Sumat han mga Parasamwak han Ginhadian

Pakaagi hin mga Tawo ha Ira Gintatrabahoan

ANO an ginkaparihoan han mga apostol nga hira Mateo, Pedro, Andres, Jakobo, ngan Juan? Hira ngatanan gintawag ni Jesus han nakadto hira ha ira gintatrabahoan. Sagipo hira Pedro, Andres, Jakobo, ngan Juan ha ira pangisda nga negosyo han gindapit hira ni Jesus, nasiring: “Sunod kamo ha akon.” Hi Mateo nakadto ha opisina han buhis han gindapit hiya nga magin disipulo ni Jesus.—Mateo 4:18-21; 9:9.

May balos an pagsangyaw ha mga tawo ha ira gintatrabahoan. Tungod kay maaram hini, an mga Saksi ni Jehova ha Japan bag-o pa la nga naghimo hin organisado nga pangalimbasog basi makigbahin hini nga klase han ministeryo. Ano an mga resulta? Ha sulod hin pipira ka bulan, nahimo an yinukot nga pagbalik bisita, ngan natikangan an mga 250 nga pag-aram ha Biblia. Tagda an masunod nga mga eksperyensya.

Usa nga bug-os-panahon nga ministro ha Tokyo an iginkita hin manidyer han restawran nga nakaistorya na hin usa nga Saksi ha eskwelahan mga 30 ka tuig na an naglabay han naeskwela pa hiya. Bisan kon gutiay la an hinsabtan han manidyer ha gin-istoryahan hadto nga panahon, nagin interesado gud hiya ha Biblia. Yana nga napukaw utro an iya interes, kinarawat dayon niya an pag-aram ha Biblia nga ginagamit an libro nga Kahibaro nga Nagtutugway Ngadto ha Kinabuhi nga Waray Kataposan. a Dugang pa, iya gintikangan an usa ka personal nga programa han pagbasa ha Biblia kada gab-i antes kumaturog.

Usa nga espesyal payunir an binisita ha usa nga opisina ngan naghangyo ha resepsyonista nga tawagan an manidyer ha telepono. Bisan kon waray an manidyer, an batan-on nga babaye nga binaton ha telepono han manidyer nagpakiana, “Karuyag mo ba makiistorya ha akon?” Katapos han halipot nga pag-istorya ha telepono, an babaye ginawas ha iya opisina ngan nagsiring nga interesado hiya ha pagbasa han Biblia. An espesyal payunir nag-eskedyol ha pagbalik nga dara an usa nga Biblia ngan gintikangan an pag-aram ha Biblia ha iya, nga ginhimo nira ha kahirani nga parke ha temprano ha aga antes magtrabaho an babaye.

Ha lain nga opisina, usa nga lalaki an nakakita hin igkasi-empleyado nga kinarawat hin Barantayan ngan Awake! nga mga magasin kondi iginlabog dayon ito han binaya an Saksi. Han inuli na an lalaki, iya ginsumatan an iya asawa nga Saksi mahitungod han nahitabo ngan nagsiring nga kon hiya an gintanyagan han mga magasin mamamati hiya bisan madaliay la. Iginsumat an panhitabo han iya anak nga babaye, nga diri-tinuyo nga nakabati han iya ginyakan, ha usa nga Saksi nga nagsasangyaw hito nga lugar han komersyo. Ginbisita dayon han Saksi an bana ha opisina ngan gintikangan an pag-aram ha Biblia ha iya. Regular nga nagtambong dayon an lalaki ha mga katirok ha Domingo.

An pagsangyaw ha mga tawo ha ira gintatrabahoan nagresulta hin iba pa nga mga bentaha. Damu nga magwarali ha Japan an nagin maabtik ha pagbalik bisita ha mga lugar han komersyo, mga pabrika, ngan mga opisina. Dugang pa, pinaagi hini nga mga paagi han pagsangyaw, damu nga diri-aktibo an nakaistorya ngan natikangan hin mga pag-aram. Maopay gud an mga resulta. Usa nga kongregasyon ha sentro han Tokyo an bag-o pa la nga nagreport hin 108 nga pag-aram ha Biblia ha balay, sobra pa ha doble han kadamu nga iginreport ha naglabay nga tuig.

[Footnote]