Sunda an Susbaranan nga Ipinakita ni Jesus
Sunda an Susbaranan nga Ipinakita ni Jesus
“Akon kamo tinagan hin susbaranan nga sugad han akon ginbuhat, iyo man buhaton.”—JUAN 13:15.
1. Kay ano nga hi Jesus an susbaranan nga angay subaron han mga Kristiano?
HA BUG-OS nga kasaysayan han katawohan, usa la nga tawo an waray makasala ha bug-os niya nga kinabuhi. Ito nga tawo amo hi Jesus. Gawas kan Jesus, “waray tawo nga diri makakasala.” (1 Hadi 8:46; Roma 3:23) Tungod hito, gintatagad han totoo nga mga Kristiano hi Jesus sugad nga hingpit nga susbaranan nga angay subaron. Oo, han Nisan 14, 33 K.P., antes mamatay hi Jesus, iya ginsumatan an iya mga sumurunod nga subaron hiya. Hiya nagsiring: “Akon kamo tinagan hin susbaranan nga sugad han akon ginbuhat, iyo man buhaton.” (Juan 13:15) Durante hiton ultimo nga gab-i, gin-unabi ni Jesus an damu nga paagi nga sadang pangalimbasogan han mga Kristiano basi magin pariho ha iya. Hini nga artikulo, aton paghihisgotan an pipira hito nga mga paagi.
An Panginahanglan hin Pagpaubos
2, 3. Ha ano nga mga paagi nagin hingpit nga susbaranan han pagpaubos hi Jesus?
2 Han ginsagda ni Jesus an iya mga disipulo nga sundon an susbaranan nga iya ipinakita, espisipiko nga gin-uunabi niya an pagpaubos. Ha pipira nga okasyon, iya ginsagdonan an iya mga sumurunod nga magin mapainubsanon, ngan ha gab-i han Nisan 14, ipinakita niya an iya mismo pagpaubos pinaagi han paghugas ha mga tiil han iya mga apostol. Katapos, hi Jesus nagsiring: “Kon ako an Ginoo, ngan an Magturutdo, nga nanmusa [“naghugas,” NW] han iyo mga tiil, kamo kinahanglan man, nga magpinusaay han mga tiil han usa kag usa.” (Juan 13:14) Katapos hito, iya ginsugo an iya mga apostol nga sundon an susbaranan nga iya ipinakita. Ngan pagkamaopay gud hito nga susbaranan han pagpaubos!
3 Hi apostol Pablo nagsusumat ha aton nga antes kumanhi ha tuna hi Jesus, hiya naeksister na “ha dagway han Dios.” Kondi, ginhukas niya an iya kalugaringon ngan nagin ubós nga tawo. Dugang pa, “nagpaubos hiya ha iya ngahaw, nga nagmasinugtanon tubtob ha kamatayon, oo, an kamatayon” ha pasakitan nga kahoy. (Filipos 2:6-8) Hunahunaa ito. Hi Jesus, an ikaduha nga gihitaasi nga persona ha uniberso, inuyon nga magin mas ubos pa kay ha mga anghel, nga matawo sugad nga waray-mahihimo nga minasus-an, nga magtubo nga masinugtanon ha diri-hingpit nga mga ginikanan, ngan ha kataposan mamatay pariho hin tinamay nga kriminal. (Kolosas 1:15, 16; Hebreo 2:6, 7) Makatirigamnan gud ito nga pagpaubos! Posible ba masubad ito nga ‘panhunahuna’ ngan mapatubo an sugad nga “pagpaubos ha hunahuna”? (Filipos 2:3-5) Oo, kondi diri ito masayon.
4. Ano nga mga butang an nagpapagios ha mga tawo nga magpahitaas, kondi kay ano nga peligroso an pagpahitaas?
4 An kabaliktaran han pagpaubos amo an pagpahitaas. (Proberbios 6:16-19) An pagpahitaas nagresulta ha kahulog ni Satanas. (1 Timoteo 3:6) Masayon ito tumubo ha mga kasingkasing han tawo, ngan kon aada na ito, makuri na ito makuha. Mapahitas-on an mga tawo tungod han ira nasud, rasa, mga panag-iya, edukasyon, mga nahimo ha sekular, kahimtang ha komunidad, hitsura, mga abilidad ha isport, ngan tungod han damu nga iba pa nga mga butang. Kondi, ito ngatanan diri importante kan Jehova. (1 Korinto 4:7) Ngan kon nagpapagios ito ha aton nga magin mapahitas-on, nadadaot hito an aton relasyon ha iya. “Bisan kon hitaas hi Jehova, natan-aw hin hirani ha makalolooy; kondi hirayo niya kilalhon an palabilabihon.”—Salmo 138:6; Proberbios 8:13.
Mapainubsanon ha Butnga han Aton Kabugtoan
5. Kay ano nga importante nga magin mapainubsanon an mga tigurang?
5 Diri kita sadang magpahitaas tungod ha aton mga naibubulig ngan mga nahihimo ha pag-alagad kan Jehova; bisan han mga responsabilidad ha kongregasyon. (1 Kronikas 29:14; 1 Timoteo 6:17, 18) Ha pagkamatuod, kon mas mabug-at an aton mga responsabilidad, kinahanglan magin mas mapainubsanon kita. Ginsagda ni apostol Pedro an mga tigurang nga diri magin ‘mga agaron han mga igintubyan ha ira, kondi nga magin mga susbaranan ha panon.’ (1 Pedro 5:3) An mga tigurang pinipili basi magin mga surugoon ngan mga susbaranan, diri mga ginoo ngan mga agaron.—Lukas 22:24-26; 2 Korinto 1:24.
6. Ha ano nga mga bahin han Kristiano nga pagkinabuhi ginkikinahanglan an pagpaubos?
6 Diri la mga tigurang an kinahanglan magpakita hin pagpaubos. Ha mas batan-on nga kalalakin-an nga bangin naghahambog tungod han ira mas aktibo nga mga hunahuna ngan mas makusog nga mga lawas kay ha mga mas edaran na, hi Pedro nagsurat: “An ngatanan ha iyo magpanapton ha pagpaubos basi ha pagminangnoay ha usa kag usa: kay an Dios nasuwahi ha palabilabihon, kondi nahatag hin grasya ha mapainubsanon.” (1 Pedro 5:5) Oo, importante nga an ngatanan magpakita hin sugad-Kristo nga pagpaubos. Ginkikinahanglan an pagpaubos ha pagsangyaw han maopay nga sumat, labi na kon nakakaeksperyensya hin kawaray-pagtagad o pagkontra. Ginkikinahanglan an pagpaubos ha pagkarawat han sagdon o ha pagpasimple han aton pagkinabuhi basi mapauswag pa an aton pakigbahin ha ministeryo. Dugang pa, ginkikinahanglan naton an pagpaubos sugad man an kaisog ngan pagtoo kon nag-aantos hin maraot nga publisidad, legal nga mga pag-atake, o madarahog nga persikusyon.—1 Pedro 5:6.
7, 8. Ano an pipira nga mga paagi nga mahimo naton mapatubo an pagpaubos?
7 Paonan-o madadaog han usa ka tawo an pagpahitaas ngan gumawi nga may ‘pagpaubos ha hunahuna, an tagsa-tagsa mag-isip han iba nga maoroopay’ kay ha iya? (Filipos 2:3) Kinahanglan hunahunaon niya an iya kalugaringon sugad han paghunahuna ha iya ni Jehova. Iginsaysay ni Jesus an husto nga paghunahuna ha kalugaringon han hiya nagsiring: “Sugad man kamo, kon iyo mabuhat ngatanan an iginsugo ha iyo, masiring: Kami waray pulos nga mga surugoon, kay amon ginbuhat an nahitutungod ha amon nga buruhaton.” (Lukas 17:10) Hinumdumi nga diri gud maitatanding ha ginbuhat ni Jesus an bisan ano nga mahihimo naton. Bisan pa hito, mapainubsanon hi Jesus.
8 Dugang pa, mahimo kita mangaro han bulig ni Jehova nga mapatubo an husto nga paghunahuna ha aton kalugaringon. Pariho han salmista, mahimo kita mag-ampo: “Pagtutdui ako hin maopay nga paghukom ngan kinaadman; kay natuod ako ha imo mga sugo.” (Salmo 119:66) Bubuligan kita ni Jehova nga mapatubo an maaramon, timbang nga paghunahuna ha aton kalugaringon, ngan babalosan kita niya tungod han aton mapainubsanon nga paggawi. (Proberbios 18:12) Hi Jesus nagsiring: “Bisan hin-o an nagpapakahitaas, mahiuubos, ngan bisan hin-o an magpapaubos, mahihitaas.”—Mateo 23:12.
Husto nga Panhunahuna ha Husto Ngan Sayop
9. Ano an panhunahuna ni Jesus ha husto ngan sayop?
9 Bisan pa han pagkinabuhi ha sulod hin 33 ka tuig kaupod han diri-hingpit nga mga tawo, hi Jesus nagpabilin nga “waray sala.” (Hebreo 4:15) Ha pagkamatuod, han nagtatagna mahitungod han Mesias, an salmista nagsiring: “Naghigugma ka han pagkamatadong, ngan nangalas ka han pagkamaraot.” (Salmo 45:7; Hebreo 1:9) Hini liwat nga bahin sadang mangalimbasog an mga Kristiano ha pagsubad kan Jesus. Diri la kay maaram hira kumilala han husto ngan han sayop; nangangalas hira han maraot ngan nahigugma han husto. (Amos 5:15) Nabulig ini ha ira nga maatohan an ira kinaiya nga mga hilig ha pakasala.—Genesis 8:21; Roma 7:21-25.
10. Kon waray pagbasol nga ginbubuhat naton an “mangil-ad,” ano nga disposisyon an ipinapakita naton?
10 Hi Jesus nagsiring ha Pariseo nga hi Nikodemo: “An ngatanan nga nagbubuhat han mangil-ad, nadiri han kalamragan, ngan diri napahirani han kalamragan, bangin sawayon an ira mga buhat. Kondi, an nagbubuhat han kamatuoran, nahirani ha kalamragan basi humayag an ira mga buhat, kay ipinapagbuhat han Dios.” (Juan 3:20, 21) Tagda ini: Kinilala ni Juan hi Jesus sugad nga ‘an matuod nga kalamragan, nga nakakalamrag ha ngatanan nga tawo.’ (Juan 1:9, 10) Kondi, hi Jesus nagsiring nga kon magbuhat kita han “mangil-ad”—mga butang nga sayop, nga diri-naruruyagan han Dios—nangangalas kita ha kalamrag. Mahahanduraw mo ba nga nangangalas ka kan Jesus ngan ha iya mga suruklan? Ito an ginbubuhat han mga tawo nga diri nagbabasol ha ira ginbubuhat nga sala. Bangin diri sugad hito an ira paghunahuna han mga kahimtang, kondi matin-aw nga ha paghunahuna ni Jesus nangangalas hira ha iya ngan ha iya mga suruklan.
Kon Paonan-o Mapapatubo an Panhunahuna nga Sugad han kan Jesus Mahitungod ha Husto Ngan Sayop
11. Ano an importante kon karuyag naton mapatubo an panhunahuna nga sugad han kan Jesus mahitungod ha husto ngan sayop?
11 Kinahanglan masabtan naton hin matin-aw kon ano an husto ngan an sayop sumala ha panhunahuna ni Jehova. Magkakaada kita hito nga pagsabot pinaagi la han pag-aram ha Pulong han Dios, an Biblia. Samtang nagpapadayon kita ha sugad nga pag-aram, kinahanglan ig-ampo naton an sugad han igin-ampo han salmista: “Igtutdo ha akon an imo mga agianan, O Jehova; tutdui ako han imo mga dalan.” (Salmo 25:4) Kondi, hinumdumi nga malimbong hi Satanas. (2 Korinto 11:14) Mahimo niya tabonan an sayop ngan magin husto ito ha pagkita han diri-mabinantayon nga Kristiano. Salit, kinahanglan pamalandungon naton hin hilarom an aton hinbabaroan ngan sundon gud an sagdon han “matinumanon ngan maaramon nga uripon.” (Mateo 24:45-47, NW) An pag-aram, pag-ampo, ngan pamalandong ha aton hinbabaroan mabulig ha aton nga magtubo ha pagkahamtong ngan makig-upod ha mga tawo nga “pinaagi han paggamit, an ira mga balatian nagkababatid na ha pagkilala han maopay ngan han maraot.” (Hebreo 5:14) Katapos, magigin tendensya na naton nga kangalasan an maraot ngan higugmaon an maopay.
12. Ano nga sagdon han Biblia an nabulig ha aton nga diri magbuhat hin pagtalapas?
12 Kon nangangalas kita ha sayop, diri naton tutugotan nga magtubo ha aton mga kasingkasing an paghingyap han sayop nga mga butang. Damu ka tuig na an naglabay katapos mamatay hi Jesus, hi apostol Juan nagsurat: “Ayaw niyo higugmaa an kalibotan, bisan an mga bagay ha kalibotan. Kon may tawo nga maghigugma ha kalibotan, an gugma han Amay waray dida ha iya. Kay an ngatanan nga aada ha kalibotan, an kairiphon han unod ngan an kairiphon han mga mata, ngan an paghambog han [mga katigayonan ha] kinabuhi, diri kanan Amay, kondi kanan kalibotan.”—1 Juan 2:15, 16.
13, 14. (a) Kay ano nga an paghigugma ha mga butang ha kalibotan peligroso ha mga Kristiano? (b) Paonan-o naton malilikyan an pagpatubo hin gugma ha mga butang ha kalibotan?
13 An iba bangin mangatadongan nga diri sayop an ngatanan nga butang ha kalibotan. Bisan kon totoo ito, an kalibotan ngan an makaruruyag nga mga butang hito masayon la makaulang ha aton ha pag-alagad kan Jehova. Ngan waray butang nga igintatanyag han kalibotan nga dinisenyo basi magin mas duok kita ha Dios. Salit, kon aton higugmaon an mga butang ha kalibotan, bisan an mga butang nga bangin diri man sayop, aada na kita ha peligroso nga dalan. (1 Timoteo 6:9, 10) Gawas pa, an kadam-an dida ha kalibotan maraot gud ngan mahimo makadaot ha aton. Kon magkikita kita hin mga sine o mga programa ha telebisyon nga nagpapakita hin kamadarahog, materyalismo, o seksuwal nga imoralidad, ito nga mga butang mahimo magin makaruruyag—ngan katapos makakasulay na ha aton. Kon makikig-upod kita ha mga tawo nga interesado gud ha pagpauswag han ira estilo-ha-pagkinabuhi o pagpauswag han mga oportunidad ha negosyo, ito nga mga butang mahimo magin importante na gud liwat ha aton.—Mateo 6:24; 1 Korinto 15:33.
14 Ha luyo nga bahin, kon nalilipay kita ha Pulong ni Jehova, “an kairiphon han unod ngan an kairiphon han mga mata, ngan an paghambog han [mga katigayonan ha] kinabuhi” diri na makakadani hinduro ha aton. Dugang pa, kon makikig-upod kita ha mga tawo nga inuuna an mga butang han Ginhadian han Dios, magigin pariho kita ha ira, nga nahigugma han ira hinihigugma ngan naglilikay han ira linilikyan.—Salmo 15:4; Proberbios 13:20.
15. Sugad la han ginbuhat ni Jesus, paonan-o magpaparig-on ha aton an paghigugma ha pagkamatadong ngan kangalas ha pagtalapas?
15 An kangalas ha pagtalapas ngan paghigugma ha pagkamatadong nakabulig kan Jesus nga isentro an iya mga mata ha “kalipay nga ibinutang ha iya atubangan.” (Hebreo 12:2) Mahihimo liwat naton ini. Maaram kita nga “an kalibotan nawawara, ngan an iya kairiphon.” Anoman nga kalipayan nga igintatanyag hini nga kalibotan temporaryo la. Kondi, “an nagbubuhat han kaburut-on han Dios nagpapadayon ha gihapon.” (1 Juan 2:17) Tungod kay ginbuhat ni Jesus an kaburut-on han Dios, nagin posible para ha mga tawo nga magkaada kinabuhi nga waray kataposan. (1 Juan 5:13) Hinaot kita ngatanan magsubad ha iya ngan magpahimulos tungod han iya pagkamatinumanon.
Pagpailob ha Persikusyon
16. Kay ano nga ginsagda ni Jesus an iya mga sumurunod nga maghigugmaay ha usa kag usa?
16 Iginsaysay ni Jesus an usa pa nga paagi nga angay subaron hiya han iya mga disipulo, nasiring: “Ini amo an akon sugo, nga maghigugmaay kamo an usa kag usa, sugad gud han akon paghigugma ha iyo.” (Juan 15:12, 13, 17) Damu an mga hinungdan kon kay ano nga an mga Kristiano nahigugma ha ira kabugtoan. Hini nga okasyon, an aada ha hunahuna ni Jesus amo an kangalas nga aatubangon nira tikang ha kalibotan. Hiya nagsiring: “Kon an kalibotan magdumot ha iyo, maaram kamo nga hi ako gindumtan niya una pa ha iyo. . . . An surugoon diri darodaku han iya agaron. Kon ako ginbiling nira hin pagtimaraot amo man kamo pagbibilngon hin pagtimaraot.” (Juan 15:18, 20) Oo, bisan kon ginpipersigir, an mga Kristiano nagsusubad kan Jesus. Kinahanglan patuboon nira an marig-on, mahigugmaon nga bugkos basi makabulig ha ira nga makailob hito nga kangalas.
17. Kay ano nga an kalibotan nangangalas ha totoo nga mga Kristiano?
17 Kay ano nga an kalibotan mangangalas ha mga Kristiano? Tungod kay, pariho kan Jesus, hira “diri kanan kalibotan.” (Juan 17:14, 16) Neutral hira may kalabotan ha militar ngan ha politika, ngan ginsusunod nira an mga prinsipyo han Biblia, gintatahod an pagkasagrado han kinabuhi ngan nagkikinabuhi uyon ha hitaas nga mga suruklan ha moral. (Buhat 15:28, 29; 1 Korinto 6:9-11) Espirituwal an ira siyahan nga mga tumong, diri materyal. Nagkikinabuhi hira ha kalibotan, kondi sugad han iginsurat ni Pablo, diri nira ‘ginagamit ito hin labi.’ (1 Korinto 7:31) Oo, gindadayaw han iba an hitaas nga mga suruklan han mga Saksi ni Jehova. Kondi an mga Saksi ni Jehova diri nagkukompromiso basi la dayawon o karawaton han iba. Sugad nga resulta, diri hira nasasabtan han kadam-an dida ha kalibotan, ngan damu an nangangalas ha ira.
18, 19. Ha pagsunod ha susbaranan ni Jesus, paonan-o inaatubang han mga Kristiano an pagkontra ngan persikusyon?
18 Hinkit-an han mga apostol ni Jesus an duro nga kangalas han kalibotan han gindakop ngan ginpatay hi Jesus, ngan ira hinkit-an kon paonan-o inatubang ni Jesus ito nga kangalas. Ha hardin han Getsemani, nagkaabot an relihiyoso nga mga kaaway ni Jesus basi dakpon hiya. Nangalimbasog hi Pedro ha pagpanalipod ha iya pinaagi han kampilan, kondi hi Jesus nagsiring kan Pedro: “Itakob mo an imo kampilan, kay an ngatanan nga nagamit hin kampilan, ha kampilan man kamamatay.” (Mateo 26:52; Lukas 22:50, 51) Ha mga panahon nga naglabay, an mga Israelita nakig-away pinaagi han kampilan kontra ha ira mga kaaway. Kondi, yana, iba na an mga kahimtang. An Ginhadian han Dios “diri kanan hini nga kalibotan” ngan waray mga giutan han nasud nga magpapanalipod. (Juan 18:36) Diri mag-iiha hi Pedro magigin bahin na han usa nga espirituwal nga nasud, nga an mga membro hito magigin mga tuminungnong didto ha langit. (Galasia 6:16; Filipos 3:20, 21) Salit, tikang hadto nga panahon padayon, aatubangon han mga sumurunod ni Jesus an kangalas ngan persikusyon sugad han ginbuhat ni Jesus—waray kahadlok kondi ha mamurayawon nga paagi. May pagsarig nga itatapod nira an resulta hito ha mga kamot ni Jehova ngan masarig ha iya para han kusog ha pag-ilob.—Lukas 22:42.
19 Paglabay hin mga tuig, hi Pedro nagsurat: “Hi Kristo nag-antos man tungod ha iyo, nga gintagan kamo hin susbaranan, basi kamo magsunod ha iya mga pitad. . . . Han pagpakaalohi ha iya, waray hiya bulos hin pagpakaalo; han iya pag-antos, waray hiya magtarhog; kondi nga igintubyan niya an iya kalugaringon ngadto ha naghuhukom hin matadong.” (1 Pedro 2:21-23) Sugad la han iginpahamangno ni Jesus, an mga Kristiano nakakaeksperyensya hin makuri nga persikusyon ha paglabay han panahon. Ha siyahan nga siglo, ngan ha aton panahon, ira ginsunod an susbaranan ni Jesus ngan nakahimo hin urusahon nga rekord han matinumanon nga pagpailob, ipinapakita nga hira mamurayawon nga mga magtiripig han integridad. (Pahayag 2:9, 10) Hinaot kita ngatanan magsubad liwat ha ira kon naatubang ha sugad nga mga kahimtang.—2 Timoteo 3:12.
“Igsul-ot Niyo an Ginoo Jesu-Kristo”
20-22. Ha ano nga paagi ‘iginsusul-ot han mga Kristiano an Ginoo Jesu-Kristo’?
20 Hi Pablo nagsurat ha kongregasyon ha Roma: “Igsul-ot niyo an Ginoo Jesu-Kristo, ngan diri kamo mag-andam ha mga kairiphon han unod, ha pagtuman han mga karuyag hito.” (Roma 13:14) Iginsusul-ot han mga Kristiano hi Jesus, siring pa, pariho hin usa nga bado. Nangangalimbasog hira ha pagsubad han iya mga kalidad ngan mga buhat tubtob nga hira nagigin sanag han ira Agaron, bisan kon hira diri-hingpit.—1 Tesalonika 1:6.
21 Malampuson nga mahihimo naton ‘igsul-ot an Ginoo Jesu-Kristo’ kon magigin pamilyar kita ha kinabuhi ni Jesus ngan mangalimbasog nga magkinabuhi sugad han iya pagkinabuhi. Aton ginsusubad an iya pagpaubos, an iya gugma ha pagkamatadong, an iya kangalas ha pagtalapas, an iya gugma ha iya kabugtoan, an iya pagin diri bahin han kalibotan, ngan an iya waray-reklamo nga pagpailob ha pag-antos. Diri kita ‘nag-aandam ha mga kairiphon han unod’—karuyag sidngon, diri nagigin siyahan nga katuyoan naton ha kinabuhi an pakadangat ha sekular nga mga tumong o pagtagbaw ha mga hingyap han unod. Lugod, kon naghihimo hin desisyon o naatubang hin problema, nagpapakiana kita: ‘Ano daw la an bubuhaton ni Jesus ha sugad hini nga sitwasyon? Ano daw la an karuyag niya nga akon buhaton?’
22 Ha kataposan, aton ginsusubad hi Jesus pinaagi han pagin okupado pirme ha ‘pagwali han maopay nga sumat.’ (Mateo 4:23; 1 Korinto 15:58) Hito liwat nga paagi, ginsusunod han mga Kristiano an susbaranan nga ipinakita ni Jesus, ngan paghihisgotan ha masunod nga artikulo kon paonan-o nira ginbubuhat ito.
Maisasaysay Mo Ba?
• Kay ano nga importante nga magin mapainubsanon an usa nga Kristiano?
• Paonan-o naton mapapatubo an angayan nga panhunahuna ha husto ngan sayop?
• Ha ano nga paagi ginsusubad han mga Kristiano hi Jesus ha pag-atubang ha pagkontra ngan persikusyon?
• Paonan-o nagigin posible nga ‘igsul-ot an Ginoo Jesu-Kristo’?
[Mga Pakiana]
[Retrato ha pahina 7]
Ipinakita ni Jesus an hingpit nga susbaranan han pagpaubos
[Retrato ha pahina 8]
An tagsa nga bahin han pagkinabuhi han Kristiano, upod na an pagsangyaw, nagkikinahanglan hin pagpaubos
[Retrato ha pahina 9]
An diri maopay nga kaliawan puydi himoon ni Satanas nga magin makaruruyag ha usa nga Kristiano
[Retrato ha pahina 10]
An gugma ha aton kabugtoan magpaparig-on ha aton bisan pa han pagkontra