Mapapahimulosan Pa ba Naton an Totoo nga Seguridad?

MALIPAYON nga nag-uuyag an kabataan kaupod han ira mahigugmaon nga mga ginikanan—hin-o an diri nalilipay ha pagkita ha sugad nga kahimtang? Inaabat gud han kabataan an bug-os nga seguridad kon kaupod nira an ira mahigugmaon nga mga ginikanan. Kondi, para ha damu nga mga batan-on, talagsahon la an sugad nga malipayon nga mga takna. Lugod, an iba nga kabataan nababaraka kada adlaw kon diin hira makaturog pag-abot han kagab-ihon. May-ada pa ba paglaom ito nga waray balay nga kabataan ngan an iba pa nga mga tawo nga nagkikinabuhi nga waray seguridad?

Bisan kon an tidaraon baga in waray paglaom, an Pulong han Dios naghahatag hin paglaom. Hi propeta Isaias nagtagna nga maabot an panahon nga an ngatanan magkikinabuhi nga may bug-os nga seguridad. Hiya nagsurat: “Hira magtutukod hin mga balay ngan maukoy hini; ngan hira magtatanom hin mga urubasan, ngan makaon han mga bunga hini. Diri hira magtutukod, ngan an iba an maukoy; diri hira magtatanom, ngan an iba an makaon.”—Isaias 65:21, 22.

Kondi may-ada ba marig-on nga basihan ini nga paglaom? Bueno, an pulong nga “paglaom” diri pirme nagpapasabot hin pagkasigurado. Pananglitan, ha Brazil, an usa agsob nga nakakabati han mga pulong: “A esperança é a última que morre.” Literal nga nangangahulogan ito nga “An paglaom amo an ultimo nga butang nga namamatay.” Iginpapasabot hini nga damu nga mga tawo an nagpapabilin nga puno hin paglaom bisan kon waray totoo nga basihan para ha paglaom. Kondi, naiiba an paglaom nga iginhahatag ha aton han buhi nga Dios. Hi apostol Pablo nagsurat: “Bisan hin-o an natoo ha [Dios] diri pagpapakaalohan.” (Roma 10:11) An mga tagna han Biblia nga natuman na nagpapasarig ha aton nga an ngatanan nga iba pa nga mga saad ni Jehova nga Dios matutuman liwat. Kon matuman na ito nga mga saad, an mga kahimtang nga tungod hito napipiritan an kabataan nga mag-ukoy ha kalye magigin butang na han naglabay.

Bisan yana an praktikal nga sagdon ha Biblia makakabulig hadton waray paglaom nga mag-uswag an ira mga kinabuhi ngan makabiling hin totoo nga seguridad. Paonan-o mahihimo ito? Malilipay an mga Saksi ni Jehova ha imo komunidad ha pagbulig ha imo nga hibaroan an baton hini nga pakiana.