An Dios ba an Angay Basulon han Aton mga Problema?

HAN an adulto nga anak nga babaye ni Marion nag-antos hin grabe nga kadaot ha utok, ginhimo ni Marion kon ano an bubuhaton han damu ha aton. a Nag-ampo hiya ha Dios para hin bulig. “Waray pa gud ako makahinumdom nga umabat ako hin sugad kawaray mahihimo ngan nag-uusahan,” siring ni Marion. Ha urhi, nagtikagrabe an kahimtang han iya anak, ngan nagtikang pagruhaduhaan ni Marion an Dios. “Kay ano nga nahitatabo ini?” nagpakiana hiya. Diri niya masabtan kon paonan-o an mahigugmaon ngan matinagaron nga Dios makasalikway ha iya.

Diri naiiba an eksperyensya ni Marion. Damu nga mga tawo ha bug-os nga kalibotan an naabat nga ginbayaan hira han Dios durante han mga panahon han panginahanglan. “Nangangalimbasog pa gihapon ako nga mabilngan an mga baton ha mga pakiana mahitungod ha kon kay ano nga gintutugotan han Dios an magraot nga mga butang,” siring ni Lisa katapos han pagpataya ha iya apo nga lalaki. “Waray mawara hin bug-os an akon pagtoo ha Dios, kondi diri na ito sugad kamarig-on.” Ha pariho nga paagi, katapos maeksperyensyahan an diri-mahunahuna nga trahedya may kalabotan ha iya minasus-an nga anak nga lalaki, usa nga babaye an nagsiring: “Waray ako liawa han Dios ha nahitabo. Waray hiya pagpakita ha akon hin anoman nga tigaman han pagtagad o pagpaid.” Hiya nagdugang: “Diri ko gud papasayloon an Dios.”

An iba nakakapatubo hin kasina ha Dios kon ginkikita nira an kalibotan nga nakapalibot ha ira. Nakita hira hin mga nasud nga puno hin kakablas ngan kagutom, desperado nga mga pinalagiw tungod han girra, diri maihap nga mga kabataan nga nailo tungod han AIDS, ngan minilyon nga mga tawo nga nag-aantos tungod han iba nga mga sakit. Kon nahitatabo ini ngan an pariho hini nga mga trahedya, damu an nagbabasol ha Dios tungod han iya baga hin kawaray pagtagad.

Kondi, an totoo, an Dios diri angay basulon ha mga problema nga nakakadaot ha katawohan. Ha pagkamatuod, may-ada makatadunganon nga mga hinungdan nga tumoo nga ha diri maiha ibabalik na han Dios ha kaopayan an kadaot nga nahimo ha tawhanon nga pamilya. Ginhahangyo ka namon nga basahon an sunod nga artikulo ngan hisabtan nga nagtatagad gud an Dios ha aton.

[Footnote]