Mga Pakiana Tikang ha mga Magbarasa

Mahingangain an mga demonyo durante han Usa ka Yukot ka Tuig nga Pagmando ni Kristo?

Waray batona han Biblia ini nga pakiana ha direkta nga paagi. Kondi, mahimo kita magkaada makatadunganon nga konklusyon mahitungod ha kon mahingangain an mga demonyo durante han Milenyo nga Pagmando ni Kristo.

Ha paghatag hin abanse nga kahibaro mahitungod han mahitatabo ha tinikangan ngan ha kataposan hini nga Milenyo, hi apostol Juan nasiring: “Hinkit-an ko an usa nga anghel nga nalusad tikang ha langit, nga may-ada han yawi han atabay nga waray sag-od, ngan in daku nga talikara dida ha iya kamot. Ngan gindakop niya an Dragon, an daan nga halas, nga amo an Yawa ngan Satanas, ngan gin-gapos hiya hin usa ka yukot ka tuig, ngan ilinabog niya hiya ngadto ha atabay nga waray sag-od, ngan sadhan ito, ngan selyohan ito ha bawbaw niya, basi nga diri na niya paglimbongan an mga nasud, ngada ha katapos han usa ka yukot ka tuig: ngan katapos hini kinahanglan nga hiya bubuhian hin halipotay nga oras.” (Pahayag 20:1-3) Ini nga mga bersikulo naghihisgot la mahitungod ha paglaboga kan Satanas ha atabay nga waray sag-od ngan ha kataposan nga pagbuhii ha iya ha sulod hin halipot nga panahon. Bisan kon waray unabiha an mga demonyo, baga hin makatadunganon nga kon dadakpon na ngan ihuhulog an Yawa ha atabay nga waray sag-od han anghel nga may-ada han yawi hito—an ginhimaya nga hi Jesu-Kristo—bubuhaton liwat niya ito ha mga demonyo.—Pahayag 9:11.

Han magin Hadi hi Jesu-Kristo ha langit han 1914, ginios dayon hiya ha paagi nga nagkaada daku nga epekto kan Satanas sugad man ha mga demonyo. An Pahayag 12:7-9 nasiring: “Nag-araway ha langit: hi Miguel ngan an iya mga anghel nakikipag-away kontra han dragon; ngan an dragon ngan an iya mga anghel [an mga demonyo] nakikipag-away; ngan waray hira makadaog, ngan waray na hin-agian nga lugar nira ha langit. Ngan an daku nga dragon ginlabog, an daan nga halas, nga ginngangaranan Yawa ngan Satanas, nga amo an malimbong ha bug-os nga kalibotan; ginlabog hiya ngadto ha tuna, ngan an iya man mga anghel ginkahudlog upod ha iya.” Tikang hito nga panahon, hi Satanas ngan an iya mga demonyo aanhi na la ha kahirani han tuna. Makatadunganon la nga mahuhunahuna naton nga kon dugang nga lilimitahan na ni Jesu-Kristo an buruhaton ni Satanas basi mawara an iya maraot nga impluwensya ha tuna, sugad man liwat hito an Iya bubuhaton ha mga demonyo.

Tagda liwat an siyahan gud nga tagna han Biblia. Ito mababasa: “Igbubutang ko [Dios] in away ha butnga nimo [Satanas] ngan han babaye [an langitnon nga organisasyon ni Jehova], ngan ha butnga han imo [kan Satanas] katulinan ngan han iya katulinan [Jesu-Kristo]: ngan ini magtutultog han imo ulo, ngan hi ikaw magtutultog han iya tikod.” (Genesis 3:15) An pagtultog han ulo han halas mangangahulogan han paglaboga kan Satanas ha atabay nga waray sag-od durante han Usa ka Yukot ka Tuig nga Pagmando ni Kristo. An tagna dugang nga nasiring nga may-ada away butnga han Usa nga nagbubuhat han pagtultog ngan han binhi ni Satanas. Kaapi hini nga binhi, o organisasyon, an usa nga diri-nakikita nga bahin nga ginkukompwesto han maraot nga mga anghel, o mga demonyo. Salit, makatadunganon an paghunahuna nga kon ihuhulog na ni Jesus hi Satanas ha atabay nga waray sag-od, iya liwat gagapuson ngan ihuhulog didto an mga demonyo. An kamatuoran nga an maraot nga mga espiritu nagpapakita hin daku nga kahadlok ha atabay nga waray sag-od nagpapasabot nga maaram hira mahitungod hini nga paglimitahi ha ira ha tidaraon.—Lukas 8:31.

 Kondi, posible ba nga waray hisguti an mga demonyo ha Pahayag 20:1-3 tungod kay mabubungkag hira ha Armagedon upod han nakikita nga bahin han binhi ni Satanas? Ipinapakita han Biblia nga imposible ini. May kalabotan ha ultimo nga dadangatan ni Satanas, ito nasiring: “An yawa nga naglimbong ha ira ilinabog ngadto ha linaw nga kalayo ngan asupre, nga aadto man an mananap ngan an buwaon nga manaragna; ngan pagsasakiton hira ha adlaw ngan gab-i ha mga katuigan ha mga katuigan.” (Pahayag 20:10) An ihalas nga mananap ngan an buwaon nga manaragna mga politikal nga ahensya ngan bahin han nakikita nga organisasyon ni Satanas. (Pahayag 13:1, 2, 11-14; 16:13, 14) Bubungkagon hira ha Armagedon, kon poohon ngan tapuson na han Ginhadian han Dios an ngatanan nga mga ginhadian han kalibotan. (Daniel 2:44) An Biblia nag-unabi han ‘kalayo nga waray kataposan nga gin-andam ha yawa ngan ha iya mga anghel.’ (Mateo 25:41) Hi Satanas ngan an iya mga demonyo ilalabog liwat ngadto hito nga “linaw nga kalayo ngan asupre” sugad han ihalas nga mananap ngan han buwaon nga manaragna tungod kay hira liwat bubungkagon ha waray kataposan. Kon an diri nakikita nga bahin han binhi ni Satanas, an mga demonyo, nga mas gamhanan kay han nakikita nga mga bahin han binhi ni Satanas, bubungkagon ha Armagedon, sigurado nga gin-unabi na unta nga an mga demonyo aadto na ha simboliko nga linaw upod han ihalas nga mananap ngan han buwaon nga manaragna. An diri pag-unabi ha ira ha Pahayag 20:10 nagpapasabot nga an mga demonyo diri bubungkagon ha Armagedon.

Tungod kay waray unabiha hin direkta nga an mga demonyo sugad nga ginlabog ha atabay nga waray sag-od, waray liwat hira unabiha hin espisipiko nga ginpagawas hira tikang dida hito. Kondi, an ira dadangatan pariho han kanan Yawa. Katapos pagawason upod han Yawa ngan magkooperar ha iya durante han ultimo nga pagsari ha katawohan ha kataposan han usa ka yukot ka tuig, an mga demonyo ilalabog liwat ha linaw nga kalayo ngan hito nga paagi makakaeksperyensya han waray kataposan nga kabungkagan.—Pahayag 20:7-9.

Kon sugad, bisan kon an Pahayag 20:1-3 naghihisgot la mahitungod han kadakpi ni Satanas ngan kahilabog ngadto ha atabay nga waray sag-od, nga nangangahulogan hin kawaray-binubuhat, makatadunganon la nga aton mahuhunahuna nga an iya mga anghel gagapuson ngan ihuhulog liwat. Diri tutugotan hi Satanas o an iya mga demonyo nga makaulang ha katumanan han katuyoan han Dios ha paghimo han tuna nga paraiso ngan pagpabalik han katawohan ngadto ha pagkahingpit durante han Usa ka Yukot ka Tuig nga Pagmando ni Kristo.