“Bug-os nga Tumana an Imo Ministeryo”

“Buhata hin bug-os an imo pag-alagad.”—2 TIMOTEO 4:5, Byington.

1, 2. Bisan kon mga ebanghelisador an ngatanan nga mga Kristiano, sumala ha Kasuratan ano an ginkikinahanglan ha mga tigurang?

 USA ka ba nga parasamwak han Ginhadian? Kon amo, pasalamati hi Jehova nga Dios tungod hinin makaruruyag gud nga pribilehiyo. Usa ka ba nga tigurang ha kongregasyon? Dugang nga pribilehiyo ito tikang kan Jehova. Kondi kinahanglan diri gud naton hingalimtan nga an aton pagin kuwalipikado ha ministeryo o pagmangno ha kongregasyon diri tungod han sekular nga edukasyon o abilidad ha pagyakan hin maabtik. Binubuligan kita ni Jehova nga magin kuwalipikado para ha ministeryo, ngan tungod kay an pipira nga kalalakin-an ha aton nakadangat ha espisipiko nga mga ginkikinahanglan ha Kasuratan nakapribilehiyo hira ha pag-alagad sugad nga mga paramangno.—2 Korinto 3:5, 6; 1 Timoteo 3:1-7.

² An ngatanan nga dedikado nga mga Kristiano nagbubuhat han buruhaton han mga ebanghelisador, kondi an mga paramangno, o mga tigurang, an labi na gud nga kinahanglan magpakita hin maopay nga susbaranan ha ministeryo. An mga tigurang nga “nagbubudlay ha pagwali ngan ha panutdo” nakikita han Dios ngan ni Kristo, sugad man han mga igkasi-Saksi ni Jehova. (1 Timoteo 5:17; Efeso 5:23; Hebreo 6:10-12) Ha ngatanan nga mga kahimtang, an pagtutdo han usa nga tigurang kinahanglan makabulig ha pag-uswag han espirituwal nga kahimsog han iya mga mamarati, kay hi apostol Pablo nagsiring ha paramangno nga hi Timoteo: “Maabot an panahon nga diri hira mag-aantos han putli nga pagturon-an; kondi, tungod ha ira magkatol nga mga talinga, magtitirok hira han ira mga kalugaringon nga magturutdo nga magsusunod ha ira kalugaringon nga mga kaipa; ngan ira ipapahirayo an ira mga talinga tikang ha kamatuoran, ngan mabalik ha mga surumatanon. Kondi ikaw magmabuotan ka ha ngatanan nga mga bagay, antosa an kakurian, buhata an buhat han usa nga ebanghelista, tumana an imo pagkaministro [“buhata an buruhaton han usa nga ebanghelisador, bug-os nga tumana an imo ministeryo,” NW].”—2 Timoteo 4:3-5.

 3. Ano an kinahanglan buhaton basi an palso nga mga katutdoan diri makadaot ha espirituwalidad han kongregasyon?

³ Basi masiguro nga an palso nga mga katutdoan diri makadaot ha espirituwalidad han kongregasyon, an usa nga paramangno kinahanglan sumunod ha sagdon ni Pablo: “Magin maopay an imo panhunahuna ha ngatanan nga mga butang, . . . buhata hin bug-os an imo pag-alagad.” (2 Timoteo 4:5, Byington) Oo, an usa nga tigurang kinahanglan ‘bug-os nga magtuman han iya ministeryo.’ Kinahanglan bug-os nga buhaton niya ito, ha bug-os nga paagi, o ha bug-os nga sukol. An usa nga tigurang nga bug-os nga nagbubuhat han iya ministeryo naghahatag hin husto nga atensyon ha ngatanan nga iya mga responsabilidad, waray ginpapasibay-an o ginlilikatan. An sugad hito nga tawo matinumanon bisan ha gudtiay nga mga butang.—Lukas 12:48; 16:10.

 4. Ano an makakabulig ha aton nga bug-os nga tumanon an ministeryo?

⁴ An bug-os nga pagtuman han aton ministeryo diri nagkikinahanglan pirme hin dugang nga panahon, kondi nagkikinahanglan gud ito nga gamiton hin maopay han usa an panahon. An timbang ngan regular nga kalaksi makakabulig ha ngatanan nga mga Kristiano ha pagtuman han mga butang ha ministeryo. Basi makahatag hin dugang nga panahon ha pag-alagad ha kanataran, an usa nga tigurang kinahanglan may-ada maopay nga personal nga pag-organisa basi magin timbang an iya eskedyol ngan basi hibaroan niya kon ano an itutoka ha iba ngan kon paonan-o bubuhaton ito. (Hebreo 13:17) Syempre, an talahuron nga tigurang nagbubuhat liwat han iya bahin, pariho kan Nehemia, nga nakigbahin mismo ha pagtukod-utro han mga kuta han Jerusalem. (Nehemia 5:16) Ngan an ngatanan nga mga surugoon ni Jehova sadang makigbahin hin regular ha pagsangyaw han Ginhadian nga buruhaton.—1 Korinto 9:16-18.

 5. Ano an sadang naton abaton mahitungod ha ministeryo?

⁵ Makalilipay gud an aton toka sugad nga mga  parasamwak han natukod na nga langitnon nga Ginhadian! Sigurado nga pinabibilhan naton an aton pribilehiyo nga makigbahin ha pagsangyaw han maopay nga sumat ha bug-os inuukyan nga tuna antes umabot an kataposan. (Mateo 24:14) Bisan kon kita diri-hingpit, madadasig kita han mga pulong ni Pablo: “Ini nga bahandi [nga ministeryo] nga aadi ha amon mga surudlan nga mga tuna, basi nga an kapin kaopay nga gahum makanan Dios, ngan diri matikang ha amon ngahaw.” (2 Korinto 4:7) Oo, makakahatag kita hin pag-alagad nga makalilipay ha Dios—kondi pinaagi la han hatag-han-Dios nga kusog ngan kinaadman.—1 Korinto 1:26-31.

Pagpasanag han Himaya han Dios

 6. Ano an kaibahan han natural nga Israel ngan han espirituwal nga Israel?

⁶ Ha pag-unabi mahitungod han dinihogan nga mga Kristiano, siring ni Pablo nga an Dios ‘naghimo ha amon nga mga batid nga mga ministro ha bag-o nga kauyonan.’ Iginsaysay han apostol an kaibahan han bag-o nga kauyonan nga ginhimo ha espirituwal nga Israel pinaagi kan Jesu-Kristo ngada ha daan nga Balaud nga kauyonan nga ginhimo ha natural nga Israel pinaagi kan Moises. Hi Pablo nagdugang nga han linusad hi Moises tikang ha Bukid Sinai nga dara an papan han Napulo nga Sugo, an iya nawong nagmasilaw hinduro salit an mga Israelita waray makabuslong hito. Kondi, inabot an panahon nga may-ada nahitabo nga mas peligroso pa gud tungod kay “an ira mga hunahuna ginpatig-a” ngan nagkaada tabon an ira mga kasingkasing. Kondi, kon bumalik hira kan Jehova nga may bug-os-kasingkasing nga debosyon, kukuhaon an tabon. Sunod, ha pag-unabi han ministeryo nga iginhatag ngada hadton aada ha bag-o nga kauyonan, hi Pablo nagsiring: “Kita ngatanan, nga nagkabubukasan an aton nawong . . . nagtitinan-aw ha himaya han Ginoo, sugad dida hin salaming [“aton iginhahayag sugad hin mga espiho an himaya ni Jehova,” NW].” (2 Korinto 3:6-8, 14-18; Eksodo 34:29-35) An ‘iba nga mga karnero’ ni Jesus yana nakakapribilehiyo liwat ha pagpasanag han himaya ni Jehova.—Juan 10:16.

 7. Paonan-o maipapasanag han mga tawo an himaya han Dios?

⁷ Paonan-o an magpakasasala nga mga tawo makakapasanag han himaya han Dios, nga waray man tawo nga makakakita han iya nawong ngan mabuhi? (Eksodo 33:20) Bueno, gawas pa han himaya ni Jehova mismo, may-ada liwat hiya mahimayaon nga katuyoan ha pagbindikar han iya pagkasoberano pinaagi han iya Ginhadian. An mga kamatuoran nga may kalabotan ha Ginhadian bahin han “urusahon nga mga buhat han Dios” nga nagtikang ipasamwak hadton ginbuboan han baraan nga espiritu ha Pentekostes han 33 K.P. (Buhat 2:11) Pinaagi han giya han espiritu, bug-os nga makakatuman hira han ministeryo nga igintapod ha ira.—Buhat 1:8.

 8. May kalabotan ha ministeryo, determinado hi Pablo nga buhaton an ano?

⁸ Determinado hi Pablo nga diri tugotan an bisan ano nga makapugong ha iya bug-os nga pagtuman han iya ministeryo. Hiya nagsurat: “Tungod nga nakarawat namon ini nga pagkaministro sugad nga nakarawat namon in kalooy, diri kami maluya: kondi nga iginsikway namon an mga tinago nga bagay han pagkaawod, nga waray kami panggawi ha panlimbong, nga diri paggamit han pulong han Dios hin limbong; kondi pinaagi han pagpahayag han kamatuoran, nga gindayaw kami ngahaw ha konsensya han tagsatagsa ka tawo ha atubangan han Dios.” (2 Korinto 4:1, 2) Pinaagi han tinatawag ni Pablo nga “ini nga pagkaministro,” ipinakita an kamatuoran ngan iginpasarang ha kahigrayoan an espirituwal nga kalamrag.

9, 10. Paonan-o magigin posible an pagpasanag han himaya ni Jehova?

⁹ Mahitungod ha Surok han pisikal ngan espirituwal  nga kalamrag, hi Pablo nagsurat: “An Dios nagsiring: An kalamrag masidlak tikang ha kasisidman, nga amo an sinidlak ha amon mga kasingkasing, ha paghatag han kalamrag han pagkilala han himaya han Dios nga aada ha nawong ni Jesu-Kristo.” (2 Korinto 4:6; Genesis 1:2-5) Tungod kay iginhatag ha aton an hitaas hinduro nga pribilehiyo nga magin mga ministro han Dios, tipigan naton an aton kalugaringon nga limpyo basi pariho han mga salaming, kita makakapasanag han himaya ni Jehova.

¹⁰ An mga indibiduwal nga aada ha espirituwal nga kasisidman diri nakakakita han himaya ni Jehova o han pagpasanag hito tikang kan Jesu-Kristo, an Mas Harangdon nga Moises. Kondi sugad nga mga surugoon ni Jehova, nakakarawat naton an mahimayaon nga kalamrag tikang ha Kasuratan ngan iginpapasanag ito ha iba. Basi maluwas ha kabungkagan adton aada yana ha espirituwal nga kasisidman, ginkikinahanglan nira an kalamrag tikang ha Dios. Salit, upod an daku nga kalipay ngan kadasig, nasugot kita ha sugo han Dios nga ipasanag an kalamrag dida ha kasisidman ha himaya ni Jehova.

Iglawag an Imo Sugâ ha mga Pag-aram ha Biblia ha Balay

11. Ano an ginsiring ni Jesus mahitungod han paglawag han aton sugâ, ngan ano an usa nga paagi han pagbuhat hini ha aton ministeryo?

¹¹ Hi Jesus nagsiring ha iya mga sumurunod: “Kamo amo an kalamrag han kalibotan. An bungto nga nahimutang ha bawbaw han bukid diri matatago; ngan an mga tawo diri nadagkot hin sugâ, ngan ibutang ha ilarom han banga, kondi ha bawbaw han burutangan han sugâ, ngan ito makakalamrag ha ngatanan ha balay. Sugad man hini iglawag niyo an iyo mga sugâ ha atubangan han mga tawo, basi hira kumita han iyo mga mag-opay nga buhat, ngan maghimaya hira ha iyo Amay nga aadto ha langit.” (Mateo 5:14-16) An aton maopay nga paggawi makakapagios ha iba nga maghatag hin himaya ha Dios. (1 Pedro 2:12) Ngan an magkalainlain nga mga bahin han aton pag-ebanghelyo nga buruhaton naghahatag ha aton hin damu nga mga higayon nga iglawag an aton mga sugâ. Usa han aton nangunguna nga mga katuyoan amo an pagpasanag han espirituwal nga kalamrag tikang ha Pulong han Dios pinaagi han pagdumara hin epektibo nga mga pag-aram ha Biblia ha balay. Importante hinduro ini nga paagi ha bug-os nga pagtuman han aton ministeryo. Ano nga mga suhestyon an mahimo makabulig ha aton ha pagdumara hin mga pag-aram ha Biblia nga nakakabantad han mga kasingkasing han mga namimiling han kamatuoran?

12. Paonan-o may kalabotan an pag-ampo ha buruhaton nga pagdumara hin mga pag-aram ha Biblia ha balay?

¹² An pag-ampo kan Jehova mahitungod hini nagpapakita han aton sinsero nga hingyap ha pagdumara hin mga pag-aram ha Biblia. Ipinapakita liwat hito nga nasasabtan naton an pagkaimportante han pagbulig ha iba nga magkaada kahibaro mahitungod ha Dios. (Esekiel 33:7-9) Sigurado nga babatunon ni Jehova an aton mga pag-ampo ngan bibendisyonan an aton maduruto gud nga mga pangalimbasog ha ministeryo. (1 Juan 5:14, 15) Kondi diri la kita nag-aampo basi makabiling hin usa nga madudumarahan hin pag-aram ha Biblia. Katapos nga natikangan na naton an pag-aram, an pag-ampo ngan pamalandong may kalabotan ha espisipiko nga mga panginahanglan han estudyante ha Biblia mabulig ha aton nga pagdumarahon an tagsa nga sesyon ha epektibo nga paagi.—Roma 12:12.

13. Ano an mahimo makabulig ha aton ha pagdumara hin epektibo nga mga pag-aram ha Biblia ha balay?

¹³ Basi makagdumara hin epektibo nga mga pag-aram ha Biblia ha balay, kinahanglan mag-andam kita hin maopay para ha tagsa nga sesyon. Kon inaabat naton nga kulang pa an aton kahibaro ha pagdumara, bangin makabulig an pag-obserba kon paonan-o gindudumara han paramangno han Pag-aram ha Libro an paghisgot ha leksyon han tagsa nga semana. Usahay, mahimo kita umupod ha mga magwarali han Ginhadian nga nagkaada na maopay nga mga resulta ha pagdumara hin mga pag-aram ha Biblia ha balay. Syempre, an paggios ngan mga paagi han pagtutdo ni Jesu-Kristo an labi na nga angay naton tagdon.

14. Paonan-o naton matutugkad an kasingkasing han estudyante ha Biblia?

¹⁴ Nalipay hi Jesus ha pagbuhat han kaburut-on han iya Amay ngan pakiistorya ha iba mahitungod ha Dios. (Salmo 40:8) Hiya maaghop ngan naglampos ha pagtugkad han mga kasingkasing han mga tawo nga namati ha iya. (Mateo 11:28-30) Salit mangalimbasog kita ha pagtugkad han mga kasingkasing han aton mga estudyante ha Biblia. Basi mahimo naton ito, kinahanglan mag-andam kita para ha tagsa nga pag-aram nga ginhuhunahuna an partikular nga mga kahimtang han estudyante. Pananglitan, kon tikang hiya ha kultura nga diri nakarawat han Biblia, bangin kinahanglan kombinsihon naton hiya nga totoo an Biblia. Hito nga kahimtang,  matin-aw nga kinahanglan basahon naton an damu nga mga teksto ngan isaysay ito.

Buligi an mga Estudyante nga Masabtan an mga Ilustrasyon

15, 16. (a) Paonan-o naton mabubuligan an estudyante nga diri nakakasabot ha ilustrasyon nga ginamit ha Biblia? (b) Ano an mahihimo naton kon an usa han aton mga publikasyon nagamit hin ilustrasyon nga makuri masabtan han usa nga estudyante ha Biblia?

¹⁵ An usa nga estudyante ha Biblia bangin diri pamilyar ha usa ka partikular nga ilustrasyon nga ginamit ha Kasuratan. Pananglitan, bangin diri niya masabtan an karuyag sidngon ni Jesus han gin-unabi niya an mahitungod han pagbutang hin lampara ha burutangan hito. (Markos 4:21, 22) Gintutudlok ni Jesus an kadaan nga de-lana nga lampara nga may-ada naglalaga nga pabilo. Iton nga lampara iginbubutang ha espesyal nga burutangan salit nakakalamrag ha usa ka bahin han balay. Bangin kinahanglanon an pagsaliksik ha mga topiko nga “Lamp” ngan “Lampstand” ha publikasyon sugad han Insight on the Scriptures basi maipatin-aw an ilustrasyon ni Jesus. a Kondi makapatagbaw gud an pagkadto ha estudyante ha Biblia nga andam ka ha pagsaysay hito ha paagi nga masasabtan ngan maruruyagan han estudyante.

¹⁶ Bangin ginagamit ha usa nga bulig ha pag-aram ha Biblia an usa nga ilustrasyon nga makuri masabtan han usa nga estudyante. Magkaada panahon ha pagsaysay hito, o gamita an lain nga ilustrasyon nga magpapatin-aw liwat hiton nga punto. Bangin pinabubug-atan han usa nga publikasyon nga importante ha pag-asawa an maopay nga padis ngan an nagkakauyon nga pangalimbasog. Basi iilustrar ini, mahimo unabihon an usa ka tawo nga naglalabyog tikang ha trapeze o báras, nabul-iw hito ha igbaw, ngan naghuhulat nga saluhon hiya han usa pa nga sirkero. Sugad nga mapipilian nga ilustrasyon, an panginahanglan hin maopay nga padis ngan nagkakauyon nga pangalimbasog mahimo iilustrar han pagburubligay han mga trabahador pinaagi han pagpasa han mga kahon ha usa kag usa kon nagdidiskarga ha usa nga lantsa.

17. Ano an mahibabaroan naton tikang kan Jesus mahitungod ha mga ilustrasyon?

¹⁷ An paggamit hin mapipilian nga ilustrasyon bangin magkinahanglan hin abanse nga pangandam. Kondi, usa ito nga paagi ha pagpakita han aton personal nga interes ha estudyante ha Biblia. Ginamit ni Jesus an simple nga mga ilustrasyon ha pagpatin-aw han makuri nga mga topiko. An iya Sermon ha Bukid naghahatag hin mga ehemplo mahitungod hini, ngan ipinapakita han Biblia nga an iya pagtutdo may-ada maopay nga epekto ha iya mga mamarati. (Mateo 5:1–7:29) Mapailubon nga iginsaysay ni Jesus an mga butang tungod han iya sinsero nga interes ha iba.—Mateo 16:5-12.

18. Ano an iginrirekomenda may kalabotan ha gin-unabi nga mga teksto ha aton mga publikasyon?

¹⁸ An aton interes ha iba magpapagios ha aton nga ‘mangatadongan tikang ha Kasuratan.’ (Buhat 17:2, 3, NW) Nagkikinahanglan ini hin sinsero nga pag-aram upod an mga pag-ampo ngan maaramon nga paggamit han mga publikasyon nga igin-andam pinaagi han ‘matinumanon nga tinaporan.’ (Lukas 12:42-44) Pananglitan, an libro nga Kahibaro nga Nagtutugway Ngadto ha Kinabuhi nga Waray Kataposan nagkukotar hin damu nga mga teksto. b Tungod han limitado nga espasyo ha libro, gin-uunabi la an iba nga teksto. Durante han pag-aram ha Biblia, importante nga basahon ngan isaysay an pipira hinin gin-unabi nga mga teksto. Tutal, an aton pagtutdo iginbasar ha Pulong han Dios, ngan may-ada ito daku nga gahum. (Hebreo 4:12) Gamita an Biblia ha bug-os han tagsa nga pag-aram, agsob nga ginagamit an mga teksto ha mga parapo. Buligi an estudyante nga masabtan an ginsisiring han Biblia mahitungod han usa nga topiko o buhat. Pangalimbasog nga ipakita ha iya kon paonan-o hiya magpapahimulos tikang ha pagsugot ha Dios.—Isaias 48:17, 18.

Magpakiana hin Makapaaghat-ha-Hunahuna nga mga Pakiana

19, 20. (a) Kay ano nga sadang naton gamiton an punto-de-bista nga mga pakiana kon nagdudumara hin pag-aram ha Biblia ha balay? (b) Ano an mahihimo kon an usa nga partikular nga topiko nagkikinahanglan hin dugang nga paghisgot?

¹⁹ An maabtik nga paggamit ni Jesus hin mga pakiana nakabulig ha mga tawo nga mangatadongan. (Mateo 17:24-27) Kon magpakiana kita hin punto-de-bista nga mga pakiana nga diri maaawod an estudyante ha Biblia, an iya mga baton mahimo magpahayag han iya ginhuhunahuna mahitungod han usa nga topiko. Bangin hibaroan naton nga may-ada pa gihapon hiya diri-Kasuratanhon nga mga panhunahuna. Pananglitan, bangin natoo hiya ha Trinidad. Ha kapitulo 3, iginpapatin-aw han libro nga Kahibaro nga an pulong nga “Trinidad” diri makikita ha Biblia. An libro nagkukotar ngan nag-uunabi hin mga teksto nga nagpapakita nga hi Jehova bulag kan Jesus ngan nga an baraan nga espiritu amo an aktibo nga puwersa han Dios, diri usa nga persona. An pagbasa ngan paghisgot hini nga mga teksto han Biblia bangin igo na ha pagpamatuod han punto. Kondi ano man kon dugang pa an ginkikinahanglan? Bangin katapos han sunod nga regular nga sesyon han pag-aram, mahimo gamiton an pipira nga panahon ha mapulsanon nga paghisgot mahitungod hini nga topiko nga ginhihisgotan ha lain nga publikasyon han mga Saksi ni Jehova, sugad han brosyur nga Should You Believe in the Trinity? Katapos hito, mahimo naton igpadayon an pag-aram ha Kahibaro nga libro.

²⁰ Pananglitan nakakapakalas o nakakapasubo pa ngani an baton han estudyante ha punto-de-bista nga pakiana. Kon may kalabotan ito ha pagsigarilyo, o ha iba pa nga sensitibo nga topiko, mahimo kita magsuhestyon nga igpapadayon naton an pag-aram ngan paghihisgotan iton nga topiko ha iba nga panahon. An paghibaro nga an estudyante nagsisigarilyo pa gihapon nabulig ha aton nga mamiling hin iginpublikar nga impormasyon nga mahimo makabulig ha iya nga mag-uswag ha espirituwal. Samtang nangangalimbasog kita ha pagtugkad han kasingkasing han estudyante, makakag-ampo kita kan Jehova nga buligan hiya nga mag-uswag ha espirituwal.

21. Ano an mahimo mahitabo kon ipahiuyon naton an aton mga paagi han pagtutdo ha espisipiko nga mga panginahanglan han estudyante ha Biblia?

²¹ Pinaagi han maopay nga pangandam ngan bulig ni Jehova, sigurado nga maipapahiuyon naton an aton mga paagi han pagtutdo ha espisipiko nga mga panginahanglan han estudyante ha Biblia. Samtang nagpapadayon an pag-aram, mabubuligan naton hiya nga mapatubo an hilarom nga gugma ha Dios. Mahimo liwat kita maglampos ha pagbulig ha iya nga mapatubo an pagtahod ngan apresasyon ha organisasyon ni Jehova. Ngan makapatagbaw gud kon kinikilala han mga estudyante ha Biblia nga ‘an Dios tinuod nga aada ha aton’! (1 Korinto 14:24, 25) Salit hinaot magdumara kita hin epektibo nga mga pag-aram ha Biblia ngan buhaton an ngatanan nga mahihimo naton ha pagbulig ha iba nga magin mga disipulo ni Jesus.

Usa nga Bahandi nga Sadang Pabilhan

22, 23. Ano an ginkikinahanglan basi bug-os nga matuman naton an aton ministeryo?

²² Basi bug-os nga matuman an aton ministeryo, kinahanglan sumarig kita ha hatag-han-Dios nga kusog. Ha pag-unabi hito nga ministeryo, hi Pablo nagsurat ha igkasi-dinihogan nga mga Kristiano: “Ini nga bahandi aadi ha amon mga surudlan nga mga tuna, basi nga an kapin kaopay nga gahum makanan Dios, ngan diri matikang ha amon ngahaw.”—2 Korinto 4:7.

²³ Kaapi man kita ha mga dinihogan o usa han ‘iba nga mga karnero,’ pariho kita han maburuong nga mga surudlan nga tuna. (Juan 10:16) Kondi, hi Jehova makakahatag ha aton han kusog nga ginkikinahanglan naton basi matuman an aton mga toka bisan pa han mga pag-ipit kontra ha aton. (Juan 16:13; Filipos 4:13) Salit bug-os nga sumarig kita kan Jehova, pabilhan naton an aton bahandi nga pag-alagad, ngan bug-os nga tumanon an aton ministeryo.

[Mga footnote]

Paonan-o Mo Babatunon?

• Ano an mahihimo han mga tigurang basi bug-os nga matuman nira an ira ministeryo?

• Paonan-o naton mapapauswag an pagkaepektibo han aton mga pag-aram ha Biblia ha balay?

• Ano an bubuhaton mo kon an estudyante ha Biblia diri nakakasabot ha usa nga ilustrasyon o nagkikinahanglan hin dugang nga impormasyon mahitungod han usa nga topiko?

[Mga Pakiana]

[Retrato ha pahina 16]

An Kristiano nga mga tigurang nagtututdo ha kongregasyon ngan nabulig ha pagbansay ha mga igkasi-tumuroo ha ministeryo

[Retrato ha pahina 18]

An pagdumara hin epektibo nga mga pag-aram ha Biblia ha balay usa nga paagi nga aton iginlalawag an aton sugâ