Pangaon—Diri la Panahon ha Pagkaon!

AN NGATANAN naruruyag han marasa nga pagkaon. Durante han pangaon, mapapahimulosan mo liwat an maopay nga pag-iristorya ngan makalilipay nga pakig-upod ha mga tawo nga imo hinigugma, ngan nagigin makaruruyag ito nga okasyon nga nagtatagbaw diri la han aton kagutom. Batasan na han damu nga mga pamilya nga magkatarampo ha pangaon bisan makausa la ha usa ka adlaw. An panahon ha pangaon naghahatag ha pamilya hin higayon ha paghisgot han mga panhitabo o mga plano para han adlaw. An mga ginikanan nga namamati ha mga ginsisiring ngan mga kapahayagan han ira mga anak nahibabaro han ginhuhunahuna ngan mga binabati han ira kabataan. Samtang nalabay an panahon, an malipayon, relaks nga pakig-upod nga pinahihimulosan ha panahon han pangaon nagpapatubo ha pag-abat han pamilya hin seguridad, pagsarig, ngan gugma nga nakakadugang ha karig-on han pamilya.

Yana nga panahon, tungod kay damu nga membro han pamilya an okupado ngan pirme nagdadagmit, makuri hira magdurungan ha pangaon. Ha iba nga mga lugar ha kalibotan, diri uyon ha lokal nga kultura nga an pamilya magtarampo ha pangaon o bisan pag-iristorya durante han pangaon. Batasan na han iba nga mga pamilya nga abrihan an TV durante han pangaon, nga tungod hito waray na gud hira higayon para ha mapulsanon nga pag-iristorya.

Kondi, an Kristiano nga mga ginikanan alerto pirme ha mga higayon ha pagparig-on ha ira mga pamilya. (Proberbios 24:27) Maiha na an naglabay, ginsumatan an mga ginikanan nga an usa han pinakamaopay nga mga higayon ha pagsumat han pulong han Dios ha ira mga anak amo an, ‘kon nalingkod hira ha ira balay.’ (Deuteronomio 6:7) An regular nga paglingkod nga tarampo ha pangaon naghahatag ha mga ginikanan hin usa nga higayon nga ipasilsil ha ira mga anak an mas hilarom nga gugma kan Jehova ngan ha iya matadong nga mga prinsipyo. Pinaagi han pagkultibar hin malipayon ngan relaks nga kahimtang, an panahon han pangaon mahihimo niyo nga magin makaruruyag ngan makaparig-on nga eksperyensya liwat para ha imo pamilya. Oo, pangalimbasugi nga an pangaon diri la magin panahon ha pagkaon!