Espirituwalidad Ngan an Imo Kaopayan

POSIBLE nga nagamit ka hin daku nga bahin han imo panahon ha pag-ataman han imo pisikal nga kahimsog. Kada adlaw, bangin nagamit ka hin tubtob ha walo ka oras ha pagkaturog, pipira ka oras ha pagluto ngan pagkaon, ngan walo ka oras o sobra pa ha pagtrabaho basi may ibayad para ha lugar nga kakaturogan ngan ha pagkaon. Kon nagkakasakit ka, bangin nagasto ka hin panahon ngan kwarta ha pagpakonsulta ha doktor o ha pag-andam hin nahiaraan nga tambal. Naglilimpyo ka, nakarigo, ngan bangin regular nga nag-iehersisyo pa ngani, ini ngatanan para ha maopay nga kahimsog.

Kondi, an pagkaada maopay nga kahimsog nag-uupod hin labaw pa kay ha pag-ataman la han imo pisikal nga mga panginahanglan. May-ada usa nga butang nga importante para ha imo kaopayan. Iginpapakita han pagsaliksik ha mediko nga an imo pisikal nga kahimsog duok nga may kalabotan ha imo espirituwal nga kahimsog—an imo pisikal nga kahimsog apektado han imo espirituwalidad.

An Direkta nga Kalabotan

“An kadam-an nga personal nga ginsaliksik nga mga artikulo mahitungod ha topiko nakaobserba hin direkta nga kalabotan butnga han ginpauswag nga espirituwalidad ngan han mas maopay nga kahimsog,” siring ni Propesor Hedley G. Peach han University of Melbourne, Australia. Ha pagkomento mahitungod hini nga mga obserbasyon, an The Medical Journal of Australia (MJA) nasiring: “An kalidad han pagin relihiyoso iginkaw-ing liwat ha . . . mas hamubo nga presyon han dugo, mas hamubo nga kolesterol . . . ngan mas hamubo nga posibilidad pa ngani ha pagkaada kanser ha kolon.”

Ha pariho nga paagi, ha Estados Unidos, usa nga surbey nga  gindumara han University of California (UC), Berkeley, han tuig 2002 ha 6,545 nga mga tawo an nakaobserba nga an “mga tawo nga natambong hin relihiyoso nga mga seremonya makausa ha usa ka semana mas hilawig an kinabuhi kon itanding hadton diri pirme natambong o diri gud natambong.” Hi Doug Oman, an nanguna ha pagdumara han surbey ngan usa nga mamumulong ha UC Berkeley’s School of Public Health, nagsiring: “Naobserbahan namon ini nga kaibahan bisan katapos tagdon an mga bahin sugad han mga relasyon ha mga igkasi-tawo ngan mga pamatasan may kalabotan ha kahimsog, upod na an pagsigarilyo ngan pag-ehersisyo.”

Ha pag-unabi han iba pa nga mga bentaha han may-ada espirituwal nga panlantaw ha kinabuhi, an MJA nasiring: “Iginpakita han mga surbey ha Australia nga mas marig-on an pag-asawa, guti la an sobra nga nainom hin irinmon nga de alkohol ngan diri husto nga nagamit hin droga, mas imposible an paghunahuna ha pag-unay, mas gutiay an kabaraka ngan depresyon, ngan mas diri hakog an relihiyoso nga mga tawo.” Dugang pa, an BMJ (nga kilala hadto nga The British Medical Journal) nagrireport: “Baga hin mas madagmit ngan bug-os nga hinngangalimtan han mga tawo nga may-ada mas marig-on nga espirituwal nga mga gintotoohan an ira kasakit katapos han kamatay han usa ka duok nga tawo kay han mga tawo nga waray espirituwal nga mga gintotoohan.”

May-ada magkalainlain nga mga opinyon mahitungod ha kon ano an totoo nga espirituwalidad. Ha gihapon, an imo espirituwal nga kahimtang may-ada impluwensya ha imo kahimsog ha lawas ngan hunahuna. Ini nga ebidensya nauyon ha pulong ni Jesu-Kristo haros 2,000 ka tuig na an naglabay. Hiya nagsiring: “Malipayon adton mahunahunaon han ira espirituwal nga panginahanglan.” (Mateo 5:3, NW) Tungod kay an imo kahimsog ngan kalipayan naiimpluwensyahan han imo espirituwal nga kahimtang, makatadunganon nga magpakiana: ‘Diin ako makakabiling hin masasarigan nga espirituwal nga giya? Ngan ano an nahiuupod ha pagin espirituwal nga tawo?’

 [Ginkuhaan han mga Retrato ha pahina 2]

Ginkuhaan han mga Retrato: Pahina 18: Mao Tse-tung and Golda Meir: Hulton/Archive by Getty Images; Francis Ferdinand: From the book The War of the Nations; Hirohito, Lindbergh, & Einstein: U.S. National Archives photo; Stalin: U.S. Army photo; Roosevelt: Franklin D. Roosevelt Library; Churchill: The Trustees of the Imperial War Museum (MH 26392)