Matatambal ba han Pagtoo an mga Magsakit?

KON masakit, nagbibiling kita hin katalwasan ngan pagtambal. Posible nga hinbaroan mo tikang ha Biblia nga agsob nga gintambal ni Jesu-Kristo an ngatanan nga klase hin mga sakit, gintalwas an damu nga mga magsakit. Paonan-o nahitabo an sugad nga mga pagtambal? Pinaagi han “gahum han Dios,” siring han Biblia. (Lukas 9:42, 43; Buhat 19:11, 12) Salit, an baraan nga espiritu tikang ha Dios an nagpahinabo han katambal, diri kay an pagtoo la han indibiduwal. (Buhat 28:7-9) Ito an hinungdan kon kay ano nga waray obligara ni Jesus an magsakit nga mga tawo nga magpahayag han ira pagtoo ha iya basi la matambal.

Bangin magpakiana ka: ‘Waray na ba milagroso nga panambal yana, o mahitatabo ba utro an klase han panambal nga ginbuhat ni Jesus? Ano an paglaom para hadton nag-aantos hin maul-ol o diri na matatambal nga sakit?’

Iginsasaysay han Biblia nga ha matadong nga bag-o nga kalibotan han Dios, papahinaboon utro han gahum han Dios an klase han milagroso nga panambal nga ginbuhat ni Jesus han nakanhi pa hiya ha tuna. Malilipay an mga Saksi ni Jehova ha iyo lugar ha pagpakita ha imo kon paonan-o ngan kon san-o bubuhaton han Dios an diri gud mahihimo han mga parapanambal yana—an pagkuha han ngatanan nga mga sakit, sugad man han kamatayon. Oo, an Dios ‘maglalamoy han kamatayon ha kadayonan.’—Isaias 25:8.