Malipayon nga mga Surugoon ni Jehova
Malipayon nga mga Surugoon ni Jehova
“Bulahan an mga kablas ha espiritu.”—MATEO 5:3.
1. Ano an totoo nga kalipayan, ngan ano an iginpapakita hito?
AN KALIPAYAN presyoso nga panag-iya han katawohan ni Jehova. Hi salmista David nagsiring: “Malipayon an katawohan nga hi Jehova amo an ira Dios”! (Salmo 144:15) An kalipayan amo an pagbati hin maopay. An gihilarumi nga kalipayan—nga binabati han aton gisusuluri nga pagkatawo—nagtitikang ha paghibaro nga ginbibendisyonan kita ni Jehova. (Proberbios 10:22) An sugad nga kalipayan nakikita ha aton duok nga relasyon ha aton langitnon nga Amay ngan ha aton kahibaro nga ginbubuhat naton an iya kaburut-on. (Salmo 112:1; 119:1, 2) Makapainteres, iginlista ni Jesus an siyam nga hinungdan nga mahimo kita magmalipayon. An pag-usisa hini nga mga kalipayan, dinhi hini ngan ha masunod nga artikulo mabulig ha aton nga masabtan nga magmamalipayon gud kita kon matinumanon nga mag-alagad kita ha “malipayon nga Dios,” hi Jehova.—1 Timoteo 1:11, NW.
Pagin Maaram ha Aton Espirituwal nga Panginahanglan
2. Ha ano nga okasyon iginpahayag ni Jesus an mahitungod han kalipayan, ngan ano an iya ginsiring ha pagtikang?
2 Han 31 K.P., iginpahayag ni Jesus an usa han pinakabantogan nga mga diskurso ha bug-os nga kasaysayan. Tinatawag ito nga an Sermon ha Bukid tungod kay iginpahayag ito ni Jesus ha bakilid han bukid nga naatubang ha Dagat han Galilea. An Ebanghelyo ni Mateo nagsasaysay: “Han pakakita han kadam-an, hiya [Jesus] sinaka ngadto ha bukid; ngan han iya paglingkod, an iya mga tinon-an dinaop ha iya. Ngan iya binuka an iya baba, ngan nagtutdo ha ira, nga nasiring: Bulahan an mga kablas ha espiritu, kay ira an ginhadian han langit.” Ha literal nga hubad, an siyahan nga mga pulong ni Jesus mababasa: “Malipayon an mga kablas (may kalabotan) ha espiritu,” o “Malipayon an mga makililimos han espiritu.” (Mateo 5:1-3; Kingdom Interlinear) Ini an mababasa ha Today’s English Version: “Malipayon adton maaram nga kablas hira ha espirituwal.”
3. Paonan-o an mapainubsanon nga disposisyon nakakaamot ha aton kalipayan?
3 Ha iya Sermon ha Bukid, iginpatin-aw ni Jesus nga mas malipayon gud an usa ka tawo kon maaram hiya nga nanginginahanglan hiya ha espirituwal. An mapainubsanon nga mga Kristiano, tungod kay bug-os nga maaram mahitungod han ira makasasala nga kahimtang, nanginginyupo kan Jehova para han iya pagpasaylo pinaagi han halad lukat ni Kristo. (1 Juan 1:9) Salit nagkakaada hira kamurayawan ha hunahuna ngan totoo nga kalipayan. “Bulahan adto hiya nga an iya pagsupak ginpasaylo; adto nga an iya sala gintabonan.”—Salmo 32:1; 119:165.
4. (a) Ha ano nga mga paagi maipapakita naton nga maaram kita han aton espirituwal nga panginahanglan ngan han iba? (b) Ano an nakakadugang ha aton kalipayan kon mahunahunaon kita ha aton espirituwal nga panginahanglan?
4 An pagkamaaram ha aton espirituwal nga panginahanglan nagpapagios ha aton nga basahon an Biblia adlaw-adlaw, basi bug-os nga magpahimulos han espirituwal nga pagkaon nga iginhahatag “ha husto nga panahon” pinaagi han “matinumanon ngan maaramon nga uripon,” ngan regular nga tumambong ha Kristiano nga mga katirok. (Mateo 24:45, NW; Salmo 1:1, 2; 119:111; Hebreo 10:25) An gugma ha igkasi-tawo nabulig ha aton nga hibaroan an espirituwal nga panginahanglan han iba ngan nagpapagios ha aton nga magin madasigon ha pagsangyaw ngan pagtutdo han maopay nga sumat han Ginhadian. (Markos 13:10; Roma 1:14-16) An pagsumat ha iba mahitungod han mga kamatuoran han Biblia nakakalipay ha aton. (Buhat 20:20, 35) An aton kalipayan mas naghihilarom pa gud kon aton pinamamalandong an urusahon nga paglaom mahitungod han Ginhadian ngan an mga bendisyon nga ihahatag pinaagi hito nga Ginhadian. Para han “gutiay nga panon” han dinihogan nga mga Kristiano, an paglaom ha Ginhadian nangangahulogan hin diri-mamaratyon nga kinabuhi ha langit sugad nga bahin han Ginhadian ni Kristo. (Lukas 12:32; 1 Korinto 15:50, 54) Para ha ‘iba nga mga karnero,’ nangangahulogan ito hin kinabuhi nga waray kataposan ha paraiso nga tuna sugad nga mga sakop hito nga Ginhadian.—Juan 10:16; Salmo 37:11; Mateo 25:34, 46.
Kon Paonan-o Magigin Malipayon an mga Nasusubo
5. (a) Ano an iginpapasabot han mga pulong nga adton “mga nasasakit” o nasusubo? (b) Paonan-o naliliaw an mga nasusubo?
5 An mga pulong mahitungod han sunod nga kalipayan nga gin-unabi ni Jesus baga in nagkakasumpaki. Hiya nagsiring: “Bulahan an mga nasasakit, kay hira paglilipayon.” (Mateo 5:4.) Paonan-o an nasusubo nga tawo ha pariho nga panahon magigin malipayon? Basi masabtan an kahulogan han ginsiring ni Jesus, kinahanglan tagdon naton kon ano nga klase hin kasubo an iya gin-uunabi. Iginsasaysay han disipulo nga hi Jakobo nga an aton makasasala nga kahimtang amo an hinungdan han kasubo. Hiya nagsurat: “Mga makasasala, hugasi niyo an iyo mga kamot; mga duduha an hunahuna, linisi niyo an iyo mga kasingkasing. Magsakit kamo, ngan magsubo kamo, ngan magtuok kamo; an iyo katatawa paghimoon nga kasubo, ngan an iyo kalipay ha kasakitan. Magpaubos kamo ha atubangan han Ginoo, ngan pagbabayawon kamo niya.” (Jakobo 4:8-10) Adton tinuod nga nasusubo tungod han ira makasasala nga kahimtang naliliaw kon ira hinbabaroan nga an ira mga sala mahimo mapasaylo kon magbuhat hira hin pagtoo ha halad lukat ni Kristo ngan magpakita hin totoo nga pagbasol pinaagi han pagbuhat han kaburut-on ni Jehova. (Juan 3:16; 2 Korinto 7:9, 10) Hito nga paagi magkakaada hira presyoso nga relasyon kan Jehova ngan magkakaada paglaom nga mabuhi ha kadayonan basi mag-alagad ngan magdayaw ha iya. Naghahatag ini ha ira hin mas hilarom nga kalipayan.—Roma 4:7, 8.
6. Ha ano nga paagi nasusubo an iba, ngan paonan-o hira naliliaw?
6 An ginsiring ni Jesus nag-uupod liwat hadton nasusubo tungod han mangil-ad nga mga kahimtang nga nahitatabo ha kalibotan. Igin-aplikar ni Jesus ha iya kalugaringon an tagna ha Isaias 61:1, 2, nga nasiring: “An espiritu han Ginoo hi Jehova hahani ha akon; tungod kay hi Jehova nagdihog ha akon ha pagwali han maopay nga mga sumat ngadto ha mga maaghop; iya ako sinugo ha pagbugkos han mga samad an kasingkasing, . . . ha paglipay hadton ngatanan nga masurub-on.” Ito nga sugo naaplikar liwat ha dinihogan nga mga Kristiano nga aanhi pa ha tuna, nga nagbubuhat hito pinaagi han bulig han ira mga kaupod, an ‘iba nga mga karnero.’ An ngatanan nabulig ha buruhaton nga simboliko nga pagtigaman ha mga agtang han “mga tawo nga nanhahayhay ngan nagsisinggit tungod han ngatanan nga kangil-aran nga ginbubuhat dida ha butnga hini [apostata nga Jerusalem, nga naglaladawan ha Kakristianohan].” (Esekiel 9:4) An sugad nga mga nasusubo naliliaw han “maopay nga sumat han ginhadian.” (Mateo 24:14) Malipayon hira han mahibaro nga an maraot nga sistema han mga butang ni Satanas hirani na saliwanan han matadong nga bag-o nga kalibotan ni Jehova.
Malipayon an mga Malumo
7. Ano an diri iginpapasabot han pulong nga “malumo”?
7 Hi Jesus nagpadayon ha iya Sermon ha Bukid ha pagsiring: “Bulahan an mga maaghop [“malumo,” NW], kay hira makakapanunod han tuna.” (Mateo 5:5) An pagkamalumo usahay ginhuhunahuna nga nagpapasabot hin kaluyahan. Kondi, diri sugad hito. Ha pagsaysay han kahulogan han pulong nga iginhubad nga “malumo,” usa nga eskolar ha Biblia an nagsurat: “An nalabaw nga kinaiya han tawo nga [malumo] amo nga hiya an tawo nga kontrolado gud an kalugaringon. Diri ito an waray-determinasyon nga pagkamahumok, pagin emosyonal, ngan waray-reklamo nga pagkamahilom. Usa ito nga kusog nga kontrolado.” Hi Jesus nagsiring mahitungod ha iya kalugaringon: “Ako maaghop [“malumo,” NW] ngan mapainubsanon ha kasingkasing.” (Mateo 11:29) Kondi, maisugon hi Jesus ha pagdepensa ha matadong nga mga prinsipyo.—Mateo 21:12, 13; 23:13-33.
8. An pagkamalumo duok nga may kalabotan ha ano, ngan kay ano nga ginkikinahanglan naton ini nga kalidad ha aton relasyon ha iba?
8 An pagkamalumo, kon sugad, duok nga may kalabotan ha pagpugong-ha-kalugaringon. Oo, an pagkamalumo ngan pagpugong-ha-kalugaringon magkaupod nga iginsurat ni apostol Pablo han iginsaysay niya an mga “bunga han espiritu.” (Galasia 5:22, 23) An pagkamalumo kinahanglan patuboon pinaagi han bulig han baraan nga espiritu. Kristiano nga kalidad ito nga nabulig ha pakigmurayaw ha mga diri-tumuroo ngan ha mga aada ha kongregasyon. Hi Pablo nagsurat: “Panul-ot kamo, . . . [hin] usa nga kasingkasing han pagpuangon, pagkalooy, pagpaubos, pagkaaghop [“pagkamalumo,” NW], pagkamailob; nga mag-inantusay kamo an usa kag usa. Ngan magpinasayloay kamo an usa kag usa.”—Kolosas 3:12, 13.
9. (a) Kay ano nga an pagin malumo ginkikinahanglan diri la ha aton relasyon ha iba nga mga tawo? (b) Paonan-o an mga malumo “makakapanunod han tuna”?
9 Kondi, an pagkamalumo ginkikinahanglan diri la ha aton relasyon ha iba nga mga tawo. Pinaagi han aton kinaburut-on nga pagpasakop ha pagkasoberano ni Jehova, ipinapakita naton nga kita malumo. An nangunguna nga susbaranan hini amo hi Jesu-Kristo, nga han nakanhi pa ha tuna nagpakita hiya hin pagkamalumo ngan bug-os nga pagpasakop ha kaburut-on han iya Amay. (Juan 5:19, 30) Hi Jesus an siyahan nga nakapanunod han tuna, kay hiya an pinili nga Magmarando hito. (Salmo 2:6-8; Daniel 7:13, 14) Iya iginpapaangbit ini nga panurundon ha 144,000 nga kaupod nga “mga manurunod,” nga ginpili tikang ha “mga tawo” basi ‘maghadi hira ha tuna.’ (Roma 8:17; Pahayag 5:9, 10; 14:1, 3, 4; Daniel 7:27) Hi Kristo ngan an iya kaupod nga mga magmarando magmamando ha minilyon nga sugad-karnero nga kalalakin-an ngan kababayin-an nga ha ira, makalilipay nga natutuman an matagnaon nga salmo: “An maaghop makakapanunod han tuna, ngan maglilipay hira tungod han kahuraan han kamurayaw.”—Salmo 37:11; Mateo 25:33, 34, 46.
Malipayon Adton Nagugutom han Katadongan
10. Ano an usa nga paagi nga bubusugon adton ‘nagugutom ngan nauuhaw han katadongan’?
10 An sunod nga kalipayan nga iginsaysay ni Jesus han nagdidiskurso hiya ha bakilid han bukid ha Galilea amo an: “Bulahan an mga ginugutom ngan inuuhaw tungod han katadongan kay hira pagbubusgon.” (Mateo 5:6) Para ha mga Kristiano, iginhahatag ni Jehova an suruklan para han katadongan. Salit, adton nagugutom ngan nauuhaw han katadongan ha pagkamatuod nagugutom ngan nauuhaw han giya han Dios. An sugad nga mga tawo maaram gud han ira sala ngan pagkadiri-hingpit ngan naghihingyap han pag-uyon ni Jehova. Malipayon gud hira han hinbaroan nira tikang ha Pulong han Dios nga kon hira magbasol ngan mangaro hin pasaylo pinaagi han halad lukat ni Kristo, magigin matadong hira ha pagkita han Dios!—Buhat 2:38; 10:43; 13:38, 39; Roma 5:19.
11, 12. (a) Paonan-o dinangat ha katadongan an dinihogan nga mga Kristiano? (b) Paonan-o matatagbaw an kauhaw ha katadongan han mga kaupod han mga dinihogan?
11 Hi Jesus nagsiring nga an sugad nga mga tawo magigin malipayon, tungod kay hira “pagbubusgon” o tatagbawon. (Mateo 5:6) An dinihogan nga mga Kristiano nga gintawag basi ‘maghadi’ upod ni Kristo ha langit ‘ginpakamatadong para ha kinabuhi.’ (Roma 5:1, 9, 16-18) Ginmangnoan hira ni Jehova sugad nga espirituwal nga mga anak. Nagin mga manurunod hira kaupod ni Kristo, gintawag basi magin mga hadi ngan mga saserdote ha iya langitnon nga Ginhadian.—Juan 3:3; 1 Pedro 2:9.
12 An mga kaupod han mga dinihogan waray pa ideklara nga matadong para ha kinabuhi. Kondi, iginhatag na ni Jehova ha ira an usa ka sukol han pagkamatadong pinaagi han ira pagtoo ha iginbubo nga dugo ni Kristo. (Jakobo 2:22-25; Pahayag 7:9, 10) Ginpakamatadong hira sugad nga mga sangkay ni Jehova nga maluluwas ha panahon han “daku nga kagol-anan.” (Pahayag 7:14) An ira kauhaw han katadongan matatagbaw pa gud kon, ilarom han “bag-o nga langit,” magigin bahin hira han bag-o nga tuna diin “mag-uukoy an katadongan.”—2 Pedro 3:13; Salmo 37:29.
Malipayon an mga Maloloy-on
13, 14. Ha ano nga praktikal nga mga paagi sadang ipakita naton nga kita maloloy-on, ngan ano an kapulsanan hini ha aton?
13 Ha pagpadayon ha iya Sermon ha Bukid, hi Jesus nagsiring: “Bulahan an mga maloloy-on kay hira makakarawat hin kalooy.” (Mateo 5:7) Ha legal nga pagsabot, an kalooy nangangahulogan hin may pagkabuotan nga pagtagad han usa nga huwes nga nagpupugong pagpadapat han bug-os nga sirot ha nakasayop sumala ha balaud. Kondi, sugad han pagkagamit ha Biblia, an orihinal nga mga pulong nga iginhubad nga “kalooy” kasagaran nga nagpapasabot hin kapahayagan han buotan nga pagtagad o pagpaid nga naghahatag hin katalwasan ha mga kablas. Salit, adton maloloy-on aktibo nga mapinairon. An ilustrasyon ni Jesus mahitungod han buotan nga Samaritano naghahatag hin maopay nga susbaranan han usa nga indibiduwal nga ‘nagbuhat hin maloloy-on’ ha usa ka tawo nga nanginginahanglan.—Lukas 10:29-37.
14 Basi makaeksperyensya han kalipayan nga resulta han pagin maloloy-on, kinahanglan magbuhat kita han mag-opay nga mga buhat han pagkabuotan ngada hadton nanginginahanglan. (Galasia 6:10) Pinaid hi Jesus ha mga tawo nga iya hinkit-an. “Hiya nalooy ha ira, kay sugad hin mga karnero hira nga waray magbarantay; ngan nagtikang hiya hin pagpanutdo ha ira hin damu nga mga bagay.” (Markos 6:34) Nasabtan ni Jesus nga espirituwal an pinakaimportante nga panginahanglan han katawohan. Maipapakita liwat naton nga mapinairon ngan maloloy-on kita pinaagi han pagpaangbit ha iba han pinakaimportante nga ira panginahanglan—an “maopay nga sumat han ginhadian.” (Mateo 24:14) Makakabulig liwat kita ha praktikal nga paagi ha lagas nga mga igkasi-Kristiano, mga balo nga babaye, ngan mga ilo ngan ‘rig-unon an mga maluya ha kasingkasing.’ (1 Tesalonika 5:14; Proberbios 12:25; Jakobo 1:27) Diri la kay maghahatag ini ha aton hin kalipayan kondi pinaagi hito makakarawat liwat naton an kalooy ni Jehova.—Buhat 20:35; Jakobo 2:13.
Putli an Kasingkasing Ngan Makimurayawon
15. Paonan-o kita magigin putli ha kasingkasing ngan nakikigmurayaw?
15 Iginsaysay ni Jesus an ikaunom ngan ikapito nga mga kalipayan sugad han masunod: “Bulahan an mga maputli ha kasingkasing, kay hira makakakita han Dios. Bulahan an mga makigdaiton, kay hira pagngangaranan nga mga anak han Dios.” (Mateo 5:8, 9) An putli nga kasingkasing diri la limpyo ha moral kondi limpyo liwat ha espirituwal ngan bug-os an debosyon hito ngadto kan Jehova. (1 Kronikas 28:9; Salmo 86:11) An pulong nga “makigdaiton” ha orihinal nga yinaknan literal nga nangangahulogan hin “makimurayawon.” An nakikigmurayaw nagkikinabuhi nga mamurayawon kaupod han ira Kristiano nga kabugtoan ngan, kon mahihimo, ha ira mga igkasi-tawo. (Roma 12:17-21) Ira ‘pinangingita an kamurayawan ngan ginsusunod ito.’—1 Pedro 3:11.
16, 17. (a) Kay ano nga an mga dinihogan tinatawag nga “mga anak han Dios,” ngan paonan-o hira “makakakita han Dios”? (b) Paonan-o an ‘iba nga mga karnero’ “makakakita han Dios”? (c) Paonan-o ngan san-o, magigin “mga anak han Dios” an ‘iba nga mga karnero’ ha bug-os nga kahulogan hito?
16 An nakikigmurayaw nga putli an kasingkasing, ginsaaran nga hira “pagngangaranan nga mga anak han Dios” ngan hira “makakakita han Dios.” An dinihogan nga mga Kristiano mga igin-anak-ha-espiritu ngan ginmamangnoan hira ni Jehova sugad nga “mga anak” samtang aanhi pa ha tuna. (Roma 8:14-17) Kon banhawon na hira basi makaupod ni Kristo ha langit, mag-aalagad hira ha presensya ni Jehova ngan aktuwal nga ira makikita Hiya.—1 Juan 3:1, 2; Pahayag 4:9-11.
17 An nakikigmurayaw nga ‘iba nga mga karnero’ nag-aalagad kan Jehova ilarom han Maopay nga Magbarantay, hi Kristo Jesus, nga nagigin ira ‘Amay ha Kadayonan.’ (Juan 10:14, 16; Isaias 9:6) Adton malampuson nga makakapasar ha ultimo nga pagsari katapos han Milenyo nga Pagmando ni Kristo kakarawaton sugad nga tunan-on nga mga anak ni Jehova ngan magkakaada ‘mahimayaon nga kaluwasan han mga anak han Dios.’ (Roma 8:21; Pahayag 20:7, 9) Samtang ginpapamulat nira ini, ira tinatawag hi Jehova sugad nga ira Amay, tungod kay ira igindedikar an ira kinabuhi ngadto ha iya, kinikilala hiya sugad nga ira Humaratag-hin-Kinabuhi. (Isaias 64:8) Pariho kan Job ngan Moises ha kadaan nga panahon, hira “makakakita han Dios” pinaagi han mga mata han pagtoo. (Job 42:5; Hebreo 11:27) Pinaagi han ‘mga mata han ira kasingkasing’ ngan pinaagi han husto nga kahibaro mahitungod ha Dios, nakikita nira an urusahon nga mga kalidad ni Jehova ngan nangangalimbasog nga subaron hiya pinaagi han pagbuhat han iya kaburut-on.—Efeso 1:18; Roma 1:19, 20; 3 Juan 11.
18. Sumala ha siyahan nga pito nga kalipayan nga iginsaysay ni Jesus, hin-o an nakakaeksperyensya hin totoo nga kalipayan yana?
18 Nasabtan naton nga adton mahunahunaon han ira espirituwal nga panginahanglan, adton nasusubo, mga malumo, mga nagugutom ngan nauuhaw han katadongan, mga maloloy-on, mga putli ha kasingkasing, ngan mga nakikigmurayaw magkakaada totoo nga kalipayan ha pag-alagad kan Jehova. Kondi, an sugad nga mga tawo pirme naatubang hin pagkontra, pagtimaraot pa ngani. Nakakadaot ba ini han ira kalipayan? Ito nga pakiana paghihisgotan ha masunod nga artikulo.
Sugad nga Repaso
• Ano nga kalipayan an naieksperyensyahan hadton mahunahunaon han ira espirituwal nga panginahanglan?
• Ha ano nga mga paagi liliawon adton nasusubo?
• Paonan-o naton ipinapakita an pagkamalumo?
• Kay ano nga sadang kita magin maloloy-on, putli ha kasingkasing, ngan nakikigmurayaw?
[Mga Pakiana]
[Retrato ha pahina 10]
“Bulahan an mga kablas ha espiritu”
[Mga Retrato ha pahina 10]
‘Bulahan an mga ginugutom ngan inuuhaw han katadongan’
[Retrato ha pahina 10]
“Bulahan an mga maloloy-on”
