Kon Matuman an Kaburut-on han Dios ha Tuna

HAN gintutdoan ni Jesus an iya mga disipulo nga mag-ampo, “Kumanhi an imo ginhadian. Matuman an imo pagburut-an, sugad ha langit, amo man ha tuna,” nagyayakan hiya sumala ha iya eksperyensya tungod kay inukoy na hiya ha langit upod han iya Amay. (Mateo 6:10; Juan 1:18; 3:13; 8:42) Ha pag-eksister ni Jesus antes hiya magin tawo, naeksperyensyahan niya an panahon han an ngatanan nga nahitabo ha langit ngan ha tuna uyon ha kaburut-on han Dios. Makalilipay adto nga mga panahon tungod han mga nahimo ngan katagbaw.—Proberbios 8:27-31.

An siyahan nga mga linarang han Dios mga espiritu, “mga manurunda, mga gamhanan ha kusog, mga nagtutuman han iya mga pulong.” Hira hadto ngan yana “mga tinaporan niya, nga nagbubuhat han iya kaburut-on.” (Salmo 103:20, 21) May kagawasan ba ha pagbuot an tagsa nga anghel? Oo, ngan ha paglaranga han tuna, ini nga “mga anak han Dios nagtikang ha pagsinggit hin pagdayaw.” (Job 38:7, NW) An ira pagdayaw nagpakita hin personal nga kalipay ha kaburut-on han Dios, ngan ira iginpahiuyon an ira kaburut-on ha iya katuyoan.

Katapos larangon an tuna, igin-andam ito han Dios basi pag-ukyan han mga tawo ngan ha kataposan iya ginlarang an siyahan nga lalaki ngan babaye. (Genesis, kapitulo 1) Takos ba liwat ini han singgit hin pagdayaw? An giniyahan nga asoy nasiring: “An Dios nakakita han ngatanan nga iya ginhimo, ngan iini, ito duro hin kaopay,” oo, waray-ikasaway, hingpit.—Genesis 1:31.

Ano an kaburut-on han Dios para ha aton siyahan nga mga kag-anak ngan ha ira mga anak? Sumala ha Genesis 1:28, ito liwat maopay hinduro: “An Dios nagbendisyon ha ira: ngan an Dios nagsiring ha ira: magmabungahon kamo ngan magdamu ngan pun-on niyo an tuna, ngan pagtag-iyaha niyo ito: ngan paghadian niyo an kaisdaan han dagat, ngan an katamsihan ha mga langit, ngan an ngatanan nga mga mananap nga nabantad ha bawbaw han tuna.” Basi matuman ito nga maopay nga sugo, an aton orihinal nga mga kag-anak kinahanglan padayon nga mabuhi—ha waray kataposan—ngan sugad man an ira mga anak. Waray posibilidad han trahedya, kawaray-hustisya, kasakit ha kasingkasing, o kamatayon.

Ini an panahon nga natutuman an kaburut-on han Dios ha langit ngan ha tuna. An ngatanan nga nagkinabuhi uyon ha iya kaburut-on makakabiling hin daku nga kalipay ha pagbuhat hito. Ano an nagin problema?

Binangon an diri-linalaoman nga ayat ha kaburut-on han Dios. Kondi, masusulbad ito. Ha gihapon, nagtikang ito hin hilawig nga peryodo han kasakit ngan kasubo nga magriresulta hin duro nga kawurok mahitungod han kaburut-on han Dios para ha katawohan. Kita ngatanan mga biktima hini. Ano ito nga ayat?

An Kaburut-on han Dios Durante han Panahon han Pagrebelde

Usa han espiritu nga “mga anak han Dios” an nakakita han posibilidad ha pag-ulang ha kaburut-on han Dios, an iya katuyoan amo an pagkaada mga kapulsanan para ha iya kalugaringon. Han mas ginhunahuna hini nga espiritu nga linarang ini nga posibilidad, baga hin nagin mas posible ini ngan nagin mas makaruruyag ini. (Jakobo 1:14, 15) Bangin nangatadongan hiya nga kon maaghat niya an siyahan nga tawhanon nga mag-asawa nga mamati ha iya imbes nga ha Dios, niyan mapipiritan  an Dios ha pagtugot hin karibal ha pagkasoberano. Bangin ginhunahuna niya nga diri hira papatayon han Dios, tungod kay mangangahulogan ito hin kapakyasan ha katuyoan han Dios. Lugod, kinahanglan bag-ohon ni Jehova nga Dios an iya katuyoan, karawaton an relatibo nga awtoridad hini nga espiritu nga anak nga susugton yana han Iya tawhanon nga mga linarang. Ito nga rebelde husto nga gintawag ha urhi nga Satanas, nga nangangahulogan hin “Parakontra.”—Job 1:6.

Ha pagbuhat uyon ha iya hingyap, ginkaistorya ni Satanas an babaye. Iya ginsagda hiya nga balewarayon an kaburut-on han Dios ngan magin independente ha moral, nasiring: “Kamo diri gud mapatay. . . . Kamo mahinunugad ha Dios, nga mag-inaramon na han kaopayan ngan han karaotan.” (Genesis 3:1-5) Ha babaye, baga in maghahatag ini ha iya hin kagawasan, ngan tinoo hiya nga an pagpamati kan Satanas magriresulta hin mas maopay nga pagkinabuhi. Ha urhi, iya ginsagda an iya bana nga umupod ha iya.—Genesis 3:6.

Diri ini an kaburut-on han Dios para ha mag-asawa. Ito an ira karuyag. Ngan magdadara ito hin nakakadaot nga mga resulta. Ginsumatan na hira han Dios nga an sugad nga pagtalapas magriresulta han ira kamatayon. (Genesis 3:3) Waray hira laranga basi maglampos nga bulag ha Dios. (Jeremias 10:23) Dugang pa, hira magigin diri-hingpit, ngan an pagkadiri-hingpit ngan kamatayon maipapasa na yana ha ira mga anak. (Roma 5:12) Diri mababag-o ni Satanas ini nga mga epekto.

Nabag-o ba ha kadayonan hini nga mga panhitabo an katuyoan, o kaburut-on han Dios para ha katawohan ngan ha tuna? Waray. (Isaias 55:9-11) Kondi nagbangon ito hin mga pakiana nga kinahanglan batunon: Mahimo ba an katawohan ‘mahinugad ha Dios, nga mag-inaramon na ha kaopayan ngan karaotan,’ sugad han siring ni Satanas? Ha iba nga pagkayakan, kon tagan kita hin igo nga panahon, personal nga makakadesisyon ba kita kon ano an husto ngan sayop, mapulsanon ngan nakakadaot, ha ngatanan nga mga bahin ha kinabuhi? Takos ba an Dios han bug-os nga pagsunod, tungod kay an iya paagi ha pagmando amo an gimaopayi? An iya ba kaburut-on takos han bug-os nga pagsugot? Paonan-o mo babatunon ini nga mga pakiana?

May-ada usa la nga paagi ha pagsulbad hini nga mga isyu ha atubangan han ngatanan nga intelihente nga linarang: Pagtugot hadton naghingyap hin kagawasan nga magsari ha pagkinabuhi nga malampuson nga bulag ha Dios. An pagpatay la ha ira diri magsusulbad han iginbangon nga mga isyu. An pagtugot ha katawohan nga magkinabuhi nga bulag ha Dios ha sulod hin igo nga panahon magsusulbad han mga isyu tungod kay magigin matin-aw an mga resulta. Iginpahibaro han Dios nga iya susulbaron an mga butang hini nga paagi han hiya nagsiring ha babaye nga magkakaanak hiya. Salit nagtikang an tawhanon nga pamilya. Tungod hini nga desisyon han Dios, mga buhi kita yana!—Genesis 3:16, 20.

Kondi, diri ini nangangahulogan nga tutugotan han Dios an katawohan ngan an rebelyoso nga espiritu nga anak nga bug-os nga buhaton an ira karuyag. Waray ihatag han Dios an iya pagkasoberano, waray man niya igbalewaray an iya katuyoan. (Salmo 83:18) Iginpatin-aw niya ini pinaagi han pagtagna han tiarabot nga pagbungkag ha paraaghat han pagrebelde ngan han pagpara han ngatanan nga maraot nga mga epekto. (Genesis 3:15) Salit, tikang ha tinikangan, an tawhanon nga pamilya ginsaaran hin katalwasan.

Samtang hito nga panahon, iginbulag na han aton siyahan nga mga kag-anak an ira kalugaringon ngan an ira tidaraon nga mga anak tikang ha pagmando han Dios. Basi mapugngan han Dios an ngatanan nga makasurubo nga mga resulta han ira desisyon, kinahanglan ipadapat niya an iya  kaburut-on ha ira ha ngatanan nga higayon. Magigin pariho ito ha diri pagtugot ha ira nga magkinabuhi nga bulag ha Dios.

Syempre, mahimo pilion han mga indibiduwal an pagmando han Dios. Mahimo hira mahibaro han kaburut-on han Dios para ha katawohan durante hini nga peryodo ngan magbuhat uyon gud hito tubtob nga posible. (Salmo 143:10) Kondi, apektado gihapon hira han mga problema tubtob nga an isyu mahitungod han bug-os nga pagin bulag han katawohan nagpapabilin nga diri nasusulbad.

An mga epekto han personal nga desisyon nagin matin-aw temprano pa ha kasaysayan han tawo. Ginpatay han suhag han tawhanon nga pamilya nga hi Kain an iya bugto nga hi Abel tungod kay an “iya mga buhat mga magraot, ngan an mga buhat han iya bugto magtadong.” (1 Juan 3:12) Diri ini kaburut-on han Dios, tungod kay ginpahamangnoan na han Dios hi Kain ngan ha urhi ginsirotan hiya. (Genesis 4:3-12) Ginpili ni Kain an pagin bulag ha moral nga igintanyag ni Satanas; tungod hito hiya “kanan yawa.” Sugad liwat hito an ginbuhat han iba.

Paglabay hin sobra 1,500 ka tuig han pagkinabuhi han tawo, “an tuna nagmalaw-ay ha atubangan han Dios, ngan an tuna napuno hin panraugdaog.” (Genesis 6:11) Ginkinahanglan an determinado nga buhat ha pagtipig han tuna tikang ha kadaot. Ginios an Dios pinaagi han pagpahinabo hin delubyo ha bug-os nga tuna ngan pagpanalipod ha usa nga matadong nga pamilya nga nagkikinabuhi hito nga panahon—hi Noe, an iya asawa, an iya mga anak, ngan an ira mga asawa. (Genesis 7:1) Kita ngatanan ira mga katulinan.

Durante han kasaysayan han tawo tikang ha panahon ni Noe, igintagana han Dios an giya para hadton sinsero nga naghihingyap ha paghibaro han iya kaburut-on. Iya giniyahan an maunungon nga kalalakin-an ha pagsurat han iya mga mensahe para ha bisan hin-o nga naglalaom han iya paggiya. Ini nga mga mensahe nakarekord ha Biblia. (2 Timoteo 3:16) Mahigugmaon nga iya gintugotan an matinumanon nga katawohan nga magkaada relasyon ha iya, magin iya kasangkayan pa ngani. (Isaias 41:8) Ngan gintagan niya hira han kusog nga ira ginkinahanglan basi mailob an makuri nga mga pagsari nga naieksperyensyahan han katawohan durante hini nga mga milenyo han pagin bulag ha Dios. (Salmo 46:1; Filipos 4:13) Mapasalamaton gud kita hini ngatanan!

‘Matuman an Imo Kaburut-on’—hin Bug-os

An ginbubuhat han Dios tubtob yana diri amo an kabug-osan han iya kaburut-on para ha katawohan. An Kristiano nga hi apostol Pedro nagsurat: “Sumala ha iya saad, naghuhulat kita hin mga bag-o nga langit ngan bag-o nga tuna, diin mag-uukoy an katadongan.” (2 Pedro 3:13) Ini nga simboliko nga mga pulong nagtutudlok ha bag-o nga gobyerno nga magmamando ha katawohan ngan ha bag-o nga tawhanon nga sosiedad ilarom hito nga gobyerno.

Ginagamit an matin-aw nga mga pulong, hi propeta Daniel nagsurat: “Ha mga adlaw hito nga kahadian an Dios ha langit magpapabangon hin usa nga ginhadian, nga diri gud magugunaw. . . . Kondi ini magpipinitpinit ngan mag-aanaw hini ngatanan nga ginhadian, ngan ini matindog ha kadayonan.” (Daniel 2:44) Ini nga tagna nagtatagna han kataposan han waray kasulbaran nga sistema han mga butang yana nga panahon ngan han pagsaliwani hito han Ginhadian, o gobyerno, han Dios. Maopay gud ini nga sumat! Maabot an adlaw nga hingangalimtan na an mga kasamok ngan kahakog nga naglulukop ha kalibotan yana hin kamadarahog ngan nagtatarhog utro ha pagdaot ha tuna.

San-o mahitatabo ini nga mga butang? An mga disipulo ni Jesus nagpakiana: “San-o ba mahinanabo ini nga mga bagay? ngan ano an tigaman han imo pagkanhi, ngan ha kataposan han kalibotan?” Sugad nga bahin han iya baton, hi Jesus nagsiring: “Ini nga maopay nga sumat han ginhadian igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.”—Mateo 24:3, 14.

Hinbabaroan na gud han ngatanan nga ini nga pagsangyaw nga buruhaton ginbubuhat yana ha bug-os nga kalibotan. Posible nga nakita mo na ito ha imo kaaramyaw. Ha iya libro nga These Also Believe, hi Propesor Charles S. Braden nagsurat: “An tuna literal nga nalukop na han mga Saksi ni Jehova han ira pagsangyaw. . . . Waray usa nga relihiyon ha kalibotan an nagpakita hin labaw nga kadasig ngan pagkamapinadayunon ha pangalimbasog ha pagpasarang han maopay nga sumat han  Ginhadian kay han mga Saksi ni Jehova.” An mga Saksi aktibo nga nagpapasamwak hinin maopay nga sumat ha sobra 230 nga nasud ngan ha haros 400 nga yinaknan. Inin igintagna nga buruhaton waray pa gud mabuhat hadto ha bug-os nga kalibotan. Usa ito han damu nga ebidensya nga nagtitikahirani na yana an panahon hito nga Ginhadian ha pagsaliwan ha mga gobyerno han tawo.

An Ginhadian nga ginsiring ni Jesus nga isasangyaw amo gud an usa nga iya igintutdo ha aton nga ig-ampo ha iya modelo nga pag-ampo: “Kumanhi an imo ginhadian. Matuman an imo pagburut-an, sugad ha langit, amo man ha tuna.” (Mateo 6:10) Oo, ito nga Ginhadian amo an instrumento nga gagamiton han Dios ha pagtuman han iya katuyoan, han iya kaburut-on, para ha katawohan ngan ha tuna.

Ano an kahulogan hito? An Pahayag 21:3, 4 nabaton: “Kitaa, an payag han Dios aada ha mga tawo, ngan mag-uukoy hiya upod nira, ngan hira magigin iya katawohan, ngan an Dios ha iya ngahaw maupod man ha ira, ngan magigin ira Dios: ngan pagpapahiron niya an ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa gud: kay an siyahan nga mga bagay nag-agi na.” Hito nga panahon an kaburut-on han Dios matutuman gud ha tuna ngan ha langit—hin bug-os. a Karuyag mo ba magin bahin hito?

[Mga footnote]

[Retrato ha pahina 5]

An pagin bulag ha kaburut-on han Dios nagdara hin trahedya