Mga Pakiana Tikang ha mga Magbarasa

Han magsurat hi apostol Juan nga an “hingpit nga gugma naglalabay han kahadlok” ha gawas, ano an iya iginpapasabot ha “hingpit nga gugma,” ngan ano nga “kahadlok” an iginlalabay ha gawas tungod hito?

“Ha gugma waray kahadlok,” nagsurat hi apostol Juan, “kondi an hingpit nga gugma naglalabay han kahadlok, kay an kahadlok may sirot; ngan hiya nga nahadlok waray paghingpita ha gugma.”—1 Juan 4:18.

Iginpapakita han konteksto nga hi Juan naghihisgot mahitungod han kagawasan ha pagyakan—labi na an kalabotan han gugma han Dios ngan han kagawasan ha pakiistorya ha Iya. Masasabtan naton ini ha aton mababasa ha bersikulo 17: “Tungod hini ginhingpit an gugma ha aton, basi nga may pagsarig [“kagawasan ha pagyakan,” NW] kita ha adlaw han paghukom.” An sukol han paghigugma han usa nga Kristiano ha Dios ngan pag-abat niya han gugma han Dios ha iya may-ada direkta nga epekto ha kagawasan han iya pagyakan—o han kawaray hito—kon nakikiistorya hiya ha Dios ha pag-ampo.

An mga pulong nga “hingpit nga gugma” makahuluganon. Sugad han pagkagamit ha Biblia, an pulong nga “hingpit” diri nangangahulogan pirme hin kahingpitan ha bug-os nga kahulogan hito, nga nangangahulogan hin gihitaasi nga sukol, kondi agsob nga nangangahulogan ito hin kahingpitan ha relatibo nga paagi. Pananglitan, ha iya Sermon ha Bukid, hi Jesus nagsiring: “Maghingpit kamo, sugad nga hingpit man an iyo Amay.” Hi Jesus nasiring ha iya mga sumurunod nga kon hinigugma la nira adton nahigugma ha ira, an ira gugma diri bug-os, kulang, may depekto. Sadang nira paghingpiton, o himoon nga bug-os, an ira gugma pinaagi ha pag-upod bisan han ira mga kaaway. Ha pariho nga paagi, han nagsurat hi Juan mahitungod han “hingpit nga gugma,” naghihisgot hiya mahitungod han gugma ha Dios nga bug-os-kasingkasing, bug-os nga nakatubo, ngan nag-uupod han ngatanan nga mga bahin han kinabuhi han usa.—Mateo 5:46-48; 19:20, 21.

Kon nakikiistorya ha Dios pinaagi han pag-ampo, maaram gud an usa nga Kristiano nga makasasala hiya ngan diri hingpit. Kondi, kon an iya gugma ha Dios ngan an iya pag-abat han gugma han Dios ha iya bug-os nga nakatubo, diri hiya nauulang han kahadlok han pagkondenara o pagsalikwaya. Lugod, may-ada hiya kagawasan ha pagpahayag han aada ha iya kasingkasing ngan ha paghangyo hin kapasayloan pinaagi han halad lukat, nga mahigugmaon nga igintagana han Dios pinaagi kan Jesu-Kristo. Nakakasiguro hiya nga an iya mga panginyupo pinamamatian han Dios ngan inuuyonan.

Paonan-o an usa magigin ‘hingpit ha gugma’ ngan salit ‘ilalabay’ niya ha gawas an kahadlok ha pagkondenara o pagsalikwaya? “An nagbabantay ha iya [kanan Dios] pulong, ha pagkamatuod an gugma han Dios ginhingpit ha iya,” nagsiring hi apostol Juan. (1 Juan 2:5) Tagda ini: Kon ginhigugma kita han Dios han makasasala pa kita, diri ba mas hihigugmaon niya kita kon totoo nga mabinasulon kita ngan maduruto nga nasunod ha iya pulong? (Roma 5:8; 1 Juan 4:10) Oo, tubtob nga magpabilin kita nga matinumanon, mahimo kita magkaada han pagsarig nga pariho han kan apostol Pablo han magsiring hiya mahitungod ha Dios: “Hiya nga bisan an iya kalugaringon nga Anak waray awili, kondi igintubyan niya hiya tungod ha aton ngatanan, kay ano nga upod niya diri mahatag man ha aton ha ngatanan nga mga bagay?”—Roma 8:32.