Usa nga Pagsaurog nga Nakakaapekto ha Imo

HAN nakanhi pa ha tuna, gintikangan ni Jesu-Kristo an usa nga pagsaurog nga nagpapasidungog ha Dios. Ini la an relihiyoso nga seremonya nga direkta nga iginsugo niya ha iya mga sumurunod nga saurugon. Ito an Panihapon han Ginoo, nga kilala liwat sugad nga an Kataposan nga Panihapon.

Handurawa nga usa ka nga diri-nakikita nga testigo han mga hitabo nga nagtutugway ngada hito nga okasyon. Hi Jesus ngan an iya mga apostol nagkatirok ha igbaw nga kuwarto ha Jerusalem basi isaurog an Judio nga Paskua. Natapos na hira ha pagkaon han nahiaraan nga pangaon durante han Paskua, nga may-ada inasal nga karnero, mapait nga mga utan, waray iparatubo nga tinapay, ngan pula nga alaksiw. An diri-maunungon nga apostol nga hi Judas Iskariote ginpaiwas na ngan diri na maiha nga maglilirong ha iya Ginoo. (Mateo 26:17-25; Juan 13:21, 26-30) An 11 la nga matinumanon nga mga apostol an kaupod ni Jesus. Usa ha ira hi Mateo.

Sumala ha asoy han personal nga nakakita nga hi Mateo, ha sugad hini gintikangan ni Jesus an Panihapon han Ginoo: “Hi Jesus kinuha hin usa nga tinapay [nga waray libadura], ngan ginbendisyonan, ngan iya ginpinitpinit, ngan ipanhatag ha mga tinon-an, ngan siniring: Kuha kamo; kaon kamo; ini an akon lawas. Ngan han pagkuha han tagayan [han alaksiw] hiya nagpasalamat, ngan hinatag ha ira, nga nasiring: Inuma niyo ngatanan ito; kay ini an akon dugo han bag-o nga testamento nga igtatakbo tungod han kadam-an ha pagpasaylo han mga sala.”—Mateo 26:26-28.

Kay ano nga gintikangan ni Jesus an Panihapon han Ginoo? Han ginbuhat niya ito, kay ano nga ginamit hiya hin waray libadura nga tinapay ngan pula nga alaksiw? Kinahanglan ba makiangbit an ngatanan han mga sumurunod ni Kristo hini nga mga emblema? Mationan-o kaagsob sadang saurugon ini nga panihapon? Ngan may-ada gud ba ito kahulogan para ha imo?