Sadang ba Kita Mag-ampo ha mga Anghel Para han Bulig?

HUSTO ba an pag-ampo ha mga anghel ha mga panahon han kasakitan? Damu nga mga tawo an naghuhunahuna nga husto ito. Ha pagkamatuod, an New Catholic Encyclopedia nasiring: “An usa nag-aampo ha . . . mga anghel . . . kondi tungod la nga mahimo hira manginyupo ha Dios para ha aton.” Sadang ba kita mag-ampo ha mga anghel basi manginyupo para ha aton?

An Pulong han Dios naghahatag han mga ngaran han duha la han matinumanon nga mga anghel han Dios, hi Miguel ngan hi Gabriel. (Daniel 8:16; 12:1; Lukas 1:26; Judas 9) Tungod kay ini nga mga ngaran gin-uunabi ha Biblia, masasabtan naton nga an tagsa nga anghel usa nga indibiduwal nga espiritu nga persona nga may-ada ngaran, diri la usa nga puwersa. Kondi, an iba nga mga anghel waray magsumat han ira mga ngaran. Pananglitan, han ginhangyo ni Jakob an usa nga anghel nga binisita ha iya nga isumat an iya ngaran, nagdumiri an anghel ha pagsumat. (Genesis 32:29; Judas 13:17, 18) Ha Biblia, waray ilista an mga ngaran han mga anghel, hito nga paagi ginpupugngan an mga tawo ha paghatag ha ira hin sobra nga atensyon.

Usa han mga buruhaton han mga anghel amo an pagdara hin mga mensahe tikang ha Dios ngadto ha mga tawo. Ha pagkamatuod, an orihinal nga Hebreo ngan Griego nga mga pulong nga iginhubad nga “anghel” literal nga nangangahulogan nga “mensahero.” Kondi, an mga anghel diri nag-aalagad sugad nga manlalaban nga nagdadara han mga pag-ampo han mga tawo ngadto ha trono han Gihitaasi. Ginsisiguro han Dios nga an mga pag-ampo kinahanglan ipaabot ha iya ha ngaran han iya Anak, hi Jesu-Kristo, nga nagsiring: “Bisan ano nga iyo pangaroon ha Amay ha akon ngaran, iya ihahatag ha iyo.”—Juan 15:16; 1 Timoteo 2:5.

Hi Jehova nga Dios pirme gud maghahatag hin panahon ha pagpamati ha aton kon dumaop kita ha iya ha husto nga paagi. An Biblia naghahatag hini nga pasarig: “Hi Jehova hirani ha ira ngatanan nga nagsasangpit ha iya, ha ira ngatanan nga nagsasangpit ha iya hin kamatuoran.”—Salmo 145:18.