Atohi an Espiritu han Nagbabag-o nga Kalibotan
Atohi an Espiritu han Nagbabag-o nga Kalibotan
“Aton kinarawat, diri an espiritu han kalibotan, kondi an espiritu nga tikang ha Dios.”—1 KORINTO 2:12.
1. Ha ano nga mga paagi nalimbongan hi Eva?
“AN HALAS naglimbong ha akon.” (Genesis 3:13) Pinaagi hiton pipira nga mga pulong, an siyahan nga babaye, hi Eva, nangalimbasog ha pagsaysay kon kay ano nga nagtalapas hiya kan Jehova nga Dios. Totoo an iya ginsiring, kondi diri hito pagmamatadungon an iya sayop nga buhat. Ha urhi giniyahan hi apostol Pablo ha pagsurat: ‘Hi Eva an nalimbongan.’ (1 Timoteo 2:14) Nalimbongan hiya ha pagtoo nga an usa nga pagtalapas—pagkaon han igindidiri nga bunga—maghahatag ha iya hin kapulsanan, nga hiya magigin pariho ha Dios. Nalimbongan liwat hiya mahitungod ha kon hin-o an usa nga naglimbong ha iya. Diri hiya maaram nga an halas usa la nga tagapagyakan nga ginamit ni Satanas nga Yawa.—Genesis 3:1-6.
2. (a) Paonan-o ginlilimbongan ni Satanas an mga tawo yana? (b) Ano “an espiritu han kalibotan,” ngan ano nga mga pakiana an aton paghihisgotan yana?
2 Tikang pa ha panahon ni Adan ngan ni Eva, hi Satanas padayon nga naglilimbong ha mga tawo. Hiya, ha pagkamatuod, ‘naglilimbong ha bug-os nga kalibotan.’ (Pahayag 12:9) An iya mga taktika waray magbag-o. Bisan kon diri na hiya nagamit hin literal nga halas, padayon nga igintatago niya an iya pangirilal-an. Pinaagi han paggamit ha industriya han kaliawan, han media, ngan iba pa nga mga paagi, ginlilimbongan ni Satanas an mga tawo nga tumoo nga diri nira ginkikinahanglan o diri nira ginpapahimulosan an mahigugmaon nga giya han Dios. An kampanya han panlimbong han Yawa nag-aaghat ha mga tawo ha bisan diin nga magkaada hin espiritu han pagrebelde ha mga balaud ngan mga prinsipyo han Biblia. Tinatawag ini han Biblia nga “an espiritu han kalibotan.” (1 Korinto 2:12) Ini nga espiritu nakakaimpluwensya gud ha mga tinotoohan, mga disposisyon, ngan paggawi hadton diri nakilala ha Dios. Paonan-o ipinapakita ito nga espiritu, ngan paonan-o naton maaatohan an nakakadaot nga impluwensya hito? Aton kitaon.
Nagtitikaraot an mga Suruklan ha Moral
3. Kay ano nga “an espiritu han kalibotan” labi nga nakikita ha moderno nga mga panahon?
3 Ha moderno nga mga panahon, labi nga nakikita “an espiritu han kalibotan.” (2 Timoteo 3:1-5) Posible nga nakikita mo nga nagtitikaraot an mga suruklan ha moral. An Kasuratan nagsasaysay kon kay ano nga sugad hito. Katapos matukod an Ginhadian han Dios han tuig 1914, nagtikang dayon an girra ha langit. Napirde hi Satanas ngan an iya mga anghel ngan iginlabog hira ha tuna. Tungod kay nasina hinduro, ginpapakusog pa gud ni Satanas an iya kampanya ha panlimbong ha bug-os nga kalibotan. (Pahayag 12:1-9, 12, 17) Ha ngatanan nga paagi nga mahihimo niya, nangangalimbasog hiya “basi mahisimang, kon mahihimo, bisan an mga pinili.” (Mateo 24:24) Sugad nga katawohan han Dios, kita an iya siyahan nga puntirya. Nangangalimbasog hiya ha pagbungkag han aton espirituwalidad basi mawad-an kita han pag-uyon ni Jehova ngan han paglaom nga kinabuhi nga waray kataposan.
4. Paonan-o gintatagad han mga surugoon ni Jehova an Biblia, ngan paonan-o ito gintatagad han kalibotan?
4 Nangangalimbasog hi Satanas nga pakarauton an Biblia, an presyoso nga libro nga nagtututdo ha aton mahitungod han aton mahigugmaon nga Maglalarang. Hinigugma ngan pinabibilhan han mga surugoon ni Jehova an Biblia. Maaram kita nga ito an inspirado nga Pulong han Dios, diri pulong han mga tawo. (1 Tesalonika 2:13; 2 Timoteo 3:16) Kondi, karuyag han kalibotan ni Satanas nga iba an aton hunahunaon. Pananglitan, an introduksyon han usa nga libro nga naatake ha Biblia nasiring: “Waray bisan ano nga ‘baraan’ mahitungod han Biblia, diri liwat ito ‘an pulong han Dios.’ Iginsurat ito, diri han inspirado-han-Dios nga mga santo, kondi han kapadian nga naghihingyap hin gahum.” Adton natoo ha sugad nga mga aligasyon mahimo nga masayon mabiktima han malimbong nga ideya nga amo an paghunahuna nga may kagawasan hira ha pagsingba ha Dios ha paagi nga karuyag nira—o diri na la magsingba ha iya.—Proberbios 14:12.
5. (a) Ano an ginsiring han usa nga awtor mahitungod han mga relihiyon nga nagamit han Biblia? (b) Ano an pipira han komon nga mga ideya han kalibotan kon itanding ha ginsisiring han Biblia? (Iupod an kahon ha masunod nga pahina.)
5 An direkta ngan diri-direkta nga mga pag-atake ha Biblia, upod na an relihiyoso nga kasalingkapaw hadton nag-aangkon nga nasuporta hito, nagresulta ha pag-uswag han pagbalewaray ha relihiyon, upod na an relihiyon nga nagamit han Biblia. An relihiyon inaatake han media ngan hadton mga hitaas an edukasyon. Usa nga awtor an nasiring: “Ha kadam-an nga mga kultura, kaylap an diri maopay nga pagtagad ha Judaismo ngan Kristianidad. Bisan ha pinakamaopay nga punto-de-bista mahimo hunahunaon ito han usa sugad nga daan na; ha girarauti tatagdon ito sugad nga daan na nga mga ideya nga nakakaulang han maaramon nga pagkahamtong ngan nagpupugong han pag-uswag ha syensya. Ha bag-o la nga mga tuig an pagpasipara nagtikadugang ngadto ha pagtamay ngan dayag nga pakig-away.” Ini nga pakig-away agsob nga nagtitikang ha mga nagninigar han pag-eksister han Dios ngan ha mga nagin “waray buot ha ira mga pangatadongan.”—Roma 1:20-22, NW.
6. Ano an pagtagad han kalibotan ha seksuwal nga mga buhat nga ginkukondenar han Dios?
6 Diri urusahon, kon sugad, nga an mga tawo mas nahisisimang pa gud pahirayo ha mga suruklan han Dios ha paggawi. Pananglitan, iginsasaysay han Biblia an homoseksuwal nga mga relasyon sugad nga “mangil-ad.” (Roma 1:26, 27) Nasiring liwat ito nga adton nagbubuhat hin pornikasyon ngan pag-adulteryo diri makakapanunod han Ginhadian han Dios. (1 Korinto 6:9) Kondi, ha damu nga mga nasud, ito nga seksuwal nga mga buhat diri la kay kinakarawat kondi ipinapakita pa gud ito ha mga libro, mga magasin, mga karantahon, mga sine, ngan mga salida ha TV sugad hin makaruruyag nga gawi. Adton nakontra ha sugad nga mga buhat gintatagad sugad nga haligot an panhunahuna, kritiko, ngan diri nasunod ha uso. Imbes nga kitaon an mga suruklan han Dios sugad nga mga kapahayagan han mahigugmaon nga pagtagad, ginhuhunahuna ito han kalibotan sugad nga mga ulang ha personal nga kagawasan ngan katagbaw.—Proberbios 17:15; Judas 4.
7. Ano nga mga pakiana an sadang igpakiana naton ha aton kalugaringon?
7 Tungod kay aanhi kita hini nga kalibotan nga nagtitikakusog ha pagkontra ha Dios, maaramon kita kon aton kitaon an aton kalugaringon nga disposisyon ngan mga prinsipyo. Ha panapanahon, sadang usisahon naton an aton kalugaringon ha mainampoon ngan tangkod nga paagi basi masiguro nga diri kita hinayhinay nga nagpapahirayo tikang ha panhunahuna ngan mga suruklan ni Jehova. Pananglitan, mahimo naton pakianhan an aton kalugaringon: ‘Nalilipay na ba ako yana ha mga topiko nga ginlikyan ko ha naglabay nga pipira ka tuig? Mas kinakarawat ko na ba yana an mga buhat nga ginkukondenar han Dios? Naiibanan na ba an akon pagpabili ha espirituwal nga mga butang kay ha akon pagpabili hito ha naglabay? An paagi ba han akon pagkinabuhi nagpapakita nga inuuna ko ha akon kinabuhi an mga buruhaton han Ginhadian?’ (Mateo 6:33) An sugad nga pamalandong mabulig ha aton nga maatohan an espiritu han kalibotan.
‘Ayaw Pagpaanod Pahirayo’
8. Paonan-o bangin ig-anod an usa pahirayo kan Jehova?
8 Ha mga igkasi-Kristiano, hi apostol Pablo nagsurat: “Kinahanglan nga magtagam gud kita hin labi ha mga butang nga aton hinbatian bangin kita ig-anod tikang ha ira [“basi diri kita ig-anod pahirayo,” NW].” (Hebreo 2:1) An usa nga barko nga igin-aanod diri nakakadangat ha destinasyon hito. Kon ginbabalewaray han kapitan an hangin ngan sulog, an iya barko bangin ig-anod pahirayo ha talwas nga pantalan ngan mahisanglad ha batoon nga baybayon. Ha sugad man nga paagi, kon iginbabalewaray naton an presyoso nga mga kamatuoran han Pulong han Dios, bangin masayon kita ig-anod pahirayo kan Jehova ngan mag-antos hin espirituwal nga kalunod. Diri na kinahanglan nga isalikway naton hin bug-os an kamatuoran basi mag-antos han sugad nga kawad-i. Ha pagkamatuod, diri damu an tigda ngan tinuyo nga nagsasalikway kan Jehova. Kasagaran, hinay-hinay nga nahidadabi hira ha mga butang nga nakakaulang ha ira ha pagtagad ha Pulong han Dios. Haros diri hinbabaroan, igin-aanod na ngay-an hira ngadto ha sala. Pariho han kapitan nga nakaturog, an sugad nga mga indibiduwal diri nagmamata tubtob nga urhi na hinduro.
9. Ha ano nga mga paagi ginbendisyonan ni Jehova hi Salomon?
9 Tagda an pagkinabuhi ni Salomon. Igintapod ni Jehova ha iya an pagin hadi ha Israel. Gintugotan han Dios hi Salomon nga magtukod han templo ngan ginsugo hiya nga isurat an pipira nga bahin han Biblia. Hi Jehova nakiistorya ha iya ha duha nga okasyon ngan tinagan hiya hin bahandi, kabantogan, ngan mamurayawon nga pagmando. Labaw ha ngatanan, ginbendisyonan ni Jehova hi Salomon hin daku nga kinaadman. An Biblia nasiring: “Tinagan han Dios hi Salomon hin kinaadman ngan hin sarabotan nga daku kaopay, ngan hin kadak-on hin kasingkasing, bisan sugad han baras nga aada ha baybayon. Ngan an kinaadman ni Salomon linabaw han kinaadman han ngatanan nga mga anak ha sinirangan, ngan han ngatanan nga kinaadman ha Ehipto.” (1 Hadi 4:21, 29, 30; 11:9) Sigurado, an usa bangin maghunahuna nga kon may-ada usa nga magpapabilin nga matinumanon ha Dios, hi Salomon ito. Kondi, hi Salomon igin-anod ngadto ha apostasya. Paonan-o ito nahitabo?
10. Napakyas hi Salomon ha pagsunod ha ano nga giya, ngan ano an resulta?
10 Bug-os nga hinbaroan ngan hinsabtan ni Salomon an Balaud han Dios. Sigurado nga nagpakita hiya hin espesyal nga interes ha mga instruksyon nga iginhatag para hadton nagin mga hadi ha Israel. An usa hiton nga mga instruksyon nasiring: ‘An hadi diri magdamu hin asawa para ha iya, basi nga an iya kasingkasing diri mahisimang.’ (Deuteronomio 17:14, 17) Bisan pa hiton matin-aw nga giya, hi Salomon nagkaada pito ka gatos nga asawa ngan tulo ka gatos nga kerida. Damu hini nga kababayin-an an nagsingba ha lain nga mga dios. Diri kita maaram kon kay ano nga damu hinduro an gin-asawa ni Salomon, diri liwat kita maaram kon paonan-o niya ginpakamatadong an pagbuhat hito. An aton la hinbabaroan amo nga napakyas hiya ha pagsunod ha matin-aw nga giya han Dios. An resulta amo gud an iginpahamangno ni Jehova nga mahitatabo. Aton mababasa: ‘An mga asawa ni Salomon hinayhinay nga nagpasimang han iya kasingkasing ha pagsunod ha lain nga mga dios.’ (1 Hadi 11:3, 4) “Hinayhinay,” kondi sigurado nga nawara an iya diosnon nga kinaadman. Igin-anod hiya. Inabot an panahon, an hingyap ni Salomon ha pagpalipay ha iya pagano nga mga asawa sinaliwan han iya hingyap ha pagsunod ngan pagpalipay ha Dios. Makasurubo gud, kay hi Salomon pa ngani an nagsurat hadto hini nga mga pulong: “Anak ko, pagmakinaadmananon, ngan himoa an akon kasingkasing nga malipayon, nga ako makabaton ha iya nga nagsasaway [“nagtatamay,” NW] ha akon”!—Proberbios 27:11.
Gamhanan an Espiritu han Kalibotan
11. Paonan-o nakakaapekto ha aton panhunahuna an iginsusulod naton ngada hito?
11 An eksperyensya ni Salomon nagtututdo ha aton nga peligroso an pangatadongan nga tungod kay maaram kita han kamatuoran, an kalibotanon nga mga impluwensya diri makakaapekto ha aton hunahuna. Sugad la nga an pisikal nga pagkaon nakakaapekto han aton lawas, an mental nga pagkaon nakakaapekto ha aton hunahuna. An aton iginsusulod ha aton hunahuna nakakaapekto han aton panhunahuna ngan paggawi. Tungod kay maaram nga totoo ini, an mga korporasyon nagasto hin binilyon ka dolyar kada tuig ha pagpaanunsyo han ira mga produkto. An malampuson nga mga anunsyo nagamit hin nakakadani nga mga pulong ngan mga retrato basi maruyagan ito ngan hingyapon han mga pumaralit. Maaram liwat an mga paraanunsyo nga an makausa o makaduha nga pag-anunsyo hin produkto kasagaran nga diri makakadani ha mga tawo nga pumalit dayon han produkto. Kondi, an pauroutro nga pagkinita agsob nga nag-aaghat ha mga pumaralit nga maruyagan an usa nga produkto. Malampuson an mga anunsyo—kay kon diri, waray gud magasto hin salapi para hito. Nakakaimpluwensya gud ito ha panhunahuna ngan mga paggawi han mga tawo.
12. (a) Paonan-o iniimpluwensyahan ni Satanas an panhunahuna han mga tawo? (b) Ano an nagpapakita nga mahimo maimpluwensyahan an mga Kristiano?
12 Pariho han paraanunsyo, igin-aaghat ni Satanas an iya mga ideya pinaagi han paghimo hito nga makaruruyag, maaram nga ha paglabay han panahon madadara niya an mga tawo ha iya paagi han panhunahuna. Pinaagi han kaliawan ngan han iba pa nga mga paagi, ginlilimbongan ni Satanas an mga tawo basi tumoo nga maraot an maopay ngan maopay an maraot. (Isaias 5:20) Bisan an totoo nga mga Kristiano nabibiktima han padayon nga pangalimbasog ni Satanas ha pagpasarang han buwa nga impormasyon. An Biblia nagpapahamangno: “An espiritu nasiring gud ha dayag, nga ha urhi nga panahon an iba magkakahulog tikang ha pagtoo, manmamati ha mga maglimbong nga mga espiritu, ngan ha mga pagturon-an han mga yawa. Pinaagi han kasalingkapaw han mga tawo nga nagyayakan hin mga buwa, mag-ulat ha ira mga kalugaringon nga konsensya sugad ha binaga nga puthaw.”—1 Timoteo 4:1, 2; Jeremias 6:15.
13. Ano an maraot nga mga kaupod, ngan paonan-o an aton mga kaupod nakakaapekto ha aton?
13 Kita ngatanan mahimo maapektohan han espiritu han kalibotan. Makusog an mga impluwensya ngan tuso an mga puwersa han sistema ni Satanas. An Biblia maaramon nga nagsasagdon ha aton: “Ayaw kamo palimbong: an magraot nga mga kaupod nakakadunot ha mga mag-opay nga batasan.” (1 Korinto 15:33) An maraot nga mga kaupod mahimo nga usa nga butang o usa nga tawo—bisan ha sulod han kongregasyon—nga nagpapakita han espiritu han kalibotan. Kon mangatadongan kita nga an maraot nga mga kaupod diri makakadaot ha aton, niyan makakasiring ba liwat kita nga an maopay nga mga kaupod diri makakabulig ha aton? Sayop gud ito! Matin-aw nga iginsasaysay ito han Biblia nga nasiring: “Lakat kaupod han mga tawo nga makinaadmananon, ngan ikaw makikinaadmananon; kondi an kaupod-upod han mga lurong mag-aantos tungod hini.”—Proberbios 13:20.
14. Ha ano nga mga paagi maaatohan naton an espiritu han kalibotan?
14 Basi maatohan an espiritu han kalibotan, kinahanglan makig-upod kita ha makinaadmananon nga mga tawo—adton nag-aalagad kan Jehova. Kinahanglan pun-on naton an aton hunahuna hin mga butang nga nagpaparig-on han aton pagtoo. Hi apostol Pablo nagsurat: “An ngatanan nga matuod, an ngatanan nga harangdon, an ngatanan nga matadong, an ngatanan nga putli, an ngatanan nga makaruruyag, an ngatanan nga may kadungganan; kon may-ada kusog, ngan kon may-ada pagdayeg, paghunahunaa niyo ini nga mga bagay.” (Filipos 4:8) Sugad nga mga linarang nga may kagawasan ha pagbuot, makakapili kita han mga butang nga aton huhunahunaon. Hinaot pilion naton pirme nga hunahunaon an mga butang nga mabulig ha aton nga magin mas duok kan Jehova.
Mas Gamhanan an Espiritu han Dios
15. Paonan-o an mga Kristiano ha kadaan nga Korinto naiiba ha iba nga mga umurukoy hiton nga siyudad?
15 Diri pariho hadton nalilimbongan han espiritu han kalibotan, an totoo nga mga Kristiano ginigiyahan han baraan nga espiritu han Dios. Ginsuratan ni Pablo an kongregasyon han Korinto: “Aton kinarawat, diri an espiritu han kalibotan, kondi an espiritu nga tikang ha Dios; basi nga aton hibaroan an iginhatag han Dios nga mga bagay nga waray bayad.” (1 Korinto 2:12) An kadaan nga Korinto usa nga siyudad nga napapalibotan gud han espiritu han kalibotan. Malaw-ay gud an buhat han kadam-an nga mga umurukoy hito salit an termino nga “pagin Korintohanon” nangahulogan hin “pagbuhat han imoralidad.” Ginbuta ni Satanas an mga hunahuna han mga tawo. Salit, gutiay la o waray hira sarabotan mahitungod ha totoo nga Dios. (2 Korinto 4:4) Kondi, pinaagi han iya baraan nga espiritu, inabrihan ni Jehova an mga mata han pipira nga mga taga-Korinto, nga nakabulig ha ira nga magkaada kahibaro han kamatuoran. An iya espiritu nagpagios ngan naggiya ha ira ha paghimo hin daku nga mga pagbag-o ha ira kinabuhi basi makarawat nira an iya pag-uyon ngan bendisyon. (1 Korinto 6:9-11) Bisan kon makusog an espiritu han kalibotan, mas makusog an espiritu ni Jehova.
16. Paonan-o naton makakarawat ngan matitipigan an espiritu han Dios?
16 Sugad man hito an nahitatabo yana. An baraan nga espiritu ni Jehova amo an pinakagamhanan nga puwersa ha uniberso, ngan waray-bayad ngan hura nga iginhahatag niya ito ha ngatanan nga nangangaro hito nga may pagtoo. (Lukas 11:13) Kondi, basi magkaada han espiritu han Dios, kinahanglan labaw pa an buhaton naton kay ha pag-ato la ha espiritu han kalibotan. Kinahanglan regular liwat nga adman ngan iaplikar naton an Pulong han Dios ha aton kinabuhi basi an aton espiritu—an aton paagi han paghunahuna—nauyon ha iya panhunahuna. Kon buhaton naton ito, paririg-unon kita ni Jehova basi malamposan naton an anoman nga taktika nga bangin gamiton ni Satanas ha pagbungkag han aton espirituwalidad.
17. Ha ano nga mga paagi nakakaliaw ha aton an eksperyensya ni Lot?
17 Bisan kon an mga Kristiano diri bahin han kalibotan, aada hira ha kalibotan. (Juan 17:11, 16) Waray usa ha aton an bug-os nga makakalikay ha espiritu han kalibotan, kay bangin nagtatrabaho kita o naukoy pa ngani kaupod hadton diri nahigugma ha Dios o ha iya mga paagi. Inaabat ba naton an sugad han inabat ni Lot, nga “nasakit” hinduro, naguol pa ngani, ha maglaw-ay nga ginawian han magraot nga mga tawo ha Sodoma, nga iya inukyan? (2 Pedro 2:7, 8) Kon amo, mahimo kita madasig. Ginpanalipdan ngan ginluwas ni Jehova hi Lot, ngan bubuhaton liwat niya ito ha aton. Nakikita han aton mahigugmaon nga Amay an aton mga kahimtang ngan maaram hiya hito, ngan makakahatag hiya ha aton han bulig ngan kusog nga ginkikinahanglan naton basi matipigan an aton espirituwalidad. (Salmo 33:18, 19) Kon sumarig kita ha iya, tumapod ha iya, ngan magsangpit ha iya, bubuligan kita niya nga maatohan an espiritu han kalibotan, mationan-o man kakuri an aton kahimtang.—Isaias 41:10.
18. Kay ano nga sadang pabilhan naton an aton relasyon kan Jehova?
18 Ha kalibotan nga nagpahirayo ha Dios ngan nalimbongan ni Satanas, kita sugad nga katawohan ni Jehova ginbibendisyonan hin kahibaro ha kamatuoran. Salit aton naieksperyensyahan an kalipay ngan kamurayawan nga diri napapahimulosan han kalibotan. (Isaias 57:20, 21; Galasia 5:22) Pinabibilhan naton an urusahon nga paglaom nga kinabuhi nga waray kataposan ha Paraiso, diin mawawara na an espiritu hinin tikamatay nga kalibotan. Salit, hinaot aton pabilhan an aton presyoso nga relasyon ha Dios ngan magin mabinantayon ha pagtadong ha anoman nga hilig nga ig-anod ha espirituwal. Magin mas duok pa gud kita kan Jehova, ngan bubuligan kita niya ha pag-ato ha espiritu han kalibotan.—Jakobo 4:7, 8.
Maisasaysay Mo Ba?
• Ha ano nga mga paagi ginlilimbongan ngan ginpapasimang ni Satanas an mga tawo?
• Paonan-o naton malilikyan an kahianod pahirayo kan Jehova?
• Ano an nagpapakita nga makusog gud an espiritu han kalibotan?
• Paonan-o naton makakarawat ngan matitipigan an espiritu nga tikang ha Dios?
[Mga Pakiana]
[Tsart ha pahina 11]
KALIBOTANON NGA KINAADMAN KONTRA HAN DIOSNON NGA KINAADMAN
An kamatuoran diri bug-os—an mga tawo naghihimo han ira kalugaringon nga kamatuoran.
“An pulong [han Dios] amo an kamatuoran.”—Juan 17:17.
Basi hibaroan an husto tikang ha sayop, sarig ha imo mga inaabat.
“An kasingkasing malimbungon labaw han ngatanan nga butang, ngan labi hin kamahugaw.”—Jeremias 17:9.
Buhata an karuyag mo buhaton.
“Diri aada ha tawo nga naglalakat an pagmando han iya mga pitad.”—Jeremias 10:23.
An bahandi amo an yawi ha kalipayan.
“An gugma ha salapi amo an usa nga gamot han ngatanan nga karaotan.”—1 Timoteo 6:10.
[Retrato ha pahina 10]
Igin-anod hi Salomon pahirayo tikang ha totoo nga pagsingba ngan nag-alagad ha palso nga mga dios
[Retrato ha pahina 12]
Pariho han paraanunsyo, igin-aaghat ni Satanas an espiritu han kalibotan. Naato ka ba hito?
