga Kristiano nga kongregasyon ngan han Kakristianohan yana? (b) Ano an paghihisgotan ha masunod nga artikulo?
18 Tungod hini, makapaaghat ha hunahuna an mga pulong han propesora ha teolohiya nga hi Allison A. Trites. Ha pagtanding han moderno nga Kakristianohan ha siyahan-siglo nga Kristianidad, hiya nagsiring: “An mga iglesia yana kasagaran nga nagdadamu pinaagi han biolohiko nga pagtubo (kon an kabataan ha sulod han pamilya ha lokal nga iglesia personal nga nag-aangkon nga may-ada pagtoo) o pinaagi han pagtubo tungod ha pagbalhin (kon an usa nga bag-ohan nabalhin han iya pagin membro tikang ha lain nga lokal nga iglesia). Kondi, ha Mga Buhat, pagtubo ito tungod ha kakombirte, kay an iglesia nagtitikang pa la ha buruhaton hito.” Nangangahulogan ba ito nga an totoo nga Kristianidad diri na nagtutubo ha paagi nga sadang tumubo ito sugad han ginsiring ni Jesus? Syempre diri. An totoo nga mga Kristiano yana ha ngatanan nga paagi madasigon ha pagdayaw ha Dios ha kadaygan sugad han mga Kristiano ha siyahan nga siglo. Makikita naton ini ha masunod nga artikulo.
[Footnote]
a An Ingles nga mga pulong para han “klero” ngan “klerigo” nagtikang ha Griego nga pulong nga kleʹros, nga nangangahulogan hin “bahín” o “panurundon.” Ha 1 Pedro 5:2, 3, an kleʹros inaaplikar ha bug-os nga “panon han Dios” sugad nga panurundon tikang ha Dios.
Maisasaysay Mo Ba?
• Ha ano nga mga paagi ginhihimaya naton an Dios?
• Paonan-o inaplikar ni Pablo an Salmo 19:4?
• Ano an relasyon han pagtoo ngan han pagsangyaw?
• Ano an makatirigamnan mahitungod han siyahan-siglo nga Kristiano nga kongregasyon?
[Mga Pakiana]
[Retrato ha pahina 8, 9]
An mga langit pirme nag-aasoy han himaya ni Jehova
[Ginkuhaan han Retrato]
Ha pagtugot han Anglo-Australian Observatory, ginretrato ni David Malin
[Mga Retrato ha pahina 10]
Duok nga magkaupod an pagsangyaw nga buruhaton ngan an pag-ampo
