Kay Ano nga an mga Saksi ni Jehova Padayon nga Nabisita ha Imo?

HA BUG-OS nga kalibotan, hinbabaroan gud an pagkamapinadayunon han mga Saksi ni Jehova ha ira ministeryo ha balay-balay. An iba nga mga tawo nahipapausa kon kay ano nga an mga Saksi padayon nga nabisita ha ira, labi na kon nagpakita hira hadto hin gutiay nga interes ha mensahe han mga Saksi. Duha nga surat tikang ha Russia an nabulig ha pagsaysay han hinungdan.

“Ha totoo la,” siring ni Masha, usa nga 19-anyos nga babaye ha Khabarovsk, “nalikay gud ako hadto ha mga Saksi ni Jehova.” Kondi, katapos mabasa an pipira nga kopya han mga magasin nga iginpublikar han mga Saksi, nagbag-o an iya panhunahuna. “Makapainteres gud an ngatanan nga nabasa ko dida hito ngan naghahatag hin impormasyon,” nagsurat hi Masha, “kondi an pinakaimportante, nakakabulig ito ha imo nga kitaon an kalibotan ha naiiba nga paagi. Hinay-hinay nga hinsabtan ko kon kay ano nga an mga tawo tinagan hin katuyoan ha kinabuhi.”

Tikang ha siyudad han Ussuriysk, mga 80 kilometro ha norte han Vladivostok, hi Svetlana nagsurat: “Bag-o la nga gintikangan ko an pagbasa han The Watchtower ngan Awake! Ini nga mga magasin ginkikinahanglan gud ha aton presente nga panahon. Naruruyagan ko an ngatanan nga mga artikulo. Makapainteres gud ito, impormatibo, ngan nakakadugang han pagsabot. Salamat! Damu hinduro nga salamat nga aanhi kamo hini nga kalibotan ngan ha pagbuhat hiton maopay ngan importante nga buruhaton.”

An mga Saksi ni Jehova ha bug-os nga kalibotan seryoso nga nasunod ha nakakaaghat ha paghunahuna nga pakiana ni apostol Pablo: ‘Oonan-on an ira pakabati kon waray magsasangyaw?’ (Roma 10:14) Kay ano nga diri mamati ha pipira ka minuto ha sunod nga pagbisita ha imo han mga Saksi? Maruruyagan mo liwat an nakakaliaw nga mensahe ha Pulong han Dios, an Biblia.