Gintitimaraot Kondi Malipayon
Gintitimaraot Kondi Malipayon
“Bulahan kamo, kon kamo pagdurugasan, ngan pagtitimarat-an ngan kon pagyayaknan han ngatanan nga magraot hin buwa kontra ha iyo tungod ha akon.”—MATEO 5:11.
1. Ano an iginpasarig ni Jesus ha iya mga sumurunod mahitungod han kalipayan ngan pagtimaraot?
HAN siyahan nga sinugo ni Jesus an iya mga apostol nga isangyaw an Ginhadian, iya ginpahamangnoan hira nga maatubang hira hin pagkontra. Iya ginsidngan hira: “Kamo pagdudumtan han ngatanan nga mga tawo tungod han akon ngaran.” (Mateo 10:5-18, 22) Kondi, una pa hito, ha iya Sermon ha Bukid, iya ginpasarig an iya mga apostol ngan an iba pa nga an sugad nga pagkontra diri gud makakadaot ha ira totoo nga kalipayan. Ha pagkamatuod, an pagin malipayon iginkaw-ing pa ngani ni Jesus ha pagin gintitimaraot o ginlulutos sugad nga mga Kristiano! Paonan-o an pagtimaraot makakahatag hin kalipayan?
Pag-antos Tungod han Katadongan
2. Sumala kan Jesus ngan kan apostol Pedro, ano nga klase hin pag-antos an nagriresulta hin kalipayan?
2 An ikawalo nga kalipayan nga iginsaysay ni Jesus amo ini: “Bulahan an mga gintitimaraot tungod han katadongan, kay ira an ginhadian han langit.” (Mateo 5:10) An pag-antos mismo diri darayawon. Hi apostol Pedro nagsurat: “Kay ano ito nga kahimayaan, kon kamo makakasala, paghahampakon kamo tungod hito, iyo ito pag-aantuson ha mapailubon? Kondi, kon kamo magbubuhat hin maopay, ngan mag-aantos hito, ngan mag-iilob, kinaruruyag ini han Dios.” Hiya dugang nga nagsiring: “Ayaw pagtugot nga usa ha iyo mag-antos sugad hin usa nga parapatay, o kawatan, o magburuhat hin maraot, o malabot ha mga butang han iba. Kondi kon an usa ka tawo mag-antos tungod nga hiya kristohanon, diri hiya maawod; kondi paghimayaon niya an Dios hini nga ngaran.” (1 Pedro 2:20; 4:15, 16) Sumala ha mga pulong ni Jesus, an pag-antos nagriresulta hin kalipayan kon gin-iilob ito tungod han katadongan.
3. (a) Ano an karuyag ipasabot han gintitimaraot tungod han katadongan? (b) Ano an nagin epekto han pagtimaraot ha siyahan nga mga Kristiano?
3 An totoo nga katadongan ginsusukol pinaagi han pagbuhat han kaburut-on han Dios ngan han iya mga sugo. Salit, an pag-antos tungod han katadongan, nangangahulogan hin pag-antos tungod kay inaatohan han usa an pag-ipit nga talapason an mga suruklan o mga iginpapatuman han Dios. An mga apostol gintimaraot han Judio nga mga lider tungod kay waray hira umundang ha pagsangyaw ha ngaran ni Jesus. (Buhat 4:18-20; 5:27-29, 40) Nakadaot ba ini han ira kalipay o nagpaundang han ira pagsangyaw? Waray gud! “Hira nagkalakat tikang ha atubangan han Sanhedrin, nga malipayon; kay naihap ha ira nga hira takos mag-antos han kaalohan tungod han [iya] ngaran. Ngan adlaw-adlaw waray hira ukoy ha panutdo, ngan pagwali, nga hi Jesus amo an Kristo.” (Buhat 5:41, 42) Ini nga pagtimaraot naghatag ha ira hin kalipay ngan nagparig-on han ira kadasig ha pagsangyaw nga buruhaton. Ha urhi, an siyahan nga mga Kristiano gintimaraot han mga Romano tungod kay nagdumiri hira pagsingba ha emperador.
4. Ano an pipira nga mga hinungdan han pagtimaraot ha mga Kristiano?
4 Ha moderno nga mga panahon, gintitimaraot an mga Saksi ni Jehova tungod kay diri hira naundang ha pagsangyaw ‘hinin maopay nga sumat han ginhadian.’ (Mateo 24:14) Kon igindidiri an ira Kristiano nga mga katirok, disidido hira mag-antos han kakurian imbes nga umundang ha pagtarotarampo sugad han iginsusugo han Biblia. (Hebreo 10:24, 25) Gintitimaraot hira tungod han ira Kristiano nga neutralidad o tungod han ira pagdumiri ha sayop nga paggamit han dugo. (Juan 17:14; Buhat 15:28, 29) Bisan pa hito, inin marig-on nga pagsuporta ha katadongan naghahatag ha katawohan han Dios yana hin totoo nga kamurayawan ngan kalipayan.—1 Pedro 3:14.
Gintatamay Tungod kan Kristo
5. Tungod ha ano nga nangunguna nga hinungdan gintitimaraot an katawohan ni Jehova yana?
5 An ikasiyam nga kalipayan nga ginhisgotan ni Jesus ha iya Sermon ha Bukid naghihisgot liwat mahitungod han pagtimaraot. Hiya nagsiring: “Bulahan kamo, kon kamo pagdurugasan, ngan pagtitimarat-an ngan kon pagyayaknan ha ngatanan nga magraot hin buwa kontra ha iyo tungod ha akon.” (Mateo 5:11) An nangunguna nga hinungdan kon kay ano nga gintitimaraot an katawohan ni Jehova amo nga tungod kay hira diri bahin han maraot nga sistema han mga butang yana. Hi Jesus nagsiring ha iya mga disipulo: “Kon kamo kanan kalibotan, an kalibotan maghigugma unta han iya kalugaringon; kondi kay diri kamo kanan kalibotan, kondi ginpili ko kamo tikang ha kalibotan, tungod hini an kalibotan nagdudumot ha iyo.” (Juan 15:19) Sugad man, hi apostol Pedro nagsiring: “Hira nanhihipausa ha pagkaagi, nga diri kamo nagdadadlagan hin may kasamokan gud sugad ha ira, adton mga nagyayakan hin magraot mahitungod ha iyo.”—1 Pedro 4:4.
6. (a) Kay ano nga gintatamay ngan gintitimaraot an nanhibilin ngan an ira mga kaupod? (b) An sugad ba nga pagtamay nakakaiban han aton kalipayan?
6 Nahibaroan na naton nga gintimaraot an siyahan nga mga Kristiano tungod kay waray hira undang ha pagsangyaw ha ngaran ni Jesus. Ginsugo ni Kristo an iya mga sumurunod: “Kamo mga matitestigo ko . . . ngadto ha sidsid gud han kalibotan.” (Buhat 1:8) An matinumanon nga nanhibilin han dinihogan nga kabugtoan ni Kristo, nga binubuligan han ira maunungon nga mga kaupod nga “daku nga panon,” madasigon nga nagbubuhat hito nga sugo. (Pahayag 7:9, NW) Salit, hi Satanas nakikig-away “ha salin han iya katulinan [an binhi han “babaye,” an langitnon nga bahin han organisasyon han Dios], nga nagbabantay han mga sugo han Dios, ngan nagtitipig han pagpamatuod [kan] Jesus.” (Pahayag 12:9, 17) Sugad nga mga Saksi ni Jehova, nagpapamatuod kita mahitungod kan Jesus, an nagmamando na yana nga Hadi han Ginhadian, nga magbubungkag han tawhanon nga mga gobyerno nga nakakaulang dida ha dalan han matadong nga bag-o nga kalibotan han Dios. (Daniel 2:44; 2 Pedro 3:13) Tungod hini gintatamay ngan gintitimaraot kita, kondi malipayon kita nga nag-aantos tungod ha ngaran ni Kristo.—1 Pedro 4:14.
7, 8. Ano an buwa nga ginsiring han mga parakontra mahitungod ha siyahan nga mga Kristiano?
7 Hi Jesus nagsiring nga sadang hunahunaon han iya mga sumurunod nga malipayon hira bisan kon an mga tawo ‘buwa nga nagyayakan han ngatanan nga karaotan’ kontra ha ira tungod ha iya. (Mateo 5:11) Nahitabo gud ini ha siyahan nga mga Kristiano. Han hi apostol Pablo ginpriso ha Roma, han mga 59-61 K.P., an Judio nga mga lider didto nagsiring mahitungod ha mga Kristiano: “Mahitungod hini nga hugpo amon hinbabaroan nga bisan diin ginyayaknan ini hin kontra.” (Buhat 28:22) Hi Pablo ngan hi Silas gin-akusahan nga “mga nagbaliskad han kalibotan,” nga nagbubuhat hin “kontra ha mga kasugoanan ni Cesar.”—Buhat 17:6, 7.
8 Han nagsurat mahitungod ha mga Kristiano ha panahon han Imperyo han Roma, an historyador nga hi K. S. Latourette nagsiring: “Nagkaada magkalainlain nga buwa nga mga akusasyon. Tungod kay nagdumiri hira ha pakigbahin ha pagano nga mga seremonya an mga Kristiano gin-akusahan nga mga ateyista kuno. Tungod han ira paglikay ha kadak-an nga buruhaton han komunidad—an pagano nga mga piyesta, an panpubliko nga mga kaliawan . . .—ginpakaraot hira sugad nga nangangalas ha mga tawo. . . . Ginsiring nga an kalalakin-an ngan kababayin-an nga mga Kristiano nagkikirigta ha gab-i . . . ngan pagkatapos nagbubuhat hin pakighilawas ha bisan hin-o. . . . Tungod kay [an Memoryal han kamatayon ni Kristo] ginsaurog nga an presente amo an mga tumuroo la, nagtikang magsarang an buwa nga mga sumat nga an mga Kristiano regular nga naghalad hin minasus-an ngan ginkaon an dugo ngan unod hito.” Dugang pa, tungod kay an siyahan nga mga Kristiano waray magsingba ha emperador, gin-akusahan hira sugad nga mga kaaway han Estado.
9. Paonan-o binaton an siyahan-siglo nga mga Kristiano ha buwa nga mga akusasyon kontra ha ira, ngan ano an kahimtang yana?
9 Ito nga buwa nga mga akusasyon waray makapugong ha siyahan nga mga Kristiano nga buhaton an sugo ha ira nga isangyaw an maopay nga sumat han Ginhadian. Han 60-61 K.P., hi Pablo nakagsaysay han “maopay nga sumat” nga ‘namunga ngan nagtubo ha bug-os nga kalibotan’ ngan “iginwali ha ngatanan nga mga binuhat ha ilarom han langit.” (Kolosas 1:5, 6, 23) Nahitatabo liwat ito yana. An mga Saksi ni Jehova gin-aakusahan hin buwa, sugad la han siyahan-siglo nga mga Kristiano. Kondi, an buruhaton nga pagsangyaw han mensahe han Ginhadian yana nag-uuswag ngan naghahatag hin daku nga kalipayan ha mga nakikigbahin hito.
Malipayon Bisan kon Pagtimarauton Pariho ha mga Propeta
10, 11. (a) Paonan-o gintapos ni Jesus an iya paghisgot han ikasiyam nga kalipayan, ngan kay ano? (b) Kay ano nga gintimaraot an mga propeta? Paghatag hin mga ehemplo.
10 Gintapos ni Jesus an iya paghisgot ha ikasiyam nga kalipayan ha pagsiring: ‘Magkalipay kamo, kay amo ini an ira pagtimarat-i han mga manaragna nga una ha iyo.’ (Mateo 5:12) An mga propeta nga sinugo ni Jehova basi magpahamangno ha diri-matinumanon nga Israel waray karawata hin maopay ngan agsob pagtimarauton. (Jeremias 7:25, 26) Ha pagpamatuod hini nga hitabo, hi apostol Pablo nagsurat: “Ano pa an igyayakan ko? Kay kukulangon ako hin oras kon ako magsusumat mahitungod . . . han mga manaragna: nga hira, tungod ha pagtoo . . . nag-antos ha mga pagsulaya ha pagyubit ngan mga hampak, oo, labot pa hini ha mga talikara ngan mga bilanggoan.”—Hebreo 11:32-38.
11 Durante han pagmando han maraot nga hi Hadi Ahab ngan han iya asawa, hi Jesebel, damu han mga propeta ni Jehova an ginpatay pinaagi han espada. (1 Hadi 18:4, 13; 19:10) Hi propeta Jeremias iginbutang ha mga pandugan ngan ha urhi iginhulog ha atabay nga waray tubig kondi lapok la. (Jeremias 20:1, 2; 38:6) Hi propeta Daniel iginlabog ha lungib han mga leon. (Daniel 6:16, 17) Ini ngatanan nga mga propeta antes-han-Kristiano nga panahon gintimaraot tungod kay ira gindepensahan an putli nga pagsingba kan Jehova. Damu nga mga propeta an gintimaraot han Judio nga mga lider han relihiyon. Gintawag ni Jesus an mga eskriba ngan mga Pariseo nga “mga anak han mga nagpatay han mga manaragna.”—Mateo 23:31.
12. Sugad nga mga Saksi ni Jehova kay ano nga gintatagad naton nga pribilehiyo kon pagtimarauton kita pariho ha mga propeta ha kadaan nga panahon?
12 Yana, kita sugad nga mga Saksi ni Jehova agsob nga gintitimaraot tungod kay madasigon nga iginsasangyaw naton an maopay nga sumat han Ginhadian. An aton mga kaaway nag-aakusa ha aton hin “agresibo nga pangumbirte,” kondi maaram kita nga an matinumanon nga mga magsiringba ni Jehova antes ha aton nakaeksperyensya hin pariho nga pagpakaraot. (Jeremias 11:21; 20:8, 11) Gintatagad naton nga pribilehiyo an pag-antos tungod ha pariho nga hinungdan nga gin-antos han matinumanon nga mga propeta ha kadaan nga panahon. Hi disipulo Jakobo nagsurat: “Mga kabugtoan, karawata niyo nga susbaranan han pag-antos ngan pag-ilob, an mga manaragna nga nagyakan tungod ha ngaran han Ginoo. Kitaa, gintawag ta nga mga baraan an mga nag-antos.”—Jakobo 5:10, 11.
Hilarom Gud nga mga Hinungdan han Pagin Malipayon
13. (a) Kay ano nga diri kita nanluluya tungod han pagtimaraot? (b) Ano an nabulig ha aton nga magpabilin nga marig-on, ngan ano an pinamamatud-an hini?
13 Tungod kay diri gud nanluluya bisan pa han pagtimaraot, naliliaw kita kon nahinunumdom nga ginsusunod naton an mga pitad han mga propeta, han siyahan nga mga Kristiano, ngan ni Kristo Jesus mismo. (1 Pedro 2:21) Nagkakaada kita hilarom nga katagbaw tikang ha Kasuratan, sugad han masunod nga mga pulong ni apostol Pedro: “Mga hinigugma, diri kamo magdumdom nga makatitingala an pagsulaya nga mapaso ha butnga niyo, nga nahinabo ha iyo ha pagproyba ha iyo, sugad nga daw usa nga makatitingala nga butang an nahinabo ha iyo: Kon mga ginpasipara kamo tungod ha ngaran ni Kristo, mga bulahan kamo; kay an espiritu han himaya ngan an espiritu han Dios aada ha iyo.” (1 Pedro 4:12, 14) Aton naieksperyensyahan nga nakakapabilin kita nga marig-on ilarom han pagtimaraot tungod la kay an espiritu ni Jehova aada ha aton ngan nagpaparig-on ha aton. An bulig han baraan nga espiritu amo an pamatuod nga an bendisyon ni Jehova aada ha aton, ngan naghahatag ini ha aton hin daku nga kalipayan.—Salmo 5:12; Filipos 1:27-29.
14. Ano an mga hinungdan nga sadang kita malipay bisan kon gintitimaraot kita tungod han katadongan?
14 Usa pa nga hinungdan kon kay ano nga an pagkontra ngan pagtimaraot tungod han katadongan nagpapalipay ha aton amo nga pinamamatud-an hito nga nagkikinabuhi kita sugad nga totoo nga mga Kristiano nga may diosnon nga debosyon. Hi apostol Pablo nagsurat: “An ngatanan nga mahigugma mabuhi nga matinahuron ha Dios kan Kristo Jesus mag-aantos hin pagtimarauta.” (2 Timoteo 3:12) Malipayon gud kita ha paghunahuna nga an aton pagtipig han integridad ilarom han kakurian naghahatag hin dugang nga baton ha ayat ni Satanas nga an ngatanan nga mga linarang ni Jehova nag-aalagad ha Iya tungod han hakugnon nga interes. (Job 1:9-11; 2:3, 4) Nalilipay kita nga nakakabulig kita, bisan kon gutiay hinduro, ha pagbindikar han matadong nga pagkasoberano ni Jehova.—Proberbios 27:11.
Lukso ha Kalipay Tungod han Balos
15, 16. (a) Ano nga hinungdan an iginhatag ni Jesus nga angay kita ‘magkalipay ngan lumukso ha kalipay’? (b) Ano nga balos an naghuhulat ha mga langit para ha dinihogan nga mga Kristiano, ngan paonan-o babalosan liwat an ira mga kaupod nga ‘iba nga mga karnero’?
15 Hi Jesus naghatag hin dugang pa nga hinungdan han kalipay bisan kon gintatamay ngan gintitimaraot pariho ha mga propeta ha kadaan nga panahon. Ha ikatarapos han ikasiyam nga kalipayan, hiya nagsiring: “Magkalipay ngan maghimaya [“lumukso,” NW] kamo, kay daku an iyo balos ha langit.” (Mateo 5:12) Hi apostol Pablo nagsurat: “An suhol han sala amo an kamatayon; kondi an hatag nga waray bayad han Dios amo an kinabuhi nga waray kataposan, nga aada kan Kristo Jesus nga aton Ginoo.” (Roma 6:23) Oo, an ‘daku nga balos’ amo an kinabuhi, ngan diri ito sugad hin suhol nga makakarawat naton. Regalo ito nga waray bayad. Hi Jesus nagsiring nga an balos aadto “ha langit” tungod kay nagtitikang ito kan Jehova.
16 An dinihogan nakarawat han “pudong-pudong han kinabuhi,” nga para ha ira, amo an diri-mamaratyon nga kinabuhi upod ni Kristo ha langit. (Jakobo 1:12, 17) Adton may-ada tunan-on nga paglaom, an ‘iba nga mga karnero,’ nagpapamulat ha pakapanunod han kinabuhi nga waray kataposan ha paraiso nga tuna. (Juan 10:16; Pahayag 21:3-5) Para hinin duha nga grupo, an “balos” diri-nakakarawat tungod han pag-alagad. An dinihogan ngan an ‘iba nga mga karnero’ nakarawat han ira balos tungod han “damu gud nga grasya” ni Jehova, nga nagpagios kan apostol Pablo ha pagsiring: “Salamat ha Dios tungod ha iya hatag, nga diri sadang mahiasoy ha mga pulong.”—2 Korinto 9:14, 15.
17. Kay ano nga magigin malipayon kita kon gintitimaraot kita ngan ha simboliko nga mga pulong ‘nalukso kita ha kalipay’?
17 Ha mga Kristiano, nga hito nga panahon an iba ha ira hirani na pagtimarauton ni Emperador Nero, hi apostol Pablo nagsurat: “Naghihimaya man kita ha aton mga kasakitan: kay hinbaroan ta nga an kasakitan nabunga hin pagkamarig-on; ngan an pagkamarig-on, ha pagsulay; ngan an pagsulay, ha paglaom: ngan an paglaom diri nahatag hin kaawod.” Hiya nagsiring liwat: “Magmalipayon kamo ha paglaom; magmainantuson kamo ha kagol-anan.” (Roma 5:3-5; 12:12) Ha langit man o ha tuna an aton paglaom, an balos ha aton tungod han pagkamatinumanon bisan pa han kakurian mas daku gud kay ha bisan ano nga takos para ha aton. Waray tubtoban an aton kalipay tungod ha paglaom nga mabuhi ha kadayonan basi mag-alagad ngan dayawon an aton mahigugmaon nga Amay, hi Jehova, ha panguna han aton Hadi nga hi Jesu-Kristo. Ha simboliko nga mga pulong ‘nalukso kita ha kalipay.’
18. Ano an malalaoman ha mga nasud samtang nagtitikahirani an kataposan, ngan ano an pagbubuhaton ni Jehova?
18 Ha iba nga mga nasud, gintimaraot an mga Saksi ni Jehova ngan gintitimaraot pa gihapon yana. Ha iya tagna mahitungod han kataposan han sistema han mga butang, hi Jesus nagpahamangno ha totoo nga mga Kristiano: “Pagdudumtan kamo han ngatanan nga nasud tungod han akon ngaran.” (Mateo 24:9) Samtang nagtitikahirani kita ha kataposan, pahihinaboon ni Satanas nga an mga nasud magpakita han ira kangalas ha katawohan ni Jehova. (Esekiel 38:10-12, 14-16) Magtitigaman ini nga panahon na para gumios hi Jehova. “Ako magpapadaku ha akon ngahaw, ngan magbabaraan ha akon ngahaw, ngan ako magpapakilala ha akon ngahaw ha mga mata han damu nga nasud; ngan hira makakakilala nga ako hi Jehova.” (Esekiel 38:23) Salit pagbabaraanon ni Jehova an iya harangdon nga ngaran ngan luluwason an iya katawohan tikang ha pagtimaraot. Salit, “bulahan an tawo nga makag-antos.”—Jakobo 1:12.
19. Samtang ginhuhulat naton an daku nga “adlaw han Dios,” ano an sadang naton pagbuhaton?
19 Samtang an daku nga “adlaw han Dios” nagtitikahirani na gud, magkalipay kita tungod kay kita ‘naihap nga takos mag-antos han kaalohan’ tungod han ngaran ni Jesus. (2 Pedro 3:10-13; Buhat 5:41) Pariho ha siyahan nga mga Kristiano, hinaot magpadayon kita “ha panutdo, ngan pagwali, nga hi Jesus amo an Kristo” ngan ha pagpasamwak mahitungod han gobyerno han iya Ginhadian samtang ginhuhulat naton an balos ha aton ha matadong nga bag-o nga kalibotan ni Jehova.—Buhat 5:42; Jakobo 5:11.
Sugad nga Repaso
• Ano an karuyag ipasabot han pag-antos tungod han katadongan?
• Ano an nagin epekto han pagtimaraot ha siyahan nga mga Kristiano?
• Kay ano nga masisiring nga gintitimaraot an mga Saksi ni Jehova pariho ha mga propeta ha kadaan nga panahon?
• Kay ano nga mahimo kita ‘magkalipay ngan lumukso ha kalipay’ bisan kon gintitimaraot?
[Mga Pakiana]
[Mga Retrato ha pahina 16 17]
“Bulahan kamo, kon kamo pagdudurugasan, ngan pagtitimarat-an”
[Ginkuhaan han Retrato]
Grupo ha prisohan: Chicago Herald-American
