‘O Jehova, Pagkadirodilain Ngan Pagkadamu han Imo mga Buhat!’
An Pagkamaopay Hinduro han mga Linarang ni Jehova
‘O Jehova, Pagkadirodilain Ngan Pagkadamu han Imo mga Buhat!’
NAG-UUKOY man kita ha huron o ha usa nga siyudad, ha kabukiran o ha ligid han dagat, napapalibotan kita han makatarag-ob nga pagkamaopay han mga linarang. Angayan la nga ipinapakita han 2004 Calendar of Jehovah’s Witnesses an mga retrato han urusahon gud nga mga linarang ni Jehova nga Dios.
An mapasalamaton nga mga tawo interesado pirme ha mga buhat han Dios. Pananglitan, tagda hi Salomon, nga an kinaadman “linmabaw han kinaadman han ngatanan nga mga anak ha sinirangan.” An Biblia nasiring: “Hiya naghimangraw mahitungod han mga kahoy, tikang ha sedro nga didto ha Libano bisan ngadto ha hisopo nga natubo dida ha mga kuta: naghimangraw liwat hiya han mga mananap, ngan han katamsihan, ngan han mga nanagkamang nga mga butang, ngan han kaisdaan.” (1 Hadi 4:30, 33) An amay ni Salomon nga hi Hadi David, agsob nga namamalandong han mga obra maestra han Dios. Napagios hiya ha pagyakan ha daku nga tingog ngadto ha iya Parahimo: “O Jehova, hin pagkadirodilain ngan hin pagkadamu han imo mga buhat! Pinaagi han kaaram imo ito ngatanan ginhimo: an tuna puno han imo mga manggad.”—Salmo 104:24. a
Kinahanglan liwat naton obserbahan ngan pamalandungon an mahitungod han mga linarang. Pananglitan, mahimo naton ‘ialsa an aton mga mata’ ngan igpakiana: “Hin-o an naghimo hini?” Aw, hi Jehova nga Dios, nga may-ada ‘daku nga gahum’ ngan totoo nga “makusog ha gahum”!—Isaias 40:26.
Paonan-o sadang makaapekto ha aton an pagpamalandong ha mga linarang ni Jehova? Sadang ito makaapekto ha aton ha diri maminos tulo nga paagi. Mahimo ito (1) magpahinumdom ha aton nga pabilhan an aton kinabuhi, (2) magpagios ha aton nga buligan an iba nga mahibaro tikang ha mga linarang, ngan (3) mag-aghat ha aton nga dugang pa nga kilalahon ngan apresyaron an aton Maglalarang.
Tungod kay an aton kinabuhi sugad nga mga tawo mas labaw gud kay ha kinabuhi han “mga mananap nga waray buot,” maoobserbahan ngan mapapabilhan naton an urusahon nga mga kalidad han mga linarang. (2 Pedro 2:12) An aton mga mata nakakakita han maanyag hinduro nga palibot. An aton mga talinga nakakabati han makaruruyag nga mga huni han katamsihan. Ngan an aton sentido may kalabotan ha oras ngan lugar nagpapahinumdom ngan naggigiya ha aton ngan gintitikangan han makalilipay nga mga handumanan. Bisan kon diri hingpit an aton presente nga kinabuhi, sigurado nga takos gud kita mabuhi!
Mahimo malipay an mga kag-anak ha natural nga pagkaruyag han ira mga anak ha mga linarang. Naruruyag gud an kabataan ha pamiling hin mga timbi ha baybayon, ha paghapyod hin hayop, ha pagsaka ha puno! Maruruyag gud an mga kag-anak ha pagbulig ha ira mga anak nga hisabtan an kalabotan butnga han mga linarang ngan han Maglalarang. An kahipausa ngan pagtahod nga napapatubo han kabataan para ha mga linarang ni Jehova mahimo magpabilin ha ira, ha ira bug-os nga kinabuhi.—Salmo 111:2, 10.
Magigin halipot gud an aton panlantaw kon gindadayaw naton an mga linarang kondi napapakyas kita ha pagdayaw ha Maglalarang. An tagna ni Isaias nabulig ha aton nga pamalandungon inin partikular nga punto, han sumiring ito: “Waray ka ba mahibaro? Waray ka ba pakabati? An Dios ha kadayonan, hi Jehova an Magburuhat han mga kataposan han tuna, diri naluya, diri man ginugol-an; waray pagsusi han iya sarabotan.”—Isaias 40:28.
Oo, an mga buhat ni Jehova nagpapamatuod han iya waray-kapariho nga kinaadman, han iya gilalabawi nga gahum, ngan han iya hilarom nga gugma ha aton. Kon nakikita naton an katahom nga nakapalibot ha aton ngan nasasantop an mga kalidad han Usa nga naghimo hito ngatanan, hinaot maaghat kita ha pagyakan, sugad han ginsiring ni David: “Waray sugad ha imo, O Ginoo; bisan ngani waray mga buhat sugad han imo, mga buhat.”—Salmo 86:8.
Makakasiguro kita nga an masinugtanon nga mga tawo padayon nga mahipapausa ha mga buhat han paglarang ni Jehova. Tubtob ha kadayonan, magkakamay-ada kita waray kataposan nga mga higayon ha paghibaro hin dugang pa mahitungod kan Jehova. (Eklesiastes 3:11) Ngan kon mas nahibabaro kita mahitungod han aton Maglalarang, mas hihigugmaon naton hiya.
[Mga footnote]
a Kitaa an 2004 Calendar of Jehovah’s Witnesses, Nobyembre/Disyembre.
[Retrato ha pahina 9]
Pagdayaw ha Maglalarang
Kinikilala han damu nga maapresyaron nga mga syentista an bahin han Dios ha paglarang. An masunod amo an pipira nga mga ehemplo:
“An importante nga takna ngan kalipay ha syensya nga akon gin-aadman, aada hiton panalagsa nga mga takna han pagdiskobre hin usa nga butang nga bag-o ngan pagsiring ha akon kalugaringon, ‘Ini ngay-an an paagi han pagbuhat han Dios hini.’ An akon tumong amo an pakasabot han gutiay nga bahin han plano han Dios.”—Henry Schaefer, propesor han chemistry.
“Kon may kalabotan ha hinungdan han paghaluag han Uniberso, an parabasa an kinahanglan maghimo han iya kalugaringon nga konklusyon, kondi diri kompleto an aton pagsabot hito kon waray Hiya [Dios].”—Edward Milne, kosmologo nga taga-Britanya.
“Maaram kita nga an palibot iginsasaysay pinaagi han gimaopayi ha ngatanan nga mga matematika tungod kay ginlarang ito han Dios.”—Alexander Polyakov, Ruso nga matematiko.
“Ha aton pag-aram han natural nga mga butang, gintatagad naton an mga panhunahuna han Maglalarang, hinbabaroan an iya mga ideya, gin-iinterpretar an usa nga sistema nga Iya, ngan diri aton.”—Louis Agassiz, Amerikano nga biologo.
[Retrato ha pahina 8, 9]
Mga “Gentoo penguin,” Antarctic Peninsula
[Retrato ha pahina 9]
Grand Teton National Park, Wyoming, E.U.A.
[Ginkuhaan han Retrato]
Jack Hoehn/Index Stock Photography