Makakagbag-o ba han Kahimtang an Imo mga Pag-ampo?

HIN-O ha aton an waray pa umatubang hin makuri nga kahimtang nga diri naton makukontrol? Ipinapakita han Biblia nga maaram hi apostol Pablo nga an pag-ampo makakaapekto ha resulta han sugad nga mga kahimtang.

Han ginpriso hi Pablo ha Roma bisan kon waray hiya sala, naghangyo hiya ha iya mga igkasi-tumuroo nga mag-ampo para ha iya, ngan nagsiring: “Naglalaygay gud ako ha iyo nga iyo ini buhaton, basi nga mahibalik gud ako hin madali pa nganhi ha iyo.” (Hebreo 13:18, 19) Ha lain nga okasyon, hi Pablo nagpahayag hin pagsarig nga babatunon han Dios an mga pag-ampo para han iya temprano nga pakagawas. (Filemon 22) Waray pag-iha nakagawas hi Pablo ngan nagpadayon na liwat ha iya misyonero nga buruhaton.

Kondi makakagbag-o gud ba an pag-ampo ha resulta han imo mga problema? Bangin. Kondi, hinumdumi nga an pag-ampo diri la usa ka pormal nga relihiyoso nga buhat. Totoo ito nga komunikasyon ha aton mahigugmaon ngan gamhanan nga Amay ha mga langit. Kinahanglan magin espisipiko gud kita ha aton mga pag-ampo kondi katapos, mapailubon nga hulaton an baton ni Jehova.

Bangin diri direkta nga batunon han Dios an tagsa nga pag-ampo, o bangin diri niya batunon pirme ha paagi o ha panahon nga aton ginlalaoman. Pananglitan, hi Pablo pauro-utro nga nag-ampo mahitungod han iya “tunok ha unod.” Waray kuhaa han Dios an problema ni Pablo, anoman ito, kondi iya ginliaw hi Pablo pinaagi han nagpaparig-on nga mga pulong: “Iton akon grasya igo ha imo; kay iton akon gahum mahihingpit ha kamaluya.”—2 Korinto 12:7-9.

Makakasarig liwat kita nga bisan kon diri kuhaon han Dios an partikular nga problema, “mahatag liwat hiya hin katigayonan ha paglikay, basi nga [kita] makahimo ha pag-antos.” (1 Korinto 10:13) Diri na mag-iiha, kukuhaon han Dios an ngatanan nga gin-aantos han katawohan. Samtang yana, an pagdaop ha “Parapamati han pag-ampo” makakagbag-o han kahimtang.—Salmo 65:2, NW.