Pagpanalipod ha Aton Kristiano nga Pangirilal-an

“Kamo an akon mga saksi, nasiring hi Jehova.”—ISAIAS 43:10.

 1. Ano nga klase hin mga tawo an gindadara ni Jehova ngada ha iya?

 KON aada ka ha Kingdom Hall, kitaa hin maopay an imo palibot. Hin-o an nakikita mo dinhi hini nga lugar han pagsingba? Bangin nakikita mo an sinsero nga mga batan-on nga namamati hin maopay ha Kasuratanhon nga kinaadman. (Salmo 148:12, 13) Bangin makita mo liwat an mga ulo han pamilya nga nangangalimbasog pagpalipay ha Dios samtang nagkikinabuhi dinhi ha kalibotan nga diri nagpapasidungog ha kinabuhi sugad nga pamilya. Bangin makita mo an hinigugma nga mga may-edad na, nga matinumanon nga nagkikinabuhi uyon ha ira dedikasyon ngadto kan Jehova bisan pa han mga kasakitan tungod ha kalagas. (Proberbios 16:31) An ngatanan nahigugma gud kan Jehova. Ngan malipayon nga iya gindadani hira nga maparig-on an relasyon ha iya. “Waray usa nga sadang makakanhi ha akon,” siring han Anak han Dios, “kon diri pagdad-on han Amay nga nagpakanhi ha akon.”—Juan 6:37, 44, 65.

2, 3. Kay ano nga makuri mamintinar an marig-on nga pagtagad ha Kristiano nga pangirilal-an?

² Diri ba kita nalilipay ha pagin kaupod han katawohan nga inuuyonan ngan binibendisyonan ni Jehova? Kondi, makuri mamintinar an marig-on nga pagtagad ha aton pangirilal-an sugad nga mga Kristiano durante hinin “magpakalilisang nga mga panahon” nga makuri pakibagayan. (2 Timoteo 3:1) Naieksperyensyahan ini labi na han mga batan-on nga ginpadaku ha Kristiano nga mga pamilya. “Bisan kon natambong ako ha Kristiano nga mga  katirok,” siring han usa nga batan-on, “waray ako sigurado nga mga tumong ha espirituwal ngan, ha totoo la, waray ko mapatubo an kalugaringon nga hingyap nga mag-alagad kan Jehova.”

³ An iba, samtang sinsero nga naghihingyap mag-alagad kan Jehova, bangin maulang tungod han duro nga pag-ipit han mga kaupod, kalibotanon nga mga impluwensya, ngan makasasala nga mga hilig. Kon duro an pag-ipit ha aton, bangin hinay-hinay nga mawad-an kita han aton Kristiano nga pangirilal-an. Pananglitan, gintatagad han damu ha kalibotan yana an mga suruklan han Biblia ha moralidad sugad nga daan na o diri na angay ha aton moderno nga kalibotan. (1 Pedro 4:4) Naghuhunahuna an iba nga diri importante an pagsingba ha Dios uyon ha paagi nga iginsusugo niya. (Juan 4:24) Ha surat ni Pablo ha mga taga-Efeso, gin-uunabi niya nga an kalibotan may-ada “espiritu,” o dominante nga disposisyon. (Efeso 2:2) Ito nga espiritu nag-iipit ha mga tawo nga magpahiuyon ha panhunahuna han sosiedad nga diri nakilala kan Jehova.

 4. Paonan-o pinabug-atan ni Jesus an panginahanglan nga aton panalipdan an aton klaro nga pangirilal-an sugad nga mga Kristiano?

⁴ Kondi, sugad nga dedikado nga mga surugoon ni Jehova, nasasantop naton nga magigin peligroso para ha bisan hin-o ha aton—batan-on man o lagas—nga mawad-an han aton Kristiano nga pangirilal-an. An husto nga pagtagad ha Kristiano nga pangirilal-an mahimo igbasar dida la ha mga suruklan ni Jehova ngan ha iya mga ginlalaoman ha aton. Makatadunganon ini tungod kay ginlarang kita ha iya dagway. (Genesis 1:26; Mika 6:8) Iginpapariho han Biblia an aton klaro nga pangirilal-an sugad nga mga Kristiano ha panggawas nga mga panapton, nga iginsusul-ot basi makita han ngatanan. Mahitungod han aton mga panahon, hi Jesus nagpahamangno: “Kitaa, makanhi ako sugad hin kawatan. Bulahan an nag-aagma, ngan nagtitipig han iya mga panapton, bangin hiya maglakat nga hubo, ngan makita nira an iya kaalohan.” a (Pahayag 16:15) Diri naton karuyag nga hukason an aton Kristiano nga mga kalidad ngan mga suruklan han paggawi ngan magpaimpluwensya ha kalibotan ni Satanas. Kon ito an mahitatabo, mawawad-an kita hinin panggawas nga “panapton.” Magigin makasurubo gud ngan makaarawod an sugad nga kahimtang.

5, 6. Kay ano nga importante an karig-on ha espirituwal?

⁵ An marig-on nga pagtagad ha Kristiano nga pangirilal-an nakakaapekto gud ha paagi han pagkinabuhi han usa. Paonan-o? Kon an usa nga magsiringba ni Jehova mawad-an han iya husto nga pagtagad ha pangirilal-an, bangin an resulta maulang hiya ngan waray sigurado nga dadangatan o mga tumong. An Biblia pauro-utro nga nagpapahamangno kontra ha sugad nga pagin maruhaduhaon. “An nagruruhaduha,” nagpahamangno an disipulo nga hi Jakobo, “sugad hin usa nga balud ha dagat nga iginpapalid han hangin ngan nalutaw. Busa diri maghunahuna an sugad nga tawo nga hiya makarawat hin bisan ano nga bagay ha Ginoo; an tawo nga duha an hunahuna, maruhaduhaon ha ngatanan niya nga paagi.”—Jakobo 1:6-8; Efeso 4:14; Hebreo 13:9.

⁶ Paonan-o naton mapapanalipdan an aton Kristiano nga pangirilal-an? Ano an makakabulig ha aton basi mapauswag an aton pagkilala ha aton daku nga pribilehiyo ha pagin mga magsiringba han Gihitaasi nga Dios? Alayon tagda an masunod nga mga paagi.

 Parig-ona an Imo Kristiano nga Pangirilal-an

 7. Kay ano nga mapulsanon an panginyupo kan Jehova nga usisahon kita?

⁷ Padayon nga parig-ona an imo relasyon kan Jehova. An pinakabirilhon nga panag-iya han usa nga Kristiano amo an iya personal nga relasyon ha Dios. (Salmo 25:14; Proberbios 3:32) Kon magtikang kita magruhaduha mahitungod han aton Kristiano nga pangirilal-an, panahon na ito nga usisahon naton hin maopay an kalidad ngan an kahilarom hini nga relasyon. An salmista husto nga nanginyupo: “Usisaha ako, O Jehova, ngan sarihi ako; putlia an akon mga isol ngan an akon kasingkasing.” (Salmo 26:2, NW) Kay ano nga importante an sugad nga pag-usisa? Tungod kay kita mismo diri mahimo magin masasarigan nga mga parausisa han aton gihilarumi nga mga motibo ngan pinakatago nga mga hilig. Hi Jehova la an makakasabot han aton totoo nga pagkatawo—an aton mga motibo, mga panhunahuna ngan mga pagbati.—Jeremias 17:9, 10.

 8. (a) Paonan-o kita magpapahimulos han pagsari ha aton ni Jehova? (b) Paonan-o ka nabubuligan nga mag-uswag sugad nga Kristiano?

⁸ Pinaagi han panginyupo kan Jehova nga usisahon kita, aton ginhahangyo hiya nga sarihan kita. Bangin tugotan niya nga mahitabo an mga sitwasyon nga nagbubuhayhag han aton totoo nga mga motibo ngan kahimtang han kasingkasing. (Hebreo 4:12, 13; Jakobo 1:22-25) Sadang karawaton naton an sugad nga mga pagsari tungod kay naghahatag ito ha aton hin higayon nga ipakita an kahilarom han aton pagkamaunungon kan Jehova. Maipapakita hito kon kita ba ‘hingpit ngan bug-os, waray kakulangan hin bisan ano nga bagay.’ (Jakobo 1:2-4) Ngan samtang nag-aagi hin pagsari, mahimo kita mag-uswag ha espirituwal.—Efeso 4:22-24.

 9. Kay ano nga kinahanglan mapamatud-an naton mismo nga kamatuoran an igintututdo han Biblia? Isaysay.

⁹ Pag-aram basi mapamatud-an mo mismo an kamatuoran han Biblia. An aton pagtagad ha aton pangirilal-an sugad nga mga surugoon ni Jehova mahimo magluya kon waray ito igbasar hin marig-on ha kahibaro ha Kasuratan. (Filipos 1:9, 10) Kinahanglan mapamatud-an han tagsa nga Kristiano—batan-on man o lagas—tubtob nga matagbaw hiya mismo nga an iya tinotoohan amo gud an kamatuoran nga iya hin-agian dida ha Biblia. Ginsagda ni Pablo an mga igkasi-tumuroo: “Proybahi [“Siguroha,” NW] niyo an ngatanan nga mga butang; tipigi niyo an maopay.” (1 Tesalonika 5:21) Kinahanglan masabtan han batan-on nga mga Kristiano nga kaupod han mahadlukon-ha-Dios nga mga pamilya nga diri hira mahimo magin totoo nga mga Kristiano tungod la ha pagtoo han ira mga ginikanan. An amay ni Salomon, hi David, nagsagdon ha iya nga “kilalahon mo an Dios han imo amay, ngan pag-alagara hiya ha hingpit nga kasingkasing.” (1 Kronikas 28:9) Diri igo na nga kitaon la ni Salomon kon paonan-o ginpaparig-on han iya amay an pagtoo kan Jehova. Kinahanglan makilala niya mismo hi Jehova, ngan iya ginbuhat ito. Nanginyupo hiya ha Dios: “Tagi ako yana hin kinaadman ngan hin hibaro, nga ako makahimo paggawas ngan pagsakob ha atubangan hini nga katawohan.”—2 Kronikas 1:10.

10. Kay ano nga diri sayop an tangkod nga pagpakiana nga may husto nga motibo?

¹⁰ An marig-on nga pagtoo iginbabasar ha kahibaro. “An pagtoo tikang ha pagpamati,” siring ni Pablo. (Roma 10:17) Ano an karuyag niya ipasabot? Iginpapasabot niya nga pinaagi han pagkaon ha Pulong han Dios, aton ginpaparig-on an aton pagtoo ngan pagsarig kan Jehova, ha iya mga saad, ngan ha iya organisasyon. An tangkod nga pagpakiana mahitungod han Biblia mahimo magresulta hin masasarigan nga mga baton. Dugang pa, ha Roma 12:2, mababasa naton an sagdon ni Pablo: “[“Pamatud-an niyo ha iyo kalugaringon,” NW] kon ano an maopay ngan karuruyagon ngan hingpit nga kaburut-on han Dios.” Paonan-o naton matutuman ito? Pinaagi han pagkuha hin “husto nga kahibaro ha kamatuoran.” (Tito 1:1, NW) An espiritu ni Jehova makakabulig ha aton nga masabtan bisan an makuri nga mga topiko. (1 Korinto 2:11, 12) Sadang mag-ampo kita para han bulig han Dios kon may mga problema kita ha pagsabot ha usa nga butang. (Salmo 119:10, 11, 27) Karuyag ni Jehova nga masabtan naton an iya Pulong, tumoo hito, ngan sundon ito. Kinakarawat niya an tangkod nga mga pakiana nga may husto nga motibo.

Magin Determinado nga Lipayon an Dios

11. (a) Ano nga kinaiya nga hingyap an mahimo makalit-ag ha aton? (b) Paonan-o kita makakatirok hin kaisog basi makaato ha pag-ipit han mga kaupod?

¹¹ Pangalimbasugi nga lipayon an Dios, diri an tawo. Kasagaran na nga ipinapakilala naton ha usa nga bahin kon hin-o kita pinaagi han pakig-upod ha usa nga grupo. An kada usa nagkikinahanglan hin mga sangkay, ngan nalilipay kita kon kinakarawat kita. Durante han pagin tinedyer—sugad man ha masunod nga bahin han kinabuhi—an pag-ipit han mga kaupod mahimo magin makusog hinduro, nga  nagriresulta hin sobra nga hingyap nga subaron o lipayon an iba. Kondi an mga kasangkayan ngan mga kaupod kasagaran nga diri interesado ha aton kaopayan. Usahay karuyag la nira nga may makaupod hira ha pagbuhat han sayop. (Proberbios 1:11-19) Kon an usa nga Kristiano nadadaog han diri maopay nga pag-ipit han mga kaupod, kasagaran nga diri hiya nagpapakilala kon hin-o hiya. (Salmo 26:4) “Ayaw kamo pagsubad ha paggawi han kalibotan ha iyo palibot,” nagpahamangno hi apostol Pablo. (Roma 12:2, The Jerusalem Bible) Hi Jehova naghahatag ha aton han espirituwal nga kusog nga ginkikinahanglan naton basi maatohan an bisan ano nga pag-ipit ha gawas nga umuyon kita.—Hebreo 13:6.

12. Ano nga prinsipyo ngan ehemplo an magpapakusog ha aton basi magpabilin kita nga marig-on ha pagtoo kon nahidadabi an aton pagsarig ha Dios?

¹² Kon an mga pag-ipit ha gawas nagigin tarhog nga madaot an aton pagtagad ha Kristiano nga pangirilal-an, maopay nga hinumdoman naton nga mas importante gud an aton pagkamaunungon ha Dios kay ha opinyon han publiko o ha mga hilig han kadam-an. Maopay nga prinsipyo an ginsisiring ha Eksodo 23:2: “Diri ka sumunod ha kadam-an ha pagbuhat hin maraot.” Han an kadam-an han kan Kaleb mga igkasi-Israelita nagruhaduha ha abilidad ni Jehova ha pagtuman han Iya mga saad, marig-on nga waray hiya umupod ha hilig han kadam-an. Sigurado hiya nga masasarigan an mga saad han Dios, ngan hura nga ginbendisyonan hiya tungod han iya pagkamarig-on. (Numeros 13:30; Josue 14:6-11) Disidido ka ba liwat nga atohan an pag-ipit han popular nga opinyon basi mapanalipdan an imo relasyon ha Dios?

13. Kay ano nga maaramon nga isumat naton ha iba an aton gintotoohan sugad nga mga Kristiano?

¹³ Magpakilala nga ikaw usa nga Kristiano. An puplunganon nga an pinakamaopay nga depensa amo an pag-una ha pag-atake totoo gud samtang dinidepensahan naton an aton Kristiano pangirilal-an. Ha panahon ni Esra, han ginkontra an matinumanon nga mga Israelita tungod han ira pangalimbasog nga buhaton an kaburut-on ni Jehova, hira nagsiring: “Kami an mga surugoon han Dios han langit ngan han tuna.” (Esra 5:11) Kon apektado kita han mga reaksyon ngan mga pakaraot han magraot nga mga tawo, mahimo kita magin paralisado tungod ha kahadlok. Kon pirme kita mangangalimbasog nga lipayon an ngatanan, magpapaluya ito ha aton pagin epektibo. Salit ayaw kahadlok. Maopay nga pirme mo ipahibaro hin matin-aw ha iba nga usa ka han mga Saksi ni Jehova. Ha matinalahuron kondi marig-on nga paagi, maisasaysay mo ha iba an imo mga prinsipyo, an imo mga tinotoohan, ngan an imo determinasyon sugad nga Kristiano. Ipahibaro ha iba nga determinado ka nga tipigan an hitaas nga mga suruklan ni Jehova ha moral. Ipatin-aw nga diri mo puydi ikompromiso an imo integridad sugad nga Kristiano. Ipakita nga malipayon ka ha imo mga suruklan ha moral. (Salmo 64:10) An pagin naiiba sugad nga matinumanon nga Kristiano magpaparig-on ha imo, magpapanalipod ha imo, ngan magpapagios pa ngani ha iba nga magpakiana mahitungod kan Jehova ngan ha iya katawohan.

14. Sadang ba magpaluya ha aton an pagtamay o pagkontra? Isaysay.

¹⁴ Oo, bangin tamayon o kontrahon ka han iba. (Judas 18) Kon an iba diri maopay an pagkarawat ha imo pangalimbasog ha pagsaysay ha ira han imo mga prinsipyo, ayaw panluya. (Esekiel 3:7, 8) Bisan kon determinado ka, diri mo gud makukombinse an mga tawo nga diri naruruyag makombinse. Hinumdumi hi Paraon. Bisan an peste o milagro—bisan an kamatay pa ngani han iya suhag nga anak nga lalaki —waray makakombinse kan Paraon nga hi Moises representante ni Jehova. Salit, ayaw tuguti an kahadlok ha tawo nga makaparalisa ha imo. An pagsarig ngan pagtoo ha Dios makakabulig ha aton nga madaog an kahadlok.—Proberbios 3:5, 6; 29:25.

Mahibaro Tikang ha Naglabay, Magparig-on Para ha Tidaraon

15, 16. (a) Ano an aton espirituwal nga panurundon? (b) Paonan-o kita magpapahimulos tikang ha pamalandong han aton espirituwal nga panurundon pinaagi han paggamit ha Pulong han Dios?

¹⁵ Higugmaa an imo espirituwal nga panurundon. Pinaagi han paggamit ha Pulong han Dios, magpapahimulos an mga Kristiano tikang ha pamalandong han ira birilhon hinduro nga espirituwal nga panurundon. Upod hini nga panurundon an kamatuoran han Pulong ni Jehova, an paglaom ha kinabuhi nga waray kataposan, ngan an kadungganan ha pagrepresentar ha Dios sugad nga mga parasamwak han maopay nga sumat. Nakikita mo ba an imo bahin kaupod han iya mga Saksi, dida ha may pribilehiyo nga grupo han mga tawo nga ginsugo ha pagsangyaw han Ginhadian, an nagluluwas-han-kinabuhi nga buruhaton? Hinumdumi, waray iba kondi hi Jehova an nagsiring: “Kamo an akon mga saksi.”—Isaias 43:10.

¹⁶ Puydi mo igpakiana ini ha imo kalugaringon: ‘Mationan-o kabirilhon ha akon inin espirituwal nga panurundon? Pinabibilhan ko gud ba ito hin tinuod nga tungod hito an pagbuhat han kaburut-on han Dios amo an pinakasiyahan ha akon kinabuhi? Marig-on gud ba an akon apresasyon hito nga ito an nagpapakusog ha akon basi atohan an bisan ano nga pagsulay nga bangin magin hinungdan han kawad-i ko hini nga panurundon?’ An aton espirituwal nga panurundon magpapagios liwat ha aton nga  magkaada hilarom nga pag-abat hin espirituwal nga seguridad nga mahimo mapahimulosan dida la ha sulod han organisasyon ni Jehova. (Salmo 91:1, 2) An pagrepaso han makatirigamnan nga mga hitabo tikang ha moderno nga kasaysayan han organisasyon ni Jehova magpapakita ha aton nga waray tawo o butang nga makakapoo han katawohan ni Jehova dinhi ha tuna.—Isaias 54:17; Jeremias 1:19.

17. Ano pa an iba nga ginkikinahanglan gawas han pagsarig la ha aton espirituwal nga panurundon?

¹⁷ Syempre, diri kay madepende la kita ha aton espirituwal nga panurundon. An kada usa ha aton kinahanglan magpatubo hin duok nga relasyon ha Dios. Katapos pangalimbasogan hinduro ni Pablo an pagparig-on han pagtoo han mga Kristiano ha Filipos, hiya nagsurat ha ira: ‘Busa, mga hinigugma ko, sugad nga nagmasinunuron kamo pirme, diri la ha akon atubangan, kondi labi pa gud niyan nga waray ako dida, talinguhaon niyo an pagbuhat para ha iyo kalugaringon nga kaluwasan nga may kahadlok ngan pangurog.’ (Filipos 2:12) Diri kita makakasarig ha iba para han aton kaluwasan.

18. Paonan-o an Kristiano nga mga buruhaton makakadugang ha aton pagtagad ha Kristiano nga pangirilal-an?

¹⁸ Makigbahin ha Kristiano nga mga buruhaton tubtob ha mahihimo. Ginsisiring nga an “trabaho makusog gud an impluwensya ha pangirilal-an han usa ka tawo.” An mga Kristiano yana ginsusugo nga buhaton an importante nga buruhaton nga pagsangyaw han maopay nga sumat mahitungod han natukod na nga Ginhadian han Dios. Hi Pablo nagsiring: “Tungod kay ako apostol ha mga Hentil, ginhihimaya ko an akon pagkaministro.” (Roma 11:13) An aton pagsangyaw nga buruhaton nagpapakilala ha aton nga bulag kita ha kalibotan, ngan an aton pakigbahin hito nakakadugang ha aton Kristiano nga pangirilal-an. An pakigbahin ha iba pa nga teokratiko nga mga buruhaton tubtob ha mahihimo, sugad han Kristiano nga mga katirok, mga programa ha pagtukod hin mga lugar han pagsingba, mga pangalimbasog ha pagbulig ha mga nanginginahanglan, ngan an iba pa nga buruhaton nga may kalabotan hini, magpapahilarom han aton pagtagad ha aton pangirilal-an sugad nga mga Kristiano.—Galasia 6:9, 10; Hebreo 10:23, 24.

An Matin-aw nga Pangirilal-an Nagriresulta hin Totoo nga mga Bendisyon

19, 20. (a) Ano nga mga kapulsanan an personal nga napahimulosan mo na tungod ha pagin usa nga Kristiano? (b) Ano an naghahatag ha aton hin basihan para ha aton totoo nga pangirilal-an?

¹⁹ Pamalandonga hin madaliay an damu nga mga bendisyon ngan mga kaopayan nga napapahimulosan naton tungod kay totoo nga mga Kristiano kita. Pribilehiyo naton nga personal nga makilala kita ni Jehova. Hi propeta Malakias nagsiring: ‘Hira nga nahadlok kan Jehova nagyinakanay an usa kag usa; ngan hi Jehova namati, ngan usa nga basahon ha panumdoman an iginsurat ha iya atubangan, para ha ira nga nahadlok kan Jehova, ngan naghuhunahuna han iya ngaran.’ (Malakias 3:16) Mahimo kita tagdon han Dios sugad nga iya mga sangkay. (Jakobo 2:23) An aton kinabuhi naadurnohan han matin-aw nga pagsabot ha katuyoan, han hilarom nga kahulogan, ngan han maopay, mabungahon nga mga tumong. Ngan iginhatag na ha aton an paglaom ha waray kataposan nga tidaraon.—Salmo 37:9.

²⁰ Hinumdumi nga an imo totoo nga pangirilal-an ngan pagin birilhon nakadepende ha pagpabili han Dios ha imo pagin takos, diri ha kon ano an bangin ginhuhunahuna han iba nga mga tawo mahitungod ha imo. Bangin hukman kita han iba sumala ha diri husto nga mga suruklan han tawo. Kondi an gugma ngan personal nga interes han Dios naghahatag ha aton hin totoo nga basihan para ha aton pagin takos—hiya an nagtatag-iya ha aton. (Mateo 10:29-31) Tungod hito, an aton mismo gugma ha Dios makakaghatag ha aton han gimaopayi nga pagkilala kon hin-o kita ngan han matin-aw nga giya ha aton pagkinabuhi. “Kon an usa ka tawo nahigugma ha Dios, amo ini hiya an kinikilala niya.”—1 Korinto 8:3.

[Footnote]

Nahinunumdoman Mo Ba?

• Kay ano nga importante nga panalipdan han mga Kristiano an ira espirituwal nga pangirilal-an?

• Paonan-o naton mapaparig-on an aton Kristiano nga pangirilal-an?

• Kon pakianhan kita kon hin-o an aton lilipayon, ano an mabulig ha aton ha paghimo hin husto nga desisyon?

• Paonan-o an marig-on nga pagkilala kon hin-o kita mahimo makaapekto ha aton tidaraon sugad nga mga Kristiano?

[Mga Pakiana]

[Mga Retrato ha pahina 21]

An aton pakigbahin ha Kristiano nga mga buruhaton tubtob ha aton mahihimo makakadugang ha aton Kristiano nga pangirilal-an