666—Diri La Usa nga Misteryo

“Waray bisan hin-o nga sadang makapalit o makapagbaligya, kon diri la an may tigaman, bisan an ngaran han mananap o an ihap han iya ngaran. Dinhi hini may sarabotan. An may-ada kinaadman, maghunahuna han numero han mananap; kay amo ito an numero han usa ka tawo; ngan an iya numero amo an unom ka gatos kaunman kag unom.”—Pahayag 13:17, 18.

MAY pipira nga mga topiko ha Biblia nga nakaaghat hin daku nga interes ngan pagtagad sugad han tagna mahitungod han misteryoso nga marka, o ngaran, han “ihalas nga mananap”—an numero nga 666. Ha telebisyon ngan ha Internet, sugad man ha mga sine, mga libro, ngan mga magasin, an marka han mananap nagin sentro han waray-kataposan nga espekulasyon.

An iba natoo nga an 666 amo an marka han antikristo nga gin-unabi ha Biblia. An iba nasiring nga nagsisimbolo ito ha usa nga klase hin pinirit nga pangirilal-an, sugad han usa nga tato o iginsuksok nga microchip nga may digital code nga nagpapakilala ha tawo sugad nga usa nga surugoon han mananap. Samtang an iba pa natoo nga an 666 amo an marka han papa han Katoliko. Ira ginhunahuna nga an numero nga 666 nagtutudlok ha papa pinaagi han pagsaliwani hin Romano nga mga numero para ha mga letra ha porma han opisyal nga titulo han papa, nga Vicarius Filii Dei (Representante han Anak han Dios), ngan pinaagi han pagbag-o hin gutiay han mga numero. An iba nga mga tawo nasiring liwat nga ito mismo nga numero mahimo banabanaon tikang ha Latin nga ngaran han Romano nga Emperador nga hi Diocletian ngan tikang ha Hebreo nga bersyon han ngaran nga Nero Caesar. a

Kondi, ini nga imahinasyon la ngan inimbento nga mga interpretasyon, naiiba gud tikang ha ginsisiring han Biblia mismo mahitungod han tigaman han mananap, sugad han aton hibabaroan ha sunod nga artikulo. Iginpapakita gud han Biblia nga adton may-ada marka han mananap makakaeksperyensya han kasina han Dios kon tapuson na niya an presente nga sistema han mga butang. (Pahayag 14:9-11; 19:20) Salit, an pagsabot ha kahulogan han 666, labaw pa kay ha pagsulbad la hin makapainteres nga misteryo. Makalilipay nga waray pabay-i ni Jehova nga Dios, an gilalabawi nga personipikasyon han gugma ngan an Surok han espirituwal nga kahayag, an iya mga surugoon nga waray kahibaro mahitungod hinin importante nga butang.—2 Timoteo 3:16; 1 Juan 1:5; 4:8.

[Footnote]