Mga Saad nga Imo Masasarigan

AN PROPETA han Dios nga hi Mika maaram nga an mga saad agsob nga diri masasarigan. Ha iya panahon, bisan an pinakaduok nga mga kaupod diri pirme masasarigan ha pagtuman han ira pulong. Salit hi Mika nagpahamangno: “Ayaw kamo sarig ha usa nga amyaw; ayaw pagbutang hin pagsarig ha usa nga sangkay; bantayi an mga ganghaan han imo baba tikang ha iya nga nahundarig ha imo dughan.”—Mika 7:5.

Gintugotan ba ni Mika inin makasurubo nga kahimtang nga magin hinungdan nga pagruhaduhaan niya an ngatanan nga mga saad? Waray! Nagpahayag hiya hin bug-os nga pagsarig ha mga saad han iya Dios, hi Jehova. “Mahitungod ha akon,” nagsurat hi Mika, “ako matan-aw ngadto kan Jehova: ako maghuhulat para han Dios han akon kaluwasan.”—Mika 7:7.

Kay ano nga may-ada sugad nga pagsarig hi Mika? Tungod kay maaram hiya nga pirme gintutuman ni Jehova an iya pulong. An ngatanan nga iginsumpa han Dios ha mga kaapoy-apoyan ni Mika natuman gud. (Mika 7:20) An pagkamatinumanon ni Jehova ha naglabay naghatag kan Mika hin totoo nga  basihan ha pagtoo nga Iya tutumanon an Iya pulong ha tidaraon.

“Waray Usa nga Butang nga Nakawang”

Maaram hi Mika, pananglitan, nga ginluwas ni Jehova an mga Israelita tikang ha pagkauripon ha Ehipto. (Mika 7:15) Gindasig ni Josue, nga nakaeksperyensya hito nga kagawasan, an iya mga igkasi-Israelita nga sumarig ha ngatanan nga mga saad ni Jehova. Ha ano nga basihan? “Maaram kamo ha ngatanan niyo nga mga kasingkasing ngan ha ngatanan niyo nga mga kalag,” ginpahinumdom hira ni Josue, “nga waray usa nga butang nga nakawang ha ngatanan nga mag-opay nga butang nga kan Jehova nga iyo Dios iginyakan mahitungod ha iyo; an ngatanan natuman para ha iyo, waray usa nga butang nga nakawang hini.”—Josue 23:14.

Maaram gud an mga Israelita nga hi Jehova nagbuhat hin urusahon nga mga butang para ha ira. Iya gintuman an iya saad ha ira mahadlukon-ha-Dios nga kaapoy-apoyan nga hi Abraham nga an iya mga katulinan magdadamu sugad han mga bitoon ngan mag-uukoy ha tuna han Kanaan. Hi Jehova nagsiring liwat kan Abraham nga an iya mga katulinan mag-aantos ha sulod hin 400 ka tuig kondi mabalik ha Kanaan “ha ikaupat nga katulinan.” Nahitabo ini ngatanan.—Genesis 15:5-16; Eksodo 3:6-8.

Gin-abiabi hin maopay an mga Israelita ha Ehipto ha panahon han anak ni Jakob nga hi Jose. Ha urhi an mga Ehiptohanon madarahog nga nagpuwersa ha ira ha pagpatrabaho sugad nga uripon, kondi uyon ha saad han Dios, ha sulod han usa ka peryodo han upat nga magkasunod-sunod nga henerasyon tikang ha panahon nga sinulod hira ha Ehipto, ini nga mga katulinan ni Abraham ginpagawas tikang ha pagkauripon ha Ehipto. a

Durante han sunod nga 40 ka tuig, dugang nga napamatud-an han mga Israelita nga pirme gintutuman ni Jehova an iya mga saad. Han diri makatadunganon nga ginsulong han mga Amalekanhon an mga Israelita, nakiaway an Dios para ha iya katawohan ngan ginpanalipdan hira. Gintagbaw niya an ngatanan nira nga materyal nga mga panginahanglan durante han ira 40-ka-tuig nga paglakaton ha kamingawan ngan ha kataposan ginpaukoy hira ha Tuna nga Iginsaad. Samtang ginrirepaso ni Josue an kasaysayan han mga pakig-upod ni Jehova hini nga mga katulinan ni Abraham, may pagsarig nga makakasiring hiya: “Waray gud nakawang han bisan hain han mag-opay nga butang nga kan Jehova iginyakan ngadto ha panimalay ni Israel; an ngatanan natuman.”—Josue 21:45.

Magpatubo hin Pagsarig ha mga Saad han Dios

Paonan-o ka makakapatubo hin pagsarig ha mga saad ni Jehova, sugad han ginbuhat ni Mika ngan ni Josue? Bueno, paonan-o ka nagpapatubo hin pagsarig ha iba? Kinikilala mo hira hin maopay tubtob han imo mahihimo. Pananglitan, bangin hibaroan mo kon mationan-o kamasasarigan hira pinaagi han pag-obserba nga matinumanon nga nangangalimbasog hira ha pagtuman han ngatanan nira nga mga saad. Samtang dugang nga nakikilala mo an sugad nga mga tawo, napapatubo mo an mainuswagon nga pagsarig ha ira. Mabubuhat mo liwat ito may kalabotan ha pagpatubo han pagtoo ha mga saad han Dios.

Usa nga paagi nga mahihimo mo ini amo an pagpamalandong ha mga linarang ngan ha mga balaud nga nagdudumara hito. Nasarig an mga syentista hini nga mga balaud, sugad hadton nagmamando ha paagi han pagkabahin han usa nga selyula han tawo ngan pagdamu hito basi makahimo hin trinilyon nga mga selyula nga  nagkukompuwesto han imo lawas. Ha pagkamatuod, an mga balaud nga nagmamaniobra ha paggios han materya ngan enerhiya ha bug-os nga uniberso sigurado nga ginhimo han usa nga bug-os nga masasarigan nga Parahimo han Balaud. Sigurado nga makakasarig ka ha iya mga saad, sugad han imo pagsarig ha mga balaud nga nagpapagios han iya mga linarang.—Salmo 139:14-16; Isaias 40:26; Hebreo 3:4.

Pinaagi kan propeta Isaias, usa nga kadungandungan ni Mika, gingamit ni Jehova an pagin regular han mga kapanahonan ngan an urusahon nga sikolo han tubig ha pag-ilustrar han pagkamasasarigan han iya pulong. Kada tuig nauran. Ginhuhulos hito an tuna ngan tungod hito nagigin posible para ha mga tawo nga maitanom an ira liso ngan anihon an bunga. May kalabotan hini, hi Jehova nagsiring: “Sugad nga an uran ngan an niebe nahuhulog tikang ha langit, ngan diri nabalik ngadto, kondi nahatag hin tubig ha tuna, ngan nakakapanurok ngan nakakapamiyoos hini, ngan nahatag hin liso ha magsarabwag ngan tinapay ha kumaraon; maaamo man an akon pulong nga magawas ha akon baba: diri ini mabalik ha akon nga kawang, kondi magtutuman hadton akon karuyag, ngan ini mauswag dida ha bagay ngain ko ini igpapadara.”—Isaias 55:10, 11.

Masasarigan nga mga Saad Mahitungod ha Paraiso

An pag-usisa ha mga linarang mahimo magpatubo han pagsarig ha Maglalarang, kondi may-ada pa ginkikinahanglan kon karuyag mo mahibaro mahitungod ha mga saad nga bahin han ‘pulong nga nagawas ha iya baba.’ Basi mahibaro mahitungod hini nga mga saad basi nga masarigan mo ito, kinahanglan usisahon mo an giniyahan han Dios nga rekord han Kasuratan mahitungod ha katuyoan han Dios para ha tuna ngan ha iya mga pakig-upod ha katawohan.—2 Timoteo 3:14-17.

Hi propeta Mika sinarig ha mga saad ni Jehova. May-ada ka mas damu gud nga giniyahan han Dios nga rekord kay ha kan Mika. Samtang binabasa mo an Biblia ngan pinamamalandong ito, mapapatubo mo liwat an pagtoo ha katumanan han mga saad han Dios. Ini nga mga saad nag-uupod diri la han mga katulinan ni Abraham kondi han bug-os nga katawohan. Ginsaaran ni Jehova inin mahadlukon-ha-Dios nga patriarka: “Ha imo katulinan [“binhi,” NW] an mga nasud ha kalibotan pagbabaraanon; kay ikaw nagtuman han akon tingog.” (Genesis 22:18) An nangunguna nga bahin han “binhi,” o anak, ni Abraham amo an Mesias, hi Jesu-Kristo.—Galasia 3:16, NW.

Pinaagi kan Jesu-Kristo, sisiguruhon ni Jehova nga an mga bendisyon maawas ngada ha masinugtanon nga katawohan. Ngan ano an iginsasaad han Dios nga pagbubuhaton ha aton panahon? An Mika 4:1, 2 nabaton pinaagi hinin matagnaon nga mga pulong: “Ha urhi nga mga adlaw mahinanabo, nga an bukid han kan Jehova balay pagtitindugon ha bawbaw han mga bukid, ngan ini pagpapahitas-on labaw han mga bungtod; ngan an mga katawohan mahuyog ngada hini. Ngan damu nga nasud an makada ngan masiring: Kadi kamo, ngan kadto kita ha bukid ni Jehova, ngan ngadto ha balay han Dios ni Jakob; ngan hiya magtututdo ha aton han iya mga dalan, ngan kita maglalakat dida han iya mga agianan.”

Adton nahibabaro mahitungod ha mga paagi ni Jehova, “ira hihimoon an ira mga kampilan nga mga arado, ngan an ira mga bangkaw nga mga garab nga ipangarapon.” Mawawara an bisan ano nga mga hilig ha pakig-away. Diri mag-iiha, an tuna mapupuno na hin matadong nga mga tawo, ngan waray usa an magpapakurog ha ira tungod han kahadlok. (Mika 4:3, 4) Oo, an Pulong han Dios nagsasaad nga ilarom han Ginhadian nga ginmamandoan ni Jesu-Kristo, wawad-on ni Jehova ha tuna an ngatanan nga mga matalumpiguson.—Isaias 11:6-9; Daniel 2:44; Pahayag 11:18.

Bisan adton nag-antos ngan namatay tungod han pagrebelde han tawo ha Dios babanhawon nga may paglaom nga mabuhi ha waray kataposan ha tuna. (Juan 5:28, 29) Hi Satanas ngan an iya  mga demonyo, an mga paraaghat han karaotan, pagwawad-on, ngan an mga epekto han sala ni Adan kukuhaon pinaagi han halad lukat ni Jesus. (Mateo 20:28; Roma 3:23, 24; 5:12; 6:23; Pahayag 20:1-3) Ngan ano an magigin kahimtang han masinugtanon nga mga tawo? Aw, bibendisyonan hira hin waray kataposan nga kinabuhi nga hingpit an kahimsog ha paraiso nga tuna!—Salmo 37:10, 11; Lukas 23:43; Pahayag 21:3-5.

Pagkamaopay gud hini nga mga saad! Kondi makakatoo ka ba hito? Syempre makakatoo ka hito. Diri ini mga saad han mga tawo nga bangin may-ada maopay nga mga intensyon kondi waray gahum ha pagtuman hito. Mga saad ito han Makagarahum-ha-ngatanan nga Dios, nga diri nagbubuwa ngan ‘diri nag-aalang mahitungod ha iya saad.’ (2 Pedro 3:9; Hebreo 6:13-18) Bug-os nga makakasarig ka ha ngatanan nga mga saad nga aada ha Biblia, tungod kay an Burabod hito amo hi ‘Jehova an Dios han kamatuoran.’—Salmo 31:5.

[Footnote]

[Blurb ha pahina 6]

“Waray usa nga butang nga nakawang ha ngatanan nga mag-opay nga butang nga kan Jehova nga iyo Dios iginyakan mahitungod ha iyo.”—JOSUE 23:14

[Mga Retrato ha pahina 4, 5]

Gintuman ni Jehova an iya mga saad ha Israel didto ha Dagat nga Pula ngan ha kamingawan

[Mga Retrato ha pahina 7]

Gintuman ni Jehova an iya saad kan Abraham. An iya Binhi, hi Jesu-Kristo, magdadara hin mga bendisyon ha katawohan